الثلاثاء، 21 مايو 2013

هل يشفع الحب؟... الحلقة 8

الحلقة 8
فاتن قاعدة ف المكتب...عالية قصادها
عالية بتبص ف الارض وساكتة
فاتن بتتنهد وبتقول
"استغفر الله العظيم يارب...انتى هتقدرى البلا قبل وقوعه ليه بس"
بصت لها عالية وهو بتبتسم علشان تمنع الدموع اللى ف عينيها من النزول
"باينة يا ابلة"
فاتن بتحاول تطمنها وغير مش مقتنعة باللى بتقوله
"ردودها دى مش مقياس انها رافضاكى "
"بلاش ردودها...احساسى بمقابلتها بيقول انى معجبتهاش"
"لا اله الا الله...يا بنتى مقابلة ايه اللى مكملتش 10 دقايق اللى خلتك تحسى وتتنبأى بالقرار"
"يارب اكون غلطانة"
"غلطانة ان شاءالله... شوية كده واتصل بطه واشوف"
"لا بلاش يا ابلة الله يخليكى"
"بلاش ليه"
"مش عايزة احرجه"
"انا اللى هتصل مش انتى"
"بس هيبقى واضح انك بتسأليه علشانى...بلاش علشان خاطرى"
"طيب... انا لازم امشى ...متفقة مع ميار هروح بدرى النهاردة شوية"
"طيب يا ابلة...هى عاملة ايه"
"الحمدلله... امتحنت وخلصت والنتيجة ظهرت ونجحت"
"مبروك"
فاتن وهى بتقوم بتلم حاجتها وتاخد شنطتها... وعلى باب المكتب
"لو كلمك ابقى طمنينى"
                         ***********************

عالية ف اوضتها...بتصلى وبتعيط
رن الموبايل... رن رنات طويلة لحد ما خلصت صلاة
اول ما قامت...جريت ع الموبايل بلهفة
"الو"

طه فى العربية...بيتصل بعالية...اتأخرت لحد ما ردت
"الو... ايه ياعالية مردتيش ليه على طول"
"كنت بصلى يا طه معلش"
"تقبل الله"
"منا ومنكم"

لحظات صمت...مرت بسرعة...قطعها طه
"مالك؟"
"خايفة م اللى هسمعه"
"ليه متوقعة هتسمعى ايه"
"زى ما قلت لك...مامتك رفضتنى"
"للدرجة دى مش واثقة فيا"
"مش فاهمة"
"مش واثقة انى بحبك... مش واثقة انى قد كلمتى لما قلتلك هنتجوز"
عالية بتضحك ودموعها نازلة
"بجد؟؟ يعنى مامتك مش معترضة"
"لا يا ستى... هى كل اللى قالته عايزة شوية وقت تفكر نشوف هنعمل ايه"
"براحتها المهم انها مرفضتنيش"
"لا طبعا... هااا قوليلى بقى...بتحبينى زى ما بحبك"
عالية بتدارى فرحتها وبترد عليه مؤنبة
"طه...وبعدين"
"بعدين ايه...مش خلاص كلها حاجة بسيطة وتبقى مراتى"
عالية وهى مكسوفة
"لما ابقى"
وغيرت الموضوع
"انت بتكلمنى منين؟؟انت ف الشارع"
"انا ف العربية... رايح اجيب فلوس من تجار"
"ربنا يسلم طريقك"
"ربنا يخليكى ليا...بقولك عايزك يوم كده ننزل مع بعض نشترى شوية حاجات"
"حاجات ايه...وانت عارف رايي ف الخروج مع بعض يا طه"
"ياحبيبتى هننزل نجيب لك لبس علشان المناسبات اللى جاية لنا ان شاءالله"
                             *******************

