الأحد، 16 يونيو 2013

هل يشفع الحب؟... الحلقة 27

الحلقة 27
"هو انتى ليكى ف كل خرابة عفريت"
"شفتى!!"
"بت ياعالية... طارق ده مش كان معاهم ف الكلية"
"اه"
"يعنى صاحب ريا وسكينة اوى...ليكونوا مسلطينه عليكى علشان يوقعوا بينك وبين طه ولا بعد الشر يخلوه يطلقك"
عالية باستغراب
"معقول؟؟؟"
"ليه لأ... نرمين علشان تبعدك عنها وتبقى براحتها والتانية طبعا علشان طه"
"يعنى اعمل ايه؟؟ واتصرف ازاى؟؟ خوفتينى"
"جوزك لازم يعرف"
"يعرف ايه... اقوله انه بييجى وانى شفتهم"
"لازم يعرف كل حاجة وان الزفت ده بيعاكسك"
"اخاف...انتى متخيلة ممكن يحصل ايه"
"يحصل اللى يحصل...تضمنى منين انها مش خطة عليكى"
"وهيعملوا عليا خطة ليه...انا مبعملش حاجة لحد"
"بس وجودك مضايقهم... كلهم عارفين طه بيحبك قد ايه... وانتى عارفة غيرة الضراير"
"بس انا مهما غيرت مش ممكن اضرها"
"مش قصدى عليكى...انتى حتى مبتبينيش غيرتك... هى غيرك يا عالية...خلى بالك"
سكتت عالية تفكر فى كلام هدير
"انا هستنى شوية...لو حصل جديد هبقى اقول لطه لما اشوفه"
                       *********************

مها قاعدة على السرير... بتكلم طه ف التليفون
"الو...انت جاى امتى ياطه"
"انا لسه ف المحل"
"انا تعبانة اوى"
"حاسة بإيه"
"ضهرى بيوجعنى"
"اتصلتى بالدكتور"
"لما تيجى انت كلمه"
"ماتكلميه لحد ما اجى"
"افرض قالى تعالى ولا طلعت بولد اعمل ايه...مش لازم تقعد ف المحل للاخر...انا تعبانة وانت سايبنى لوحدى...مش خايف يحصلى حاجة وانا لوحدى"
"خلاص يامها...شوية وجاى"
"متتأخرش ...جعانة ومش قادرة اقوم اعمل حاجة آكلها"
"طيب متتعبيش نفسك... اجيبلك حاجة وانا جاى"
"هفكر واكلمك تانى"
"ماشى...مع السلامة"
"مع السلامة"
قفلت مها معاه...ومسكت بطنها المنفوخة وهى بتكلم ولادها
"تعبتونى حرام عليكم"
                      *****************

فاتن جاية من المطبخ بصينية حاجة ساقعة
ايمن وميار قاعدين...ومامته وباباه وعبد الحميد
فاتن بتقدم لهم
"منورين ياجماعة والله... ومنور مصر كلها يا ايمن"
ايمن"ربنا يخليكى يا طنط"
ام ايمن"ده من يوم ماجه والفرحة مش سيعانى... ولا لما قال انه مش هيجدد تانى...طرت م الفرحة...والبركة فيكم لولا انه جاى علشان يتجوز كان زمانه بيجدد تانى"
فاتن"تغور الغربة...هو فيه زى بلدنا"
ام ايمن"اه والله معاكى حق"
ابو ايمن"عايزين نفرح بالعيال ياحاج"
عبد الحميد"ربنا يفرحنا بيهم..انا عن نفسى وقت ما تقولوا يالا ..احنا جاهزين...مش كده يافاتن؟"
فاتن"اه...ان شاءالله وقت ما تجهزوا هنكمل اللى ناقص"
ابو ايمن"احنا السنة اللى فاتت خلصنا الشقة وبقت جاهزة... بنقول نكتب الكتاب ونحجز للفرح ف اقرب وقت"
بصت فاتن لميار اللى شافت نظرات الفرح ف عينيها
فاتن"ايه رأيك يا عبده"
عبدالحميد"اللى تشوفيه...انا عايز افرح بيها النهاردة قبل بكرة"
فاتن"الف مبروك يا ولاد... شوف يا ايمن هتكتب الكتاب امتى وفين والفرح مش قبل شهر علشان نلحق نكمل حاجتنا ونفرش"
رد ايمن بسرعة"شهر ايه ...كتير"
ضحكوا كلهم بفرحة
ردت عليه فاتن"شوف بس حجز القاعات وربنا يسهل ان شاءالله"
                           *******************

