الجمعة، 7 يونيو 2013

هل يشفع الحب؟... الحلقة 20

الحلقة 20
مها وطه فى الشقة... بتفرجه على الستاير
"ايه رأيك بذمتك مش ذوقى حلو"
"حلو"
راحت وقفت عند الدولاب... وشاورت له
"اوعى تفتح الدولاب ده... علشان جايبة شوية حاجات تحفة وعايزاها تبقى مفاجأة"
ضحك طه وهو بيقولها
"حاضر مش هفتحه"
راحت وقفت قصاده وحطت ايدها على صدره وهى بتبص له
"عارف يا طه... انا هخليك تنسى كل حاجة زعلتك قبل كده... هدلعك دلع عمرك ما شفته قبل كده... بتحبنى؟"
مسك ايديها وشالها من عليه
"مامتك بره"
"مش عريسى حبيبى"
قربت منه اكتر
"خايفة تكون مبتحبنيش"
تأثيرها الانثوى عليه كان اقوى من تفكيره... واستسلم لاحساسه كرجل بين ايديه انثى
                       
صوت مامة مها بتنادى عليها
كانوا لسه واقفين قصاد بعض ...فاقوا من نشوة احساسهم
ارتبك طه
"مامتك"
مها وهى بتجيب منديل من شنطتها بتمسح له شفايفه
"استنى فيه روج"
اخد منها المنديل... مسح شفايفه
"طب روحى شوفيها عايزة ايه... لتكون شافتنا والباب مفتوح"
"حتى لو شافتنا يعنى...كلها كام يوم وهبقى مراتك فأكيد مش هتدقق على حاجة بسيطة زى دى"
خرجت مها من الاوضة لما مامتها نادت عليها تانى
قعد طه ... وهو محرج وحاسس بالذنب وف نفس الوقت بيستعيد احساس اللحظات اللى فاتت فى خياله
                         **********************

نرمين قايمة من النوم الضهر... بعد ما غسلت وشها
سمعت صوت ف المطبخ...دخلت المطبخ
كانت عالية واقفة بتطبخ
"انتى بتعملى ايه؟"
"بعمل الغدا"
"كويس... طابخة ايه بقى"
"عاملة بامية و..."
"بامية ايه مبحبش البامية...مش تسألى الاول يا عالية"
"سألت والله ..انا مكملتش كلامى... انا عاملة جنبها صينية بطاطس"
"ايوه كده مبحبش البامية انا"
"نرمين ممكن ننظم مع بعض البيت علشان انتى بتصحى متأخر وانا بصحى بدرى"
"يعنى ايه مش فاهمة"
"يعنى لو مش هيضايقك ابقى اطبخ انا وامسك المطبخ علشان اخلص بدرى"
"يضايقنى ايه...لا ميضايقنيش طبعا... خدى المطبخ ببقية البيت وسيبيلى اوضتى انا هبقى اعملها"
"ماشى مفيش مشكلة... بس ممكن نبقى نتفق من بالليل هطبخ ايه؟؟ علشان النهاردة بقيت مش عارفة اتصرف واتصلت بماما سألتها"
"طيب ماشى"
نرمين وهى بتتكلم مع عالية...حطت براد الشاى ع النار
وعملت ساندويتش وحطته ف طبق... وحضرت كوباية شاى ف الصينية... وخرجت من المطبخ والشاى ع النار

دخلت نرمين اوضتها... قعدت ع الكمبيوتر...فتحته وفتحت الفيس
قعدت تقلب ف اكونت طارق
بانت على وشها علامات الغضب... والغليان

ف نفس اللحظة اللى جت فيها عالية بصينية الفطار
نرمين بصوت مسموع كأنها بتكلم الكمبيوتر
"يا وسخ يا ابن الكلب"

اشمئزت عالية من سماع الشتيمة من نرمين...واستغربت
دخلت وحطت الصينية على كرسى
"مالك يانرمين بتشتمى مين"
نرمين وهى قايمة وبتاخد الموبايل من ع السرير
وهى بتصرخ فيها
"مفيش حاجة... سيبينى لوحدى"
خرجت عالية من الاوضة بسرعة وهى مستغربة
وسمعت صراخ نرمين ف الموبايل
"انت مفيش فايدة فيك ابدا.. هتفضل طول عمرك وسخ ومش هتنضف ابدا... اشتم كمان ماهو ده اللى انت فالح فيه...خدوهم بالصوت ... انت زبالة اصلا وتحمد ربنا انى مستحملة قرفك... غور ف 60 داهية"

