الأربعاء، 5 يونيو 2013

هل يشفع الحب؟... الحلقة 19

الحلقة 19
طه ونرجس ونرمين قاعدين مع مها ومامتها وجوز مامتها
مها وطه بيتبادلوا نظرات اعجاب
ام مها"والله يا نرجس احنا عشرة سنين وانا اتشرف بنسبكم...ومها بدل مقتنعة ومش متضايقة ان مراته على ذمته هقول ايه بس"
نرجس"نقرا الفاتحة بقى"
ام مها"لا قبل ما نقرا الفاتحة لازم نتفق على شوية تفاصيل"
نرجس"مها بنتى وهعملها زى اى عروسة جديدة...شبكة وعفش وفرح"
طه"فرح لأ...معلش بلاش فرح"
ام مها بتبص لنرجس
نرجس لطه"وليه لأ؟؟"
طه"معلش.. اى حاجة انتم عايزينها بس فرح لأ... مش هينفع؟"
مها"علشان مراتك؟؟"
طه وهو وشه ف الارض
"كفاية انى هتجوز ومعملتلهاش فرح..واساسا انا بتحرج من الدوشة والحاجات دى...معلش يامها"
ام مها"طب والشقة...بنتى هتعيش فين؟"
نرجس"هأجر لهم شقة"
ام مها وهى بتبص لمها اعتراضا
"يعنى مراته الاولانية تبقى قاعدة ف شقة تمليك وبنتى تدخل ف ايجار وميتعملهاش فرح...مش كفاية راضية بانها تدخل على ضرة...لا يا ام طه مكنتش فاكراكى شايفة مها قليلة اوى كده"
نرجس"قليلة؟؟ اخص عليكى ده انا بقولك مها بنتى"
ام مها"وانتى ترضى ده لبنتك"
سكتت نرجس ...وبصت لمها
"ايه يامها؟ما انتوا عارفين ياجماعة الشقق نار وانا مقدرش اشترى شقة وافرشها"
ام مها"خلاص...انا عندى فكرة تريح الكل"
رن موبايل جوز ام امها...قام يرد وسابهم... كملوا كلام
نرجس"الحقينا بالفكرة اللى عندك"
ام مها"قبل بس ما اقولها... لازم طه يعرف انه لولا مها ضغطت عليا انا مكنتش وافقت على جوازة بالظروف دى ابدا"
طه"عارف والله مها قالت لى"
ام مها"طيب اقل حاجة تقدر بيها بنتى انها تتجوز ف شقتك"
طه باستغراب"مع عالية؟؟؟!!!"
ام مها"لا طبعا كفاية انها هتتجوز على ضرة عايزها تسكم معاها كمان"
نرجس"قصدك يعنى ياخد الاولانية ف ايجار"
ام مها وهى بترمى الخيار ف ايديهم
"والله ياخدها ف ايجار... ياخدها ف اى حتة دى مشكلتهم"
مها"بس ياطه لو اخدتها ف ايجار هتبقى قاعدة لوحدها فترات طويلة يا عينى وهى مالهاش حد ومحدش عارف الوحدة تعمل فيها ايه...تصعب عليا برضه"
ام مها"يا حبيبتى يا بنتى ...شايلة هم ضرتها...بذمتك يا طه طنت هتلاقى واحدة كده"
طه"لا طبعا...الحمدلله ان ربنا اكرمنى بمها... بس برضه مش فاهم ازاى اطلع عالية من بيتها"
نرجس"بيتها ده ايه هى عرفت البيوت الا لما اتجوزتك"
مها"الاحسن انها تروح تعيش مع طنط ف بيتها"
نرجس باستغراب"ايه؟؟معايا؟؟ ليه هو انا بطيقها؟"
مها"ياطنط حضرتك بره طول اليوم وهى هتاخد اوضة طه...وبعدين مش انتى اولى بفلوس الايجار"
نرمين"يا سلام هتجيبوهالى انا بقى"
مها"وانتى مالك بيها...اهى وجودها هيريحك ويونسك وكلها حاجة بسيطة وتتجوزى"
طه ساكت بيسمع كلامهم... واول ما تكلم
"لالا...مش هينفع اقولها تخرج من البيت علشان اتجوز فيه"
ام مها"براحتك"
وبصت لمها
"انا من الاول قلتلك راجل متجوز مالوش امان واهى بانت عايز ياخدك ف ايجار علشان لما يزهق منك يرميكى"
وعيطت مها...وارتبكوا كلهم
نرجس"ازاى بتقولى كده"
طه"لا طبعا احنا مش ممكن نكون بنفكر بالطريقة دى"
ام مها"والله القرار دلوقتى ف ايديكم...احنا عمالين نتنازل نتنازل وانتوا مش عايزين تعملوا لنا الحاجة الوحيدة اللى تأمن لها حياتها معاه"
نرمين"ماتيجى انتى يا مها تعيشى معانا ف البيت"
مها بتعيط"الحكاية مبقتش اعيش فين... الحكاية باينة من اولها ان طه اخدنى احتياطى ومش مقدر التنازلات اللى تنازلتها علشانه"
طه"والله ابدا مش كده خالص"
ام مها"معلش يا طه... احنا قلنا اخر كلام عندنا والقرار ف ايدك"
                     *******************

