السبت، 1 يونيو 2013

هل يشفع الحب؟... الحلقة 16

الحلقة 16
عالية قاعدة وماسكة التليفون بتتكلم
"ايوه موافقين...شكرا ياماما ربنا يخليكى ... حاضر هقولك اكيد... مع السلامة"

قفلت معاها ...رفعت ايديها للسما
"يارب انت عالم بحالى...يارب ارزقنا ولو بطفل واحد بس... مش طالبة اكتر من كده... يارب انا مش معترضة على حكمك...انا خايفة على بيتى وجوزى يروحوا منى...يارب مليش غيرك"

اخدت نفس سيطرت بيه على اعصابها...حاولت ترسم ابتسامة علشان حزنها ميبانش ف صوتها
واتصلت بطه
"الو... عامل ايه؟؟ مش هعطلك كتير... انا كلمت مامتك وقولتلها اننا موافقين وقالت نحجز مع الدكتور وهى جاهزة...ان شاءالله خير... ماشى يا حبيبى متتأخرش...مع السلامة"

قعدت عالية مكانها تبص لبيتها حواليها...ولصورتها هى وطه اللى على الحيط...ابتسمت وهى بتفتكر يوم فرحهم

قاطع تفكيرها صوت جرس الباب...قامت تشوف مين؟

عالية بتفتح الباب...ابتسمت بفرحة وترحيب
"ابلة فاتن...اهلا وسهلا"
سلمت عليها فاتن وهى داخلة
"ازيك ياعالية...عاملة ايه"
دخلت فاتن وقعدت هى وعالية
"الحمدلله...الله ع المفاجئة الحلوة"
"كنت بعمل كام مشوار كده وخلصتهم بدرى قلت اعدى عليكى اسأل عليكى"
"ده انتى نورتينى والله...تشربى ايه"
                  ********************

عالية وفاتن قاعدين وقدامهم فناجين القهوة فاضية
"وده معقول يا عالية...توافقى على شرط زى ده بنفسك"
عالية وهى بتتصنع اللامبالاة
"الحوجة مُرة وخلاص هى معاها حق..ده اخر امل لينا"
"يعنى ايه؟؟هتتطلقوا"
ردت عالية بسرعة
"لا... لوعايز يتجوز يتجوز بس ميطلقنيش"
وعيطت عالية
"انا مقدرش اتخيل حياتى من غير طه"
                       ********************

نرجس داخلة البيت...اول ما مها ونرمين يسمعوا صوت الباب من الاوضة ...يطلعوا يجروا عليها
نرمين"حمدالله ع السلامة ياماما"
مها"ازيك ياطنط"
نرجس"الحمدلله"
نرمين"هحضرلك العشا ونتعشا مع بعض"
نرجس بتبص لهم
"مالكم...مش على بعضكم ليه؟"
مها ونرمين بيبصوا لبعض ويضحكوا
وهما الاتنين" مالنا...عاديين اهو"
نرجس"طيب...يارب دايما عاديين كده"
مها بتغمز لنرمين بمعنى اتكلمى...شافتها نرجس
"جرى ايه يا بت منك ليها....مالكم ...انطقوا"
نرمين"قوليلها يا مها...مكسوفة"
مها"مكسوفة...من امتى ياختى"
تضربها نرمين وهى بتضحك...تتنرفز نرجس
"هنقضيها مياعة ولا هتنطقوا فيه ايه"
مها"اصل يا طنط...كان لينا واحد زميلنا ف الكلية...بس اكبر مننا يعنى... من زمان وهو بيحب نرمين وعايز يتقدم لها"
قعدت نرجس وسألت بأهتمام
"مين ده؟؟ وبيشتغل ايه وابن مين"
قعدت نرمين جنبها
"هو بيشتغل ف مصنع حاليا وباباه موظف عادى ومامته ست بيت...ناس عاديين يعنى ياماما"
نرجس"كحيان يعنى"
نرمين"مش كحيان ولا حاجة...شاب عادى لسه بيبدأ حياته"
نرجس وهى قايمة
"وايه اللى يرميكى الرمية دى...انتى كده قاعدة لما يجيلك اللى يستاهلك"
نرمين شاورت لمها..والاتنين مشيوا وراها
مها"ياطنط بس هو بيحبها...وهى كمان"
نرجس بتلتفت لنرمين
"هى كمان ايه؟"
مها بتلحقها"يعنى هى كمان عايزاه... مش احسن ما تتجوز واحد مبتحبوش وبعد الشر يتطلقوا...انما لما تتجوز واحد بتحبه اكيد هيبقوا مبسوطين مع بعض"
نرجس"هياكلوا ويشربوا حب... هيسكنوا بالحب...هيفرشوا بيتهم حب"
نرمين بتعيط"علشان خاطرى ياماما وافقى...انا وهو بنحب بعض وبعدين انه عايز يتقدم مش احسن ما نفضل نحب بعض من وراكم"
مها"صح ياطنط...يعنى بترفضوا الصح وبتدفعوهم للغلط"
كانت نرجس ف اوضتها وهما لسه وراها
"سيبونى افكر مع نفسى واخد رأى طه"
نرمين"طه ماله..المهم انتى"
نرجس بشخط"اخوكى الكبير وراجل البيت والكلمة كلمته... مش معنى انى مكنتش بخليه يمشى كلامه عليكى انك تنسى انه راجل البيت"
سكتت نرمين...وقالت بصوت واطى
"المهم كلامك هو اللى هيخليه يوافق او يرفض"
نرجس"بس نخلص من عملية مراته وبعد كده ربنا يحلها"
                      ********************