عالية واقفة ف الطرقة مستغربة اسلوب الكلام
افتكرت الاكل اللى ع النار...جريت ع المطبخ
وهى ف المطبخ بتفكر تسأل نرمين مالها وتتكلم معاها ولا تسكت ومتتدخلش... وبعد تفكير قررت انها متتدخلش اسلم
        
بعد ما خلصت وهى قاعدة مستنية طه..سمعته بيفتح الباب
جريت عليه تستقبله
"حمدالله ع السلامة يا طه... غير هدومك لحد ما اسخن الاكل"
"الله يسلمك.. لا ياعالية مش قادر اكل دلوقتى"
عالية بانكسار
"ليه؟؟انت اكلت بره"
"لا بس مليش نفس... هريح شوية وبعدين صحينى كمان ساعتين اتغدا وانزل.. اتغدى انتى لو عايزة"
دخل الاوضة ودخلت وراه
"لا هستناك لما تقوم من النوم"
"ماتتغدى انتى ونرمين... لازم تتعودى تاكلى من غيرى"
قالها من غير ما يفكر... حس بالندم بعدها...حست بيه عالية...ردت بسرعة قبل ما يتضايق
"نرمين لسه فاطرة من شوية... هستناكم نبقى نتغدا كلنا مع بعض"

غير طه هدومه... ونام من غير ما يقولها اى حاجة
خرجت من الاوضة وقفلت الباب وراها
                       *******************

عالية حضرت الغدا... وراحت تصحى طه
وراحت علشان تقول لنرمين تيجى تتغدا
نرمين متوقعة تلاقى نرمين منهارة من اللى حصل وانهم سابوا بعض هى وخطيبها...وقررت انها هتتقبل منها اى كلام لانها اكيد ف صدمة

خبطت عالية ع الباب خبطة خفيفة وفتحته
لقيت نرمين قاعدة قدام الكمبيوتر...وبتتكلم
اللى لفت نظر عالية وخلاها مش عارفة تتكلم انها شافت نرمين لابسة بادى بحمالات وقاعدة تتكلم وفاتحة الكاميرا

استجمعت عالية صدمتها واستغرابها...اللى مقابلوش اى ارتباك ولا خوف ولا قلق من ناحية نرمين
"نرمين الغدا جاهز "
هزت لها نرمين راسها... وكملت كلام
"طارق انا هروح اتغدا وارجع اكلمك...سلام يا حبى"

عالية واقفة بتبص لها... ومتحركتش من مكانها
"ايه ياعالية...واقفة متخشبة كده ليه؟"
"انتى كنتى بتكلمى طارق؟"
"انتى مش سمعتينى بقوله طارق...يبقى طارق"
"اصل من شوية سمعتك بتزعقى"
"لا خلاص...صالحنى واحنا اصلا مبنستغناش عن بعض"
"ربنا يسعدكم بس...."
نرمين بنفاد صبر
"بس ايه... عايزة ايه ياعالية"
"حبيبتى انتى قاعدة بتكلميه وهو شايفك صح؟"
"هاااا يعنى عايزة ايه"
"اصل لبسك يعنى"
وزعقت نرمين
"نعععععععم يا ختى... ماله لبسى ان شاءالله...ثم ان انتى مالك تتدخلى ف حياتى ليه...اسمعى ياعالية انتى قاعدة هنا ..ماشى ...مستحملاكى علشان خاطر اخويا ..ماشى...انما تتدخلى ف حياتى لأ...فاهمة"
"مش قصدى اتدخل بس انا حبيت انصحك"
"انصحى نفسك وخليكى ف حالك"