طه ف الشغل الصبح...واقف بره المكتب ..بيتكلم ف التليفون
"صباح الخير يا حبيبتى...لسه نايمة"
"صباح النور...لا صحيت من شوية"
"وعاملة ايه؟"
"الحمدلله كويسة"
 "رجعتى امتى امبارح"
"على 10 كده"
"10 يا عالية...ليه اتأخرتى كده...انتى مش عارفة انى بقلق عليكى"
"معلش ياطه كنت قاعدة مع هدير والوقت اخدنا...متقلقش عليا...طمنى بس عليك انت عامل ايه"
"انا...كويس"
"لا صوتك مش كويس؟"
"مفيش حاجة ...كويس والايام شبه بعضها"
"فى ايه بجد؟"
" مفيش متشغليش بالك انتى بس... قوليلى هتتغدوا ايه النهاردة"
"محشى ...وعاملة تشكيلة "
"ماتعزمينى علشان اكلك وحشنى"
"ياريت يا طه...تعالى اتغدا معانا"
" كُلى انتى مكانى بقى"
"لا تعالى انت كل بنفسك"
"مش هينفع ياعالية معلش..والله نفسى اجى بس لو جيت هدخل ف متاهات دكتور وعيا وعلاج واقعد جنبى علشان تعبانة وانا ما بصدق انزل اصلا... دى كانت امنية وراحت لحالها...المهم انتى مش عايزة حاجة...ثوانى ياعالية معايا ويتنج"
"طيب ابقى كلمنى"
"حاضر...سلام"    
قفل معاها ورد على المكالمة
"الو ازيك يافاتن...فينك من زمان"
"ازيك يا طه عامل ايه"
"الحمدلله...انتى عاملة ايه"
"الحمدلله...بقولك ايه كتب كتاب ميار الجمعة الجاية والفرح كمان اسبوعين ان شاءالله"
"الف مبروك يا فاتن ربنا يتمم لها بخير...هتكبرك بسرعة"
"خليها تكبرنى بس افرح بيها...هستناكم يا طه...وهبعت كارت لابلة نرجس واكلم عالية"
"لا بلاش"
"بلاش ايه"
"متبعتيش حاجة لحد...انتى نسيتى عملوا ايه يوم الخطوبة"
"ما انا هعمل ايه ...علشانك والله"
"متقوليش انتى حاجة لحد وهاجى لك انا وعالية ان شاءالله"
"ان شاءالله...تنوروا وهستناكم"
                          *******************

عالية لابسة وخارجة من اوضتها
نرجس قاعدة"انتى نازلة؟"
"اه ياماما...رايحة لهدير"
"طه عارف؟"
"اه"
"طيب مع السلامة"
نزلت عالية...وهى ع السلم قابلت طارق طالع
"عالية!!"
ارتبكت... وخافت... تماسكت
"سلامو عليكو... مستنيينك فوق"
نزلت بسرعة من جنبه... نزل وراها بسرعة شدها من ايدها
وزقها ف الحيط ووقف قصادها وهو ساند ايديه الاتنين ع الحيط وهى ف النص ومقرب منها اوى
"انتى بتتهربى منى ليه"
من الخوف بدأت ترتعش وتعيط
"انت عايز منى ايه...انا عملت لك حاجة " 
"وانتى خايفة كده ليه"
سابها ورجع لورا اشفاقا على خوفها
كانت بتعيط
"متخافيش انا مش هعملك حاجة...بس رد فعلك غريب اوى"
"حرام عليك... انا عمر ما حد مسكنى كده الا جوزى...سيبنى ف حالى الله يخليك انا كل اللى بترجاه م الدنيا الستر"
"انتى غريبة اوى...جوزك سايبك وعايش حياته مع واحدة تانية وانتى مجرد ما قربت منك من غير ما المسك عملتى كده"
ردت وهى نازلة تجرى
"مش انا اللى غريبة...اللى بيستحل الحرام هو اللى غريب"
نزلت تجرى وسابته واقف مكانه
                    *********************