طه ونرجس قاعدين مع طارق
طه"يعنى برضه مش فاهم...ناوى على ايه"
طارق"ما انا بقولك انى لسه بادئ شغل قريب ومرتبى 900جنيه اول عن اخر"
طه"ماشى... هتجيب شبكة امتى...هتجيب شقة امتى... جاى تتجوز ازاى يعنى"
طارق"انا جاى وعارف اننرمين فهمتكم كل حاجة"

مها ونرمين ف المطبخ واقفين ع الباب وودانهم بره
عالية بتحضر صينية الجاتوه

مها"اخوكى شكله هيبوظ الدنيا"
اتضايقت عالية من كلام مها وسكتت على مضض
عالية"خدى يانرمين طلعى الصينية"
نرمين وهى بتاخد الصينية
"هاتى...علشان ألحق طه"
اخدت نرمين الصينية وراحت تقدم لطارق
كانوا بيتكلموا
طه"ازاى تتخطبوا وربنا يسهل بعد كده...لما نرمين قالت هتيجى لوحدك نتفق الاول مكنتش فاكر انك لسه تحت الصفر كده"

نرمين"طه ثوانى لوسمحت"
طه"بعدين يانرمين"
نرمين"لا دلوقتى ياطه"

قام معاها...نرجس استأذنت من طارق وقامت وراهم
راحوا يتكلموا ف الطرقة قريب من المطبخ
ولما قربوا مها راحت لهم
نرمين"انت عمال تكلمه كده ليه...زى ماتكون بتتلكك له"
طه"انتى شايفاه ينفعك؟"
نرمين"ماله؟"
طه"ده محيلتوش اى حاجة...ده عايز يخطبك كده بدبلة من غير ما نتفق على اى حاجة"
"ايه المشكلة يعنى"
"ايه اللى ايه المشكلة... ده مايناسبكيش يا نرمين... فيه فرق كبير بيننا وبينه"
واتكلمت نرمين بعصبية وهى بتعيط
"والله؟؟ ومقلتش الكلام ده لنفسك ليه وانت اتجوزت واحدة من ملجأ"
اتنرفز عليها طه...ورفع ايده يضربها
"اخرسى يا قليلة الادب"
جريت عليه عالية تحوشه...وشدت نرجس نرمين بعيد عنه
نرجس"انتوا اتجننتوا...هتفضحونا قدام الراجل"
طه وهو بيبعد عالية عنه
"خلاص...مش انتى عايزاه...مترجعيش تعيطى وتشتكى"

راح طه بعصبية وقعد مع طارق
"انا مراتى هتعمل عملية الاسبوع الجاى ومش ضامن ظروفى بعدها... خلال يومين تلاتة بالكتير هات اهلك ونقرا الفاتحة"
                      *********************

عالية داخلة البيت...وطه بيسندها
ووراهم نرجس شايلة شنطة هدوم

سبقتهم نرجس ع الاوضة... عدلت السرير لعالية
طه بيسند عالية وهى بتنام على السرير

نرجس"ربنا يكملك على خير... واسمعى كلام الدكتور ومتتحركيش كتير"
عالية"حاضر"
طه بيقول لنرجس
"ماما...انا مش هعرف اجى المحل زى الاول... مش هينفع اسيب عالية طول اليوم"
نرجس"اه طبعا...مش مهم ...هعمل اعلان اشوف اى بنت تيجى تساعدنى ف المحل وعلشان كمان ابقى اجى اطمن عليها او لو عايزة حاجة اعملها لها"
عالية مش مصدقة اللى بتسمعه
"شكرا ياماما...مش عايزة اتعبك"
نرجس"احنا اللى مش عايزينك تتعبى ولا تتحركى زى الدكتور ما قال...كفاية اوى المتابعة اللى هتروحيها له"

