الخميس، 13 يونيو، 2013

هل يشفع الحب؟... الحلقة 25

الحلقة 25
عالية بتروق البيت الصبح وكل شوية تبص ف الساعة
خلصت ودخلت تحضر الغدا
حست انها مالهاش نفس تطبخ حاجة وهتطبخ لمين؟
خرجت تانى من المطبخ بملل وبصت ف الساعة كانت 12
دخلت اوضتها والموبايل جنبها...بتفكر تتصل بطه ولا لأ
نص ساعة قعدتها مترددة... ف الاخر قالت لنفسها
"لا ...الانتظار صعب كده... انا اتصل واعرف منه جاى ولا لأ بدل القلق اللى انا فيه ده"
مسكت الموبايل بتاعها...واتصلت وهى مترددة وبتدعى انها تفرح ومتتصدمش...اتصلت...رن الجرس ...رد طه
"الو..ازيك ياطه"
"الحمدلله يا عالية...عاملة ايه"
"كويسة الحمدلله...رجعت الشغل مش كده؟"
"اه انا ف الشغل اهو"
"شكلك عندك شغل كتير"
"فعلا يا حبيبتى معلش معرفتش استأذن...انتى بتعملى ايه دلوقتى"
"مفيش حاجة قاعدة اهو هتفرج ع التليفزيون شوية"
"طيب يا حبيبتى...مش عايزة حاجة"
"شكرا...ابقى كلمنى ياطه"
"حاضر... مع السلامة"
"الله يسلمك"
قفلت معاه وهى حاسة بكسرة نفس
                   ********************

طه قفل معاها وهو بيضحك... وبيركن العربية تحت البيت
طلع ومعاه شنطة لاب على كتفه...وصل عند باب الشقة
فتح بشويش...وقفل الباب وراه من غير صوت
دخل يتسحب...البيت هادى وساكت
بص ع المطبخ...ملقاش حد
بص على ابواب الاوض...كل باب مقفول ففهم ان كل واحدة ف اوضتها ...نرمين اكيد نايمة وعالية زى ما قالت له بتتفرج ع التليفزيون... راح على باب الاوضة... وفتح الباب فجأة

عالية قاعدة ...سمعت الباب بيتفتح عليها فجأة
اتخضت....شهقت... اول ما شافت طه بيضحك
نطت بسرعة من ع السرير على حضنه
"مش مصدقة ... انت هنا بجد"
طه بيضحك وهو بيحضنها
"حلوة المفاجئة"
"اخص عليك ياطه..ليه مقلتليش انك جاى"
"علشان اخد الحضن الحلو ده"
حط شنطة اللاب على السرير وقعد وقعدها جنبه وهو حاطط ايده على كتفها
"انت كنت واحشنى اوى"
"وانتى اكتر... احكى لى عاملة ايه"
"لما بشوفك بنسى اى حاجة ممكن تضايقنى... حتى خوفى بنساه"
"خوفك ...من ايه؟"
"انك تبطل تحبنى"
"والله العظيم يا عالية لولا كلام الناس وان ميصحش اسيبها بسرعة كده كنت جيت قعدت معاكى من تانى يوم...انا مبحسش بالراحة الا جنبك"
"ربنا يريح قلبك...عارف يا طه...انا بقى مبحسش بأنى عايشة غير وانا جنبك...وانت بعيد عنى بموت"
حضنها اوى... كلامها وصوتها الصادق وجع قلبه
"انا جبت لك هدية"
رجعت عالية لورا ...وبصت له
"هدية ايه"
التفت على الشنطة اللى ع السرير
"لاب توب... هو اه مش جديد بس حالته كويسة اوى بتاع واحد زميلى"
"ليه تكلف نفسك بس...انا عارفة ظروفك كويس"
"حسيت انه لقطة... وعايز حاجة تسليكى مش عايزك تزهقى انا عارف ان نرمين قاعدة ليل ونهار ع الكمبيوتر وماما ف المحل وانتى طول الوقت لوحدك"
"ربنا يخليك ليا"
قام طه وفتح الدولاب... وبدأ يغير هدومه
                      *******************

