السبت، 11 مايو 2013

هل يشفع الحب؟... الحلقة 1

الحلقة 1
عالية قاعدة ف فصل دراسى ..قدام بنات اعمارهم مختلفة من 3 ل 6 سنين
"وماتت ستنا آمنة ام الرسول عليه الصلاة والسلام"
تقف عالية ف الكلام...تبص للبنات
"ها قلنا نقول ايه"
يردوا البنات
"عليه الصلاة والسلام"
تكمل عالية"كان عنده وقتها 6 سنين لما بقى يتيم من غير ام او اب... اخده جده عبد المطلب يربيه"
تسأل بنت من اللى قاعدين
"يعنى الرسول مكنش عنده ام واب زينا"
ابتسمت لها عالية
"ايوه يا جيجى كان يتيم زينا... بس ربنا كان بيحبه وقال ان كل الناس لازم تحب الايتام... بسم الله الرحمن الرحيم واما اليتيم فلا تقهر"
سألت بنت تانية
"يعنى ايه"
عالية"يعنى ربنا قال ان اللى يزعلنا هيزعل منه والرسول عليه الصلاة والسلام"
ردوا البنات
"عليه الصلاة والسلام"
كملت عالية"قال ان اللى بيحبنا وبيخلى باله مننا بيدخل الجنة معاه"

اتفتح باب الفصل...دخلت هدير
"يالا ياعالية نزلى البنات الجنينة"
عالية"يالا يابنات كل واحدة تمسك ايد اختها"
                     **********************

فى الجنينة...بنات كتير اعمار مختلفة بيلعبوا
هدير وعالية قاعدين جنب بعض وعينيهم على البنات
"مالك ياعالية... سرحانة ف ايه"
"مفيش يا حبيبتى... بس كل ما افتكر اننا هنبعد عن بعض بخاف"
"نبعد عن بعض...هو انا ليا غيرك يا عالية... فاكرة يوم كتب كتابى"
ردت بأسى"فاكرة"
وضحكت عالية وهى بتغير نبرة الاسى
"كنتى زى القمر والله يا هدير"
ابتسمت هدير بأسى
"قمر بالستر... كل ما افتكر والقاعة فاضية ومفيش حد...كل الموجودين ميجوش 10 انفار"
"واحنا هنعمل ايه بالناس بس..مش بيقولوا العروسة للعريس"
"بمناسبة العروسة للعريس... امبارح بعد مانمتى عصام كلمنى وقال قدامه شقتين وهروح معاه النهاردة نختار واحدة منهم "
"مبروك... بقاله كتير بيدور"
"الحمدلله لقى دول ايجارهم معقول"

شافوا ثريا مديرة الحضانة بتقرب منهم...ابتسموا لها بحب
قعدت معاهم
"صباح الخير يابنات"
ردوا هدير وعالية
"صباح النور"
هدير"ابلة ثريا عندى ليكى خبر حلو"
ثريا"ايه ياهدير فرحينى"
هدير"عصام لقى شقتين ايجارهم معقول وهنروح العصر نشوفهم"
ثريا"الف مبروك"
ردت عالية بسرعة
"العصر؟؟ النهاردة الخميس ياهدير عندى درس تحفيظ"
هدير"اااه صحيح... طيب لما تيجى نبقى نروح"
عالية"ابلة...عايزة اقولك حاجة"
ثريا"خير؟"
عالية"عايزة ادور على شغل"
ثريا"شغل ايه يا بنتى ...انتى مش ماسكة فصل البنات الصغيرين هنا ف الدار وبتروحى دروس التحفيظ...كفاية عليكى"
عالية"المدارس قربت يا ابلة ومش هيبقى فيه غير الصغيرين يعنى ممكن يقعدوا مع سعاد ولا وجيدة"
ثريا بتفكر"بس هتشتغلى ايه؟"
عالية"اهو هدور وان شاءالله الاقى"
                       *********************

عالية ماشية ف الشارع ...صوت اذان العصر
عالية حست بدوخة... وقفت لحظات وكملت طريقها

طه ف عربيته... جنبه خالد صاحبه
"نزلنى هنا ياطه...شكرا ع التوصيلة"
"العفو...استنى اما اركن"
"ليه رايح فين"
"اصلى العصر بالمرة هنا"

