الخميس، 2 مايو، 2013

ليست عذراء... الحلقة 15

الحلقة 15
مايا قاعدة ف اوضتها..دخلت لها ايمان
"حبيبتى صاحية"
"اه ياعمتى...نزلتى امتى مش طلعتى تنامى"
"بصى بقى... بعد ماخلاص طلعت ع السرير وهنام...حسيت انى عايزة اتكلم معاكى ولو استنيت للصبح ماما بتبقى قاعدة معانا وساعات حياة بتنزل مش هعرف اتكلم معاكى"
"ايه ياعمتى...فيه سر ولا ايه"
"انا ملاحظة كده كلام كتير بينك وبين نادر...تليفونات ونت واول ماجه انتى اول واحدة كلمك...ده حتى مراحش لامه"
"عادى ...شغل"
"عليا يا مايا... قوليلى ايه الحكاية"
"بصى...هو النهاردة لما جه اخدنى"
"هااا...ايه؟"
"كلامه وتلميحاته كانت زيادة عن كل مرة"
"زيادة؟"
"اه...دايما لما بيكلمنى ع النت او التليفون يقعد يحكى لى عن حياته وعن عيشته وانه مش مرتاح وكده"
"وانتى ؟"
"انا بحكى عادى... ماهو اكتر واحد بيسأل عليا بعدك ياعمتى"
"وبعدين"
"بس النهاردة لما قعد يلمح بقيت اغير الموضوع واجيب سيرة حاجة تانية"
"بصى يا مايا... انتى لسه صغيرة يعنى كده كده لازم هتتجوزى...بس انا بقول فارس اولى علشان بنتكم"
"ياعمتى لا فارس ولا نادر ولا اى راجل خلاص كفاية"
"كفاية ايه هتقعدى كده"
"اه... هربى بنتى واشتغل مع بابا وعندى طموح كبير اوى انى انجح ف شغلى الجديد"
"والجواز والاسرة"
"الاسرة ربنا يخليكوا ليا...انما الجواز... بصى ياعمتى... مبقتش متقبلة اى راجل ف حياتى"
"بس هتحتاجى وجود راجل ف حياتك"
"لما ابقى احتاج ابقى افكر...انا دلوقتى كل اللى بفكر فيه بنتى اللى مستنياها وشغلى اللى مستنينى"
"ربنا يقدم اللى فيه الخير"
                       **********************

تانى يوم... مايا قامت م النوم على صوت التليفون
"الو... صباح النور... لا صحيت خلاص... لا مش قادرة اجى الشركة النهاردة...انت روحت بدرى كده...وبابا معاك؟... لا عايزة ارتاح النهاردة... ربنا يسهل بكرة ...مع السلامة"

قامت مايا بتثاقل...خرجت م الاوضة
شافت ايمان وجدتها ف المطبخ
مايا"صباح الخير"
الجدة"مساء النور ياختى"
ايمان"صباح النور يامايا... هحضرلك الفطار لحد ما تخلصى الحمام"
                   
مايا قاعدة بتفطر... نزلت حياة وقعدت جنبها ومدخلتش المطبخ
"ازيك يا مايا"
"الحمدلله ياعمتى"
"الا قوليلى...انتى امبارح نزلتى مع مين"
"مع مين ازاى؟"
"حد جالك بعربية؟"
مايا بتسيب الاكل اللى ف ايدها
"اه ياعمتى...نادر شريكنا ف الشركة كان جاى م السفر وعلى فكرة بابا عارف لانى كنت رايحة له"
حياة بقلة حيلة
"بلاش يا مايا تخلى حد يتكلم عليكى وعلينا...توفيق شافكم امبارح وكان منظركم وحش...متنسيش انك متطلقة"
مايا وهى بتقوم بعد ما اتضايقت من كلام عمتها
"مش ناسية"
                          ******************