جه طه على صوت نرمين
"فى ايه...مالكم"
نرمين"ادى اللى قلتولى معلش تونسك...جاية تقرفنى وتتدخل ف كل حاجة بعملها"
طه اتنرفز"اتكلمى كويس يا نرمين واحترمى نفسك"
نرمين"ما تقولها هى مالهاش دعوة بيا"
عالية حست بالاهانة... عيطت من غير ماترد
طه"متزعليش ياعالية حقك عليا"
نرمين"ياسلام... هى نزلتلها دمعتين هتقوم مزعقلى انا"
طه بيشخط فيها"انتى مش عاملة احترام لحد"
عالية وهى بتشد طه بعد ما مسحت دموعها
"خلاص يا طه... حصل خير خلاص...يالا نتغدا يانرمين"
نرمين"مش عايزة"
طه"ان شالله عنك ما كلتى...يالا يا عالية"

طه وعالية وهما بيتغدوا
"هو ايه اللى حصل"
"مفيش حاجة ياطه...متشغلش بالك انت سوء تفاهم بس"
"معلش متزعليش من نرمين ومن طريقتها...حقك عليا انا"
"انا ميهمنيش حاجة ف الدنيا غير رضالك عليا...ربنا يخليك ليا"
"ويخليكى ليا ياحبيبتى"
فرحت عالية بكلامه... حست بصدق احساسه وهو بيقولها يا حبيبتى ودى كانت اكتر حاجة ممكن تفرحها
                          *********************

عالية قاعدة بتتكلم ف التليفون
"الو...ازيك ياهدير... عاملة ايه.. انا كويسة الحمدلله... قاعدة لوحدى اهو قلت اطمن عليكى ... نرمين مع خطيبها وطه ومامته بره...اه بكرة هيتجوز...مليش دعوة مبسألش.. الحمدلله على كل حال... كل ما احس انى متضايقة اوى ومخنوقة اقوم اتوضا واصلى وافضل اقرا قران وادعى ربنا لحد ما احس ان نزل ف قلبى صبر عجيب... والله الصبر ده من عند ربنا... مفيش جديد... اه متغير طبعا بس معذور هيعمل ايه... لا مليش دعوة بيها من ساعة المشكلة اللى حصلت...الكلام عادى ف حدود بس ... مامته بتنزل الصبح وبترجع بالليل وحرام مش محسسانى انى ضيفة ومش بتضايقنى ...بالعكس محسسانى كأنى ف بيتى..اول كام يوم كنت بسألها اعمل ايه ف الاكل وكده كانت بتقولى...بعد كده قالت لى اتصرفى انتى كأنك ف بيتك ومتسألنيش.. اهو ربنا كريم مش هيبقى من كله... اه يا هدير بالله عليكى ادعيلى كتير يحنن قلبهم كلهم عليا... سيبك منى بقى وقوليلى صحتك عاملة ايه؟؟ المرة دى شكلك تعبانة اكتر من المرات اللى فاتت... هتروحى له امتى؟؟.. ابقى قوليلى قبلها بيوم اجى معاكى"
وسمعت صوت الباب بيتفتح
"ماشى يا هدير... مش عارفة مين منهم جه...هقفل معاكى دلوقتى ..هبقى اكلمك بكرة...سلام"

دخلت نرمين وطارق
طارق"سلامو عليكو"
عالية وهى متفاجئة... جريت على باب البلكونة اللى معلقة عليه طرحة ...لبستها بسرعة
نرمين"مالك متلخبطة كده...مفيش حد غريب"
عالية"اهلا وسهلا"
طارق مد ايده يسلم عليها
"اهلا بيكى"
سلمت وهى مرتبكة...وخطفت ايدها بسرعة
بصت له... كان مركز نظره عليها وهو بيبص لها بابتسامة ضايقتها