نرمين قايمة من النوم الساعة 3
سامعة صوت ف المطبخ...عرفت ان عالية اكيد بتعمل الغدا
دخلت الحمام...وهى بتغسل سنانها لاحظت ف المراية سبت الغسيل وفيه مع الهدوم ...هدوم طه ...استغربت
"السبت ده كان كان فاضى اول امبارح... هدوم طه ايه اللى حطها هنا؟؟"

خرجت من الحمام...وراحت المطبخ وقفت على الباب وعالية مش شايفاها... شافت عالية واقفة بتغنى بصوت واطى وهى بتطبخ
" دي ليلة حب حلوه بألف ليله وليله .. بكل العمر .. هو العمر إيه غير ليله زي الليله...زى الليله...الليلة"
"ده ايه الروقان ده كله"
اتخضت عالية وسكتت
"هتغدا ايه النهاردة"
"هعمل مكرونة وفراخ بانيه"
"مش عوايدك تبدأى الاكل متأخر"
ارتبكت عالية ودورت وشها
"ما هو لما بعمله بدرى بيبرد"
"وكل يوم بتسخنيه...مالك النهاردة مش طبيعية"
"مالى بس ما انا كويسة اهو"
"شكلك مبسوطة وبتضحكى وبتغنى... الحمدلله غيرتى البوز اللى ضرباه ف وشى طول النهار"
"انا بضرب بوز... الله يسامحك"
"انتى ليه عايشة ف دور الغلبانة كده على طول... ودايما مكشرة لا بتضحكى ولا بتهزرى...كئيبة كده"
اتضايقت عالية من كلام نرمين...بس حست انه الى حد ما صح
"ابدا... اصل كل فرحتى بتكون ف وجود طه...وطه مبقاش معايا فطبيعى ان تروح منى ضحكتى وميبقاش ليا نفس اهزر"
خرجت عالية من المطبخ وسابت نرمين لوحدها
                     ***********************

مها قاعدة بتتكلم ف التليفون
"ومسألتيهاش وش ليه"
"اتكسفت يامها"
"ما انتى بتقولى هدومه ف الغسيل...ايه اللى هيجيب هدومه عندكم وهو قاعد هنا...اكيد كان موجود وانتى نايمة ومحسيتيش"
"متهيألى كده...اصلها عمالة تغنى ومبسوطة حتى بعد ما خرجت م المطبخ وشها متغير مش نفس الكآبة والتكشيرة اللى كانت فيها الايام اللى فاتت"
سمعت مها صوت الباب بيتفتح
"هقفل معاكى دلوقتى ...طه جه"
"اوعى تعملى مشكلة واتحط انا ف النص"
"طيب ماشى ...مع السلامة"
دخل طه وهى لسه مقفلتش...قعد
"سلامو عليكو"
قفلت ورد السلام
"وعليكو"
"كنتى بتكلمى مين"
"ليه؟"
"هو ايه اللى ليه؟ بسأل"
"نرمين...انا مبعملش حاجة واداريها"
"كل ده علشان سألتك بتكلمى مين؟ انا بسالك يعنى ماما ولا مامتك ولا نرمين ولا حد من صحابك...مش محتاج اسمع دفاع"
قام دخل يغير هدومه...وقبل ما يدخل الاوضة
"حضرى الغدا"
"لسه مخلصش"
رجع لها تانى
"مخلصش ازاى... الساعة 3 ونص"
"ما انا صحيت متأخر وبدأت متأخر ولسه مخلصش...وانت مقلتليش انك عايز تتغدا بدرى"
"هو كده بدرى؟...انا هدخل انام شوية ولما تخلصى صحينى... بس ياريت لو تكرمتى يعنى بعد كده ارجع الاقى الغدا خالص"
"شكلك بتتريق عليا"
"اه...انتى بتتلككى وانا مليش نفس اتخانق"
دخل الاوضة ورزع الباب وراه
                    ********************