طه قاعد ف العربية...فى شارع جانبى قريب من البيت
شاف عالية جاية من بعيد...فرح لما شافها...نزل من العربية
لما قربت وشافها معيطة
"مالك؟؟"
"مفيش حاجة يالا بس نمشى من هنا"
ركبت وركب طه ومشى بالعربية
"ايه يا عالية مالك؟"
"مفيش ياطه... افتكرت حاجات ضايقتنى"
"هو انا مش عارفك...حاجات ايه اللى هتعيطك كده...حد زعلك؟؟ماما ولا نرمين حد ضايقك"
"مفيش حاجة من دى والله"
"ماتقولى فى ايه"
عالية وهى بتحاول تهدا
"هقولك بعد كتب الكتاب...ممكن"
"وليه مش دلوقتى"
"علشان نعرف نروح نبارك للناس واحنا كويسين"
"ليه انتى هتقولى ايه"
"بعد كتب الكتاب"
                       ********************

طه وعالية قاعدين جنب بعض... وبعد كتب الكتاب ما خلص
قاموا سلموا على العروسين... وبعدين باركوا لفاتن
فاتن لاحظت تغيير على عالية...خدتها على جنب
"ثوانى ياطه عايزة عالية اسألها على حاجة لميار"
طه"طيب خدوا راحتكم...هستناكى ياعالية ف العربية"
مشى طه وسألتها فاتن
"شكلك مش طبيعى كده ليه....هما عملوا لك حاجة؟"
"لا يا ابلة مفيش حاجة"
"هو انا مش عارفاهم"
"مش هما"
"اومال مين"
"مش وقته شوفى ضيوفك وهبقى اكلمك"
"ضيوفى بيتصوروا مع العروسة والعريس...انتى فيكى ايه"
"خطيب نرمين...مش سايبنى ف حالى"
"نعم...وده عايز منك ايه"
"معرفش بس وانا نازلة قابلته طالع واتهجم عليا ع السلم من ساعتها وجسمى كله بيتنفض"
"وايه اللى مسكتك"
"خايفة...وف نفس الوقت هدير قالتلى ليكون متسلط عليا علشان يخلوا طه يطلقنى"
"احتمال والله"
"يعنى اقول لطه"
"اه طبعا قوليله...ابعدى نفسك عن اللبخ بتاعهم خالص"
"حاضر يا ابلة...معلش دوشتك ارجعى لضيوفك...الف مبروك"
"الله يبارك فيكى...هكلمك بكرة اطمن عليكى"
                   **********************

عالية وطه ف العربية
"هااا قوليلى بقى مالك؟"
"هقولك بس اوعدنى ياطه انك متتسرعش ف اى تصرف"
"ليه؟؟ فى ايه؟"
"احلف انك هتتصرف بعقل"
"اخلصى ياعالية...فى ايه"
"الحكاية بقالها سنة تقريبا...لما روحت عند قعدت عند مامتك... لقيت ان طارق متعود يروح عادى ومامتك مش ف البيت"
"لنرمين لوحدها"
"مش لوحدها خالص...يعنى قبل ما اروح كانت بتبقى مها ف البيت ولما روحت بقيت اكون موجودة"
واتنرفز طه
"وكل ده ساكتة ليه"
"مامتك قالت لى ملكيش دعوة وهو بييجى وانتى ف البيت وكأنك انا وخلاص...المهم بعد كده شفتهم مرة ..."
طه بيبرق"شفتى ايه"
"لا مش زى ما فهمت... بس يعنى وضع كده معجبنيش ...ميليقش بمخطوبين...واتكلمت مع نرمين وبطلوا شوية بعدها"
"شوية...هما رجعوا تانى؟"
"الزيارات بقى تتكرر بس انا مكنتش بسيبهم لوحدهم او لو سبتهم مش بتأخر كده يعنى...بس طارق بقاله فترة كبيرة بيضايقنى"
"بيضايقك ازاى"
"نظراته... حركاته... من كام يوم كلمنى ع التليفون والنهاردة وانا نازلة قابلته ع السلم اتهجم عليا...بس والله ما لحق حتى يلمسنى انا سبته ونزلت"
وطلع طه بالعربية بسرعة جنونية
                    *********************