رن جرس الباب
طه"هروح اشوف مين"

راح طه يفتح الباب
كانت هدير وبناتها قدامه
"سلامو عليكو"
"اهلا وسهلا ...اتفضلى"
هدير وهى ع الباب
"انا روحت لكم المستشفى قالوا لى لسه ماشيين"
طه وهو بيوسع لها تدخل
"اه فعلا لسه جايين ...اتفضلى عالية جوه"

هدير دخلت على اوضة عالية..شافت نرجس قاعدة...خافت من اللى ممكن تسمعه من نرجس...وبانكسار
"سلامو عليكو"
نرجس"اهلا وسهلا...اتفضلى"
هدير برقت من الاستغراب والمقابلة الحلوة اللى بتقابلها نرجس
سلمت عليها ذوقيا
"ازى حضرتك ياطنط"
نرجس"الحمدلله يا بنتى...ماشاءالله مين القمرات دول"
هدير وهى بتبص لعالية وعايزة تقولها مين دى؟ نرجس ولا واحدة شبهها
هدير"عالية وهنا بناتى"
نرجس"ربنا يخليهوملك ويقومك بالسلامة"
هدير"ربنا يخليكى... وان شاءالله عالية ربنا يكملها على خير"
قعدت هدير جنب عالية بعد ما سلمت عليها...واتكلموا كلهم ف مواضيع عادية..ولما حكوا ان الدكتور قال متتحركش كتير وان طه هيقعد معاها وميروحش المحل
هدير"والصبح متشيلوش همه...انا هجيلها كل يوم الصبح شوية"
نرجس"وبيتك وجوزك وعيالك"
هدير"عيالى معايا وجوزى بيرجع بالليل من الشغل...يعنى انا لو جيت لعالية ساعتين تلاتة الصبح اشوف طلباتها مش هيأثروا على بيتى ف حاجة"
نرجس"ربنا يقويكى ويديكى الصحة...صاحبتك جدعة اوى يا عالية"
عالية وهى بتبص بحب لهدير
"هدير اختى واكتر من اختى"
هدير وهى بتبص لعالية
"احنا مالناش غير بعض"
                      ***********************

طارق ونرمين قاعدين مع بعض ف كافيه
طارق مكشر ونرمين بتكلمه
"مالك يا طارق...كل ما اكلمك ترد عليها بغلاسة كده"
"يعنى انا غلس؟"
"كلامك وطريقتك معايا وحشة جدا"
"واللى حصل من اخوكى كان حلو"
"ايه اللى حصل ماهو نفذ اللى احنا عايزينه واتخطبنا"
"بعد ما حسسنى انه مش طايقنى لا انا ولا اهلى"
"اخويا معملش حاجة لاهلك بالعكس هو استقبلهم بكل ذوق"
"لا كان مبوز ف وشنا"
"هو عنده ظروف شاغلاه ومراته كانت رايحة تانى يوم تعمل عملية ...يعنى مكنش كبوز لكم انتم مخصوص...وبعدين يعنى هنفضل نتكلم على اخويا ولا نتكلم عن نفسنا"
"ما انا متضايق ...اعمل ايه "
"معلش علشان خاطرى متتضايقش...خلينا نفرح ببعض مش نعكنن على بعض"
طارق بيرد عليها بالعافية
"طيب"
                       ********************

طه داخل الاوضة وعالية ع السرير قدامها التليفزيون
"حبيبتى ...انا اسف انى اتأخرت عليكى"
بيقرب منها يبوسها من راسها
"حمدالله على سلامتك"
قعد قدامها
"الله يسلمك...ها عاملة ايه؟"
"الحمدلله كويسة"
"هدخل اخد دش سريع واجى اغير هدومى علشان نلحق معاد الدكتور"
"طه...انت لسه جاى من السفر...نام ساعة ولا حاجة ونأجل معاد الدكتور لبالليل متأخر"
"لا نروح نطمن وبعدين لما نرجع ابقى انام براحتى"
"انا مش عارفة اقولك ايه"
"على ايه"
"طول الشهر ونص اللى فاتوا وانت ومامتك وهدير شايلنى على كفوف الراحة...انا حاسة انى تعبتكم كلكم"
"متقوليش كده... احنا بنحبك وبنخاف عليكى وياما انتى عملتى لنا كلنا ...المهم بس ان ربنا يكملك على خير ويرزقنا باللى نفسنا فيه"
"يارب... انا كل ما بصلى او وانا قاعدة بدعى ربنا ان يرزقنا الذرية الصالحة ويكملى على خير"
                         *******************