ام مها بتقفل الباب وراهم بعد مانزلوا...بصت لماما بابتسامة انتصار
مها"تفتكرى ايه؟"
ام مها"كل حاجة مشيت اهى زى ما اتفقنا... وبدل امه مقتنعة وهو متردد كده يبقى اطمنى"
مها"نفسى اعرف بيفكر ف ايه دلوقتى"
ام مها"استنى لما يروحوا وابقى كلمى نرمين وهى تحكيلك ساعتها بقى هتعرفى ... ولو لسه متردد دقى ع الحديد وهو لسه سخن"
مها"اكلمه يعنى واتصعب"
ام مها"طبعا...وشوية حنية من بتوع الايام اللى فاتت على اللعب بحلمه بالخلفة هيبقى عجينة طرية ف ايدك"
مها بتضحك باطمئنان وهو بتفكر ف كلام مامتها
                          *******************

طه واقف بالعربية قدام بيت نرجس
نرجس جنبه ونرمين ورا
طه"مش هقدر اعمل كده ياماما والله"
نرجس"هو انا طول الطريق عمالة اتحايل عليك على ايه...هى كلمة يا تقولها انت بطريقتك يا اقولها انا بطريقتى...خلصت كده"
طه"ماما...لا بلاش تقوليلها الله يخليكى"
نرمين"طه...انت عايز مها ولا لأ؟؟... دى قالت لى ان الايام اللى فاتت كنتوا بتتكلموا كتير ... معرفش هى قالتلك ولا لا انها بتحبك من زمان ...وياريتك اتجوزتها م الاول والله مكناش وصلنا للى احنا فيه ده"
طه وهو بيلتفت لنرمين
"من زمان ازاى؟؟"
نرمين"من قبل ما تشوف عالية... وشوف النصيب انت اتجوزت وهى اتخطبت واتجمعتوا تانى... متعاندش بقى علشان حاجة هايفة قصاد اللى هى وافقت عليه"
سكت طه بيفكر
نرجس"وبعدين صحيح عالية هتكون ف وسطنا هنا علشان تبقى مطمن عليها وانت مع مها"
طه"مش عارف ياماما...صعب اوى"
نرجس"مش احسن ما كنت طلقتها... انا ماصدقت انى افرح بجوازة عليها القيمة هتطلعلى الست عالية"
طه"خلاص ربنا يسهل... هحاول اقولها"
                     *******************

