الثلاثاء، 4 يونيو 2013

هل يشفع الحب؟... الحلقة 18

الحلقة 18
نرجس بتفتح المحل... اول ما دخلت...فتحت الراديو على القران
واتصلت بطه
"الو...صباح الخير ياطه"
"صباح النور ياماما..عاملة ايه"
"انا كويسة الحمدلله...انت ف الشغل"
"اه ف الشغل"
"كويس...انا واختك اتكلمنا مع مها امبارح...وبعد اخد ورد علشان حكاية جوازك دى... تقريبا وافقت"
"يعنى ايه تقريبا...يا آه يا لآ"
"هى بتقول عايزة تقعد معاك الاول لانها خايفة تكون مفروضة عليك"
"يعنى اعمل ايه"
"يعنى تقعد معاها وتتكلموا...بس تخلى بالك انها زى اى بنت عايزة تفرح بعريسها...يعنى اوعى تفضل تقولها بحب مراتى ومش عايز ازعلها والكلام ده خالص"
"هبتدى معاها بكذب؟"
"هو ده كذب... متجيبش سيرة مراتك خالص معاها كأنها مش موجودة... ايه لازمة سيرتها يعنى...بقولك ايه مها مفيش زيها وقابلة ان تفضل عالية على ذمتك بس تحسسها انك عايزها"
"طيب ماشى"
"مها عندنا النهاردة هترجع م الشغل ع البيت عندى ولا نبقى نروح بالليل بعد المحل"
"مش عارف..بس اصل عالية مبتتغداش لوحدها"
"هى لازم تتعود ع الوضع الجديد...بس اسمع اوعى تقولها حاجة غير لما ناخد الموافقة النهائية من مها...ربنا يجعلكم نصيب يارب"
"طيب...بالليل هبقى ارجع معاكى ...نبقى نقفل بدرى ساعة "
"طيب مش مشكلة نقفل بدرى ...ربنا يجعله بفايدة"
                   *********************

مها قاعدة قدام المراية... بتحط ميك اب
"شكلى كده حلو؟"
"يعنى هو طه مش عارفك؟"
"عارفنى حاجة والنهاردة حاجة تانية... قوليلى شكلى كده حلو"
"زى القمر طبعا هى حاجة جديدة يعنى"
تبص مها لنفسها ف المراية بإعجاب
نرمين"مش لو كان طه متجوزش الزفتة دى كان زمانك مراته من زمان"
"والله يا نرمين لحد دلوقتى مقررتش.. لسه لما اقعد مع طه واشوف دماغه ايه ومشاعره من ناحيتى"
"انتى مش بتحبيه من زمان...يعنى المفروض تفرحى"
"لا يا حبيبتى زمان حاجة ودلوقتى حاجة... زمان كنت انا اللى عايزاه...دلوقتى هو اللى عايزنى...تفرق"
"تفرق ف ايه مش فاهمة"
"متاخديش ف بالك... المهم بس هما جايين امتى"
"زمانهم جايين ماما كلمتنى كانوا قفلوا المحل وجايين"
                         *********************

طه ونرجس داخلين البيت...طه بيدخل بتردد
"ماتدخل هو انت داخل بيت غريب"
"شوفيهم فين الاول طيب"

سبقت نرجس...ونادت عليهم
خرجت لها نرمين...سلمت على طه
"ازيك يا طه... تعالى ادخل مها جوه ف الاوضة"

دخل طه قعد فى الصالون... نرجس وراه
"احنا هندخل ونناديهالك ...زى مافهمتك ياطه"
طه يهز راسه باستسلام

قعد... بيفكر هيقول ايه ويتكلم ف ايه
سمع صوت خطوات مها
جت مها...قام وقف
سلمت عليه...سلم عليها
"ازيك ياطه"
"الحمدلله...عاملة ايه...اتفضلى"
قعدت مها... وقعد طه
طه بيبص ف الارض...بيفكر يتكلم ف ايه
مها ساكتة... بتبص له نظرات خاطفة ومستنياه يتكلم