طه ومها قاعدين بيتغدوا
طه بيمضغ الاكل ووشه مقلوب
"ايد ده يامها... الاكل طعمه ايه"
"ايه؟"
"طعمه غريب...زى ... مش عارف...زى مايكون محروق"
"لا مش محروق ...كان هيتحرق ولحقته"
سكت طه وهو بيكمل اكل بقرف
"انت روحت فين النهاردة"
"الشغل"
"بس؟"
"ليه؟"
"بسأل؟"
"لا روحت بعد الشغل للميكانيكى"
"احلف؟"
"نعم؟"
"احلف انك روحت للميكانيكى ومروحتش للزفتة"
"انتى بتسألينى علشان كده؟؟ وبعدين لما تتكلمى عنها تقولى باسمها مش تشتميها"
"ضايقتك اوى الزفتة...طب زفتة وهبابة ودى مش شتيمة ده صفة"
"ماشى... بعد كده لو جابت سيرتك هقولها متقوليش مها...قولى زفتة وهبابة... المساواة ف الظلم عدل"
"انت بتشتمنى"
"دى مش شتيمة دى صفة... وعلى فكرة اكلك يقرف"
قام من ع الاكل...دخل الاوضة وهى عمالة ماشية وراه وتتكلم وتزعق... حس انها بتتنرفز اكتر بعد الرد...فقرر يستفزها
بدأ يلبس
"انت فاكرنى بتهدد...كل شوية هتلبس وتروح لها"
"ملكيش دعوة"
"مفيش نزول يا طه"
ضحك وهو بيكمل لبس
"طيب خلاص متزعلش"
بيلبس ومش بيرد عليها...بدأت تتحايل وتتودد له
"دى مش طريقة ابدا انك تتقمص كل شوية وتهددنى بيها... احنا مش اتفقنا الاسبوع ده عندى...علشان خاطرى متكسفتيش قدام الناس اللى هتيجى... خالتى جاية بالليل تباركلى"
"ماشى هاجى قبل ما ييجوا"
"هتنزل ليه طيب...خليك قاعد"
"هروح المحل شوية... اتخنقت م البيت"
                 **********************

عالية بتقوم من النوم...على صوت الموبايل
"الو.. ازيك انت ياحبيبى... اه كنت نايمة احنا الساعة كام... 8 يااااااه ده انا نايمة من 5... لا احنا كويسين الحمدلله... لا مش سامعة صوت بره يمكن نرمين نايمة ...انت ف المحل... حاضر وانت خلى بالك من نفسك... مع السلامة ياحبيبى"
قفلت معاه وهى بتبلع ريقها بصعوبة...من العطش
قامت من السرير وهى بتلم شعرها بايدها وبتعدل ديل الحصان اللى اتفك من النوم

من شدة عطشها مقدرتش تستنى تدخل الحمام الاول فراحت تشرب
وهى رايحة ع الانتريه... اتفاجئت بطارق ونرمين بيبعدوا عن بعض اول ما شافوها...هى اتخضت من وجودهم لان مكنش فيه صوت خالص... شهقت ورجعت بسرعة وهى بتغطى شعرها بايدها

دخلت اوضتها وهى بتفتكر اللحظة اللى شافتهم فيها على الكنبة مع بعض...تقلب وشها باشمئزاز

تسمع صوت الباب ...وتلاقى نرمين داخلة عليها الاوضة
"بصى ...اوعى تفهمى غلط"
"انتى هاجمتينى لما قلتلك وجوده هنا لوحدنا غلط ولما لقيت ماما ساكتة سكتت"
"مش اللى فدماغك ده والله"
"انتوا مخطوبين يا نرمين يعنى حتى لو مسك ايديكى حرام... انتى كده بتسمحيله بحاجات كتير وغلط"
"انا عارفة الصح م الغلط وبحافظ على نفسى كويس"
"لا اللى بتعمليه ده غلط وحرام"
"ملكيش دعوة بيا...احنا بنحب بعض...ولا هو حلال ليكم وحرام على غيركم"
"قصدك ايه"
"طه لما يجيلك متسحب الصبح وانا نايمة وف الايام اللى المفروض يكون فيها عند مها... يبقى حلو"
"انتى بتقارنى ازاى...طه جوزى"
"وطارق خطيبى... وفيه حدود مبنتعدهاش"
"بلاش كده يا نرمين"
"انتى هتدينى اوامر"
"انا خايفة عليكى"
"لا متخافيش"
"طيب بصى...اتجوزوا...او اكتبوا الكتاب ع الاقل"
"ان شاءالله... هتقولى لحد؟"
"لأ...بس ارجوكى بلاش تحطى مامتك واخوكى ف موقف وحش...بلاش"
خرجت نرمين وهى حاطة راسها ف الارض
                      ********************