نرمين اول ما دخلت ...دخلت على اوضتها تحط الحاجات اللى اشترتها..ورجعت لهم تانى
"انتوا واقفين ليه...اقعد يا طارق"
استغربت عالية... ومقدرتش تسكت
عالية"هو هيقعد وطه مش موجود؟؟"
نرمين"نعم؟؟ هو مفيش فايدة برضه بتتدخلى ف اللى ملكيش فيه"
عالية"لو طه جه دلوقتى واحنا قاعدين كده هيتضايق...انا اسفة يا طارق معلش متزعلش منى بس الاصول اصول"
ارتبك طارق وهو مش متوقع
طارق"لا عادى ولا يهمك... استأذن انا"
نرمين وهى بتزعق"تستأذن مين؟؟ والله ما انت قايم...هى مش عاجبها تدخل تقعد ف اوضتها"
عالية"ميصحش يا نرمين انا ادخل واسيبكم لوحدكم"
نرمين"يااااااااااربى انتى جيتى لى انا ... انا كان مالى هما يتجوزوا واقعد انا ف القرف ده"
عالية"الله يسامحك"
نرمين"انتى مستفزة اوى على فكرة... وباردة كمان"
طارق"اهدى يانرمين... هبقى اجى مرة تانية"
نرمين"لا... مش هتمشى كلامها علينا ف بيتنا...اسمعى طارق ييجى ف اى وقت بدل انا مش لوحدى يبقى عادى"
عالية وهى مستغربة"هو كان بيجيلك وماما ف المحل"
نرمين"قصدك ايه...عايزة تشككى فينا...روحى اجرى قولى لطه علشان توقعى الدنيا"
طارق"مينفعش كده بقى هتفضلوا تتخانقوا بسببى"
ووجه كلامه لعالية
"خلاص يا ستى انا اسف...بس لو عايز اجى ازور خطيبتى ابقى استأذنك الاول؟"
عالية"وتستأذنى انا ليه؟؟ استأذن راجل البيت"
نرمين بتضحك"راجل البيت مين...طه ههههه"
عالية متضايقة علشان طه
"ايوه طبعا"
نرمين"لا ياماما... طه عمره ماكان فاضى لى وانا مش همشى بأمره"
عالية"خلاص ..ابقى استأذن مامتها وانا مليش دعوة ...اللى هتقول عليه صاحبة البيت هو اللى هيمشى"
طارق"ماشى... سلام يا نرمين"
نرمين وهى بتبص لعالية شذرا... راحت ورا طارق ع الباب
"حبيبى متزعلش علشان خاطرى... ربنا بلانى بواحدة متخلفة ومعقدة تطلع عقدها عليا"
"بصى لو مامتك موقفتهاش عند حدها انا مش جاى تانى"
"لا متقلقش انا هتصرف ...متزعلش انت بس"
"ماشى...البت مها كانت سكرة مش دى"
"وانا مين يكفرنى ف عيشتى... مها سابتنى للعقد دى"

عالية بعد ما خلصت كلامها معاهم وشافتهم رايحين ع الباب
دخلت اوضتها وفكرت تقول لطه ولا لأ
وقررت انها متقولوش علشان ميحصلش مشاكل بسببها
                        *********************

طه نايم صاحى... وعالية نايمة صاحية
"عالية"
"نعم"
"صاحية؟"
"ايوه عايز حاجة"
"اه"
قامت قعدت
"نعم يا حبيبى عايز اجيبلك حاجة"
قام قعد جنبها
"انتى مسامحانى بجد...مش زعلانة منى"
"ايوه"
"ليه حاسس انك مخبية عليا احساسك"
"علشان مليش حق انى ازعل... انا اهم حاجة عندى انك متبعدش عنى وتسيبنى"
وبدأت دموعها تنزل
"انا بحبك اوى يا طه... انا عندى اتعذب وانا شايفاك بتتجوز ارحم من انى اموت وانت بعيد عنى... انا بس عايزة اعرف انت لسه بتحبنى"
اخدها ف حضنه وهو بيطبطب عليها
"طبعا بحبك"
"حاسة انك مبقتش تحبنى زى الاول"
"بالعكس... انا مقدرش اتخيل حياتى من غيرك... انتى حبيبتى يا عالية... وحشتينى اوى"
                       ********************