مايا ف اوضتها...بتدخل عليها ايمان
"قومى يامايا...ابوكى ونادر هنا"
"نادر؟"
"اه...قومى لحد ما نحضر الغدا"
خرجت ايمان من الاوضة...قامت مايا غيرت هدومها وخرجت

سلمت على نادر وقعدت معاهم هو وباباها
فؤاد"احنا اتفقنا اننا نعمل الافتتاح يوم الجمعة بعد الجاى...ايه رايك"
مايا"كويس"
فؤاد"هنسافر انا ونادر شرم والغردقة بعد بكرة كام يوم ونرجع...لو كنتى تقدرى تيجى معانا كنتى جيتى"
مايا"لا لما اولد ابقى براحتى"
نادر"طيب ع الاقل تعالى الشركة بكرة فيه حاجات عايزك تعرفيها"
مايا"حاضر"

صوت ايمان
"يالا...الغدا جاهز"
                     *********************

فارس راجع بعد الاجازة وكله اشتياق لمايا اكتر من اى حد تانى
اول ما نزل من العربية اللى جاى بيها\
نزل الشنط ... فتح الباب الخارجى
طلع السلم بسرعة لحد بيت الجدة...ودخل

ايمان قاعدة مع الجدة
ايمان"فارس...حمدالله ع السلامة"
راح سلم عليها وبعدين على جدته
فارس"الله يسلمكم"
الجدة"كده ياولا ولا تسلم عليا قبل ماتسافر"
فارس"معلش يانينة كنت مستعجل وكنا بالليل"
فارس بيدور بعنيه على مايا...وسأل عليها
"هى مايا نايمة ولا ايه؟"
ايمان"مايا ف الشركة... اصل هيفتتحوها قريب"
فارس بخيبة امل
"وصحتها عاملة ايه؟"
ايمان"اهى شوية تعبانة وشوية كويسة...ربنا يهون بالشهرين الفاضلين"
فارس"ربنا يهون...اما اطلع زمان ماما مستنيانى"
ايمان"اه ياعينى مستنياك بقالها كام يوم...اطلع لها بسرعة"
                      **********************

فارس داخل البيت...اول ما سمعت حياة صوت الباب
قامت تهرول ناحيته
"ياحبيبى يا ابنى...وحشتنى يا ضنايا"
تحضنه حياة بكل حب وحنان
"وحشتينى ياماما...عاملة ايه"
وييجى توفيق بلهفة على صوت حياة
"حمدالله ع السلامة يا فارس"
يسلم عليه فارس ويحضنه
"وحشتنى يا بابا...ازى صحتك"
حياة"انا عاملالك كل الاكل اللى بتحبه... ثوانى الاكل يكون جاهز...شهرين كتير اوى يافارس... بلاش كل الغيبة دى"
يبتسم لها فارس من غير ما يرد...وتكون هى راحت ع المطبخ
                      ***********************

مايا وفؤاد راجعين بالليل ونادر بيوصلهم
مايا نزلت م العربية... وفؤاد من جنب نادر
نادر"7 الصبح هعدى عليك...تمام"
فؤاد"تمام...هكون جاهز... مع السلامة"

تمسك مايا ف ايد فؤاد وهما داخلين البيت
اول ما تدخل تفوجئ بفارس قاعد مع ايمان

فارس يقوم اول ما يشوفهم...يسلم على فؤاد وعينيه على مايا
مايا واقفة مكانها...بعد ما سلم فارس على فؤاد...سلم عليها
"ازيك يامايا...وازى صحتك"
"الحمدلله...انت عامل ايه؟"
"كويس"
ايمان"مالك وشك مصفر ليه كده يا مايا"
مايا وهى بتقعد بتقل
"مفيش حاسة بهبوط بس"
فارس بلهفة
"من ايه؟؟ وليه ساكتة طيب مرحتيش للدكتور ليه"
مايا بتضحك
"انا لو روحت للدكتور كل ما احس بحاجة مش همشى من عنده"
فارس وهو بيقعد
"انتى تعبانة للدرجة دى"
ايمان"هو الضنا بييجى بالساهل يا ابنى"
فؤاد وهو قاعد...بص ف الساعة
"طب هقوم انام شوية...معلش يافارس عايز اقعد معاك بس مسافر الصبح"
فارس"لا براحتك ياخالى...انا قايم"
ايمان"تلاقى حياة نايمة ...استنى لما تتعشى مع مايا وفؤاد"
فؤاد"لا متعمليش حسابى انا تعبان ونفسى انام...تصبحوا على خير"