ركن طه...نزل هو وزميله بعد ما ركن جنب سور الجامع
عدت عالية من جنبهم... داخت تانى
سندت على سور الجامع ووقفت
لمحوها طه وخالد
خالد"مالها دى شكلها تعبانة"
راحوا ناحيتها
خالد"خير يا انسة...تعبانة ولا حاجة"
ارتبكت عالية من احراجها وردت
"لا كويسة...شكرا"
طه"نوصلك اى حتة طيب؟"
عالية"شكرا"
قربت منهم ست كبيرة كانت رايحة الجامع
"عالية؟!! مالك يا بنتى"
عالية"مفيش ياحاجة زينب دوخت شوية بس"
فتحت زينب شنطتها وطلعت زجاجة مياه
"خدى اشربى شوية مياه"
عالية"صايمة يا حاجة شكرا"
مسكتها زينب من ايدها
"طب امسكى فيا تعالى...الف سلامة عليكى"
حطت عالية ايديها ف ايد زينب
التفتت زينب لطه وخالد
"شكرا يا ولاد..ربنا ما يرميكم ف ضيقة"
ردوا "العفو...اى خدمة"

مشيت عالية مع زينب ودخلوا الجامع
ومشى طه عكس الاتجاه ودخل الجامع يلحق الصلاة
                         ********************

بعد الصلاة خرج طه من الجامع... وهو بيبص على مكان مصلى السيدات والمصليات خارجين منه
ركب العربية... واول ما ركب سمع موبايله بيرن
"الو"
صوت بيزعق
"ايه ياطه... عشرتلاف مرة بتصل بيك"
"كنت بصلى يا ماما والموبايل ف العربية"
"مش تقولى قبلها بدل ماتسيبنى اتصل كده"
"معلش ياماما"
"انت جاى امتى؟؟وروحت جبت الفلوس ولا لسه"
"لسه ياماما...هروح اهو وساعة بالكتير اكون عندك"
"طيب متتأخرش... بقولك ايه اخدت اجازة بكرة"
"لا ياماما معرفتش"
"ازاى معرفتش...انا مش قايلالك من امبارح"
"عندنا شغل ومش هينفع حد ياخد اجازة الاسبوع ده"
"يعنى شغل الحكومة يمشى وشغلنا احنا يقف ومنلاقيش ناكل بقى علشان معرفتش تاخد اجازة"
"ماما...ممكن نكمل كلامنا لما اجى...ومتقلقيش شغلنا مش هيقف ولا حاجة"
"طيب مستنياك... انا متغديتش لسه..متتأخرش"
"حاضر ياحبيبتى مش هتأخر...مع السلامة"
"مع السلامة"
قفل طه مع مامته...وبص على باب مصلى السيدات...لقى ان كل الناسى خرجوا...مشى بالعربية
                      ********************

عالية قاعدة ف الجامع...بعد الصلاة
زينب"ايه ياعالية هتقعدى برضه؟"
عالية"اه هحضر الدرس علشان بعده فيه بنات جاية درس التحفيظ"
زينب"يا بنتى شكلك تعبان"
عالية"لا والله انا كويسة انا دوخت بس علشان الصيام والحر"
زينب"ما تفطرى هو احنا ف رمضان"
ابتسمت عالية لزينب علشان تغير الموضوع...حست بيها زينب
"قوليلى ياعالية...هدير مجتش معاكى ليه"
"رايحة تشوف شقة مع خطيبها"
"ربنا يصلح حالهم... قوليلها تطمن انا كلمت مجموعة اصحابى وزمايلى ف الشغل على اول الشهر هنلم مبلغ كده وانزل معاكم نشوف الحاجات المهمة اللى ناقصاها"
عالية بفرحة"بجد يا حاجة...ربنا يكرمك يارب...ده احنا كنا شايلين الهم علشان مش عارفين هتجهز منين"
زينب"سيبيها ع الله"

صوت الشيخ ف الميكروفون
"السلام عليكم ورحمة والله وبركاته... درس النهاردة هنكمل فيه نفس موضوع الدرس اللى فات"
                      ********************