نرمين وطارق قاعدين... ونرجس معاهم
اتفتح الباب بالمفتاح..دخل طه وعالية معاه
شافهم طارق قام وقف وعينيه مركزة على طه
طه راح ناحيته باندفاع...وضربه ف وشه
صرخت نرمين واتفاجئت نرجس وهى بتزعق لطه
"فى ايه"
طارق بيهجم على طه يضربه...طه كانت عصبيته اكبر ومحدش قادر يسيطر على عصبيته
نرمين"قلتى لى ايه قلبتيه كده"
طه"اطلع بره والبيت ده متعتبوش تانى"
نرجس وهى بتقف بينهم
"اهدا يا طه...اقعد ياطارق...صلوا ع النبى ياولاد"
وبصت لعالية اللى واقفة بعيد وهى خايفة وكملت
"ده شيطان ودخل بينكم"
طارق"اقعد ايه بعد ما اتطردت...انا مش داخل هنا تانى"
نرمين بتمسك فيه"لا ياطارق متمشيش...محدش له دعوة بينا"
طه"ده واحد غير امين عليكى ولا بيحافظ على شرف البيت اللى دخله"
طارق"ياعم المحموق اوى... حوش حوش بتطردنى م الجنة انا ميشرفنيش اناسبكم "
نرمين بتصرخ"لا ياطارق متمشيش...استنى ياطارق"
خرج طارق ورزع الباب وراه
نرمين بتعيط وتصرخ
"انتى قلتى له ايه... منك لله يا شيخة... الغيرة عامياكى ...عايزة كل الناس تبقى زيك كده... انتى قاعدة معانا ليه... غورى ارجعى الشارع اللى جيتى منه"
ومقدرش طه يسكت اكتر من كده على نرمين
ضربها بالقلم
"اخرسى... انتى ايه مش لاقية اللى يلمك"
نرجس"هى حصلت يا طه... هتضرب اختك كمان... الشيطانة دى قالت لك ايه قلبتك على الكل كده...وانا اللى فاكراها طيبة"
عالية"انا معملتش حاجة... مكذبتش ف حاجة"
نرجس وهى بتحضن نرمين اللى عمالة تعيط
"اسكتى بقى مش عايزة اسمع صوتك...ولا عايزاكى ف بيتى"
طه وهو بيزعق لعالية
"لمى هدومك يالا وتعالى معايا"

هناك 47 تعليقًا:

  1. اوباااااااااااااااااااا
    لا يا دينا اوعي تأخري الحلقه الجايه

    ردحذف
  2. هيوديها فين ؟ :o
    يطرد زفته مها بقى و يريحنا منها
    و برضه الحلقه قصــــــــــــيره اوووووووووووووووووووووووى

    ردحذف
  3. الله حلقه حلووووووووووووه اوى ^_^ بجد تحفه انا نفسى فى حلقه تانيه الله يخليكى يا دينا خليصيها قبل اليوم الثلاتاء عشااااااااان خاطرى

    ردحذف
  4. يالا بقى خلي الحكايه تخلص انا دمي اتحرق يا رب عاليه تاخد حقها

    ردحذف
  5. روعه بس الافضل كانت عاليه قالت لنرمين ونرمين طبيعي مش هتصدق فتوريها بعينها وكان طه فضل بعيد

    ردحذف
  6. ياااااااااااااني ياما طب كان طه يفهم امه طيب يالهوي يادينا طولي الحلقه شويه :(


    جااااااااااامده يادودو ياجامده ياجميله انتي

    ردحذف
  7. تحفففففففففففففففففة يادينا القصة دى كام حلقة عاوزة اعرف النهاية

    ردحذف
  8. احييييييييييييييه هياخدها عند مهاا ابن المراااا

    ردحذف
  9. احييييييييييييييييييييه :D :D

    ردحذف
  10. بجد الحلقة دى حلووووووووووووووووووووة اووووووووووووووووووووى ونفسى اوى اعرف ايه اللى هيحصل ياريت بقى الحلقة تنزل بدرى ان شاء الله وبلاش حكاية الاتنين الاجازة ده

    ردحذف
  11. حلوووووووووووه اوي يا دينا تسلم ايدك

    ردحذف
  12. يخربيت عثللللللللللللللللللك ياطه بققققققققققققااااااااااااااااااااااااا :) تحفففففففففففففة اووووووي وطه دا بموت فيه يارب تبقى النهاية حلوة

    ردحذف
  13. وعاليه هتروح تقعد مع مها ياعينى عليكى يا عاليه
    ياريت يادينا تخلينا نفرح الحلقات اللى جايه بقى

    ردحذف
  14. طبعا هيوديها لمها تقعد معاها وياويلك ياعالية من مها

    ردحذف
  15. ياربى بجد صعب مستنية الحلقة الجديدة ومتضايقة عشان بكرة اجازة

    ردحذف
  16. الحلقه جااااااااااااااااااااااااااامده جداااااااااااااااااااااااااااا
    ومستنيه الحلقه الجايه جدااااااااااااااااا