لما طال الصمت... قامت مها وقفت
"طيب واضح ان مفيش كلام عندك عايز تقوله...بعد اذنك"
استغرب طه من رد فعلها...غير متوقع
وقف
"استنى"
"استنى ايه...هنفضل ساكتين"
"بصراحة انا محرج"
"محرج ولا جاى غصب عنك؟"
"محرج"
ابتسمت مها
"كده يبقى نقعد"
قعدت تانى وقعد طه
"مش ماما اتكلمت معاكى... ومتهيألى انتى عارفة كل ظروفى"
"اه عارفاها...وراضية بيها لو انت عايز تتجوزنى بجد"
"اومال بهزر؟"
"مقصدش...قصدى عايز تتجوزنى علشانى مش علشان مامتك قالتلك عليا"
ارتبك طه...مش عارف يرد...وافتكر تحذيرات مامته
"اه طبعا...بس احنا لسه مقربناش من بعض يعنى علشان كده هتلاقينى محرج شوية ...معلش استحملينى وبعد كده اكيد هناخد على بعض اكتر"
"استحمل...علشان خاطرك هستحمل حاضر"
رن موبايل طه... طلعه من جيبه
ارتبك لما شاف ان اللى بتتصل عالية
لاحظت مها ارتباطه...فهمت...وبابتسامة عادية
"لو مراتك رد...انا فاهمة طبعا انى لازم اتعود على وجودها"
حس براحة من رد فعلها...رد وهى قاعدة
"الو... اه شوية وجاى...اجيب ايه وانا جاى....ماشى مع السلامة"
قفل مع عالية...وهو بيبص لمها بارتياح
"شكرا يا مها انك مقدرة ظروفى... يمكن مكناش قريبين اوى بس ان شاءالله شكلنا هنكون متفاهمين"
"ان شاءالله"
وبدأ يتكلم بارتياح اكتر
"قلتى لمامتك ولا لسه"
"كنت مستنية لما نتكلم مع بعض الاول"
"وبعدين ...دلوقتى ايه رأيك"
ابتسمت مها بكسوف وهى بتحط وشها ف الارض ورجعت بصت له
"لو ممكن توصلنى هاروح النهاردة واقولها"
طه "ممكن"
قامت مها "هجيب شنطتى حالا"

دخلت مها بفرحة.... كانت نرجس ونرمين مستنيينها
نرجس"طمنينى؟؟اتفقتوا"
مها بفخر"تقريبا...هو هيوصلنى علشان اكلم ماما واتفق معاها"
نرجس"بجد؟؟ يا الف بركة...اما اروح اشوفه"
خرجت نرجس من الاوضة
نرمين وهى بتبص لمها
"اتفقتوا بجد؟؟ وهيوصلك البيت"
"طبعا يا بنتى بستقلى بيا"
"يا بنت اللذينة... انا قلت طه مش هيتكلم كلمتين على بعض من كسوفه"
"مين ده يابنتى...هو فيه راجل بيتكسف...هو كان محتاج انكشه بس وجاب نتيجة اسرع ما كنت اتخيل"
"انتى بجد فرحانة بيه"
"طبعا"
"مش متضايقة انه متجوز"
"الصبر حلو... بكرة مش هيشوف غيرى...يالا بقى علشان متأخرش عليه"

نرجس لما طلعت لطه
"ايه الاخبار ياطه"
"شكلها طيبة اوى ياماما...واحسن حاجة فيها انها متقبلة وجود عالية ومش متضايقة"
"طب الحمدلله ...ربنا يوفقكم ويتمم بخير يارب"
                      *********************

عالية قاعدة تبص ف الساعة... اتصلت تانى بطه
رن الموبايل لحد ما فصل...بعدها سمعت الباب بيتفتح
راحت تجرى ع الباب
"طه...اتأخرت كده ليه"
"مفيش...بس اصلى بعد ما وصلت ماما مسكت فيا اطلع معاها"
"طيب احضرلك العشا"
"معلش يا حبيبتى...ماما مسكت فيا واتعشيت معاهم هناك...لو لسه مأكلتيش هقعد معاكى"
عالية بعد ما حست بتغيير طه
"لا...انا مكنش ليا نفس بس قلقت عليك"
"متقلقيش"
دخل الاوضة...دخلت وراه عالية
قعدت على طرف السرير ...بتبص له وهو بيغير هدومه ومش بيبص ناحيتها...شكله متغير...احساسها انه مخبى عليها حاجة مش قادرة تفسره...وبكل هدوء سألته
"فيه جديد؟"
"بالنسبة لايه؟"
"العروسة"
ارتبك وقعت من الشماعة وهو بيعلق عليها الهدوم
قامت شالتها عالية
"ولا يهمك...سيب هعلقهم انا"
"شكرا"
"ها..مقلتليش فيه جديد؟"
"لا ...لما يكون فيه جديد هقولك اكيد"
                   ********************

