الثلاثاء، 14 مايو، 2013

هل يشفع الحب؟... الحلقة 3

الحلقة 3
جرس الباب رن
قامت فاتن تفتح ...لقيت طه قدامها
ابتسمت بترحيب وهى بتوسع له يدخل
"طه... اهلا وسهلا...ايه المفاجئة الحلوة دى"
دخل طه وسلم عليها وباسها
"ازيك يافاتن عاملة ايه"
"الحمدلله...خطوة عزيزة"

قامت ميار تسلم عليه
"ازيك يا خالو...واحشنى"
"ازيك انتى ياحبيبتى...عاملة ايه"

قعد طه وقعدت معاه فاتن وميار
"ازيك يا طه وازى نرمين"
"الحمدلله بخير...انتى عاملة ايه...مبتتصليش تسألى خالص كده قلت اسأل انا"
"فيك الخير طول عمرك احسن منى... قومى اعملى شاى لخالك ياميار"
طه"مفيش داعى انا نازل على طول"
شاورت فاتن لميار انها متسمعش كلامه...دخلت ميار المطبخ
"طمنينى عليكى يافاتن اخبارك ايه؟؟"
"الحمدلله ف نعمه...ربنا يخليك يا طه انك بتودنى وبتسأل عليا"
"ان مكنتش اود اختى الكبيرة ...لولا انى مش عايز اكبرك كنت قلت اللى مربيانى"
ردت فاتن بضحك
"ما انا مربياك فعلا...ولا هتنكر"
"لا يا ستى مقدرش انكر ابدا...اخبار الحاج عبد الحميد ايه"
ردت باقتضاب"بخير...نحمده"
قام طه "طب هقوم انا علشان ارجع المحل"
"وانت لحقت...نرمين عاملة ايه ف الدروس"
"ما انتى مبتسأليش عليها"
ردت بانكسار"ماانت عارف نرمين وابلة نرجس مبيحبونيش فمبحبش اكون تقيلة"
طه بيحاول ينفى الحقيقة اللى عارفها
"لا ازاى متقوليش كده... هى مشاغل بس"
فاتن بترد عليه بصدق
"انا مش زعلانة منهم...وعارفة ان كل واحد عنده مشاغل...كفاية انك كل فترة بتجيلى وتسأل عليا"
"انا كنت هعدى عليكى الصبح ف الشغل بس مفضيتش"
"اه صحيح انا سبت الشغل"
"ايه؟؟ليه؟؟"
"لا اتنقلت يعنى ...قصدى انى سبت هناك وروحت دار ايتام"
"مرتاحة هناك؟"
"الحمدلله"
حط طه ايده ف جيبه...وطلع فلوس كان محضرها
مسك ايد فاتن وحط ف ايدها الفلوس
"خلى دول معاكى"
فاتن وهى بتبعد ايديها عن الفلوس
"لا والنبى يا طه..خيرك سابق"
طه وهو بيديها الفلوس ويسيبها ف ايديها
"متقوليش كده...هو انا غريب"
جت ميار بالشاى
"الشاى يا خالو"
"معلش ياميار..مستعجل... سلامو عليكو"
فتح طه الباب وخرج...وفاتن بتدعيله
قفلت الباب وراه...فتحت الفلوس
"ياحبيبى...ربنا مايرميك ف ضيقة ابدا"
"اداكى فلوس؟"
"الحمدلله ربنا فرجها"
"الحمدلله...سبحان الله ياماما خالو طه غير نرمين ومامته خالص...بحس انه طيب زيك كده انما هما اعوذبالله"
"وانتى شفتى ايه من نرجس ... انا اللى شفت منها المر كله...ماعلينا ربنا يسهلها...ويرضيك يااخويا"
                    ********************

