السبت، 25 مايو 2013

هل يشفع الحب؟... الحلقة 11

الحلقة 11
"والمفروض انى اصدق ان كل اللى حصل علشان الهيافة دى"
اتفاجئت عالية
"يعنى انت مش مصدقنى؟"
"بقولك ايه ياعالية... انا مش من اول يوم هلاقى مشاكل بينكم... مهما حصل متنسيش ان دى امى واللى يرضيها يرضينى واللى يزعلها يزعلنى"
"والله ما زعلتها...ده هى اللى طردت هدير"
"هى ليها ف بيت ابنها انما صاحبتك ليها ايه عندنا"
عالية بتبص له كأنها شايفة واحد تانى...كمل طه كلامه
"قومى معايا تروحى تراضى ماما وتخلصى المشكلة دى وهدير اللى هتعمل مشاكل... بلاش منها"
سكتت عالية وهى بتبص له... شافت علامات الغضب على وشه
"ايه...مش هتقومى معايا"
"حاضر يا طه...هقوم معاك واجى لمامتك اراضيها علشان خاطرك مش علشان انا غلطت"
قام طه وقف
"يالا"
"ممكن اطلع اغير هدومى"
"وكده ماله؟"
"مالوش ...عايزة اغير هدومى ممكن"
"متتأخريش"
خرجت عالية بسرعة... تلحق دموعها اللى هتنزل

فاتن قاعدة ف الجنينة بعيد...وشافت عالية وهى طالعة بسرعة من المكتب...راحت فاتن لطه..
"ايه ياطه اللى حصل...عالية مالها"
"مفيش ...طلعت تغير هدومها علشان تيجى معايا لماما"
سكتت ...مترددة...تتكلم وتبقى بتدخل ولا تسكت علشان متتدخلش
حسمت ترددها بسؤاله
"انت شايف مين غلطان يا طه؟"
"عالية طبعا"
"ليه"
"ليه ايه؟؟ هى محكتلكيش"
"لا ...حكت انا بس عايزة اعرف غلطانة ليه"
"هو يصح تقابل ماما وحش وترد عليها وتقولها ان ده بيتى وبيت اختى على هدير وهدير تزعق لنرمين"
"هدير وعالية يقولوا كده ويعملوا كده...دول اغلب م الغلب"
"قصدك ايه يافاتن...ماما هتكذب يعنى"
حاولت فاتن اختار كلامها كويس وردت
"بص يا طه...انت مكنتش صغير ساعة ما انا اتجوزت...كنت واعى وشايف اللى بيحصل...لما كانت مامتك تشتكى لبابا منى كانت بتقول المواقف بالظبط ولا كانت بتزود شوية من عندها وكنت انت بتشهد الحق دايما"
سكت طه بيفتكر ويفكر...كملت فاتن
"خليك حقانى يا طه ومتظلمش عالية"
                        ********************

عالية اول ما دخلت اوضتها ف الدار
قعدت تعيط... عياط بحرقة وهى بتكلم ربنا
"يارب... بعد ماقلت خلاص الدنيا ضحكت لى...اتظلم كده... يارب انت شايف انى مغلطتش...حنن قلب طه عليا"
بدأت تهدا... غيرت هدومها بسرعة .. راحت غسلت وشها ونزلت لطه
                      *********************

طه وعالية ف العربية...ساكتين...محدش فيهم اتكلم
لكن كل واحد جواه كلام كتير...مقالش منه ولا كلمة
ركن طه قبل المحل بشوية... نزلت عالية ونزل طه
بعد ما قفل العربية...لف مشى جنبها...مسك ايدها
التفتت له عالية...كانت فاكراه مخاصمها
الامان اللى حست بيه لما مسك ايدها...طمنها وهما داخلين المحل

اول ما دخلوا...كانت نرجس قاعدة ع المكتب...لما شافتهم كشرت زيادة
"ماماااا"
نرجس"عايز ايه...ايه اللى جابها هنا بعد ما طردتنا"
عالية"انا طردتكم؟؟ ازاى وهو بيتك"
نرجس"انتى مشفتيش وشك اتقلب ازاى اول ما شفتينا...ولا صاحبتك بتزعق لبنتى... على اخر الزمن بنات الشوارع هيعلموا بنات الناس الادب"
طعنة تلقتها عالية من نرجس...وجعتها...الالم بان ف عينيها وهى بتبص لطه تستنجد بيه
طه مش متوقع الكلمة القاسية دى... وجعته زى ما وجعت عالية
نرجس ندمت لما انتبهت ان كلامها ف وجود طه