نرجس خارجة من اوضتها الصبح
شافت مها ونرمين
"انتوا منتمتوش"
نرمين"لا لسه ...شوية وهننام ونقوم نكمل مذاكرة"
نرجس"واحدة فيكم تعملى كوباية شاى قبل ما انزل"
مها"مالك ياطنط...شكلك مقريفة كده ليه"
نرمين"هتنزلى بدرى ليه"
نرجس بعصبية"هروح للهبابة اللى لايفة على اخوكى علشان اخليها تتلم وتبعد عنه"
مها بفرحة بتتابع الكلام
نرمين"هتروحى لها فين"
نرجس"ف الملجأ اللى عايشة فيه ...وقعت طه ف الكلام وعرفت العنوان"
مها ونرمين ف وقت واحد
"ملجأ!!!"
نرجس"آآآه شفتوا الخيبة"
مها"يعنى اهلها فين"
نرجس"ميتين"
مها"لو ليها اصل من اصله"
بصت لها نرجس بتساؤل...ردت مها
"مش ف اللى بيلاقوه ف الشارع بيودوه ملجأ"
سكتت نرجس بتفكر ف كلام مها
"يالا الحقونى بكوباية شاى قبل دماغى ما تضرب لحد ما ادخل الحمام والبس"

راحت نرجس دخلت الحمام... ودخلت مها ونرمين المطبخ
                 ********************

نرجس على باب الملجأ... بتتكلم مع بتاع العامل
العامل بيشاور لها على الجنينة

نرجس ماشية ناحية الجنينة اللى بيلعبوا فيها الاطفال
عالية ضهرها ليها ووشها للاطفال... نرجس بتقرب ناحيتها
وقفت وراها
"عالية"
التفتت عالية...اتفاجئت
"اهلا يا طنط"
الف سؤال بيدور ف راس عالية... طه كان بيتهرب من انه يحكى لها تفاصيل الكلام اللى دار بينه وبين مامته
ياترى هى عارفة ايه...الحقيقة ولا انها بتشتغل ف الدار
فاجأتها نرجس
"اتضايقتى لما شفتينى ولا ايه"
"لا ابدا...اتفضلى حضرتك"
قعدت معاها نرجس...وهى بتبص حواليها
"انتى عايشة هنا بقى"
تلعثمت عالية...مش عارفة ترد
"طه حكالى... بس عايزة اعرف منك حكايتك ايه"
"حضرتك عايزة تعرفى ايه"
"انتى مين اللى جابك هنا وملكيش اى قرايب خالص"
عالية وهى حاطة وشها ف الارض والكلام بيطلع بصعوبة
"انا كل اللى اعرفه انهم لقونى ف مستشفى حكومى وكان عمرى يوم ... اللى لقونى سلمونى ف القسم ومن القسم لملجأ للتانى للتالت لحد ما جيت هنا"
نرجس متفاجئة... بتحاول تسيطر على اعصابها
"لو انتى مكانى...هترضى تجوزى ابنك لبنت ح.. قصدى يعنى لبنت مالهاش اهل"
الدموع نازلة من عين عالية ومش بترد

ف نفس الوقت...فاتن خارجة من مكتبها رايحة لعالية
شافت واحدة قاعدة معاها... شكلها مش من الدار
قربت منهم تشوف مين دى وجاية ليه

قربت فاتن...على بعد خطوات...اتواجهت مع نرجس
فاتن المفاجئة عقدت لسانها
نرجس لما شافت فاتن...قامت واقفة بعصبية
"انتى بتعملى ايه هنا؟"
"ازيك يا ابلة نرجس... انا مديرة الدار"
فاتن بتمد ايدها تسلم على نرجس...نرجس مسلمتش
"آآآآآآآآآآآآآه... قلتوووووولى ...هى الحكاية كده بقااااا"

قامت عالية وقفت مذعورة من نرجس اللى تحولت فجأة
فاتن بتبص لها بابتسامة خفيفة... لانها عارفة طريقتها كويس
"انتى مديرة الملجأ... تبعتى لى واحدة صايعة تلوف على ابنى علشان تنتقمى منى...طول عمرك غلاوية وبتكرهينى"
عالية بتبص حواليها على الموظفين اللى بيبصوا من شبابيكهم واللى خرجوا من مكاتبهم على مصدر الصوت
فاتن"واكرهك ليه بس... اهدى وتعالى مكتبى نتكلم"
نرجس"مكتب...مكتب ايه يا ام مكتب...ده انا لولا فلوسى مكنتيش كملتى تعليمك"
فاتن بترد بضيق
"بابا الله يرحمه هو اللى علمنى وجوزنى قبل ما يموت...محدش له فضل عليا"
نرجس بترد بصوتها العالى
"اسمعى بقى انتى وهى... خطتكم دى مش هتعدى عليا... سامعيييييين"
وبصت لعالية
"وانتى... اوعى تفتكرى ان ممكن اجوز ابنى لواحدة زيك لا ليها اصل ولا فصل ولا حد عارف جيتى من انهى داهية"
وبصت لفاتن"اوعى انتى كمان"
زقت فاتن ف كتفها وهى ماشية وخارجة من باب الدار