طه على السرير... ضهره لعالية
بيفكر يتكلم معاها ازاى
يرن موبايله...عالية تصحى على صوت الموبايل من غير ماتلتفت
طه يعمله صامت بسرعة...يبص على عالية اللى وشها الناحية التانية...يلاقيها متحركتش فيعرف انها نايمة
يقوم يتسحب من جنبها...يخرج البلكونة يرد
"ايوه يامها....بتعيطى ليه"
"كنت فاكراك هتتمسك بيا اكتر من كده...ليه علقتنى بيك لما انت مش عايزنى وعند اول موقف بعتنى بسهولة"
"اهدى بس ومتعيطيش...مين قال انى بعتك"
"يعنى شارينى زى ما انا شارياك"
"اه طبعا"
"بجد يا طه"
"ايوه طبعا"
"ليه مكلمتنيش طيب؟"
"كنت هكلمك الصبح اول ما انزل"

طه واقف وضهره لباب البلكونة
عالية واقفة تسمعه ودموعها نازلة
"كل حاجة هتمشى عادى...انا بس معرفتش اكلمها النهاردة"
"هتقولها امتى"
"بكرة بالكتير"
"ماشى ياطه...وابقى خلى مامتك تكلم ماما"
"ماشى يالا تصبحى على خير"

مسحت عالية دموعها بسرعة قبل ما يشوفها طه
التفت طه وشاف عالية واقفة بتبتسم له ببساطة
"انتى هنا من امتى"
"لما حسيت انك قمت من جنبى"
طه بارتباك"دى...اصل..."
"مالك؟؟ اذا كنت عارفة انك هتتجوز هزعل انك بتكلمها ف التليفون"

دخلت عالية ودخل طه وراها
قعدت على السرير..وقف قصادها
"مش انتى اللى طلبتى اتجوز"
خلاص يا طه... مش كل يوم هتبرر اللى حصل...خلينا ف الامر الواقع من غير ما نفسر ليه وعلشان ايه"
سكت طه... قعد على السرير وهو بيبص ف الارض
سألته"هاا مقلتليش ...ايه اللى هتقولهولى بكرة"
طه وقف الكلام على لسانه
مش عارف يبدأ منين
"للدرجة دى اللى هتقوله صعب؟؟ انت عايز تطلقنى؟"
قالتها بصوت مخنوق ودموعها نزلت غصب عنها
حضنها طه
"ابدا... لا يمكن ابدا اطلقك...انتى حبيبتى ياعالية مقدرش استغنى عنك"
"الحمدلله...بدل مش هتطلقنى يبقى اى حاجة هتقولها اهون بكتير...اتكلم يا طه من غير ما تزوق الكلام"
"انا مش عايز اعمل اى حاجة تزعلك...دول حتى طلبوا منى فرح وانا رفضت خالص"
"ايه اللى مش قادر تقوله؟؟"
"كل الموضوع ان وقفت قصادنا مشكلة الشقة"
عالية ساكتة مستنية يكمل كلامه
طه ساكت مبيتكلمش... مش عارف يقولها ازاى
"هااا يا طه...وبعدين"
"يعنى الاقتراحات كلها اجمعت ان اسكن انا ومها هنا"
"هنا؟؟ عموما براحتك لو هيريحك نبقى كلنا مع بعض اللى تشوفه"
"لا..ما هو ...اصل يعنى... هتتضايقى لما نكون هنا كلنا"
"اومال اروح فين"
"عند ماما... اوضتى هناك موجودة هننقل فيها اوضتنا... وتقعدى هناك"
سكتت عالية...مش عارفة ترد
"اصل طبعا مش هتهونى عليا تقعدى ف شقة لوحدك فقلت تقعدى مع ماما ونرمين يونسوكى ومتبقيش لوحدك ف الايام اللى هبقى فيها معاها"
عالية وهى بتنام
"مفيش مشكلة...اللى شايفة اريح لنا اعمله...تصبح على خير"
                          ******************