فاتن واقفة ف المطبخ... دخلت لها بنتها ميار
"ماما"
"نعم"
"الشامبو خلص"
فاتن"مفيش ولا كيس؟؟دورى كويس"
ميار"مفيش والله اخر مرة كنتى جايبة 4 اكياس وخلصوا"
فاتن"هجيبلك بكرة وانا جاية م الشغل"
ميار بتردد"اتصل ببابا اقوله؟"
فاتن "اتصلى...يمكن يجيب"
خرجت ميار من المطبخ... وكملت فاتن قلية البتنجان

رجعت ميار بعد اقل من دقيقة... بصت لها فاتن
"ايه؟؟قالك ايه؟"
ميار باستسلام"قالى اغسلى بالصابون او استنى امك تجيبلك بكرة"
فاتن ساكتة ومبتعلقش...سألتها ميار
"اعمل ايه؟"
"هجيبلك بكرة"
"ياماما كيس شامبو بربع جنيه ميرضاش يجيبه ليه"
فاتن ساكتة وبتقلب اللى ع النار
"ياماما...انتى ليه ساكتة كده"
ردت بنفاد صبر
"هعمل ايه... عملت كل اللى ممكن تخيليه خلاص لحد ماتعبت...ابوكى مش هيتغير الحمدلله انه بيجيبلنا اللقمة"
"ياماما انا مطلبتش حاجة كبيرة"
"عارفة...وهجيبلك اللى انتى عايزاه..انا عمرى حرمتك من حاجة"
"لا...بس انتى هتعملى ايه ولا ايه بس"
"اهو بعمل اللى بقدر عليه"
"الدروس هتبدأ... اصحابى كلهم حجزوا... وانا لسه"
"احجزى"
"عايزين فلوس مقدم"
"طب استنى عليا شوية"
"حاضر ما انا مستنية اهو"
                       *******************

فاتن وميار وعبد الحميد ع الغدا...بعد ماتقوم ميار
فاتن بابتسامة "بقولك ايه يا عبدالحميد...ميار عايزة تحجز الدروس"
عبدالحميد وهو بياكل"ما تحجز"
"المدرسين عايزين الفلوس مقدم"
"مقدم ولا مؤخر انا مالى"
"ادفع لها بس اول شهر وانا اكمل"
"لا ده مش اتفاقنا...انتى صممتى تدخليها ثانوى وقلتى مش هكلفك حاجة خليكى قد كلامك...قلتلك تدخل صنايع ولا تجارة و3 سنين ونخلص"
"ده اسمه كلام برضه...فيه حد دلوقتى بيقول الكلام ده... وبعدين هبقى انا معايا بكالوريوس واقعد بنتى بدبلوم"
"ماله الدبلوم ياختى... حوش حوش اخدتى الدكتوراة"
"والله ما اقصد حاجة...انا بتكلم على ميار "
"فلوس معاييش فلوس... انتى فاكرة البيت ده بيصرف ايه ورق كوتشينة"
قام عبد الحميد...قامت وراه فاتن
"الشهر ده بس يا عبدالحميد"
"منين...عايزة فلوس روحى خدى من اخوكى انما انا مفيش عندى فلوس"
                       ***********************

طه داخل المحل "محل مفروشات"...مامته قاعدة ع المكتب...راح قعد قدامها وعليه علامات الاجهاد
"اتاخرت ليه ياطه؟"
"جبت فلوس البضاعة الاخيرة من سالم"
"ومقالش على طلبية تانية"
"قال"
"وان شاءالله مين هيسافر يجيبها"
"انا ياماما حاضر"
"مش قلت مش عارف تاخد اجازة"
"بكرة ولا بعده بعد الشغل هروح اجيب بضاعة جديدة...متشيليش هم انتى بس"
"طيب"
قامت نرجس ...دخلت ورا ستارة ورجعت بصينية فيها اكل
"يالا ... قوم اغسل ايدك وتعالى نتغدا قبل ما امشى"
"ونرمين فين؟"
"ف البيت...هنبقى نجيلك بالليل علشان لما تقفل المحل تيجى معانا بالعربية نجيبلها هدوم المدرسة"
                      **********************