نرجس"انا طبعا مقصدكيش انتى ... انا اقصد صاحبتك ان مالهاش حق تيجى بيتنا وتعيب فينا"
طه"موضوع صاحبتها ده انتهى ياماما خلاص... لو عايزة تساعدى عالية ف الفرش روحى انتى وهى بس"
نرجس"يعنى ايه انا وهى بس...قصدك اختك لأ...مليتك من جيهة اختك"
عالية ساكتة مش عارفة تتكلم ولا تدافع عن نفسها
طه"عالية متكلمتش خالص بدليل انها كانت جاية تراضيكى... بس اللى انا شايفة انك عايزة تطلعيها غلطانة وخلاص"
نرجس باستعطاف"انا يا طه... الله يسامحك يابنى"
طه"دلوقتى انا مش عايز كتر مشاكل من اولها...انا مش كل يوم هاجى اخلص خناقات...انتم الاتنين ايه اللى يرضيكم"
نطقت عالية بتلقائية صادقة
"انا مش عايزة غير رضاكم"
طه بص لنرجس مستنى ردها
ردت بتصنع البراءة وهى بتبص لعالية من تحت لتحت
"وانا هعوز ايه م الدنيا غير انى اشوف ولادى مرتاحين وبيحبوا بعض ومحدش يفرقهم"

طه"طيب عايزانى ف حاجة"
نرجس"رايح فين"
طه"كام مشوار كده هجيب حاجات مع عالية واوصلها واجى"
عالية وهى بتسلم على نرجس
"انا اسفة لو لسه زعلانة منى ف حاجة"
هزت نرجس راسها ببرود وابتسامة مصطنعة

خرجت عالية ورا طه...فتح لها العربية وقعدت ولف جنبها

وهما ف العربية... عالية بتبص قدامها...طه بيبص لها نظرات مختلسة بطرف عينيه
"على فكرة ...انتى النهاردة كبرتى ف نظرى اوى"
"ليه"
"انك استحملتينى وانا متنرفز...انا عارف انى جيت عليكى شوية بس لازم تعرفى ان دى امى ومقدرش ازعلها وخصوصا انها وافقت على جوازنا وساعدتنى كمان...مش معقول يبقى جزائها انى اجى معاكى ضدها"
"وانا مش ممكن اساعدك على انك تغضبها ابدا"
"علشان خاطرى متزعليش منها على اى كلمة... متزعليش الا منى"
"وانا مقدرش ازعل منك ياطه"
كانوا واقفين ف اشارة... قرب منها وباس راسها
"طه...الناس"
"واحد بيصالح مراته...محدش له عندنا حاجة"
ضحكت عالية ...ضحكة فرحة بانها حست ان اللى معاها دلوقتى طه اللى حبته مش اللى جالها وهو متضايق وبيكدبها

فتحت الاشارة...ومشى طه
"بصى يا عالية... احسن حاجة متتقابليش انتى وماما الا لو انا معاكم"
"ياريت"
"ياريت ليه"
"بصراحة بخاف منها"
ضحك طه"ليه بعبع"
"لا شديدة قوى ومبعرفش اتكلم معاها...بحس ان اى كلمة هقولها هبقى غلطانة فيها"
"لا متخافيش... بقولك ايه... مش كفاية علينا اسبوع تخلصوا البيت بقى ونتجوز"
عالية بفرحة"ياريت...انا نفسى يبقى لى بيت"
طه"خلاص... ومعلش اى حاجة ماما تعملها ف البيت سيبيها براحتها ولما نستقر ابقى غيرى اللى انتى عايزاه"
"حاضر... بس ممكن طلب"
"اطلبى"
"هدير"
اتغيرت ملامح طه... وقَلَب وشه لما جت سيرتها
"ياطه انا مليش غير هدير...احنا مع بعض ع الحلوة والمرة من يوم ماوعينا ع الدنيا ...هى كل اهلى وانا كل اهلها... مقدرش ابعد عنها وهى اكيد هتبقى محتاجالى الايام الجاية...انت عارف انها حامل ومفيش غيرى يقف جنبها وزى ماهقف جنبها هى كمان مش هتسيبنى لما احتاج لها... انا مليش غيرها ارجوك ياطه متحرمنيش منها لانك لو صممت انا مش هقدر اقولك لأ بس تبقى بتقهرنى"
صوتها كان مخنوق بدموع لمعت ف عينيها وقت كلامها عن هدير
بدأ طه يلين لما حس بيها
"خلاص ياعالية...خلاص"
سألته بعد فهم"خلاص ايه"
"انا مقلتش قاطعيها ... بس بلاش اليومين دول ف الفرش علشان ماما وميحصلش مشاكل ...ماشى"
فرحت عالية انها مش هتبعد عن هدير
                            *********************