عالية وطه ونرجس عند الدكتور
عالية على سرير الكشف والدكتور بيعمل السونار
طه ونرجس عينيهم على الشاشة
عالية عينيها على الدكتور اللى لاحظت انه كَشر فجأة
عالية"فى ايه يا دكتور"
الدكتور"للاسف...الجنين مش بينمو نهائى"
طه بصدمة"يعنى ايه"
الدكتور"ربنا يعوضكم ان شاءالله...الجنين لازم ينزل"
قام الدكتور وراح قعد على مكتبه
بصت عالية لطه... وهى بتعيط بحرقة وبصوت عالى
طه بيحاول يدور على كلام يقوله لعالية...مطلعش منه كلام ...نزلت دموعه
نرجس بتعيط من غير ما تتكلم
عالية وهى بتعيط
"كان نفسى اخلف يا طه...كان نفسى ابقى ام ولادك... كده خلاص اخر امل لينا راح"
طه بيحضنها
"متقوليش كده...ان شاءالله ربنا هيعوضنا"
"انا بحبك اوى...واللى انا فيه ده غصب عنى"
"انا عارف...قدر الله وماشاء فعل...هنحاول تانى الحياة مبتقفش"
التفتت لهم نرجس
"تحاول تانى ف ايه... ربنا مش رايدلكم خلفة من بعض وربنا مبيتعاندش... ومعدش ييجى منه محاولات تانية...انا ذنبى ايه تحرمونى من انى اشوف ولاد ابنى... احنا اتفقنا اتفاق ولازم يتنفذ"
طه وهو بيطبطب على عالية
"انا مقدرش اسيب عالية ابدا...ابدا يا ماما"




هناك 40 تعليقًا:

  1. بجد رووووووعة
    بس حرام عليا دي بجد
    الحلقة مؤثرة اووووووووووووووووووووووووووي

    ردحذف
  2. حرااااااااااااااااام :/ :/ :(

    ردحذف
  3. ليه بس يا دينا كدا صعب اوى كل ما احس الدنيا حتبقى حلوه تبوظ تانى مش. لازم واقعيه اوى كدا عاليه صعبانه عليا اوووووووووووى

    ندى احمد

    ردحذف
  4. لييييييييييييييييييييييييييييه يا دينا
    مافي ناس بتعملها وتنجح :( :(

    ردحذف
  5. هعيط بجدددددددددددددددد

    ردحذف
  6. سبحان الله القادر علي شيء
    حكمتك يارب

    ردحذف
  7. كفاية بقي و النبي خليها تخلف ده انا بقيت ادعيلها و الله

    ردحذف
    الردود
    1. هههههههههههههههههههههههه

      حذف
  8. انا كنت خلاص هفرح واقول ربنا هيعدلهالها وخلاص وبعدين قلبت وحش كده تانى :(

    ردحذف
  9. يا عينى عليكى يا عالية .............. ربنا يعوضك خير و يرزقك بالذرية الصالحة و يا رب يحنن قلبك يا نرجس علشان خاطر البت الغلبانة ديه ياااااااااااااااااااا رب

    ردحذف
  10. 7l2aaa gamelaa awiiiiiiii :(((

    ردحذف
  11. انا خلاص فقدت الامل انها تكون نهايه سعيده دي قصه ماساويه اوي اوي

    ردحذف
  12. والله يا دودوديما بتتحفينا بكتاباتك وقصصك كده والله بجد الحلقه كانت حلوه اوي اوي

    والله زعلت عشان عاليه اوي اوي يا خساره بس انا متاكده انها هتخلف ان شاء الله

    ردحذف
  13. بقى كده يا دينا :D انا قلت الدنيا هتحلو مع عالية يحصل كده متخلهاش قصة ماسوية بقى
    بس عموما قصصك روعة وجامدة وبستناه كل يوووووووووووووووووووووم ربنا يوفقك

    ردحذف
  14. فى ايييييييييييييه
    ما نرجس كان حلها اتصلح
    هو احنا قرينا عليها ولا ايه
    ده انا مصدقت انها بقت كويسة
    حرام عليكى بجد يا دينا
    طب كنتى تكمليها الحلقة دى بس كويسة
    حرااااااااااااااااام

    ردحذف
  15. ليه بس كده الجنين ينزل ليه :( انا نفسى يكملوا سوا
    طب طمنينا بسرعه ايه اللى هيحصل بقى ياريت يا دينا :)