عالية فى اوضتها ف الدار...دخلت عليها هدير
"ايه ده؟؟جيتى امتى"
"من ساعة كده.. وانتى عملتى ايه"
"شكلنا كده يا لولو مش هنعرف نجيب غير اوضة نوم بس"
"وماله... اللى يقدر عليه يجيبه وبعدين يبقى ربنا يكرمكم"
"والله انا مش طالبة اى حاجة...انا عارفة انه بيتعب اوى علشان نعمل البيت...بس كان نفسنا نجيب انتريه مع الاوضة"
"يا ستى المهم يكون لك بيت"
"معاكى حق...واحنا يعنى مين هيجيلنا...لا لينا اهل ولا معارف ولا حد خالص...يوه خدتك ف الكلام ومسألتكيش .. عملتى ايه؟"
"ولا حاجة... مش لاقية شغل مناسب"
"هى دروس التحفيظ خلصت؟"
"اه من يوم ما الدراسة بدأت ومبقاش فيه تحفيظ...بحضر الدروس بس"
"مشفتيش حد هناك"
قالتها هدير وهى بتضحك...ومخدتش عالية بالها من قصدها
"لا بشوف كل اللى بيحضروا عادى"
"لا مش قصدى...انا اقصد بتاع الحلم"
ردت بحزم"لا"
"ومالك بتتكلمى كده ليه"
"علشان متضايقة من نفسى ياهدير...حاسة انى بعمل حاجة غلط"
"ايه اللى غلط؟"
"انه بييجى على بالى كتير...مش قادرة اتحكم ف تفكيرى ده"
"عادى يا عالية مفيهاش حاجة...بتتمنى تقابليه تانى مش كده"
سكتت عالية وهى عايزة تقولها آه... فهمتها هدير
"ما تيجى نعمل اننا رايحين نتفرج على اى حاجة ف المحل وتشوفيه"
"اخص عليكى ياهدير...انا اعمل كده...الله يسامحك"
                    **********************

نرمين ف المحل مع نرجس وطه
طه"يالا يانرمين اوصلك"
نرمين"مستنية مها هتجيلى هنا"
نرجس"اتصلى بيها شوفيها اتأخرت ليه"
اتصلت نرمين بمها
"الو...انتى فين يا جزمة... يالا متتأخريش.. شغالين عند اهلك احنا... يالا سلام"
نرجس بتضحك"هههههههه يوه جتك ايه...قوية يابت"
طه بيبص لنرجس باستغراب...وبيوجه كلامه لنرمين
"ايه يانرمين الاسلوب ده...فيه حد يكلم صحابه كده"
نرمين"اسلوب ايه ياطه...صاحبتى وبنهزر مع بعض...دماغك والنبى"
طه"ماما...مش تفهميها ان كده غلط"
نرجس"وايه الغلط ف كده...بتقولك صاحبتها وبتهزر معاها"
طه باستسلام"ماشى"

بعد 5 دقايق...وصلت مها..واول مادخلت
"ازيكم...ازيك يا طنط"
وسلمت على نرجس وباستها
نرجس"ازيك ياحبيبتى وازى ماما"
مها"الحمدلله"
مها بتسلم على طه
"ازيك"
طه"الحمدلله"
مها بتبص لنرمين"اما انتى زبالة ولا اسلم عليكى ولا اعبرك"
نرمين"حوش حوش مستنية سلامك...يالا هنتأخر"
اخدت نرمين مفتاح العربية وايدها ف ايد مها
"يالا ياطه...حصلنا"
                     **********************