طه قاعد ف المحل...حاطط ايده على خده
نرجس بتبص له
"طه"
ينتبه لها
"نعم؟"
"مالك؟"
"مفيش"
"لا انت بقالك فترة كده مش مبسوط...هو لسه برضه؟"
طه بتساؤل حقيقى
"لسه ايه؟"
"لسه محبلتش...بقالكم 3 شهور ومفيش حاجة"
"اه لسه... الحمدلله"
"يابنى مالك...ماتقولى فى ايه"
"ندمان... الندم بيقتلنى... اتسرعت بجوازى من مها"
"ليه؟"
"مش مرتاح معاها خالص... مبقتش طايق هيافتها ولسانها الطويل وقلة عقلها"
"ايه اللى حصل"
"لو اتخانقنا الاقى اسلوب غبى ونفضل نتخانق ولما تلاقينى هلبس وانزل تقلب وتبقى كويسة...طيب ليه من الاول...ده غير عدم احساسها بالمسئولية ولا بتقدر ظروفى سواء ف فلوس ولا تعب ... وعايزانى كل شوية اخرجها وانا مش فاضى انا برجع مهدود ويوم الجمعة ببقى عايز ارتاح فيه..دى ابدااا...غير عالية اللى حاطاها فدماغها وكل شوية تتكلم عنها بطريقة تضايقنى...انا بقيت بكره الايام اللى بكون فيها عندها واحسب هيخلصوا امتى علشان اروح لعالية... انا اتسرعت وغلطت ياماما ولازم الغلط يتصلح"
"يتصلح ازاى يعنى؟"
"اطلقها...الحمدلله انى مخلفتش منها... كفاية اوى كده انا محبيتش ولا هحب غير عالية...منكرش انى نفسى ف طفل...هموت وابقى اب بس ربنا مبيتعاندش... انا تعبت اوى ال3 شهور اللى فاتوا وعايز ارتاح"

هناك 69 تعليقًا:

  1. ياااااااااااااارب تغوووووووووووووور

    ردحذف
  2. ايوه بقى يارب ما تبقى حامل وعاليه تبقى حامل ويطلقها بسرعه وامه متعندش

    ردحذف
  3. يارب يطلقها

    ردحذف
  4. قه اكتر من رائعه

    ردحذف
  5. ايووووووووووووووووووا بقى يا طه كده حبيبى والله :)
    تحفه يا دينــــــــــــــــــــــــا:)

    ردحذف
  6. ايوة بقــــــــــــــــى :D

    ردحذف
  7. 7abeby ya Taha 5od Mwkf b2aaaaaaaa ^_^ EL-7l2a To7faaaa

    ردحذف
  8. يا ريت يطللقها بقى ونخلص منها دى مستفزه بجد ودماغها صغيره اوووووووووووووووى وكمان عاليه صعبانه عليا بجد

    ردحذف
  9. حلووووووووووة اووى يادينا
    وانا فرحانة اوى لفرحة عالية
    ويارب طه ومها يطلقوا
    ويرجع لعالية وتجيبله طفل بقى يااااااااااااارب

    ردحذف
  10. يااااااااااااااااااااااااارب يطلقها ياااااااااااااار
    ب هموت من الفرحة

    ردحذف
  11. هييييييييييييه :)))
    اهو فاق اهو , عقبال اخته :D

    ردحذف
  12. الصابرين على خير
    الحلقه جميله اوى النهارده تسلم ايدك

    ردحذف
  13. ياااااااااااااااارب يطلقها ويرجع لعقلة وربنا يرزقهم بطفل يفرحهم ,, بجد الحلقة جميلة :)تسلم ايدك

    ردحذف
  14. فظيييييييييييييييييييييييييييعه
    تخفه بجد
    ايوه كده يطاقها بلا قرف
    ولو هيجى منها عيل يغور

    ردحذف
  15. زين العقل يابنى :D

    ردحذف
  16. جميلة يا دينا
    ويا رب فعلا يطلقها دي ما تستاهلش

    ردحذف
  17. waaaaaaaaaaaaaaaaaaaaaaaaaaaawwww :D 7l2a 7lwaa...ma3tqwdsh nargs hatsebo ytl2haaa :(