عالية منهارة من العياط... فاتن بتبص حواليها
بتطبطب على عالية
"روحى اغسلى وشك وتعالى...متعيطيش"
"انا مش قلتلك يا ابلة... انا كنت حاسة...الله يسامحك يا طه"
"طه ذنبه ايه بس"
"مقاليش الحقيقة انها مش عايزانى... ولما هو حكى لها كل حاجة عنى مقاليش ليه... ليه يسبنى اتفاجئ بيها هنا كده ليه"
عالية بتعيط... فاتن نادت لواحدة من العاملات
"خلى بالك من البنات ...روحى ياعالية اغسلى وشك وتعالى المكتب"
                    *********************

عالية قاعدة قدام فاتن... بتحط كوباية عصير خلصت قدامها ع المكتب
"شكرا يا ابلة"
"العفو"

دخل طه المكتب عند فاتن ملهوف
"فى ايه يافاتن... عالية حصل لها حاجة"
اتفاجئت عالية بطه... بصت له بغضب وقامت
فاتن"استنى ياعالية"
طه مش فاهم حاجة"فى ايه"
فاتن"انا اتصلت لطه علشان لازم يعرف اللى حصل...واللى انا متأكدة انه ميعرفش حاجة عنه"
انفجرت عالية ف العياط تانى... وقعدت مكانها
طه مش فاهم ولا عارف يوجه كلامه لمين
"فيه ايه فهمونى"
وحكت فاتن لطه اللى حصل بالظبط
طه لعالية" وانتى متخيلة انى كنت اعرف حاجة زى دى وسكت؟؟"
عالية"وهى عرفت كل حاجة منين"
طه فكر" انا مقلتلهاش حاجة غير ان اهلك متوفيين... وف وسط الكلام سألتنى انتى ساكنة فين؟؟على مكان الدار يعنى قلتلها"
فاتن"مامتك مش غبية يا طه... عرفت توقعك بالكلام وتوقع عالية بالكلام وربطت كله ببعضه"
طه وهو قايم"بصى يا عالية... انتى موافقة عليا ايا كانت ظروفى ولا لأ؟"
عالية"يعنى ايه ايا كانت ظروفك؟"
طه"يعنى لو اخدتك وروحنا بدأنا حياة بسيطة... موافقة ولا لأ؟"
عالية"شايفنى زى ما مامتك شايفانى...انى عايزة استغلك؟"
طه"كل اللى قصده هتقدرى تتحملى معايا اى ظروف"
عالية"ايوه"
طه وهو رايح ع الباب
"لو ماما فضلت رافضة...هنقل شغلى اى محافظة بعيد عن هنا ونكتب الكتاب واخدك معايا"
خرج طه من المكتب وعالية مستغربة
فاتن بتبص لها ومبتسمة
"مخيبش ظنى فيه... غير امه خالص ...ربنا يحميك يا اخويا... مبروك يا عالية"
                      **********************