دخل فؤاد اوضته... ودخلت ايمان المطبخ
فارس ومايا قاعدين مع بعض... مايا قاعدة ساندة ضهرها وراسها على الكنبة وحاطة ايدها على بطنها
فارس بيبص لها بحب
"وحشتينى يا مايا"
مايا معرفتش ترد... ترد باحساسها ولا بعقلها
"وانت كمان يافارس"
فارس بفرحة
"بجد؟؟ وحشتك"
"انت ليه مش مصدق انك غالى اوى عندى"
"غالى؟؟ بس انا بحبك"
لحظات تردد ...ودمعت مايا
"وانا حبيتك يافارس... وكنت كل ما ليا ف الدنيا وقلت ربنا عوضنى عن كل احساس افتقدته ...علشان كده صدمتى فيك كانت على قد حبى ليك واكتر"
"احنا فيها... نرجع يامايا"
"مينفعش"
"ليه"
"مبقتش آآمن على نفسى معاك"
"انا؟؟"
"للاسف ايوه... انت نسيت انت عملت فيا ايه"
"مش عايزة تنسى ابدا"
"عايزة انسى...بس مش قادرة..والله ماقادرة"
"انتى عارفانى كويس... انا عمرى كنت وحش معاكى"
مايا بتمسح دموعها
"لآ... وده اللى صدمنى اكتر...حسيت ان كتب الكتاب حولك واحد تانى الكام ساعة اللى كنت فيهم على ذمتك كنت واحد تانى معرفوش... واضح ان مالناش نصيب مع بعض يافارس ...خلينا كده محافظين على عشرة زمان علشان مستقبل بنتنا...مش اكتر من كده"
"مفيش فايدة؟"
"غصب عنى... مش قادرة انسى الضرب ولا تشكيكك فيا ولا فضيحتك ليا"
"مش عايزة تسامحينى ليه...انا قدرت اللى حصلك ومبتكلمش فيه"
"متفكرنيش الله يخليك...مش عايزة افتكر"

ايمان بتحط العشا
"يالا ياولاد"
بصت عليهم شافت مايا بتعيط...قربت منهم
"فى ايه؟"
فارس وهو بيقوم"مفيش ياخالتى...مفيش فايدة"
                     ********************

فارس داخل البيت...النور مطفى...دخل على اوضته
قعد على طرف السرير...متضايق

دخل له توفيق...فتح النور وجاب كرسى وقعد قصاده
"مالك يافارس"
"مفيش يابابا"
"قابلت بنت خالك؟"
"اه؟"
"وكان معاها شريكهم برضه؟؟"
بص له فارس باستغراب
"شريكهم؟"
"اومال ايه اللى مضايقك كده؟"
"فهمنى بس يابابا ايه حكاية شريكهم دى"
"قريب ممدوح اللى مشاركهم ف الشركة اللى بيفتحوها...على طول قاعد عندهم تحت يا اما مايا خارجة داخلة معاه وفكرت اتكلم بس مسكت نفسى بالعافية وقلت مليش دعوة اهى ف حكم ابوها"
"داخلة خارجة معاه؟؟ ليه؟"
"معرفش... بس طريقتهم ملفتة اوى ... انا مش عايزك تفضل حابس نفسك ف اللى فات...مين عارف يمكن مستنيها تولد ويتجوزوا"
"لا مش معقول"
"مش معقول ليه؟ وهى هتفضل يعنى طول حياتها عزبة؟...لازم تفكر انت كمان ف حياتك وانسى اللى حصل"
                   **************************