طه صاحى بيبص لعالية... عالية نايمة
"بحبك ياعالية... بس غصب عنى انى كذبت عليكى... مش عايز اضايقك كل يوم بالموضوع ده... وانتى اللى ضغطتى عليا اوافق على اقتراح ماما...انا كنت راضى علشان مجرحكيش...بس انا نفسى ابقى اب... نفسى اشوف ابن ليا يكبر قدام عينى...سامحينى ياعالية"
رن موبايله...اخده بسرعة من الكومودينو
شاف رقم.... وافتكر ان وهو مع مها ف العربية...اخدوا ارقام بعض ومسجلوش خوفا على شعور عالية لو شافته
بس اللى فاكره ان اول رقمين هما نفس اول رقمين عنده

كل ده فكر فيه ف ثوانى...وعمل الرنين صامت
وقام اتسحب من جنب عالية وخرج من الاوضة

راح البلكونة...رد على مها
"الو.. نمت ولا لسه؟"
"لا لسه"
"انا سببت لك مشكلة ولا حاجة"
"لا عالية نايمة"
"انا بس حبيت اقولك انى اتكلمت مع ماما وهى كانت رافضة ف الاول بس انا اقنعتها"
"كويس"
"مفرحتش؟"
"ليه بتقولى كده"
"يعنى حسيت"
"لا طبعا...اكيد فرحت...بس اصل انا لسه مقولتش حاجة لعالية فعلشان كده بتكلم من غير ماتعرف"
"ماشى براحتك...المهم انا قلت لماما انكم جايين يوم الجمعة علشان انا عارفة انك بتلبقى اجازة من المحل والشغل"
"تمام"
"واضح انك مش عارف تتكلم...لو عايز نأجل ولا نلغى عادى"
"لا زى ما اتفقتى مع مامتك"
"ماشى...ابقى عرف طنط"
"تمام...مع السلامة"

قفل طه ...بص وراه اطمن ان عالية مش واقفة ...رجع للاوضة يتسحب كانت عالية لسه نايمة...اطمن ...ونام
                      *******************

فاتن قاعدة مع عبدالحميد وميار بيتغدوا
ميار عمالة تغمزلها ...شاورت لها فاتن بهزة راسها
قامت بعدها ميار
ميار"الحمدلله...تسلم ايدك ياماما"
بعد ما مشيت ميار
فاتن"عبد الحميد... فاكر دكتور ايمن"
عبد الحميد بعد ما سرح شوية
"بتاع العلاج الطبيعى ولا مين"
فاتن"اه هو"
"ماله"
"مامته اتصلت بيا وعايزين ييجوا يزورونا"
"مامته؟؟وجابت رقمنا منين؟"
"يا سلام ياعبده...وهى دى مشكلة يعنى...هتسيب المهم وتمسك ف الهايفة"
"يعنى عايزين يزورونا ليه؟"
"ابنهم شاب وعندنا بنت...بذمتك انت يبقى ليه"
وضحك عبدالحميد
"هى البت كبرت بجد...انا لسه شايفها عيلة صغيرة"
"انت تشوفها عيلة انما هى اسم الله عليها بقت عروسة والخطاب بيدقوا بابها"
"انتى شايفة ايه يعنى"
"انا شايفة ان ايمن ابن حلال وهو بقاله 3 سنين بيشتغل ف السعودية ولسه نازل اجازة من اسبوع ...مامته اللى قالتلى"
"السعودية...يعنى بنتنا هتتغرب؟؟؟"
"ايه؟"
وانتبهت فاتن لسؤال عبدالحميد اللى مفكرتش فيه قبل كده
وردت كأنها بترد على نفسها
"لأ طبعا... بنتى الوحيدة متتجوزش غير جنبى... ولازم يعرفوا كده من قبل ما ييجوا"
                       *******************