هدير راجعة من الحمام...بتصحى عالية
"عالية عالية"
قامت عالية بخضة
"ايه... فى ايه"
"مالك...قومى يالا"
"كويس انك صحيتينى....استغفر الله العظيم يارب"
"ايه مالك"
"كنت بحلم حلم وحش اوى"
"كابوس ؟"
"لا حلو وحش استغفر الله العظيم يارب... اعوذبالله من الشيطان الرجيم"
"بتستغفرى على ايه"
"الحلم"
"ماله"
"هقولك ومتضحكيش عليا...انا اول مرة تحصل لى والله"
"هو ايه ده؟"
"حلمت بواحد ...استغفر الله العظيم يعنى...انه بيحضننى"
"ههههههههههه"
"بتضحكى عليا ياهدير...الله يسامحك"
"عادى يا بنتى هو حقيقى...ده حلم...هو حد حقيقى"
"ماهو اللى انا مستغرباله ان الشخص ده شفته فعلا...بس معرفوش والله ولا فكرت فيه ولا حاجة"
هدير باهتمام"مين ده؟؟ وشفتيه فين"
عالية وهى بتاخد فوطة وقبل ماتخرج من الاوضة
"شفته وانا رايحة الدرس يوم الخميس ف الشارع لما دوخت"
خرجت عالية بسرعة من الاوضة وهى محرجة وهى بتحكى
                       *********************

عالية وهدير داخلين اوضة مديرة الدار
هدير"حضرتك عايزانا يا ابلة"
ثريا"اه اقعدوا يا بنات"
قعدوا...وهما بيبصوا لبعض على تردد ثريا
ثريا"انتم طبعا عارفين انا بحبكم قد ايه... وعارفة انكم بتحبونى"
هدير"طبعا يا ابلة... احنا مشفناش راحة ف حياتنا الا لما جينا الدار هنا وده كله بسبب حنانك علينا"
عالية"اه والله... ده احنا اتعذبنا اوى من يوم ماوعينا ع الدنيا...محسناش ان القلوب فيها رحمة الا لما جينا الدار هنا"
ثريا"انا يعز عليا انى اسيبكم... بس انا طالعة معاش الاسبوع الجاى وقلت لازم اعرفكم علشان ممشيش فجأة"
عالية وعنيها مدمعة"معاش؟؟ وهدير هتمشى؟؟ وانا هبقى لوحدى"



هناك 48 تعليقًا:

  1. اوبا بقي يا دينا
    حزينه جدااا خااالص اووي يعني
    وشكلها هيبقي فيها مشاكل كتير قلبي مش متطمن
    بس انتي مبدعه ♥

    ردحذف
  2. ra23a ya dina, bead entyy shatra gedan

    ردحذف
  3. تسلم اديكى يادينا بجد اسلوبك جميل فى الكتابة وسرد القصة لا ان شاء الله شكلها قصة جامدة ربنا يوفقك
    واحب اهنيكى على احلى قصص قريتهم ليكى بقينا عيلة ولسة بحب وليست عذراء بجد قصص جميييييييلة قوى

    ردحذف
  4. جميله جدا وشكلها فعلا هتكون مشوقه اووووووووووووووى

    ردحذف
  5. حلوه اوي يا دينا انا مشتاقه للحلقه اللي بعدها دايما انتي متالقه بقصصك ويارب دايما

    ردحذف
  6. شكلها هتكون قصه حلووووووووووووه اوي

    ردحذف
  7. حلوة ... حاجه جديده ... ربنا يوفقك ;)

    ردحذف
  8. طبعا الفكره شكلها جميله بس حاسس اني اخدت كم معلومات كتير اوووي في اول حلقه

    ردحذف
  9. ايه الحزن دا بقي يا دودو
    بس جامده كالعاده

    توتا

    ردحذف
  10. gamila bs 5ayfa b3d keda tkoon momellaaaaaaaaaaa :O

    ردحذف
  11. حـــــــــــــــــــــــــــــــــــــــــلوة اوي اوي اوي وشكلها حزينة وهتبقى عالييه لوحدها كده ويارب طه يحبها لالالا دي هتبقا جميلة جدا وده العادي منك ادودو
    والله وحشتينا جـــــــــــــــتدا