فاتن داخلة على ميار اوضتها
"هااا...خلصتى"
ميار وهى بتستعرض فستانها وبتلف قدام فاتن
"حلو؟؟"
"قمر"
"كان نفسى ف فستان سواريه مش فستان عادى"
"هنجيب السواريه على ساعة ونرميه... وبعدين ده مش فرح كبير يعنى... دى زفة بسيطة كده هيتزفوا ويتصوروا ويروحوا"
"نفسى اشوف عالية وهى عروسة"
فاتن وهى خارجة من الاوضة
"طب يالا علشان تروحى تشوفيها"

دخلت فاتن اوضتها...وهى بتصحى عبدالحميد بصوت واطى
"عبد الحميد...عبد الحميد"
"اممممم"
"مش جاى الفرح معانا برضه"
"لا عايز انام"
"طب احنا نازلين"
"فين ميار"
"عايزها؟"
"اه"
نادت فاتن على ميار
دخلت لهم ميار
"نعم ياماما"
"كلمى ابوكى"
اتعدل لها عبد الحميد وبص لها شوية
"نعم يا بابا"
"مفيش كنت عايز اشوفك قبل ماتنزلى"
بصت ميار لفاتن مستغربة
عبدالحميد"تعالى ياميار"
فتح حضنه ليها...قربت منه ميار حضنته
"انتى زعلانة منى علشان زعقتلك امبارح وقلت لك الاكل شايط"
"لا يابابا...ماهو كان شايط معاك حق"
فاتن"يالا يا ميار...عايز حاجة يا عبده"
عبدالحميد"متتأخروش...خدى علشان تركبوا"
سحب عبد الحميد المحفظة من تحت المخدة...طلع منها 20 جنيه
بيناولها لفاتن...وقعت الفلوس من ايده ع السرير
"ايدى منملة شكلى كنت نايم عليها"
اخدت فاتن الفلوس
"شكرا يا عبده...مش هنتأخر ساعتين بالكتير"
                       ************************

عالية لابسة فستان الفرح عند الكوافيرة...بتبص لنفسها ف المراية مش مصدقة نفسها
هدير جنبها..نظراتهم اتقابلوا ف المراية...ابتسموا لبعض بحب

دخلت نرجس وهى مبهرجة زى عروسة المولد وشخطت ف عالية
"انتى هتسيبينا ملطوعين كتير...يالا"
خافت عالية ...وردت بسرعة
"خلاص ...خلصت اهو"

خرجت عالية ووراها هدير...واول عينيها ما جت فى عينين طه
نسيت نرجس وسخافتها ونسيت كل اللى حواليها

طه اول ما شاف عالية... حس انه اول مرة يشوفها
اتقدم ليها وهو مبتسم بخطوات سريعة
عالية بتتقدم ناحيته... عينيهم بتتكلم من غير صوت
واول ما مسك ايديها... قالت له بكل ثبات وصدق بهمس
"بحبك اوى"
مكنش سامع غير صوتها رغم كل الاصوات اللى حواليه
قرب من ودنها
"انا بحبك اكتر"
ابتسمت بفرحة وهى بتبص له ف عينيه

مصور الفيديو بيصورهم
ومصور الفوتوغرافيا بيلقط ليهم صور وهما مش شايفين غير بعض

هدير واقفة مع فاتن وميار... فرحانين بيهم وليهم

نرجس واقفة مع مها ونرمين
مها"انا مش عارفة عاجبه فيها ايه"
نرمين بتضحك"دول ف دنيا تانية خالص"
نرجس متغاظة...راحت ناحيته بِ غل
شدت طه ناحيتها وكلمته ف ودنه
"ايه مش قادر تصبر لما تروحوا...مش تحترموا نفسكم شوية"
صوتها كان مسموع لعالية... حست بالاحراج ومبصتش ناحية طه تانى لحد الزفة ما خلصت
                   **********************

ميار داخلة سابقة فاتن...فاتن بتدخل وراها وبتقفل الباب
"عقبالك ياميار"
"انا نفسى ف فرح كبيييير ياماما"
"مش بشكل الفرح ولا مكانه...بالراجل اللى هتعيشى معاه عمرك كله"
"معاكى حق...هغير هدومى واجى نرغى شوية"
"طيب "

دخلت فاتن اوضتها تغير هدومها
فتحت النور وهى عارفة ان عبد الحميد هيزعقلها علشان فتحت النور وهو نايم

عبد الحميد مزعقش...بصت عليه حست انه معووج وهو نايم
قربت منه وهى قلقانة
"عبد الحميد... عبد الحميد"
مردش عليها... بدأت تهز فيه وتعلى صوتها
"عبد الحمييييد"
جت ميار تجرى على صوتها...وقفت ع الباب
"ماله بابا؟؟"
فاتن بترد عليها بفزع وهى بتهز ايده
"مبيتحركش ومبيردش عليا"



هناك 37 تعليقًا:

  1. حلوة جدااااا بجد
    بس مش حرام جوز فاتن اول ما يبتدى يتعدل معاهم يموووت كدا
    :)

    ردحذف
    الردود
    1. ممكن ميكونش مات ممكن يكون في غيبوبه مش اكتر
      ولو مات المؤلف يبقي عازو كده عشان القصه تحلو
      يسلملو يادينا

      حذف
    2. أزال المؤلف هذا التعليق.