هدير قاعدة مع عالية ف بيت هدير
"انتى هتنقطينى ياعالية"
"بعد الشر عليكى ليه بس"
"دلوقتى جوزك راح يخطب وانتى قاعدة معايا بالبرود ده"
عالية بابتسامة لا مبالاة
"هعمل ايه يعنى؟"
"لو مش راضى بقضاء ربنا ومستعجل اوى كده ع الخلفة سيبيه انما ميتجوزش عليكى"
"انا مليش غيره"
"بس ده ميخليهوش يذلك كده"
"ذل ايه بس...انا اللى طلبت منه يتجوز...وهو معملش حاجة من ورايا...بالعكس ده وصلنى هنا قبل ما يروح وهيرجع ياخدنى"
تصرخ هدير
"هتموتتتتتتتتتتتينى مفروسة ياعالية.... ده انا لو عصام فكر بس تفكير انه يفكر ف واحدة تانية كنت موته قبل ما يفكر"
"ربنا ما يكتب عليكى ابدا اللى انا فيه"
تحس هدير بلهجة عالية...تقعد جنبها...بعد ماكل شوية تقوم وتقعد من عصبيتها
"يا حبيبتى لو شايلة هم ان مفيش حتة تقعدى فيها انا بيتى مفتوح لك العمر كله...وانتى مش غريبة عنى ولا عن عصام"
"عارفة يا حبيبتى والله...مش دى المشكلة"
"طيب ايه المشكلة؟"
"انى فعلا مقدرش استغنى عن طه...بحبه فوق ما اى حد يتخيل...كل المشاعر اللى اتحرمت منها اديتها واخدتها من طه... بجد مقدرش ابعد عنه وهبقى مبسوطة لو شايفاه مبسوط"
"لا انتى كده عبيطة بقى"
"مش عبيطة...انا بحبه وعاجزة انى احقق له حلمه انه يكون اب"
"طب اتضايقى...اتنرفزى...عيطى...صوتى...كسرى"
"تصدقى ان دموعى نشفت...خلاص مبقتش قادرة اعيط"
"انتى ازاى كده"
"طول الفترة اللى فاتت كنت بدعى ربنا يلهمنى الصبر... اهو انا راضية بكل اللى ربنا كاتبهولى ومش معترضة...المهم بس انه ميسبنيش"
"وملقاش غير البومة صاحبة اخته...دى شبه امه..ازاى وافقتى عليها"
"يعنى انا وافقت على جوازه...هتفرق معايا ف ايه هى او غيرها"
"ربنا يصبرك ياعالية"
"ايوه...ادعى لى بالصبر مش عايزة اكتر من كده"
                     *********************

طه ونرجس ونرمين قاعدين مع مها ومامتها وجوز مامتها
مها وطه بيتبادلوا نظرات اعجاب
ام مها"والله يا نرجس احنا عشرة سنين وانا اتشرف بنسبكم...ومها بدل مقتنعة ومش متضايقة ان مراته على ذمته هقول ايه بس"
نرجس"نقرا الفاتحة بقى"
ام مها"لا قبل ما نقرا الفاتحة لازم نتفق على شوية تفاصيل"
نرجس"مها بنتى وهعملها زى اى عروسة جديدة...شبكة وعفش وفرح"
طه"فرح لأ...معلش بلاش فرح"
ام مها بتبص لنرجس
نرجس لطه"وليه لأ؟؟"
طه"معلش.. اى حاجة انتم عايزينها بس فرح لأ... مش هينفع؟"
مها"علشان مراتك؟؟"
طه وهو وشه ف الارض
"كفاية انى هتجوز ومعملتلهاش فرح..واساسا انا بتحرج من الدوشة والحاجات دى...معلش يامها"
ام مها"طب والشقة...بنتى هتعيش فين؟"
نرجس"هأجر لهم شقة"
ام مها وهى بتبص لمها اعتراضا
"يعنى مراته الاولانية تبقى قاعدة ف شقة تمليك وبنتى تدخل ف ايجار وميتعملهاش فرح...مش كفاية راضية بانها تدخل على ضرة...لا يا ام طه مكنتش فاكراكى شايفة مها قليلة اوى كده"
نرجس"قليلة؟؟ اخص عليكى ده انا بقولك مها بنتى"
ام مها"وانتى ترضى ده لبنتك"
سكتت نرجس ...وبصت لمها
"ايه يامها؟ما انتوا عارفين ياجماعة الشقق نار وانا مقدرش اشترى شقة وافرشها"
ام مها"خلاص...انا عندى فكرة تريح الكل"



هناك 33 تعليقًا:

  1. يارب تتفركش كل حاجة حراا م الي بيحصل في عالية ده :(

    ردحذف
  2. ياوجع قلبى آآآه على عالية:((
    بس ابدااااااااااع يادودى كالعادة

    ردحذف
  3. والمصحف لو عاشوا كلهم ف بيت واحد ممكن انا اللى اروح فيها يا دينا وزى ما قولتلك ع الاسك
    منهم لله ام مها ومها ندوا عليا قبل الامتحان >_<

    ردحذف
  4. انا صعبانه عليا اوى عليا
    هيحصلى حاجه لو طه اتجوز مها :( :(

    ردحذف
  5. انا أول مرة اشارك معاكو برد بس انا متابعة كتاباتك من فترة كبيرة ناشاء الله مبدعة

    حسناء

    ردحذف
  6. لالالالا بجد عالية دى قلبها جامد وربنا يستر لحسن يكون الحل دة انها تعيش مع عالية فى البيت دا انا اتشل فيهااااااااااااااااااااا

    ردحذف
  7. بجد كدا اوفر اوى وعاليه وربنا هتطق حاسه بيها _ والسوسه مها انا مش مرتاحه لها حاسه انها هتخربها على عاليه _ بس فرحت لميار ورجعت اتصدمت تانى ﻻن موضوع السفر والغربه دا قلقنى يمكن لانى كمان احتمال اتغرب وابعد عن اهلى ربنا يسترها

    ردحذف
  8. بجد كدا اوفر اوى وعاليه وربنا هتطق حاسه بيها _ والسوسه مها انا مش مرتاحه لها حاسه انها هتخربها على عاليه _ بس فرحت لميار ورجعت اتصدمت تانى ﻻن موضوع السفر والغربه دا قلقنى يمكن لانى كمان احتمال اتغرب وابعد عن اهلى ربنا يسترها

    ردحذف
  9. هتخلى عاليه تعيش فى الايجار ومها تاخد الشقه التمليك

    ردحذف
  10. حرام عليكى بقى والله قلبى بتقطع انا بجد حاسه بيها قووووى فرحيها بالله عليكى

    ردحذف
  11. اكيد الحل ان عالية تروح الشقة الايجار ومها نكون فى شقة عالية

    ردحذف
  12. ليييييه ليه كدا بس :'( :'( يا قلبي يا عاليه تلاقيهم هيعيشوفها فالايجار والزفته مها فالتمليك... حرام كدا بجد :(

    ردحذف
  13. الحلقة حلوووووة اووو ي كالعادة بس بلاش عالية تتعذب اكتر من كده

    ردحذف
  14. اوعى يكون الحل دا يا دينا انهم يقعدوا مع بعض فى نفس الشقة هزعل وهعيط على عالية بجد

    ردحذف
  15. حلوة اووووووووووووووي

    ردحذف
  16. حلوه اووووووووي يا دينا
    الحلقه جميله والقصه كلها حلوه
    وبتناقش مشكله مهمه وموجودة في المجتمع كتيييير

    بجد تسلم أيدك انتي كاتبه موهوبه ومبدعه

    ردحذف
  17. ليه بس القفله دى :(

    ردحذف
  18. ممكن الحلقه اللى جايه بدرى وياريت الروايه تخلص قبل ولادتى الله يخليكى

    ردحذف
  19. la tkon btfkr enhom y3isho m3 3alia l2aaaaaaaaaaaaa :'(

    ردحذف
  20. اظن ان الفكرة ديه انهم يقعدوا مع بعض.........يالهوي ديه مها هتطلع عين عاليه ربنا يستر

    hadil gasser

    ردحذف
  21. حلقه جمييييييييييييييله جدا جدا لازم يا دودو تنزلي الحلقه الي جايه بدري لاحسن انا هموت واعرف ايه الفكره بس يارب متبقاش انهم يقعدوا مع بعض

    ردحذف
  22. حلوووووووووووووووووة اووى يادينا
    بس يارب مهما متخلوش يتقلب ع عالية ف الاخر

    ردحذف
  23. اﻻم هتخلي اﻻتنين يعقدوا مع بعض حاسة بكده بس و الله مسكينة اوي عالية هتتعذب من البومة مها شكلهل اصﻻ عوزة تطلق طه من عالية و الله صعبانة عليا ربنا يصبرها