نرمين قاعدة قدام الكمبيوتر...رن موبايلها
"الو...ايوه يامها ازيك...مبروك ياعروسة"
"بلا عروسة بلا زفت...طه فين"
"مالك فى ايه... دخل نام من شوية"
"والزفتة فين"
"مخمودة"
"لا واضح اوى انهم ولا نايمين ولا نيلة... البيه كنسل عليا وقفل التليفون بعدها"
"هههههه"
"بتضحكى يا نرمين وانا والعة"
"طب اعمل ايه"
"روحى خبطى عليه خليه يكلمنى"
"لا اتكسف افرضى يعنى"
"ماهو علشان انا متأكدة انهم صاحيين بقولك قومى خبطى عليه خليهم يكلمنى...قومى يانرمين متنرفزنيش"
قامت نرمين..وراحت بتردد خبطت على الباب
نرمين "طه انت صاحى؟"
طه"ايوه...عايزة حاجة"
نرمين"مها ع التليفون عايزاك"
طه"طيب قوليلها هكلمها كمان شوية"
نرمين"طيب"
بعدت عن الباب... وكلمت نرمين
"بيقولك هيكلمك كمان شوية"
"اخوكى ده معندوش دم ومستفز... يحرق دمى كده انا غلطانة انى راضية بالوضع ده"
قفلت مها ف وش نرمين...نرمين استغربت
نرجس خارجة من الحمام
"واقفة كده ليه"
"تعالى بقى علشان احكيلك على كل اللى حصل النهاردة لحد دلوقتى علشان تتصرفى... اخويا هيتجوز اتنين علشان يطلعوا عينى انا"










هناك 46 تعليقًا:

  1. مش عارفه ساعات بحس ان طه بيحب عليا اوى ومش متخيله انه يبقى مع مها
    وفى نفس الوقت مش متضرر يعنى ولا زعلان من جوازة من مها
    وعليا صعبانه عليا اوى هيبقى طه ومها وكمان نرمين :( :(

    ردحذف
  2. اول مره اخرج من صمتي والله حاسه اني هيجيلي الضغط ع اخر الحلقات
    انا عندي اموت ولا يجري فيا اي حاجه م دي
    قدري اني مبخلفش مثلا ادوس ع كرامتي عشان بحبه ؟
    لالا يولع هو واتعذب انا ف بعده احسن ما اموت كل يوم ف قربه

    ردحذف
  3. قصه جمييييييييله جدا و احداثها ممتعه جدا :-)

    ردحذف
  4. لا خلاص يا دينا انا جالي ضغط وسكر ومرارتي اتفقعت بالله عليكي يا دينا يا تخلي بقية الحلقات فرح يا اما تخلصي القصة ديه

    hadil gasser

    ردحذف
  5. يارب الجوازه ما تتم

    ردحذف
  6. الحلقة النهاردة رووووووووعة
    تسلم ايدك يادينا ^_^

    Doda

    ردحذف
  7. لالالالالالا عالية مزوداهاااا
    عايز يتجوز تمام .. عايزة أفضل على ذمته ماشى .... لكن الاهانة دى لا
    كرامتى مش متصااانة يبقى ليه أعمل كددة ..... حب بقى وكددة مقولناش حاجة لكن بردوووو للصبر حدود
    طه عايز يبقى اب تمام من حقه يتجوز لكن يجيب عاليه مع اخته ومامته وهو عارفهم كوويس و عارف انهم هيبهدلوها .... لا غلطان
    :(((((((

    ردحذف
    الردود
    1. عشان انت الحمد لله عندك ام وام وعيله تتحامى فيهم بس هى لا :(

      حذف
  8. ربنا يصبر عالية على اللي هي فية دة يا عالم يا دينا هتعملي فيها اية تاني اكتر من كدة =D= D

    ردحذف
  9. انا اول مره اعلق بس بجد عاليه صعبانه عليا جدا وموقف طه غريب ونرمين دى محتاجه ربايه ومها مش مرتحالها من الاول وحاسه ان كل المصايب الى هتحصل هتكون بسببها واكيد انها هتغتت على عاليه وهتكون السبب ف ضياع نرمين لان هى الى بوظتها بس انا عاوزه اعرف هو لسه بدرى على النهايه ولا لا لانى عندى امتحانات ومبقتش افتح كتير وهموت واعرف ايه الى هيحصل وبصراحه خايفه ف يوم من الايام اتحط مكان عاليه يعنى موقفها صعب جدا وبان فعلا انها اصيله وكويسه يعنى واحده غيرها عمرها ماكانت هتستحمل الى بيحصلها ده