    ردحذف
  12. شكلها حلوة القصة :) تسلم ايدك

    ردحذف
  13. بموت فيكي يا لينا وبحب القصه دي علشان اسمي فيها

    ردحذف
  14. بموت فيكي يا لينا وبحب القصه دي علشان اسمي فيها

    ردحذف
  15. بموت فيكي يا لينا وبحب القصه دي علشان اسمي فيها

    ردحذف
  16. شكلها هتبقي جامده

    ردحذف
  17. حلوة اووي يا دودو .. بحب القصص الاجتماعية دي :) :) :)

    ردحذف
  18. شكلها جامده يا دونا
    يارب تكون حلوه شبه باقي رواياتك

    ردحذف
  19. شكلها فيها احداث كتير يادينا وتسلم ايديكى انا مستغربة ازاى قلتى عليها ان احداثها مش مشوقة زى ليست عزراء

    ردحذف
  20. بداية جميلة يادينا وحلوة جدا

    ردحذف
  21. جمييييلة الحلقة
    شكلها هتبقى حلوة اوي ^_^

    ردحذف
  22. جميله واعتقد انها من واقع الحياه

    ردحذف
  23. مبدعه كالعاده.. بانتظار الحلقات القادمه

    ردحذف
  24. حلوة جدا جدا يا أستاذه دينا
    وماشاء الله طويلة ^_^
    منتظرة الباقى

    ردحذف
  25. شكلنا كده داخلين علي عياط جامد كويس ان البدايه حونينه علينا عشان الحق احضر المناديل ههههههههه في انتظار بكره
    ام ياسين

    ردحذف
  26. تحغة يا دوندون البداية تسلم أيدك

    توتا

    ردحذف
  27. شكلها حلوة حتى اسم البطلة انا حبه اوي مستنيين الاحداث :)

    hadil gasser

    ردحذف
  28. بداية حلوة يا دينا رغم الحزن اللى فيها
    على فكرة قريت كتاب رسائلى اليه من شوية حلو اوى

    ردحذف
  29. شكلهاااااااااا حلووو يادندونة مستنيييييييه جدييييييد

    ردحذف
  30. حلوه فوووى يا دينا

    ردحذف
  31. gamDa ya DonDon bGd TsLam EiDk Kal3ada nTy mObd3a ya dondon wLahy na kOnt bShof al Kesa Kolha Fy Yom nw na msTnia al7aL2a alGaya bFare8 Alsapr






    *Yasmen*

    ردحذف
  32. اوباااااا ي دينا والله حلوة اوووووووي ولكن انا خايفة على عليا اوي وانها تحصل معاها حاجات هي مش قدها ي ربي

    ردحذف
  33. جميييييييييييييييله جدا جدا جدا تسلم ايديك

    ردحذف
  34. جميلة اوى انا لسة متابعاكى قريب وشدنى قصصك الروعه
    وخليكي حنينة شوية على عالية عشان صعبت عليا من اولها اهو

    ردحذف
  35. جميلة جداااااااااا رووووووووووعه

    ردحذف
  36. حلوة اوي ومؤثرة

    ردحذف
  37. حلوووووووووة ومتشوقة وباذن الله لازم اكمل الحلقات

    ردحذف
  38. جامدة اووووووووووووووووى

    ردحذف
  39. شكلى كده هاقيم عندك ف صفحتك ومدونتك :)

    ردحذف
  40. بصراحة قصصك كلها حلوة بجد انتى مبدعة

    ردحذف
  41. بدا حلوه يا دودون

    ردحذف
  42. بداية حزينة بس اضن انوا طه راح ايغير حياة عليا

    ردحذف
  43. انتى بجد جامدة جدى

    ردحذف
  44. شكلها هتبقى قصه حب جامده

    ردحذف
  45. جميلة جدا تسلم ايديكى يا دينا

    ردحذف
  46. جميلة جدا تسلم ايديكى يا دينا

    ردحذف
  47. شكلها حلوه... بالتوفيق

    ردحذف

قول رأيك بلاش تقرا وتقفل من سكات...ارائكم تهمنى