    ردحذف
  24. :( انا مش عايزه عاليه تتظلم كده بقي حرام :(
    مش ذنبها كده

    ردحذف
  25. اووووووووووبا ايوووووه بجد لو الفكرة ان مها تقعد مع عالية فى الشقة هيبقى صعب اوى ع عالية الموقف و كمان أكيد مها مش هتسيبها فى حالها ربنا يستر من اللى هيحصل بكرة يا دينا

    ردحذف
  26. تقريبا االفكرة انها تسكن مكان عاليا

    ردحذف
  27. انا اغتقد ان الحل اللى هتقوله ام مها ان مها تسكن مع عاليا والسوسه مها هتطفش طه من عاليا

    ردحذف
  28. اكيد الحل ان عالية تقعد مع نرجس و نرمين وتاخد مها الشقة؟صح؟؟ بس انا صعبانة عليا عالية اوووووووووووووى

    ردحذف
  29. هى الحلقه الجديده هتنزل امتى بقى

    ردحذف
  30. ياااااااا قلبي يانا يامه بجد عاليه صعباانه عليا اوووووي والله بقالي حلقتين بعيط عشان بقراهم ورا بعض بجد طه ده انا عذراه بس بردو كرهاه جدااا

    ردحذف
  31. يحصل خدمة الإقراض المال بشكل جيد اليوم وهذا هو عموما
    موثوقة وآمنة وتصفيتها
    وكالة القرض الدولي واختبارها أيضا والموثوق بها. نحن نعطيه قرض ل
    أي أغراض، إذا كنت حقا في حاجة الى قرض ،، فقط اسمحوا لنا أن نعرف
    المبلغ الذي تحتاجه كقرض، والخاص
    سوف يكون أكثر المشاكل. نصدر القروض للأفراد على الرغم من
    الأوضاع المالية، وانخفاض درجة الائتمان.
    (kivalloanfinancecompany@gmail.com)
    هل أنت في حاجة الى قرض؟
    هل ترغب في سداد فواتيرها؟
    هل تريد أن تكون مستقرة ماليا؟
    كل ما عليك القيام به هو الاتصال بنا للحصول على مزيد من المعلومات حول كيفية الحصول على
    التي والحصول على القروض التي تريدها.
    هذا العرض متاح لجميع من شأنها أن تكون قادرة على سداد العودة في الوقت المناسب.
    علما أن الإطار الزمني سداد قابل للتفاوض وعلى سعر الفائدة
    3٪.
    ملاحظة: نحن نقدم القروض التالية لindividuals-
    القروض التجارية (آمنة وغير المضمونة)
    الأعمال الصغيرة القروض الإدارية (SBA)، (آمن وغير المضمونة)
    القروض الشخصية (غير المضمونة والآمنة)
    القروض السكنية (آمنة وغير المضمونة)
    قروض الرهن العقاري (الآمنة وغير المضمونة) وغيرها الكثير بفائدة 2٪
    معدل. طلب للحصول على الحد الأدنى
    من 500،00 $ إلى الحد الأقصى من $ 50،000،000.00. ينبغي على مقدمي الطلبات المهتمين يرجى
    الاتصال بنا عبر البريد الإلكتروني: kivalloanfinancecompany@gmail.com].
    يتوقع منك أن تبلغنا من مبلغ القرض المحدد طلبت ذلك ل
    يمكننا توفير لكم مع بنود وشروط القرض. اذا كنت
    مهتم في الحصول على قرض من شركتنا.
    من فضلك، لا ملء استمارة طلب قصير الواردة أدناه، ونحن
    عدت لمساعدتك في أي احتياجات مالية أنت في
    قرض تطبيق نموذج الاستمارة الإلكترونية} {
    PREFIX {MR.، MRS.، MS، DR.، الخ.}
    1) اسمك ...................
    2) ............... بلدكم.
    3) مهنتك .............
    4) وضعك العائلي .........
    5) رقم الهاتف ................
    6) الدخل الشهري ............ ..
    7) العنوان .....................
    8) الغاية من القرض .............
    9) ............... قرض الطلب.
    10) الهاتف ..................
    11) شروط القرض ومدة .... شركتنا مربع الاتصال البريدي هو
    via- kivalloanfinancecompany@gmail.com

    ردحذف

قول رأيك بلاش تقرا وتقفل من سكات...ارائكم تهمنى