الاثنين، 17 يونيو 2013

هل يشفع الحب؟...الحلقة 28

الحلقة 28
نرجس"هى حصلت يا طه... هتضرب اختك كمان... الشيطانة دى قالت لك ايه قلبتك على الكل كده...وانا اللى فاكراها طيبة"
عالية"انا معملتش حاجة... مكذبتش ف حاجة"
نرجس وهى بتحضن نرمين اللى عمالة تعيط
"اسكتى بقى مش عايزة اسمع صوتك...ولا عايزاكى ف بيتى"
طه وهو بيزعق لعالية
"لمى هدومك يالا وتعالى معايا"
وقفت عالية مش عارفة تتصرف...زعق
"يالاااااااااا"
                    ********************

عالية وطه ف العربية.... بيسوق بنفس العصبية
"انت قلتلى مش هتتصرف بعصبية...ليه عملت كده"
"كنتى عايزانى ادخل اخده بالحضن...عالية مش عايز كلام تانى ف الموضوع ده بيفور دمى"
"دلوقتى مامتك ونرمين يقولوا عليا ايه... اتسرعت ياطه كنت تجوزهم مش تفسخ خطوبتهم"
"اجوزهم...واحد مصانش البيت اللى دخله هيصون اختى؟"
سكت شوية...وبص لها بقلق
"انتى تعرفى حاجة مقلتيهاش"
"والله ابدا...حاجة ايه؟"
"علاقتهم وصلت لفين"
قالها طه ووشه احمر من الغيظ
"اطمن هى اكدت لى ان محصلش بينهم حاجة تخوف...مفيش غير اللى قلتلك عليه بس"
سكتوا الاتنين...وبصت عالية ف الطريق
"انا هروح فين دلوقتى"
"البيت طبعا"
"بيت مين؟"
"بيتنا"
وبكل حزم"لا ياطه"
بص لها باستغراب
"لأ ايه؟؟"
"مش هروح عند مها...مش هينقع ولا هقدر"
"اومال هتروحى فين...هنروح فين يعنى"
"مش عارفة...بس مش هقدر ابقى ضيفة عندها...وضيفة تقيلة كمان"
"طيب خلاص حاضر"
"هنروح فين"
"ثوانى"
واتصل بمها
"الو...ايوه يامها...انا هتأخر النهاردة...هتأخر اوى ...بعدين... روحى عند مامتك او هاتيها عندك...خلاص بقى مش وقته"
وقفل ف وشها وبعدين قفل التليفون
"دى لسه هترغى...انا ناقص"
                   ********************

عالية ف العربية... طه بيفتح المحل... دخل اخد فلوس من الدرج... وقفل المحل تانى وركب جنبها
"هنعمل ايه"
"هنشوف اوضة ف اى فندق لحد بكرة ربنا يحلها"
"اخاف اقعد ف فندق لوحدى يا طه"
"متخافيش انا معاكى"
"ومها"
"مش هتاكلها القطة لو باتت ليلة لوحدها...سيبك منها... كفاية علينا اللى حصل النهاردة"
                    ******************

نرمين بتعيط ونرجس بتجيب لها عصير
"الحرباية خربت لى حياتى... اوعى تدخليها هنا تانى... وطه ازاى يطرد طارق... اسمعى انا بحبه ومش هتجوز غيره"
"لما افهم الاول ايه اللى حصل"
"بتسألينى انا ما تسأليها هى"
"انا اتصلت بأخوكى تليفونه مقفول"
"طيب والله لاطربقها على دماغهم الاتنين"
ومسكت الموبايل ونرجس بتسألها بتعمل ايه مبتردش عليها
"ايوه يامها... جوزك اخد الهانم بتاعته ونزلوا...وقافل تليفونه"
صوت مها بتزعق
"نعم...يعنى لما كلمنى كان معاها...يومه اسود بس لما اشوفه... يخربيتك ياطه ياحارق دمى...كان يوم اسود لما اتجوزتك"
وكملت نرمين وهى بتصرخ
"معرفش قالت له ايه خلته جه ضرب طارق وطرده"
"ودينى لاربيها السوسة دى... ضربت اسفين ف الكل علشان يبقى لها لوحدها..طيب هنشوف انا ولا هى"
"شوفى انا ف ايه وانتى ف ايه"
"انتى ف ايه...طارق ده يدوب خطيبك انما طه ده جوزى وابو ولادى وانا احق بيه منها"
"انتى مش همك الا نفسك...كل واحد مش هامه الا نفسه... انا كمان مش هيهمنى حد منكم وهتجوز اللى بحبه غصب عن عين اى حد"
قفلت نرمين مع مها...ونرجس بتبص لها
"غصب عن مين يا بت"
"سى طه..ولا هو كلمته خلاص اُنزلت"
"لما افهم ايه اللى حصل وليه عمل كده...واصلا يعنى انتى مخطوبة بقالك سنة ونص...عمل ايه سى طارق بتاعك ده ...اللى ماجاب شبكة ولا شفناله شقة"
"ظروفه كده وانا راضية بيها انتوا زعلانين ليه"
                     *********************

طه وعالية داخلين الاوضة....عالية بتحط شنطة هدومها على السرير
"طه...انت هتنام ازاى"
"بهدومى وخلاص"
"مش عندك شغل الصبح"
"هبقى اروح اغير قبل الشغل"
"وهتسيبنى لوحدى؟"
"هعمل ايه يا عالية...انا لازم اروح الشغل واروح المحل واشوف مها كمان متنسيش انها على وش ولادة"
"طيب وانا؟"
"مش عارف...لما يطلع النهار يبقى ربنا يحلها من عنده... الفندق هنا غالى ومش هقدر اقعدك فيه كتير"
سكتت عالية وهى مش لاقية اى اقتراح لمكان تروح فيه
                   **********************