فاتن وعبد الحميد...قاعدين مع ايمن واهله
الجو العام كله ود ومحبة وترحيب من الجانبين
ابو ايمن"احنا اتشرفنا بمعرفتكم يا حاج وفعلا ايمن يا زين ما اختار"
عبد الحميد"الشرف لينا...منورين والله"
ابو ايمن"طيب طلبات حضرتك ايه علشان عايزين نعمل قراية الفاتحة والشبكة قبل ما يرجع شغله...فلو عايزين تسألوا علينا شوفوا البيانات اللى عايزها كلها بس خلى بالكم م الوقت"
عبد الحميد" ايمن دخل بيتنا كتير وانا عارفه كويس ومش محتاج اسأل عليه"
ابو ايمن"على خيرة الله...نقرا الفاتحة"
فاتن بتبص لعبد الحميد ... بص لها...فهم
عبد الحميد"ام العروسة كان عندها كلمتين بس عايزة تقولهم"
ايمن"اتفضلى ياطنط...خير؟"
فاتن"ميار بنتى الوحيدة... ومش هقدر ابعد عنها...يعنى سفر بعد الجواز لأ"
ايمن"بس ازاى...وانا محبش انى اكون ف حتة ومراتى ف حتة"
ام ايمن"والله خدتى الكلام من على لسانى...بلا غربة بلا قرف"
ايمن"بس الشغل هناك احسن"
فاتن"انا مليش غيرها ومش هقدر انها تتغرب"
ابو ايمن"خلاص يا ايمن... الحاجة معاها حق... الغربة وحشة يا ابنى...انت اقعد سنة ولا اتنين كمان وتيجى تستقر هنا خالص وتتجوزوا"
عبد الحميد"حل كويس اوى"
فاتن"ياريت"
ايمن"خلاص ...ماشى... نقرا الفاتحة بقى"
فاتن زغرطت وبعدين نادت على ميار
                      ********************

هدير قاعدة ساكتة...وعالية اخدة هنا ف حضنها وساكتة
"وبعدين...هيتجوزوا امتى؟"
"الاسبوع الجاى"
"وانتى نقلتى عند امه بقالك يومين...على كده هيلحقوا يفرشوا"
"طبعا يلحقوا...مش كلهم مع بعض"
"وباقى عفشك فين"
"فيه حاجات اتباعت وحاجات زى ماهى"
"طبعا انا لو اتكلمت هتزعلى"
"لا براحتك...معدش عندى طاقة للزعل على حاجة بعد اللى حصل"
"وطه معاكى ايه الاخبار"
"حنيته وحبه زى ماهما بس غصب عنه انشغل"
"يعنى ايه انشغل"
"يعنى بيروحوا يشتروا حاجات ناقصاهم... بيروحوا يظبطوا حاجات ف الشقة...مبقاش فاضى"
"وانتم مع بعض ايه؟؟"
"بقولك مشغول ومش فاضى وبيرجع بالليل تعبان"
"يامرارتى يا انااااااااا"
"لازم اتعود"
"وان شاءالله هيبقى مع كل واحدة يوم ولا اسبوع واسبوع ولا شهر وشهر"
"متكلمناش ف كده خالص"
"انتى عبيطة يابنتى"
"لا مش عبيطة... انا عاجزة ووحيدة وبحبه يا هدير"
                       *********************

مها وطه فى الشقة... بتفرجه على الستاير
"ايه رأيك بذمتك مش ذوقى حلو"
"حلو"
راحت وقفت عند الدولاب... وشاورت له
"اوعى تفتح الدولاب ده... علشان جايبة شوية حاجات تحفة وعايزاها تبقى مفاجأة"
ضحك طه وهو بيقولها
"حاضر مش هفتحه"
راحت وقفت قصاده وحطت ايدها على صدره وهى بتبص له
"عارف يا طه... انا هخليك تنسى كل حاجة زعلتك قبل كده... هدلعك دلع عمرك ما شفته قبل كده... بتحبنى؟"
مسك ايديها وشالها من عليه
"مامتك بره"
"مش عريسى حبيبى"
قربت منه اكتر
"خايفة تكون مبتحبنيش"
تأثيرها الانثوى عليه كان اقوى من تفكيره... واستسلم لاحساسه كرجل بين ايديه انثى
                       