    ردحذف
  18. ايوه بقا يا طه يا جامد بس ده هيرجع في كلامه ده واطي

    ردحذف
    الردود
    1. ممكن ميطلقهاش عشان هتعمل عليه حوار انها حامل ويطلع كدب وفي الاخر يكتشف انها كدابه ويطلقها ساعتها

      حذف
  19. جامده جدا
    و نرمين المفروض بعد كده هتخلى معملتها مع عاليه احسن

    loly

    ردحذف
  20. ايه ده دييه صغيره جدااااااااااااااااااااااااااااااااااااااااا

    ردحذف
  21. يارب يطلقها

    ردحذف
  22. يـــــــــــارب يطلقها ونخلص
    جميله اوووووووووووى يادينا

    ردحذف
  23. ايوووووه كده يا طه ارجع زي زماااان
    يا رب يطلقوا وعاليا تخلف و النهايه تبقي سعيييده
    بس حاسه ان مها هتحمل وعاليا برضه هتحمل بس مش عارفه ايه الي هيحصل بعد كده ربناااا يستر :‫))

    ردحذف
    الردود
    1. واه بقى لو مها تموت وهى بتولد الطفل وعالية طبعا مش هتاخده بذنب مامته
      وكده يبق عندها ولدين بدل واحد ويعيشوا ف سعاده

      حذف
  24. حلوووووووووووووة اووووووى الحلقــــه دى يا دينا :)
    ويااااااارب فعلا يطلقها ونستريح منها
    فعلا الحلقه تحفــــــه يا دينا :)
    يارب بقى باقى الحلقات تبقى دايماا كده ^_^ (Y)

    ردحذف
  25. بس و طلقها كده يبقا مفيش عنوان للقصه

    ردحذف
    الردود
    1. لا طبعا ازاى كفايه اللى عليا اتحملته باسم الحب

      حذف
  26. علي فكره هايطلقها وهايلالقيها حامل

    ردحذف
  27. كم هو جميل أن تفهم من تحب
    و أن تتعمق في روحه
    و أن تبحر في عقله
    و أن تعيش داخل قلبه
    و أن تفهم ما يريد قبل أن ينطق بها
    هكذا أرى الحب بين عاليه وطه .. رغم غياهب ظلمات القلوب حولهم

    ردحذف
  28. كم هو جميل أن تفهم من تحب
    و أن تتعمق في روحه
    و أن تبحر في عقله
    و أن تعيش داخل قلبه
    و أن تفهم ما يريد قبل أن ينطق بها
    هكذا ارى الحب بين عاليه وطه رغم غياهب ظلمات القلوب حولهم

    ردحذف
  29. يا سلام بأه اتفاجأ تانى كده وتنزلى حلقة جديدة كده ياااااااااه دا انا هزغرط :D

    ردحذف
  30. حاسة ان طه هيطلع هو كمان مبيخلفش :D

    ردحذف
  31. احساسى انه نرجس هتحس بتعبه فهتوافق بس لما يطلب الطلاق من مها هتعمل انها حامل عشان ميطلقهاش.

    ردحذف
  32. لولولوووووووولى يارب يطلقو بس امه مش هترضى و هتقوله ع الاقل خلف منها عيل و طلقها بعد كدا

    ردحذف
  33. ياااااااااااارب يطلقهااا بقى جاتها طلقة مستفزة وقليلة الادب

    ردحذف
  34. انا حسا ان طه هو ال مبيخلفش مش عاليه

    ردحذف
  35. ايه الجمال والروعة يا دينا بس عندي احساس انه عقبال مايجي يطلق مها الزفتة دي هتكون حامل ومش هيعرف يطلقها :( انتي بجد روووووعة

    ردحذف
  36. ايون بقا هو ده الكلام اخيرا ياطـــــه بجد روعه يادينا تسلم اديكى

    ردحذف
  37. ايوة بقى يطلقها ونرتاح منها :)

    ردحذف
  38. انا عارفه اكيد مش هنلحق نفرح انه هيطلقها واكيد اول ما يجى يطلقها هتطبع حامل