      حذف
    3. ماهو اتعدل عشان حاسس انه خالص

      حذف
    4. ايوه هو اتعدل علشان كده

      حذف
  2. ماات عبد الحميــدد؟! :D :S

    ردحذف
  3. ناااااااااااااااااااااااااايس يادينا

    ردحذف
  4. و الله أول ما لاقيت تصرفات عبد الحميد غير المبررة في وسط الأحداااث كدة عرفت على طول انه هيموووت , بس مش فاهمة ايــه تأثير موته ؟
    و برضه موقف طه و عالية بعد ما خرجت من الكوافير حاسة انه مبالغ فيه أوي بصراحة مش عارفة ليه !!!

    ردحذف
  5. حلقه جامده فحتتتتتتتتتتتتت تسلم ايديك

    ردحذف
  6. حلووووووووووووووووووووووووووووووووووووووووووة

    ردحذف
  7. جميلة ربنا يسعدهم ويسعدك وتكملي القصة بئا :D

    ردحذف
  8. عبد الحميييييييييييييييييد
    وانا اقول ليه اتغير اتاريه يا عيني ....
    ولا بلاش اسبق الاحداث يارب اكون غلطانه

    ردحذف
  9. حلوه أوي يا دينا تسلم أيدك =))

    والله كان باين كده ان عبد الحميد فيه حاجه مش مظبوطه

    شكله هيمووووووت او هيدخل في غيبوه او يعيا جااامد
    عشان يتغير ويتعظ

    بس الحلقه حلوه اووووي وموقف طه وعاليا أحلي حاجه في الحلقه <3

    ردحذف
  10. حلوه اوي الحلقه ي دينا تسلم ايديك حبيبتي

    ردحذف
  11. Ana 4yfa en mo2f 3lyaa w 6ha da mo2f 6by3y byn ay etnyan mtgwzyan ... w kman l2n 3lyaa kant 2oal mra t2oal l 6ha enha bt7bo

    ردحذف
  12. جميلة اوى الحلقة بس ممكن الحلقة تطول شوية

    ردحذف
  13. تحفه يا دينا ايوا كده بقى :)

    ردحذف
  14. -الحلقه فظييييييييييييعه يا دينا تسلم ايييييديك

    ردحذف
  15. =) feen el7l2a el12 ?! please 3izaha

    ردحذف
  16. جميلة اوووووووووووووووووي يا دينا تسلم ايدك :)

    ردحذف
  17. جمييييييييييييييييييييلة :/ بس تصدقي هضايق لو مااااااااااااات

    ردحذف
  18. يعينىىىىىىىىىىىىىى عبحميد هيموت ليييييييه كده

    ردحذف
  19. جميل اووووووووووووووووى
    شكل عبد الحميد هيموت يا رب لا

    ردحذف
  20. جميله جدا تسلم ايدك

    ردحذف
  21. la2 7aram ymot bas gamila awiiiii

    ردحذف
  22. جميلة جداااااااااا النهارده

    ردحذف
  23. حلوة اوي..تسلمي ^_^

    ردحذف
  24. انا من المتابعين الصامتين بس مش القصد انى معلقش على كتاباتك الرائعه انا قرات كل قصصك على فكره وكلهم احلى من بعض بس هو الوقت والبيت بيخلونى اقرا واطلع اجرى هههههههههه

    ردحذف
  25. رووووووووووووووووعه

    ردحذف
  26. howa mafesh 7ala2a wala eah ?

    ردحذف
  27. الاخداث حلوة اوي بس طولي الحلقه حبه ممكن؟؟

    ردحذف
  28. احلى حاجه كانت فى الفرح البسيط كانت عاليه وطه كان الحب مصيطر على كل حاجه

    "manar"

    ردحذف
  29. أزال المؤلف هذا التعليق.

    ردحذف
  30. انا قلبي كان حاسس ان عبد الحميد هايجرى له حاجه

    ردحذف

قول رأيك بلاش تقرا وتقفل من سكات...ارائكم تهمنى