هناك 48 تعليقًا:

  1. بجد حرام عليكي اللي بتعمليه في عاليا ده بجد ظالم

    ردحذف
  2. انا صعبان عليا عالية اوووووووي وحاسة ان مها ومامتها مش هيجيبوهاالبر ومامة طة واختة هيطلعو عين عالية لما تعيش معاهم بجد حرام اللي بيحصل في عالية دة

    ردحذف
  3. بجد حرااااااااااام عاليه مظلومه اوى ومها دى حيوانه وحاسه ان عليا هتتبهدل لما تعيش مع امه واخته دينا انصفي عاليه وبجد بقيت بكره طه اوى اوى

    ردحذف
  4. طه شكله هيطلع ندل اووووي ..... حرام عالية كده

    ردحذف
  5. :/ يعنى ايه ايه السهوكه ديه

    ردحذف
  6. taha da bgd ensan zebala awee :( w 3alya sa
    3bana 3lya awee :(

    ردحذف
  7. جميله جدا يادندن بس عالية صعبانة عليا جدا ده لو كان قعدها في صحراء لوحدها احسن من قعدتها مع امه واخته

    ردحذف
  8. حسبى الله وتعم الوكيل البت دى عاوزة الحرق فى ميدان عام

    ردحذف
  9. عااااااااا عندى مرارة واحدة يا دينا :@ :@

    salma

    ردحذف
  10. ايه ده بقى؟؟ ايه الظلم ده..عاليه مستحملة كتير اوي والله صعبانة عليا اوي..والحية اللي اسمها مها ديه موتتني من الغييييييييييييييييظ

    hadil gasser

    ردحذف
  11. ايه ده حرام بجد دى عالية دى طيب جدا بكره يا نرجس تعرفى قيمتها لما مها هانم تمشيكى على العجين متلخبتهوش

    ردحذف
  12. لا بقي .... كدة كفاية اوي حرام عليكي اللي بتعمليه في عالية و فينا كدة كتير اوي الصراحة انا نفسيتي بقت زي الزفت والله ... وحياة ولادك يا شيخة تخلي عالية تحمل بقي دي غلبانة و الله و طيبة وتستاهل كل خير

    ردحذف
  13. مها دى عايزة تضربلها قلمييييين يوفوقوهاااا >_<

    ردحذف
  14. طه ده طلع زباله و لو كان بيحب عاليه بجد مكنش خطب مها عاليه صعبانه عليا اوووولا

    ردحذف
  15. انا حاسه ان مها دى هتجيبهم كلهم ع البلاطه وهيلعنوا الساعه اللى جوزها لطه فيها وهتبقى عاليه بعد كده الـ هنا والـ هناك

    ردحذف
  16. 4kl taha. Keda hai7b. Mha w keda 3alia hattzlm 2wiii bgd 3alia s3bana 3lia 2wiiiii rbna m3aha ya RB

    ردحذف
  17. على فكرة كدا حرام عليكى انا قلبى وجعنى على اللى بتعمليه فى عليا ده ممكن اقتل نرجس ونخلص بقى علشان الظلم اللى بيحصل ده حراااااااااااااااااااااااااام


    منار

    ردحذف
  18. احساس ايه ابو احساس ربنا يهدك راجل ايه يا دينا ليه الحزن والاسي دا استحالةواحد يحب اتنين فى نفس الوقت وبجد حرام اللى بيحصل لعالية دا

    ردحذف
  19. طه ده بجد طلع حيوان جدااااااااااا عشان يطلعها من شقتها اللى اتجوزت فيها عشان يجيب فيها الهانم مها دى و الله عالية صعبانه عليه اوووى متطلب الطلاق منه بدل الذل اللى بيذلهولها ده و عامل فيها بيحبها