تانى يوم...طول اليوم وفارس قاعد ف البيت مش بيخرج وبيفكر ف كلام باباه وبيقارنه بردود مايا عليه

مايا طول اليوم تعبانة ومش قادرة تقوم م السرير
وكل شوية نادر يكلمها ويطمن عليها

                 *************************

نادر وهو قاعد مع فؤاد بيتعشوا ف الاوتيل اللى نازلين فيه
"استاذ فؤاد كنت عايز اكلمك ف موضوع شخصى"
"خير"
"انت جيت تركيا وشفت حياتى ومراتى هناك... ايه رايك او استنتاجك عن حياتى"
فؤاد بارتباك
"دى حياتك وانا معرفش حاجة عنها"
"انا ومراتى مختلفين تماما لاختلاف الطباع والتفكير والبيئة وكل حاجة...ومن زمان ماما كانت بتقولى نفسها اجى واستقر واتجوز هنا... مش هطول عليك انا محسيتش بانى فعلا عايز اتجوز واستقر هنا غير لما شفت مايا...انا عارف انه طلب سابق لاوانه بس انا حبيت اعرفك انى عايز اتجوزها على سنة الله ورسوله"
فؤاد بارتباك اكتر
"هى رأيها ايه"
"انا مصارحتهاش...انا كنت بلمح بس ولما لقيت فرصة واحنا بندردش مع بعض قلت اخد رأيك"
"والله يانادر القرار قرارها هى لو قالت آه يبقى خير لو قالت لأ هى حرة انا مقدرش افرض عليها رأى"
"لما نرجع ان شاءالله هصارحها برغبتى دى واشوف رأيها"
                        ********************

مايا وهى على السرير...حست بمغص خفيف
حاولت تنام...حست المغص بيزيد
فتحت نور الاباجورة اللى جنبها...واتعدلت تقعد وهى بتمسك بطنها
بتحاول تستحمل المغص اللى بيزيد
نادت على جدتها...صوتها طلع ضعيف ميتسمعش
مسكت الموبايل اللى جنبها واتصلت بايمان...وبصوت مرتعش
"الو...عمتى انا تعبانة اوى انزليلى بسرعة"

دقايق ولقت ايمان بتدخل عليها الاوضة وهى بتعيط من الالم
"مالك يامايا"
"بطنى هتموتنى وحاسة بهبوط...وعايزة ادخل الحمام ومش قادرة من الدوخة"
"طب اتسندى عليا"
وسندتها ايمان وهى بتقوم..واول ما وقفت
مايا برعب"ايه المياه دى كلها"
ايمان بفزع"يا مصيبتى... دى باينها ولادة"
مايا بتصوت من الالم ...ايمان اخدت موبايل مايا واتصلت بفارس
"الو... الحقنى يافارس...مايا بتولد"
وقبل ما تكمل كلامها...مايا داخت وقعدت ع السرير واغمى عليها ف حضن ايمان
ايمان بتصوت وبتحاول تفوقها
"بسرعة يافارس...دى اغمى عليها...اتصل بالاسعاف"
                  **************************

فى المستشفى...فارس وايمان وحياة وتوفيق والجدة قدام اوضة العمليات... خرجت ممرضة تجرى من الاوضة... ورجعت تانى
دقايق وخرجت ممرضة تانية
فارس"فى ايه؟؟"
الممرضة"الام جالها نزيف شديد والجنين مش مكتمل"
ايمان"يعنى ايه... المهم الكبيرة"
الممرضة "الاتنين حالتهم خطر ...ادعولهم"

                     انتظرواااااااا الحلقة الاخيرة


            

هناك 53 تعليقًا:

  1. جميلـــــــــــــــــــة الحلقة بجد...يارب مايا ترجع لفارس بقي....