    ردحذف
  17. جميله اوووووووووي اووووووي يا دينا

    ردحذف
  18. جامده جدا

    بس قصيره اووووووي يا دي

    ردحذف
  19. الحلقة جميلة اوى اوى يارب بس يسترها مع عالية

    ردحذف
  20. بجد احسنت طه و أحسنتى عاليه ولا يصح الا الصحيح

    ردحذف
  21. waaaaaaaaaaaaaaaahm

    ردحذف
  22. ايوة كده يا دينااااااااااا تحفة ماشاء الله بس بلاش تتاخري علينا يوم التلات بقى والنبي تسلم ايديكي

    ردحذف
  23. To7faaaaaaaaaaaaaa Bgd ^_^

    ردحذف
  24. يــــــــــــس هو ده الكلااااام ايون بقا ياطه اظهر الرجوله شويه كدا حلقه جميله بجد ربنا يصبرنى لحد الحلقه الجايه ان شاء الله :D

    ردحذف
  25. حلوه بس صغيره عوضيها بقي المره الجايه ^_^

    ردحذف
  26. الحلقة تحفففففففففففففففففففففففففة والله...بس كده هتعيش مع مها....بالله عليكي لااااااااااااااااااا

    ردحذف
  27. اووووووووووو لالا ايه التشويق ده واخيرا طه اخد موقف بدل ما كان عروسة امه بتحركه ايوه كده

    hadil gasser

    ردحذف
  28. حد يضرب الوليه دى بالشالوط ع قفاها يا جدعاااااااااااااااااااان ونبى لضربها ع بوزها الوليه دى واعوضها من الارئوشه هع هع ماعليييييييييناااااا ايه باه يا دندون الجمال ده باه بأه يسلمولنا اديكى الحلوه يا حلو انت يا حلو يا مسكر
    NOUr

    ردحذف
    الردود
    1. hhhhhhhhhhhhhhhhhh wlahy enty 3asl momkn nt3arf

      حذف
    2. ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

      حذف
  29. جاااااااااااااااااااامده يا دودو

    ردحذف
  30. انا مش متفاءلة :(

    ردحذف
  31. kaseera gidan ya dena

    ردحذف
  32. هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

    والنعمه ده رد فعلى بعد الحلقه :D

    ردحذف
  33. الحلقه قصيره اوى

    ردحذف
  34. أووووووووووووووووبش لالالالالالالالالالا حلوة اوووووووووووووووووووووي فظيييييييييييعه بجد بجد بجد ... الحلقة الجديدة عايزاها امبارح قبل بكرة ربنا يصبرررررررررررررررررررررني لحد بكرة :D :D

    ردحذف
  35. الحلقه الجايه لو اتاخرت انا هولع في تفسيييي .... انا بقلك اهووووو وتبقا طويله شويه .... حلو اوي تطورات تجننن كل الاحترام

    ردحذف
  36. دودو الحلقه جامده اووي بس قصيره جــــــــــــــــــــــــــــــــــــدا ابقي كبيرها شويه ونبي اي دودو

    ردحذف
  37. rabna ywaf2k =D

    ردحذف
  38. emta b2aaaaa L 7l2a L gdeeeeda plz..Asr3Oo

    ردحذف
  39. emta b2aaaaa L 7l2a L gdeeeeda plz..Asr3Oo

    ردحذف
  40. حراااام انا عايزه الحلقه الجديده مليش دعوه
    يرضيكي يعني يا دندن انام زعلانه :(
    ممكن تنزليها الاتنين و تخلي الجمعه بس الأجازه بليز يا دندن يا قمر انتي
    و قصصك جامده بصراحه
    ببقي مش عايزه الحلقه تخلص
    احبك في الله
    Reem

    ردحذف
  41. حلوه قوي الحلقه بس اعصابي بتتعب من الظلم اللي عاليه بتتعرضله و هيا طيبه و غلبانه بفضل مقريفه طول اليوم عشان الحلقه فرحينا بقى يا دينا ارجووكي

    ردحذف
  42. انا اول مرة اعمل كومنت
    بس عشان حسه بظلم رهيب ناحية عاليه لان انا متاكده ان مفيش حد بيفضل مظلوم كده لان ربنا رحيم واكيد حيرحمها لانها ظلمت كتير اووووي

    NOURHAN

    ردحذف
  43. حاسة ان مها هايحصلها حاجة وعالياء هي اللي هاتربي الولاد

    ردحذف

قول رأيك بلاش تقرا وتقفل من سكات...ارائكم تهمنى