فاتن ف مكتبها...وقاعدة معاها هدير وعالية
هدير"والنبى يا ابلة ابقى تعالى اتفرجى على شقتى"
فاتن"طبعا يا هدير...وهاجى احضر الفرح واباركلك ف بيتك وكل حاجة"
هدير بحزن"فرح!! احنا مش هنعمل فرح... احنا بعد ما عصام يكمل فلوس الاوضة ونستلمها هبقى اروح معاه وخلاص"
عالية"مش مهم الفرح ياهدير المهم انك تبقى ف بيتك"
هدير"يالا الحمدلله على كل حاجة... من وانا صغيرة كنت بحلم بفستان الفرح زى اى بنت... بس يعنى هى جت ع الفرح...ما احنا طول عمرنا محرومين من كل حاجة اشمعنى دى اللى هنحققها"
فاتن بتأثر"انتوا هتوجعوا قلبى ليه...ياريتنى ما سألت"
هدير"اسفة يا ابلة...بس اصلك متعرفيش احساسى ايه دلوقتى...كان نفسى يبقى لى اهل...بلاش اهل...ام بس تبقى معايا ف فرحتى"
فاتن بدموع"قلبتى عليا المواجع ياهدير... مين قال بس انى مش عارفة احساسك... انا كمان كنت يتيمة زيكم"
بصوا لها هدير وعالية...بتساؤل ف عينيهم
وسألتها هدير بتردد
"يعنى حضرتك كنتى ف ملجأ زينا"
فاتن"لأ... انا امى ماتت وانا عندى 8 سنين ولان اهل امى واهل ابويا محدش فيهم استحملنى عنده...كان لازم ابويا يتجوز.. واتجوز واحدة مكنش عندها رحمة ورتنى العذاب اشكال والوان"
عالية"وباباكى"
فاتن"الله يرحمه كان طيب وبيصدقها وهى كانت بتقنعه انها بتعاملنى عادى وانها زى اى ام بتربى بنتها وبتعلمها"
هدير"يعنى كانت بتعمل ايه"
فاتن"كان عندها محل ومتمسكة بالشغل بيه ومرضتش تقعد ف البيت فكان شغل البيت كله عليا مع المدرسة ده مع المعاملة السيئة منها واهمالها ليا لا تجيب لى لبس ولا تتكلم معايا ف فترة اى بنت بتبقى محتاجة حد يكلمها"
عالية "ربنا احن من اى حد"
فاتن"اه والله ياعالية... كنت حاسة ان ربنا مش سايبنى كان ليا واحدة صاحبتى مامتها حنينة اوى وكانت بتحبنى وتحن عليا...كنت محتاجة الحنان اكتر من الاكل والشرب واللبس والفسح اللى كنت محرومة منهم طبعا...مامة صحبتى دى اللى كانت بتدينى الحنان كله كنت بحبها اوى ...هى اللى كانت دايما تصبرنى وبتقولى ان اكيد ربنا زى ما بيحرمنا من حاجة بيعوضنا بحاجة تانية ...وده قبل ما نتفرق ف الكليات انا وصاحبتى والدنيا تشغلنا"
هدير"الحمدلله...ربنا عوضك بإيه يا ابلة؟"
فاتن"كنت متفوقة اوى ف دراستى...ورغم انى كنت شغالة ف البيت ودادة لاخويا اللى هى خلفته كنت دايما بجيب درجات عالية طول سنين الدراسة"
عالية"ماشاءالله ربنا بيعوض فعلا"
فاتن"وشوفوا حكمة ربنا..وانا ف الكلية اتقدم لى عريس وهى اقنعت بابا الله يرحمه انى لازم اوافق والعريس مكنش عايزنى اكمل دراستى وهما وافقوا ومحدش اهتم برفضى وكنت هموت ان تعبى هيضيع"
هدير وعالية ف نفس الوقت باهتمام
"وبعدييييييين"
فاتن بابتسامة راحة
"مرات ابويا اكتشفت انها حامل والحمل ده كان ف مصلحتى...حامل وبتشتغل يبقى محتاجة حد يراعيها ويراعى البيت وبابا واخويا وفركشت الخطوبة الحمدلله"
ضحكوا الاتنين
"الحمدلله...ربنا كبير"
فاتن"الحمدلله على كل حال...لولا انى كملت دراستى مكنتش اشتغلت ودى نعمه كبيرة اوى الحمدلله"
هدير"واكيد ربنا عوض حضرتك بزوج احسن من الاولانى"
سكتت فاتن ووشها اتغير لما افتكرت انها اتجوزت عبد الحميد الاكبر منها ب 17 سنة علشان بس تبعد عن عيشتها مع نرجس
وردت على هدير بابتسامة تدارى بيها حزنها
"الحمدلله على كل شئ"
قامت عالية من ع الكرسى وقربت من فاتن
"ابلة...عايزة احضنك ممكن؟"
خدتها فاتن ف حضنها..وعيطت عالية كتير
هدير ودموعها نازلة
"طيب بتعيطى ليه دلوقتى...المفروض انا اللى اعيط"
عالية وهى بتمسح دموعها
"كنت خايفة اوى بعد ابلة ثريا ما طلعت معاش وانتى هتمشى بعدها انى ابقى لوحدى ...ربنا بعت لى ابلة فاتن اللى حسيت انها اطيب واحن حد قابلته"
فاتن"ربنا يعلم يا بنات انا بحبكم قد ايه انتم وكل بنات الدار...بحس انى كان ممكن ابقى مكانكم فبعتبركم كلكم بناتى"

رن موبايل فاتن...
"الو ...ايه ياميار مالك؟؟ مفيش درس؟؟ طب تعالى ونبقى نروح مع بعض...يالا مستنياكى"
قفلت فاتن مع ميار
"هقوم امر على البنات لحد ميار ما تيجى...واهو فرصة تتعرفوا عليها"
هدير وعالية قاموا وراها
"هنقعد نستناها ف الجنينة"
"طيب هخلص واجيلكم"
                      **********************