    ردحذف
    الردود
    1. اعتقاد شخصى مايا هتموت ودى هتبقى الصدمة الكبيرة لنادر وفارس برضو

      حذف
  2. يلاااااهويييييييس
    مايا هتموت ؟؟؟؟؟؟
    لا بالله عليك يا دينا ماتخليش مايا تموت
    بس بجد الحلقة تحفة اويي

    ردحذف
  3. اوبااااااااااااا
    دينا اوعي تموتي مايا حاقتلك انتي شخضيا :D

    ردحذف
    الردود
    1. هههههههههه
      هههههههههه انا ممكن مش اقرا قصص تاني :D

      حذف
    2. لو مايا ماتت او اتجوزت نار والله العظيم ما هبص علي اي قصه هتكتبيها تاني

      حذف
    3. ايه يا جدعان ما بلاش أيمان :D ؟؟ مش حنقدر اصلا وحنقرا برضه القصص :D
      يلا احنا واثقين في دينا ^^

      حذف
  4. لا بقى بجد مش قادرة استنى ليوم لسبت :\

    ردحذف
  5. بجد تحفة اوي الحلقة يا دينا انتي شوقتينا اكتر يارب مايا تقوم بالسلامة وبجد نفسي ترجع لفارس اما نادر ده لا حاجة خنيقة

    ردحذف
    الردود
    1. بالعكس اهتمام نادر الزيادة وكلامة مع فؤاد امه الرجال عايز يدخل البيت من بابة واستى لما يرجع ويفاتحها
      وبيتهيلى ان فى مثل بيقول ديل الكلب ميتعدلش ولو حصل وومايا رجعت لفارس هيضربها تانى انما بالنسبة للمستشفى فاحتمال 45% مايا تعيش بسبب النذيف فى 5 % الى هما الجنين ع رأى المثل ضحينا بالجنني عشان الام تعيش :)

      حذف
  6. يلهووووووووووووووى بجد ايه دة امتى ازاى كدة طيب حرام عليكى :-D اوعى تموتيها :-D اقولك موتى توفيق :-D

    ردحذف
    الردود
    1. ههههههههههههههه
      هو توفيق معقد المستمعين كلهم بس ببأسف يا جوجو
      مايا تعيشى انتى

      والمولود الى فاضل بس للاسف معاق

      ونادر وفؤاد مش هيعرفو حاجة غير لما مايا تموت

      البقاء لله

      حذف
  7. لالالالالالالالالالالالالالالالالالالالالالالالالالالالا يا دودو كمليها النهاردة بكرة اجاااااااااازة بلاش والنبي عااااااااااايزين نذااااااااااااااااااكر :(

    ردحذف
  8. حلوة اوى وربنا يستر على مايا والبيبى
    مورا

    ردحذف
  9. الحلقة تجنن يا دودو :) ...بس والنبي مش هنعرف نذاااااااكر قبل يوم السبت عاجبك كدة ..نسقط يعني ؟؟

    ردحذف
  10. والله م قدرتش اعلق حتى بس ربنا يستر مايا وبنتها وير جعو هي وفارس بقى نفسي دا يحصل
    يلهوووووووووووي الجمعة اجازة حنستنى للسبت والله كتيرة علينا اوي ي دينا

    ردحذف
  11. واااااااااااااو ع الحلقه

    ردحذف
  12. ربنا يستر بقي
    مستنيين علي ناااااااااااااااااااار

    ردحذف
  13. لالالالالالا يادينا اوعي تقولي ان بكرة اجازة

    حراااااااااااام عاوزين نطمن علي مايا


    و توفيق ده ولعي فيه بجااز



    الحلقة رووووعة و مليانة


    رحاب علي

    ردحذف
  14. احيييييييييييييييييييييه احم احم المهم دلوقتي لو نادر اتجوز مايا انا هقتل نفسي وهقتل مايا ومن ثم كريمة السكرتيرة :P لا بجد لو مرجعش فارس لمايا هتبقى قصة قفيلة