    ردحذف
  16. حرام عليكي يادينا بقا انتي بتفرحيها نص ساعه وبعدين تعكنني علينا حرام بقا يارب النونو مش ينزل يارب اهو كلنا بندعيلها

    ردحذف
  17. وبعدين بقى؟؟ لحد امتى الدنيا هتفضل واقفة ف وشهم كده ده انا كنت لسه هفرحهلم

    hadil gasser

    ردحذف
  18. لا تعليق

    ردحذف
  19. مش عندي تعليق غير اني قلبي وجعني اووووووووووي

    ردحذف
  20. Dinaaa =((( ow3i tegawezih Maha ya Dina =(
    W Akeed awel mayetgawezha 3alya 7ate7mal

    ردحذف
  21. الخلقات صغيره اوى نزلى حلقتين انا هموت واعرف هيحصل ايه

    ردحذف
  22. يا عينى عليكى يا عالية :(
    صعبت عليا اوى :'(

    ردحذف
  23. ايوة بقي يا دودو.... لازم يبقي ليه موقف كدة ... بس صعبانة عليا اوي :( :(

    ردحذف
  24. leeeeeeeeeeeeeh kda bs ya dndon :(

    ردحذف
  25. ♥ديناعماد♥2 يونيو 2013 في 12:12 م

    يا عينى دى عاليه دى معندهاش حظ خاااالص اهىء اهىء
    دامفيش حلقه فضلت عاليه فيها بتضحك لحد اخرها

    ردحذف
  26. متاكدة انو هيتجوز مها دي و هتخلف عيل تزل بيهم عالية المسكينة

    ردحذف
  27. leeh keda bas ya deena .. :( wnbii 5lii nhaytha s3eeda msh m2sawiia keda .. :S ana s3bana 3liiaa awiii 3aliia .. :((

    ردحذف
  28. ااااه قلبي وجعني وبكيت غلي عاليه ايه ده يااااارب تخلفي ياعاليه وتبقي احلي ام

    ردحذف
  29. والله العظيم يا دينا انتي مبدعه وفنانه بجد انا اول مره اعلق وبقولك ان كل قصصك جميله جداااااااااا والحلقه في منتهى الروعه

    ردحذف
  30. حرام بجد انازعلانة اوى يارب يعوضها ان شاء الله خير ربنا قادر على كل شئ
    تسلمى يادندونة بجد روعة وحزينة طلبى الوحىد منك انك تخلى عالية تخلف من طه
    لان الحب الا بينهم كبير اووووووووووووي ويارب يحنن قلبك يانرجس
    بجد فلبى وجعنى اوووووووووووووووووووووووووووووووووووى

    ردحذف
  31. عليا النعمه انا بقيت بدعى لعاليه انها تحمل اكتر مبدعى لاي حد تانى خليها تبقي حامل بقي :(

    ردحذف
  32. ارجوكي خليها تحمل خلي يبقي عندنا امل لان انا عندي نفس المشكله

    ردحذف
  33. حراااااااااااااااااااااااااااااااااااااااااااام بجددددد كداااا :/ :/

    ردحذف
  34. أمانه عليكي تنزلي الحلقه الجديده قبل الساعه 12 :( :( :(

    ردحذف
  35. يحرررررررررررررررق سنينك يا نرجس :( طه دا راجل بجد

    ردحذف
  36. حد يموت الوليه الى اسممها نرجس دى ولا يديها بوكس ف بوقها

    ردحذف
  37. لالالالالالالالالا حرام كده معقول ده بيحصل في الواقع ولا ده كلام رويات

    "manar"

    ردحذف
  38. ناما سايا السيدة زينب عمر، سايا seorang pemberi pinjaman uang بريبادي يانغ terdaftar ساه الدلم memberikan pinjaman kepada individu، بيزنيس بريا، انيتا دان الملاحم untuk بيروساهان-بيروساهان يانغ membutuhkan bantuan keuangan دي اندونيسيا دان دي seluruh دنيا. كامي دي سيني untuk memberikan البيك jangka بانجانج atau jangka pendek pinjaman، بريبادي atau hipotek، pinjaman اندا dapat ditransfer melalui kertas kerja atau تحقق كامي اكان memberikan يانغ terbaik ketika اندا menghubungi بيروساهان كامي. دي bawah رسائل كتبها هذا المؤلف كامي عدالة البريد الإلكتروني kontak
    (Zainabomarloanfirm@gmail.com) atau (omarzainabloanfirm@outlook.com)

    ردحذف

قول رأيك بلاش تقرا وتقفل من سكات...ارائكم تهمنى