نرمين ومها ف المدرسة مع بعض
"ما تروحى معايا يا مها وبعدين نروح الدروس مع بعض"
"ماشى...بس قوليلى هو اخوكى هيوصلنا برضه؟"
"اه"
"اففف بقى"
"ليه؟"
"ليه ايه؟...واحنا صغيرين اننا نروح ونيجى لوحدنا...يا شيخة انا زهقت دى ماما وبابا مش خنقنى كده...اكيد مبيثقش فيكى"
"لا طبعا بيثق فيا"
"اومال ليه رايح جاى معاكى...وانا بقيت مربوطة بيكم وانتم بتجرونى وراكم"
"هو بيخاف عليا بس...بدل ما اركب مواصلات ولا تاكسيات وحد يضايقنى"
"بذمتك انتى مصدقة؟"
"قصدك ايه"
"مقصدش... بصى لو اخوكى هيفضل يودينا ويجيبنا كده هبقى اقابلك ف الدروس... مش معقول تبقى خنقة ف كل حتة كده...ياستى نمشى لوحدنا فيها ايه"
"وافرضى حد عاكسنا"
"ماتسيبى اللى يعاكس يعاكس...هيخطفنا يعنى"
                       *********************

فاتن مع ميار وعبد الحميد ف البيت بيتعشوا
عبد الحميد"امتحاناتك امتى يا ميار"
ميار"لسه متحددتش يا بابا بس اكيد قريب مش هتبعد عن النص الاولانى من يناير"
عبدالحميد"صعبة الدراسة عليكى؟"
ميار"لا الحمدلله ...اهو الدروس والمدرسة ماشية"
عبدالحميد"وقلة تواجد امك ف البيت...مش مأثر عليكى"
فاتن"انا مستعدة ارجع تانى للشغل اللى بخلصه بدرى...بس ادفع انت فلوس الدروس"
عبدالحميد"هو انا كل كلمة اتكلمها فلوس...فلوس...فلوس...انتى ايه فاكرانى قاعدلك على بنك"
فاتن"لاحول ولا قوة الا بالله...مش انت اللى بترمى كلام على شغلى...هو انا يعنى فرحانة وانا طول اليوم بره "
عبدالحميد"الواحد ميتكلمش كلمة الا تعملى منها حكاية ورواية...انتى ايه يا شيخة فاضية"
قام عبد الحميد... وميار بتبص لفاتن وتشاورلها على راسها...وبتقول بهمس
"طنشى"
وحدفت لها بوسة وهى بتكمل عشا...ضحكت لها فاتن وردت ببوسة تانية
                         *********************

طه ونرجس ونرمين داخلين شقتهم
وقبل طه ما يدخل اوضته
"طه... استنى...عايزة اسألك سؤال"
التفت ليها طه
"نعم؟"
نرمين"انت ليه مبتثقش فيا"
طه باستغراب"نعم؟؟ مبثقش فيكى؟؟ مين قال كده"
نرمين"اومال ليه على طول ملازم خطواتى كده ورجلك على رجلى ف كل حتة"
نرجس"اخوكى وبيوصلك ويخلى باله منك"
نرمين"اشمعنى انا ...ماكل البنات مش كده...على فكرة انت خليت شكلى وحش اوى...بنات كتير بقوا فاكرينى وحشة من كتر ماانت مراقبنى كده"
طه"بنات مين...ومالنا احنا بالناس...اللى يفتكر يفتكر المهم انا نيتى ايه"
نرمين بزعيق"اسمعوا بقى... انا مش صغيرة...كلها كام شهر وهدخل الجامعة... لو فضلت تودينى وتجيبنى كده زى عيال الحضانة مش رايحة مدرسة ولادروس ولا امتحانات كمان"
نرجس"يا خرابى...وتضيعى مستقبلك"
نرمين"ماهو انا مش عيلة صغيرة اخوها بيراقبها"
نرجس"خلاص ...كله الا تعليمك"
طه"ايه ياماما...مش فاهم يعنى ايه اللى حصل وبعدين هى بتهددنا"
نرمين وهى داخلة اوضتها بتزعق
"اخر كلام عندى قلته"
بعد ما دخلت اوضتها
طه"شايفة طريقتها"
نرجس بضحك وبتطبطب عليه
"اختك الصغيرة وبتتدلع عليك...سيبها براحتها وهى هترجع تقولك ابقى وصلنى"
"انا خايف عليها"
"من ايه...ماهى مبقتش صغيرة وليها حق تتكسف من صاحباتها... يالا هغير هدومى واحضر العشا وانت غير هدومك وادخل راضى اختك وخليها تيجى تتعشا معانا"


هناك 33 تعليقًا:

  1. تحفه يا دودو =‫) تسلم ايدك

    ردحذف
  2. جاااااااااااااااامدة ومستنين الجديد

    ردحذف
  3. dina begd kesasek kolha aktar mn raw3a .. rabna ye5aleeeky le masr =D

    ردحذف
  4. muaaaaa7 .. tslm el2iid elle ktbt .. ^_^

    ردحذف
  5. جميلة اوي ي استاذة دينا بجد تسلمي

    ردحذف
  6. بجد جميله يا دندونه بس كنتي طولتيها كمان حبه

    ردحذف
  7. جميله اوووي اووووووي ♥ ♥

    ردحذف
  8. جميله ربنا يوفقك

    ردحذف
  9. جميييييييييييييييله اوووووووووووى يا دودو تسلم ايديك

    ردحذف
  10. حاسس انها زي الحقيقة والسراب ونرمين هيضحك عليها وترجع تندم وتبقي طيبة
    وهكذا

    ردحذف
  11. جمييييييلة اوي اوي والله تسلم ايديكي

    ردحذف
  12. ع فكرة طه دا راجل اوى ولو فعلا هيتجوز عالية امه واخته هيطلعو عنيها

    ردحذف
  13. جميلة يادودى كل يوم بتعلقينى بقراءة قصصك وادمنتها خلاص بقيت اصحى افتح المدونة واقعد اقرا القصص القديمة لحد ما تنزلى يوميات حماده وبعدها اقرا الحلقة الجديدة وبتابع يوميات حماده من تانى معاكى دودى...............مدمنة قصص دينا عماد

    ردحذف
  14. مبدعة بجد ربنا يوفقك

    ردحذف
  15. مش عارفه ليه يا دينا حسه انها شبه مسلسل الحقيقة والسراب نرجس شبه فيفي عبده ونرمين شبه مي عز الدين

    ردحذف
  16. جميلة اوووووووووي يا دودو :) :) :)
    تسلم ايدك :) :)

    ردحذف
  17. الاسلوب تحفه بس الافكار تقليديه

    ردحذف
  18. بصي يا دينا انا علطول كنت بتابعك وبستنى حلقاتك على نار
    بس القصة ديه مملة اوي يا اما تجري الاحداث يا اما تجري الاحداث بقى

    ردحذف
  19. وااااااااااااااااااااااااااااااااااااو تحفة تسلم ايدك

    ردحذف
  20. يا سلام عليكى يادندونة انا لسة قراه 3حلقات دلوقتى لان كنت مذاكرة وامتحانات
    لاكن لسه امتحان بكره واقرا كل قصصك زى الاول القصة تحفة تسلم ايديك
    بس ياريت تكون اطول من كده
    من \
    ايمى
    الحلقة جميلة جداااااااااااااااااااااااااااااااااااااااااااااااااااااااااااا
    الزرار علق على الالف
    ههههههههههههههههههههههههه

    ردحذف
  21. تحفة بجد وكل قصصك روعة

    ردحذف
  22. جمييله اوىىى ...هى الحلقة الرابعه هتنزل امتى؟؟؟؟

    aya

    ردحذف
  23. وعايزة اعرف اجيب القصص التانيه منيين..انا قريت كذا واحده وبجد حلوييين اوى...وياريت الرابعه بقا تنزل

    aya

    ردحذف
  24. La2 b2a na m2drsh 3la kda bra7a 3lia shwya ya dodo eh bs da bgd nty mafesh zaik ya a7la dodo fy alonya ♥♥






    *Yasmen*

    ردحذف
  25. بجد ربنا يوفقق بس يريت يكون في اختصار شويه ilovedana

    ردحذف
  26. ياريت يكون في اختصار شويه ماشي يا عسل

    ردحذف
  27. حلوووووووووووووووووووووووه

    ردحذف
  28. وفعلا دخلت ع التالتة من كتر التشويق بس لولا الوقت كنت كملت تانى ان شاء الله ابقى اكمل بكرة

    ردحذف
  29. نرجس دي بتفكرني بفيفي عبده في مسلسل الحقيقة و السراب !

    ردحذف
  30. انا مخنوقة من البت نرمين دى وامها ماشية وراها
    خسارة فيكم طه والله

    ردحذف
  31. حلو .. بس انا متلخبطة شوية حاسة ان القصة غريبة اووي
    بس جمييلة بالتوفيق :) استمرري يا مبدعة
    واكيد هغير رايي في الباقي :))

    ردحذف

قول رأيك بلاش تقرا وتقفل من سكات...ارائكم تهمنى