    ردحذف
  10. انا قريت ليكى قصص كتييييييييييير واول مرة اعلق ع حاجه بس معنديش حاجه اقولها غير انى تعبت ونفسيتى بقت زفت عاوزه حاجه تفرررررررررررررررح وعاليه صعبانه عليا اوووووووووووووى

    ردحذف
  11. يا دينا حرام عليكي انا عندي مرارة واحدة لا و كمان عندي امتحانات و النبي كفاية علي عالية كدة بقي

    ردحذف
  12. معرفش ليه حاسة ان نرجس هتغلط نرمين وتبهدلها ولاول مرة هتقف فى صف عليا
    يااااااااااااااااااااااااااارب يبقى احساسى صح وعليا تتعوض على المر اللى شافته

    ردحذف
  13. يا دينا اني رووووووووعة بس فرحي عالية شوية والحلقة طويلة بس مفيهاش احداث كتيرررر بس برده رووووووووووووووووعة
    rana

    ردحذف
  14. لالالالالالالالالالا مها رخمة ونرمين ارخم وشكل نرجس هتبقي رخمة الحلقة الجاية ونبدا بقي ف الحب اللي بيشفع واللي مش بيشفع

    ردحذف
  15. حلوه خلى عاليه تبقى حامل ونرجس تنصف عاليه ومها يجيلها اى تعب وتتنيل متخلفش ويطلقها ونرمين برده يحصلها حاجة وهنا نرجس تتهد

    ردحذف
  16. حلوة يا دندن بس اتوصي بينا شوية ابقى طولى الحلقة

    ردحذف
  17. بجد الحلقات روعة بس بجد عايزة حاجة تفرح في الحلقة الي بعد كدة تعبت من كتر الحزن و العياط الي في الحلقات

    ردحذف
  18. حلوة اووووووى الحلقة النهاردة بس اول مرة تبقى قصيرة كدة

    ردحذف
  19. انا حاسه ان عاليه هتحمل والجوازه مش هتم ونرجس هتقف في صف عاليه

    ردحذف
  20. انا ابتديت اتنرفز من عالية نفسها :@
    مع اني عاذراها وكل حاجة , بس مش طبيعي الانكسار اللي هي فيه دا :(
    ربنا ما يكتها على حد يارب :(

    ردحذف
  21. عاليه دى ساعات ردود افعالها،بتستفزنى ومحدش يقولى حب انا مش مقتنعه ان فيه كده محدش يرضى بكده ابدا يعنى مثلا مينفعش تحب وكرامتها،متصانه لالالالالا كده اوووووووووفر اخر 36حاجه

    ردحذف
  22. يارب يوم الفرح عاليه تلع حامل و يسيب مها المقرفه دى

    ردحذف
  23. نيهاهاهاااااااااااااااااااااااااااااااا احنا نخلص من نرجش يطلعولنا نرمين ومها دا ايه الغلب دا :( حللللللللللللللللوة جدااااااااااا

    ردحذف
  24. جامده جدا الحلقه ديه يا دودو بس ونبي قوللنا القصه ديه نهايتها قربت ولا لسه عشاننعرف ايه النظام لاحسن انا هيجيلي القلب منهم وبجد صعبان عليا عاليه اووووووووووي

    ردحذف
  25. انا صار عندي اكتئاب من هب القصة انا زعلانة على عليا كتيييييييييير

    ردحذف
  26. عارفه مش قادره اقولك انا جالى اكتئاب ولا المراره تعبتنى ولا عاليه صعبانه عليا ولا طه ده عاوز الضرب
    ولا نرمين ومها دول مش هيوردوا ع جنه ولا ع نار وع جنينه الحيوانات
    بس بجد حـــــــــــــــــــــــــــــــــــــــــــــــــــــــــــــــــــــــــــــــــراااااااااااااااااااام >_<

    ردحذف
  27. ياجدعان حد يدى البت دى بالشلوط ع قفاهاااااااااااااااااا

    ردحذف
  28. انا عندي احساس ان عاليه هتبقي حامل و مش هيعرفوا غير بعد لما طه يتجوز مها