    ردحذف
  15. لا حلوه ممكن الجنين يموت ربنا يستر بس بجد تعاطفت مع فارس

    ردحذف
  16. لأ لأ لأ كده
    انا مش هقدر استني الحلقه الاخيره
    وليه اصلا تبقي الاخيره

    مينفعش كده علي فكره

    ردحذف
  17. لا بقى لالالالالالالالالالالالالالالالالالالالالالالالالا انا كده هعييط بكرة اجازة علشان خاطري نزليها بكرة بلييييييييييييييز

    ردحذف
  18. رائعة جدا جدا جدا بس لسة هنستنى يوم الاجازة دة كلة مينفعش يبقى فى استسنة وتنزلى حلقة بكرة بس حلقة جميلة جدا

    ردحذف
  19. لو مايا ماتت انا معدتش هقرا اي قصة تانيه حتى اللي في كتب النحو هه

    ردحذف
  20. لااااا .. بجد حلقه حلووووووووووووووووه اوى . مش هقدر استنى لحد بعد بكرا :( :(

    nousa

    ردحذف
  21. واااااااااااااااااااااااااو بليز الحلقه الجديده بكره

    ردحذف
  22. ya salaamm

    ردحذف
  23. جمييييل جدااااااا

    ردحذف
  24. أنا أتوقع ان الجنين هيموت و مايا هتقوم بالسلامة , و مش هيبقى فيه أي حاجة تربطها بفارس , و نادر هيعرض عليها فكرة الجواز فهتفكر و بما انها مكانتش ممانعة الكلام معاه و متضايقتش من تلميحاته يبقى فيه احتمال كبير انها توافق , و بصراحة هو يستاهل لأنه فكر فيها على وضعها و مشكش فيها الشك المعتاد للي بتطلق في أول الجواز , زي ما فارس شك فيها , و فارس برضو يستاهل ان ابنه منها يموت و ان هي مترجعلووووش لأنه بصراحة اللي عمله أثبت تخلفه و عدم كفاءته و حبه لمايا , و أنا مش هبقى فرحاااانة خااااالص لو مايا نسيت اللي حصل و سامحته و رجعتله و كدة القصة مش هتبقى ليها معنى لأن المفروض الجانب الظالم في القصة دي هو فارس و هو لسة مخادش جزااؤه

    ردحذف
    الردود
    1. اولا همسك معاكي علي نقطه نادر نادر دا متجوز دي حاجه
      الحاجه التانيه ان اي شاب شرقي اتجوز واحده بنت بنوت ومطلعتش بنت كان ممكن يعمل اكتر من كده
      وفارس مشكش فيها فارس كان معاه حق عشان هيا ماقلتش من الاول
      والحاجه التالته الحب الي بينهم لما فارس عرف الحقيقه سامحها ودا اكبر دليل علي انو بيحبها

      حذف
  25. تحفه بجد يا دينا ربنا يوفقك
    بس عشان خاطري بلاش تموتيهم :( :( :(

    ردحذف
  26. لا يا دينا حرام عليكى والله بجد انا هاعيط بقى بجد حرام

    ردحذف
  27. لالالالالالالالالالالالالالالا كدا حرام بقا بجد

    ردحذف
  28. ليه يا دودو كدا متخليهاش تموت

    توتا

    ردحذف
  29. بلاااااااااااش بقى تخلي بكرة اجازة الله يكرمك يا دينا
    اكتبيها وبعد كده خدى اجازة براحتك

    ردحذف
  30. 7araaaaaaaaaaaaaaaaaaaaaaaaaaaaaaaaaaaaaaaaaaaaam :( :(

    ردحذف
  31. يارب تقوم بالسلامه انا خايفه يحصلها حاجه مش هقدر استني لبعد بكره

    ردحذف
    الردود
    1. المشكله ان بكره الجمعه

      حذف
  32. حلوة جدا تسلم ايدك يا دينا انا باقول تضحى بتوفيق عشان الجنين ومايا وكلنا نعيش بسلام بقى هههههههههههههههههه بس اوعى تجوزيها لنادر انا متعاطفة مع فارس رغم اللى عمله اه وحاجة كمان الله يباركلك فكرى ونزلى الحلقة بكرة حرام نستنى ليوم السبت