نرجس بتفتح الباب وتدخل
شافت مها ونرمين قاعدين
نرجس"هو فين؟"
نرمين"ف اوضته"
دخلت نرجس مندفعة وفتحت اوضة طه
"فى ايه؟؟؟ مجيتش المحل ليه زى كل يوم؟"
"علشان الكلام اللى لازم نقوله مينفعش يكون ف المحل"
"كلام ايه"
"روحتى لعالية ليه"
"آآآآآه... ودودتلك وقومتك عليا...قالتلك ايه الكذابة دى"
"فاتن اللى حكت لى اللى حصل"
"يا بنى فوق ...دول عاملين عصابة مع بعض... فاتن وَزت بنت الحرام دى عليك علشان عارفينك طيب"
"ماما لو سمحتى متتكلميش عنها كده... هى مالهاش ذنب ف اى حاجة حصلت... مش ربنا قال لا تزر وازرة وزر اخرى...عايزة تاخديها بذنب ناس هى متعرفهمش ليه"
"العرق يمد لسابع جد... زى ما امها رمتها قبل كده هى مش هيبقى لها امان"
"مش شرط...وبعدين ايه دخل فاتن بالموضوع كله"
"هى اللى مخططة كل حاجة"
"مش صحيح انا شفت عالية قبل ما اعرف ان فاتن تعرفها"
نرجس بتقعد على طرف السرير
"يا بنى فكر ... انت شفت البت دى ف المحل اللى فاتن عارفة مكانه كويس... وشفتها تانى ف الملجأ اللى اكيد فاتن هى اللى قالتلك تروح"
"اولا انا شفت عالية اول مرة خالص ف الشارع وهى رايحة الجامع... هنعدى مرة المحل ويوم اليتيم انا اللى قلت لفاتن انى رايح"
نرجس بنفاد صبر"الموضوع منتهى...جواز من البت دى مش هيحصل"
طه وقف لحظات... وفتح الدولاب طلع شنطة وبدأ يحط فيها هدومه
"تمام...الموضوع فعلا منتهى"
نرجس باستغراب وقلق
"انت بتعمل ايه"
"هسيبلك كل حاجة علشان تطمنى ان عالية وفاتن مالهمش دعوة ... لا هسكن ف الشقة اللى جيبتهالى ولا هاجى المحل بتاعك... هقعد ف اى فندق لحد ما انقل شغلى واكتب كتابى على عالية واخدها ونبعد خالص"

هناك 42 تعليقًا:

  1. جااااامده يا دودو تسلم ايدك
    بس طه ده جدع اؤؤى بجد :)

    ردحذف
  2. جمييييييله جدا بس طه فعلا راجل

    ردحذف
  3. تسلم ايدك...حلوه اوى الحلقه :)

    ردحذف
  4. بصراحه طه راحل اوى اوى ربنا يحميه لها

    ردحذف
  5. تحفه ماشاء الله مستنيه اللي بعدها بسررررعه

    ردحذف
  6. ايوة بقة عجبني اوي طه وانو متمسك بعاليه ونرجس دي بردة اوي اصلا ^_^

    ردحذف
  7. القصه روووووووووووووووووووووووووعه يادندن .. تسلم ايديك

    ردحذف
  8. gamdaaaaaaaaaaaaaaaaaaaa aweeeeeeeeeeeeeeeeeeeeeeeeeeeeeeeee

    ردحذف
  9. حلوتك يا طه ايوه كده ادينى ف الجامد وانا احبك يا نيتى

    ردحذف
  10. رااااااااااااااااااجل
    roobe

    ردحذف
  11. نرجس دي فكرتني ب فيفي عبده ف مسلسل الحقيقه والسراب :D
    تسلم ايدك يا دندون ... مستنيه حلقه بكره بفارغ الصبر ...

    ردحذف
    الردود
    1. ههههههههههههههههههههههههههه يابا اشطه

      حذف
  12. حلوه اوووي يا دينا
    و طه ده بجد محترم

    ردحذف
  13. to7faaaaaaa <3 <3
    Taha dah to7fa :D

    ردحذف
  14. تحـــــــــــــفة يادينا تسلم ايديك
    وطه طلع راجل اوى ومحترم
    يارب يكون فيه منه كتير ف الزمن دة ^_^

    ردحذف
  15. هو في زي طه ده دلوقتي !!

    ردحذف
  16. راااااااااااااااااااااااااااااااااااااااااجل وابن راجل :) ونرجس دي عايزة تتحرق بس خوف على ابنها بردو يلا بقى دنيا :D تحححححححححححححححححححفة يا دندون تسلمي مستنيه الباقي

    ردحذف
  17. يا دينا انا اول مرة احط تعليق عل المدونة انا عرفت المدونة بتاعت من شهرين ودخلت وبدأت اقرأ في القصص القديمة بصراحة لما كنت بقرأ القصص متجمعة كنت بحس بيها واني عايشة جواها لحد ما خلصت كل القصص وبدأت اتابع القصص اليومية بصراحة مش حاسة بالقصص نهائيا والحلقة مش بتعمل معايا 5 دقايق قراءة ياريت لو تقدري تنزللنا مثلا في نهاية كل اسبوع 5 او 6 حلقات هتبقى احسن بكتييييييييييييييييييييير وارجو انك تتقبلي مروري وبجد انتي انسانة مبدعة حتى كمان كلمة مبدعة مش قادرة توصفك وربنا يوفقك