    ردحذف
    الردود
    1. ياريت و يارب يعرفوا يوم كتب الكتاب علشان اشوف طه هيعمل ايه ؟

      حذف
  29. اللى مخلى عاليه زى ماهى كده فى القصه مش بس الحب
    لكن الامان
    عاليه اتربت طول عمرها يتيمه بتتنقل من ملجأ للتانى
    اكيد اتعرفت على ناس وصحبت ناس وكل مره الحياه بتفرقهم
    عاليه عاشت خايفه من الفراق
    عشان كده مكنش ليها غير صديقه وحيده وحتى هى بقى ليها حياتها
    اللى كانت بتدير الملجأ الاول برضه مهما كانت بتحبهم وعاليه بتحبها بس برضه كان ليها حياتها وجه اليوم اللى فرقتهم فيه
    عاليه تمسكها ب طه مش بس حب ...لكن امان حتى لو الامان دا مشتت
    لكنه امان نوع من الاستقرار

    ردحذف
  30. حلوه الحلقه انهارده بس انا نفسي عاليه تخرج من صمتها ده وتزعق وتطلع اللي جواها انا اتخنقتلها بصراحه

    ردحذف
  31. بجد قصه جامده اوي يادينا بس مفتكرش حد ممكن سيتحمل اللي بيحصل مع عاليه ده باسم الحي

    ردحذف
  32. عالية فعﻵ لو فى ظروف طبيعية لها اهل مكنتش هتستحمل بس طبعا هى مكسورة ولوحدها وخايفة من المجهول متوقعة انها هتشوف كتير فى حياتها من طه ومها ونرجس ونرمين والى هتقف جنبها فاتن وهتطلق من طه وهتكون خطة من مها وهدير صاحبتها هتموت وهتتجوز جوز صاحبتها وتربى عيالها وطه هيشرب المر من مها وهيفوق متاخر اوى

    ردحذف
    الردود
    1. انتى على فكره خياليه اوووى و درامية بردوا
      القصة كده هتكون حزينه مووت و انا الصراحه مش منتظرة حاجه تانيه تحصل لعاليه

      حذف
  33. E7sas sa3b awy elly 7sah 3liaa dlo2ty soa2 hya wla ana .. bs 4akl koal elly 2smhom 3liaa nsbhom 2swad f el donia ...

    ردحذف
  34. انا بيجيلي اكتئاب كل م اقرا القصة ده وابتديت اكره طه عشان بدأ يميل لمها ويتنرفز على عالية مش كفاية اللي هي مستحملاه :@
    ولحد دلوقتي برضو ما استلطفتش نرجس ده كفاية ان هي صاحبة الفكرة المهببة ده م الاول وعالية الغلبانة عشان م تترميش ف الملاجئ تاني ساكتة :@

    ردحذف
  35. اين الحلقه 21 فات يومين
    و يارب تكون نهايه سعيده ...

    ردحذف
  36. تحية كبيره من المغرب لمصر الحبيبه بجد رووعه يا دينا...بس انا زعلانه على عاليه كتير بس لازم تكون عندها كرامه مينفعش كدا احسن ترجع تعيش في دار الايتام احسن بكتير من البهدله دي :( ياريت النهايه تكون حلووه وسعيده مع اني مش متفائلة

    ردحذف
  37. والله طه ده معندوش دم انا كرهته اووووى حرام عليه يعذي غاليه كده

    ردحذف
  38. هى الحلقه اتاخرت ليه كده فات اليوم كله ومنزلتش

    ردحذف
  39. هى الحلقه اتاخرت ليه كده فات اليوم كله ومنزلتش

    ردحذف
  40. دينا بجد بجد حراااااااااااااااااااااااااااااام انا تعبت احساس عاليه اكيد وحش اوووووووووووووووووووووى حرااااااااااااااااااااااااام يارب تطلع النهايه سعيده ويعرف حقيقه الحقيره مها دى

    ردحذف
  41. اليله يا عمده ههههههههههههههههههههههههههه

    ردحذف
  42. جميل جدا
    بس انا مش عارفة احدد ايه موقف واحساس طه بالنسبة لـ عالية !!

    ردحذف

قول رأيك بلاش تقرا وتقفل من سكات...ارائكم تهمنى