    ردحذف
  20. حب ايه ده اللىيذل الواحد كده يغور الحب الى يعمل فى صاحبه كده على قد ما عاليه صعبانه عليا جداااا على قد ما شايفاها ساذجه جدا ازاى تسكت على كل ده دا الزفت طه مرمطها اوووى دى قعدتها فى الدار كانت هتبقى ارحم تسيبه يروح فى داهيه و تمشى ايه حرقت الدم دى

    ردحذف
  21. بجد حرام اوى اللى بيحصل فى عليا ده
    ومنها لله مها دى وحشه اوووووووووووووووووووووووووى

    ردحذف
  22. ههههههههههههههه جامده بس استعدى يا دينا هتلاقى هجوم على اسك انه الفسق والفجور وانك بتثير الشهوات هههههههههههههههههه
    تسلم ايدك بجد :)

    ردحذف
  23. :( :( حرام كل ده يحصل لعاليه بقي هي امتي هتنتصر :(

    ردحذف
  24. شوفتى انا قولتلك من الاول
    حاسه انى عاوزه اصوووووووووووووووووووووووووووووت
    بالصوت الحيانى #نرجس استايل #

    ردحذف
  25. زعلانة اوووووووووووى علي عالية ربنا يستر عليها من نرجس و نرمين و مها و طه نفسه

    ردحذف
  26. حرام اوووووووووووووووووووي شكل طه هينسي عاليه
    لوكان طلقها كان ارحم

    ردحذف
  27. الحلقة حلوة جدااااااااااااااااااااااااا بس مش عارفة عالية كل حاجة وحشة بتحصلها ليه

    ردحذف
  28. كفااااااااااااااااااااية

    ردحذف
  29. بجد عاليه صعبانه عليه اوى
    ايه ده مها دى ايه معندهاش احساس بس ربنا مبيسيبش ده بيخلص

    ردحذف
  30. ااه بجد بقي قلبي وجعني اوي علي عايه

    ردحذف
  31. نعم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
    ايه الاستهبال دا لا
    بجد طه نزل من نظري اوووووووووووووي من اول ما وافق اصلا على مها دي
    دا كفاية اللي كانت بتعمله وهي عارفة انه متجوز بجد شخصيات زبااااااااااااااااااااالة


    ddy dody

    ردحذف
  32. بجد بجد اول مره ادايق من حلقه كده ايه ده وايه طه ده هو مش بيحب عاليه ولا ايه ازاى كده يعنى المفروض انه مبيقاش بالطريقه دى اوى كده والله انا لو مكان عاليه ما تقعد على زمته ولا دقيقه اازى تستحمل انه يتجوز عليها اصلا لا وكمان يعيشو فى شقتها انا اقبل انى اكون وحيده ومع ربنا الا ان اعيش بالطريقه دى بس بردو حضرتك مبدعه وبدليل ان الواحد اتاثر اوى فعلا
    مايسه

    ردحذف
  33. انا عاليه صعبانه عليه بس دى اقل حاجه بتحصل
    و طبعا نرجس قاسيه عليها بس بردو كويس انها موافقه انو يفضل متجوزها و كمان وفق انها تقعد معاها فى بيتها و حاولت تساعدوهم كتيـــــــــــــــر
    بس فى النهايه عاليه بجد حالها يقطع القلب :/

    ردحذف
  34. الحلقه تحرق الدم وتدايق بشكل رهيب بجد وطه ده بيثبت اني كل الرجاله نوع واحد وعاليه بتثبت اني الواحده لما بتحب بضحي باي حاجه وجعتينننننننننننني اوي يادودو

    ردحذف
  35. Abo om dy zal2a tgeb el-da3't wllahy !!!!! Taha da zbalaaa y3ne wstfzny ldrgt eny m2drtsh m3la2sh ! :@:@