    ردحذف
  39. بس انا حاسه ان فى حاجه هتحصل قبل ما يطلقها

    ردحذف
  40. هييييييييييييييييييييييييييييييييه وعالية تطلع حامل بلييييييييييييييييييييييز

    ردحذف
  41. الله بقىىىىىىىىىىىىىىىىىى يارب متحملش قبل مايطلقها يارب يطلقها وتغور ف داهية

    ردحذف
  42. واضح ان محدش طايق مها خالص وواضح كمان ان في اجمااع علي كده
    يا رب تغووورر

    ردحذف
  43. أنا مش هعلق اى تعليق ع القصه خااااااالص .. انا بس بقولك انا واحده عندى 15 سنه و اتعقدت ... انا كنت بكتب قصص من صغرى خالص بس اول ما بدأت اقرالك و انا بقيت معقده . ذنبى فى رقبتك مش مسامحاكى :P
    Nada Ashraf

    ردحذف
    الردود
    1. وياترى ايه اللى عقدك ؟؟؟دى حتى فصصها جميلة اووووى وواقعية جداااا

      حذف
    2. هى تقصد ان مدام دينا قصصها تحفة فاى مقارنة مع قصصها تبقى خسرانه

      حذف
    3. ماهو علشان قصصها روووووعه و جميله جدا و واقعيه انا اتعقدت .. لانى انا كنت بكتب قصص من صغرى بس مقارنه بقصصها بطلت اكتب و بستمتع بقرائه قصصها و بس
      NaDa ashraf

      حذف
  44. agmal7l2a el7l2a de

    ردحذف
  45. القصة عجباني لانها فيها شيء من الواقع وعلي فكرة لطشيها مع عالية اكتر علشان فعلا الغلبان مبيشبعش غلب

    ردحذف
  46. ايوه بقي

    ردحذف
  47. جميله اوي يا دودو

    ردحذف
  48. انا حاسه ان مها مبتخلفش بس لما هيكون طه ناوى يطلقها هتقول له ان هى حامل بس تظانا مش عارفه ليه القصه محققتش معناها هل يشفع الحب وحاسه ان نرمين هتتحط فى مصيبه مع طارق وعاليا هتنفذها

    ردحذف
  49. اول بقا ما هيطلقها علياء هتكون حامل ما هو مش هيروح الدعا والتقرب لربنا والصبر ده كده لازم ربنا هيكافئها

    ردحذف
  50. ♥دينا عماد♥14 يونيو، 2013 1:44 م

    يبقى كده مها هتبقى حامل :(

    ردحذف
  51. A7ssn enu ya5ls mnha :@

    ردحذف
  52. واضح ان ورا عطش عاليه ده سر يمكن حامل ولا حاجة وبعدين يعيشوا ف تبات ونبات ويخلفوا توأم ملتصق وشوية بنات

    hadil gasser

    ردحذف
    الردود
    1. ياريييييييييييييييييييييييييييييييييت

      حذف
  53. الحلقه تحفه يا دودو ويارب يطلقها بقي انا تعبتله وتعبت لعاليه والله

    ردحذف
  54. فيييييين الحلقة اللي بعدها يا دودوو ارجوك نزليها بسرررعة بقى :) :*

    ردحذف
  55. فيييييين الحلقة اللي بعدها يا دودوو ارجوك نزليها بسرررعة بقى :) :*

    ردحذف
  56. انا نفسى مها تخلف وتموت وطه وعالية بأه هما اللى يربوا البيبى ويعيشوا فى سعاده :)

    ردحذف
  57. جميلة جدا وتسلم ايدك على الحلقة بس هى صغيرة شوية ياريت تطول شوية لو ينفع بعد اذنك

    ردحذف
  58. جامده اوي بس يا ريت لو تطوليها شويه لو سمحتي و تخلص عشان هي طولت اوي
    بعد اذنك يعني :)

    ردحذف
  59. جامده جدا يا دينا بس حاسه ان في حاجه هتحصل علشان كده الحب هيشفع فيها

    ردحذف
  60. الحلقات تحفة بجد
    بس فين الحلقة اللى بعدها :(

    ردحذف
  61. ههههههههههههههههههههه حلوة القصة بس انا الحمد لله مش فاهم اى حاجة :P

    ردحذف

قول رأيك بلاش تقرا وتقفل من سكات...ارائكم تهمنى