    ردحذف
  18. بجد طه ده راجل جدا جدا جدا

    ردحذف
  19. رائعه جدااااااااااااااااااا
    وطه راجل بمعني الكلمه .... :)

    ردحذف
  20. بغض النظر عن كــل الألم والوجع فى الموضوع الا ان طــه ده راجل بمعنى الكلمة ..وعندى يقين غريب ان بنت نرجس دى هتجيب للبيت مصيبة سودا

    جـــوبـا

    ردحذف
  21. جميلة يادوندن استمرى واحنا معاكى

    ردحذف
  22. طه بجد موقفه رجوووووووووووولى جدا ودى اكتر حاجة بتنجح اى علاقة مش معارضة الام لا الوقوف مع الحق ومحاولة تفهيم الطرف التانى وجهة النظر

    ردحذف
  23. جميلة جدا وعلي الرغم من انها قصيرة بس جميلة جدا

    ردحذف
  24. الحلقه تحفه.....ياترى هيعملو ايه

    ردحذف
  25. راااجــل بجــدد :)
    الحلــقةة رووووع’ــةة ^__^

    ردحذف
  26. طه ده جنتل اووووووووووووووي
    وعاليه تستاهل راجل زي ده
    صبانه عليا اوي عاليه

    ردحذف
  27. رااااااااااااااااااااجل اووووى

    ردحذف
  28. بصي بقي انا هقولك اللي هيحصل عالية هتلاقي اهلها وهيطلعوا ناس كويسين ونرجس تقول اخس عليا دا انا كنت ظلماها صحيح يقطعني وتوافق ونرمين هتودي مها في داهية وتوتة توتة خلصت الحدوتة شوفيلك غيرها بقي

    ردحذف
  29. اللى زى طه دول اللى بجد يتقال عليهم رجالة بجد مش بكلام لأن الرجالة افعال مش اقوال و هو كل حلقة بيثبتلى انه راجل بافعاله ة فعلا عالية تستاهل حد زى كده و ان شاء الله الموضوع يتم بس ربنا يستر من نرجس

    ردحذف
  30. رائــــــــــــــــــــــــعــــــــــــــة

    ردحذف
  31. حلوه الروايه جدا بسم الله ما شاء الله بتعرفي تبدعي في الكتابه

    الى الامام دائما يا جميل ^_^

    ردحذف
  32. جمييييييله ومشوقه اووووووووووووووى

    ردحذف
  33. راجل ي طه

    ردحذف
  34. راجل ياطه وبهد عن المره امك

    ردحذف
  35. جميله اوى يا استاذه دينا


    طه راجل بصحيح كد نرجس هتلم الدور وتكن لانوا هو ابنها الوحيد ومتقدرش تستغنى عنوا
    "manar"

    ردحذف
  36. اوعدنى يااااااااارب بواحد زى طه :)

    ردحذف
  37. هو مفيش طه تاني ليا

    ردحذف
  38. بقولك ايه يا دينا ونبي ركزي معايا بقي كده وخلي الواد الي واقف وراكي يروح يلعب ف حته تاني و خلصي كوبايه الشاي اليمعاكي دي وانجزي عشان انا هقول كلام بيهدد امن البلد !!! (ان ان ااااااان)......بصي قي ياستي بخلاف ان الكومنت بتاعي جه متأخر اوي بس معلش انا بقرالك من يومين بالضبط وادمنت قصصك مش مأفور ولا حاجه ولاهي دي الحقيقه و انا عايز اعترفلك بحاجه !!!!

    علــــــــــــــــــــــــــيا الطلاق انتي ست ميه الميه الميه الميه واســـــــــــــــــــــــــــيادنا راضيين عليكي و بعدين انتي برنس كبيير يعني ......ايه ده؟؟؟؟؟؟ ايه يسطي الحلاوه دي!! بسم الله ماشاء الله عليكي يعني طب تصدقي ويبنا انتي خساره ف البلد دي و......بس كده ^_^

    ردحذف

قول رأيك بلاش تقرا وتقفل من سكات...ارائكم تهمنى