    ردحذف
  33. لا مايا لا :( ... و ياريت يا دينا تتعاطفى معانا و تنزلى حلقة بكره :D

    ردحذف
  34. اوعي تموتيها يادينا عارفه لوماتت هخاصمك هههههههههههههه
    اقولك اقتلي توفيق الكلب دا

    ردحذف
  35. انا بجد متعاطفة مع فارس بصراحة لانى حسيت انه بيحبها بجد وفعلا اى راجل شرقى ممكن اوى يعمل زيه وهى برضو فضلت ساكتة حتى لما سألها ما حولتش تفهمه
    بس نادر بجد مش نازلى من زور :D
    وبرضو انا مع الناس اللى قالتلك موتى توفيق :D

    ردحذف
  36. الللللللللللللللللللللللله ع الجمااااااااااااااااااااااال بجد حلووووووووووووووووووووووووووووة ومنتظرة الاخيييييييييرررررررررة بشوووووووووووووووق رهيييييييييييييييييييييب

    ردحذف
  37. الحلقه جمييييييييله يا دودو القصه خلصت بدرى مستنيه الجديد

    ردحذف
  38. ana batmana inou maya t9oum bi salama wi yimkin janin may3ich wi ana ma3a noona fi li9alito ana mou haba maya tirja3l li faris li anou li 3amalou biybayin mada takhalofo ana ba3rif inou maya ghiltit 3achan mahaktlouch li sar bas kan lazim ysm3ah madam inou byhibaha wi mayhkoumch 3aliha bi tari9a di min doun mayisma3ha o binsba li nader bayin 3alih rajoul monasib li maya o madam rah ysta9ir fi mesre fa akid rah ynfisil 3ala mrato
    AMIRAT MAGHREB

    ردحذف
  39. لا والنبي بلاش مايا تموت وبسرعه بقا احنا هنموت ونشوف الحلقه الاخيره

    ردحذف
  40. بلاش تموتى مايا والجنين والنبى خليهم يعيشوا الله يخليكى يادينا

    ردحذف
  41. انا متغااظه من الناس اللي شايفه ان فارس همجي ووحش وكل الكلام ده
    انا اينعم اتضايقت من اسلوبه بس هو معدور ومعاه حق في اللي عمله ده رااجل شررررقي ومفيش اي راجل يحصل معاه الموقف ده وهو يجي يقولها طيب ياحبيبتي احكيلي ده حصل ازاي وخصوصا هي كانت عماله تستفزه اكتر

    انا شايفه ان هما الاتنين غلطوا ولازم يتحملوا نتيجه غلطهم واكيد الجنين ده لازم يموت علشان مايفكرهمش باللي حصل ويرجعوالبعض ويبتدوا حياه جديده خاالص
    ده رأي

    ••• سمسمة •••

    ردحذف
  42. يااريت يادينا القصه الجديده تكون رعب لانك بقالك كتييييير مفيش قصه رعــــب واهو تغيير بردو


    ••• سمسمة •••

    ردحذف
  43. اللي بيحصل ده حرااااااااااااااااااااام الحلقه الاخيره هاتنزل الساعه كام بقي مش قادره استني والله

    ردحذف
  44. دينا اوعى تنهى القصة على موت حد او على حزن كفاية الى الواحد فية احنا بندور على الفرحة فى خيلنا وحلمنا انتى كمان مش تبكينا

    ردحذف
  45. الاتنييييييييين ايه ده :o لالالالالالالالا كده تشويق زياده ع فكرة :D ((ونبى رجعى فارس لمايا بقى )) :D

    ردحذف

قول رأيك بلاش تقرا وتقفل من سكات...ارائكم تهمنى