    ردحذف
  36. طه كمان طلع كلب وحيوان :(
    وعالية عبيطة اوووى وهبلة وعل نيتها
    ومها كلـــــبة ربنا ينتقم منها
    وامها انيل منها
    ونرجس ونرمين طووول عمرهم زبالة
    وهدير مش عارفة تعمل ايه لصاحبتها بس جدعة
    اما فاتن وكده شالو ايدهم من موضوع عليا تماما

    ربنـــــا ينتقم من مها وامها ونرجس ونرمين وياخدهم
    وطه بقى كلب وحيوان وزبالة ومبقاش زيى الاول
    يا عينى عليك يا عليا مع انك هبلة وعلى نياتك


    بس الحقلة تحرق الدم حرااااااام عليكى يا دينا

    ردحذف
  37. بكرهك اوي يا مها يا حيوانة انتي

    ردحذف
  38. حراااااااااااااام اوى كده اللى بيحصل لعاليه وبعدين كرهتينى فى اسمى يادينا

    ردحذف
  39. لآلالالالالالالالالالالالالالالالا حرااااااااااااااااااام :/ :/ :/

    ردحذف
  40. يا جماعه احنا مضايقين من طه بس اللي بيعمله ده طبيعي هو مخانش عليا بالعكس هي عارفه كل حاجه من الاول وبعدين هو مش بيعمل كده مع واحده من الشارع دي خلاص تعتبر مراته انا مش بقول ان ده صح بس بحاول افهمكم الموضوع ماشي ازاي وبعدين لازم نحط في الاعتبار ان دينا مصوره عليا علي انها مش جميله اوي و كمان مش دلوعه و علي العكس مها اخر دلع و بتعرف تهتم بنفسها يبقي لازم طه يقع فيها خاصه انه برضه معندهوش تجارب ولو كان عنده كان هيعرف انها مش كويسه وبعدين اللي بيقول عليا ساكته ليه هي برضه ملهاش حد يعني هتقعد فين لو سبته و بعدين ملهاش اهل يساندوها و يقولولها كرامتك واللي بيقول تروح تعيش في الملجا الموضوع مش بالسهوله دي هي بقالها سنين متجوزه يعني ممكن ميخدوهاش و بعدين مش بتشتغل يعني هتصرف منين لو اتطلقتو في راي المشكله الحقيقيه و السبب في كل اللي حصل تدخل نرجس في حياتهم و عدم صبر طه بسبب زن امه لان من غير مامته هو كان عنده استعداد يجرب تاني ويصبر علي عليا وانا اسفه اب الكومنت بتاعي طويل
    ا

    ردحذف
    الردود
    1. كلامك صح جدا وانا من رايك

      حذف
  41. انا حاسة ان النهاية حلوة وطه هيطلق مها ومامتو اكيد هتتعب وهيا اللى هتقف جنبها وتساعدها وساعتها هتحبها وتعرف انها غلطت فى حقهاا

    ردحذف
  42. و الله مسكينة اوي عالية ربنا معاها مع العقارب نرجس و نرمين و طبعا لسه دا لما تحمل مها هتزل عالية زل ما بعدو زل ربنا معاها المكينة ووالله طه شكله بيحبها برده رغم الليعمله دا

    ردحذف
  43. انتى جبتى المفيد الموضوع كله مش حب ولا حنان ولا اى هبل هو ضعف رجل بين ايديه انثى

    ردحذف
  44. وربنا عيط قلبي وجعنى علي عليا حرام بجد

    ردحذف
  45. ما تعذبيش عاليه اكتر من كده :(((

    ردحذف
  46. بصى انا مها الكلب دى مش طيقاها و بجد هو لسة فى زى عليا عارفة انا لو مكنها كان زمانى جبت مها مسحت بيها البلاط و طلعت على اللى اسمو جوزى القديم و الجديد يعنى انا محترمة و وافقت كمان اخرج من شقى دا ايه الجبروت ده.( انا بجد هطق هطااااااااااااااااااااااق)

    ردحذف

قول رأيك بلاش تقرا وتقفل من سكات...ارائكم تهمنى