مها سمعت صوت الباب قامت مندفعة...مقدرتش وغصب عنها قامت ببطء ...كان طه وصل الاوضة وقف قدام الدولاب بيطلع هدوم
"انت كنت معاها فين"
طه ساكت
"تسيبنى هنا طول الليل وقافل تليفونك ورايح تقضى معاها وقت لطيف وتروقوا مزاجكوا وانا هنا يتحرق دمى"
طه خلص تغيير هدومه وراح ع الباب
"استنى هنا فهمنى"
"افهمك ايه...ايوه كنت معاها... بس علشان اتطردت من البيت هناك مش علشان نقضى وقت مع بعض... كنت معاها علشان رفضت تيجى هنا"
"تيجى فين...انت كنت عايز تجيبهالى هنا"
"شكلك نسيتى انه كان بيتها"
"كااااان... فعل ماضى... دلوقتى بقى بيتى وبيت ولادى"
"وعايزة ايه دلوقتى؟"
"متسيبنيش تانى....افرض كنت هولد كنت تسيبنى اموت انا وولادك"
"الحمدلله انتى كويسة اهو"
"رايح فين"
"عندى شغل يامها...هتأخر"
"وهى فين"
"ف فندق...انا هتأخر سلام"
"متقفلش تليفونك تانى...انا كنت خايفة اتعب وانا لوحدى"
                    *********************

عالية قاعدة فى الاوضة...خايفة تخرج
كل ماتسمع صوت خطوات تجرى تقف ورا الباب وتسمع لحد ما صوت الخطوات يبعد
رن تليفونها...اتخضت...جريت ترد وهى متوقعة طه
"الو... ازيك يا ابلة... اه حكيت له... هحكيلك"
                    **********************

طه ف العربية وجنبه عالية...واقفين تحت بيت فاتن
"انا هنزل بقى"
"عالية...بجد فاتن هى اللى مسكت فيكى"
"اه والله... هى قالتلى ان الوقت ضيق وهى وميار لوحدهم ف الفرش وعايزانى معاهم"
"انتى متضايقة؟... لو مش عايزة تقعدى عندها متعمليش حاجة غصب عنك وقوليلى وانا هتصرف ف مكان"
"انت عارف انا بحب ابلة فاتن وميار قد ايه...متقلقش عليا انا مش متضايقة"
"معلش ان شاءالله كل حاجة هتتحل قريب"
"ان شاءالله...متشيلش انت بس فوق طاقتك...متخلنيش اقلق عليك"
طبطب عليها"متقلقيش انا كويس.. هكلمك ولو فيه اى حاجة ابقى كلمينى"
"حاضر"
نزلت عالية من العربية... واخدت شنطتها من الكنبة اللى ورا ودخلت العمارة... وطه واقف لحد ما اختفت ف السلم
                     ***********************

نرمين قاعدة بتعيط قدام الكمبيوتر وماسكة تليفونها
بتبعت رسالة لطارق ع الفيس
"رد عليا...مرة واحدة بس متسيبنيش كده"
واتصلت تانى...رد عليها
"عايزة ايه؟"
"انت هتاخدنى بذنب طه ليه...انا عملتلك ايه"
"خلاص يانرمين ... انتهينا من الموضوع ده بقى"
"انتهينا يعنى ايه... والسنين دى كلها كانت ايه"
"مش اول ولا اخر اتنين قعدوا يحبوا بعض وف الاخر متجوزوش"
"اهون عليك تسيبنى ياطارق وانا بحبك"
"بكرة تلاقى الاحسن منى...انا مش مستعد لجواز خالص"
"انت ماصدقت بقى علشان تبقى براحتك مع الزبالة اللى تعرفهم"
"مبقاش يخصك...مع السلامة...لا قبل مااقفل...متتصليش بيا تانى علشان مهما عملتى انتى خلاص متنفعينيش"
وقفل التليفون ف وشها...اتصلت بيه تانى مردش عليها
جت تبعتله رسالة تانى...لقيته عملها بلوك
صرخت وعيطت وهى بتقول
"ف 60 داهية"
وقعدت تعيط بحرقة وهى لوحدها
                    ********************

طه داخل المحل... نرجس واقفة مع زباين
قعد لحد ما مشيوا.. راحت قعدت قصاده
"قافل تليفونك ليه"
"فتحته الصبح"
"ايه اللى حصل امبارح خلاك تعمل كده... بتطرد خطيب اختك م البيت"
"انتى زعلانة انى طردته وفسخت الخطوبة"
"ان جيت للحق هو م الاول مش على مزاجى...بس الدَخلة اللى دخلتها امبارح مش طبيعية"
"انا هحكيلك كل اللى حصل واحكمى بالحق"
                      *****************

مها قاعدة بتتكلم ف التليفون
"قاعدة ياماما اهو... محروق دمى من امبارح... دى ايامها سودة ان شاءالله بس اقوم بالسلامة وافوق لها... ولا نرمين دى كمان اللى هتشكيلى وتعيط لى على خطيبها وانا كنت هموت من الغيظ ...لا مش هكلمها انا مش قادرة وفيا اللى مكفينى"
وفجأة مسكت بطنها
"ماما...جالى مغص جامد"
اتنهدت بالراحة
"لا خلاص راح...ما تيجى شوية"
                        ********************

نرجس وطه قاعدين بعد ما حكى لها
"وانت ايش ضمنك ان كلامها صح"
"وهى هتكذب ليه"
"معرفش...يمكن غيرانة من اختك"
"والغيرة دى هتظهر فجأة...انتى مش عارفة عالية...الاولى انها تغير من مها مش من نرمين ومع ذلك مبتجيبش سيرتها خالص"
نرجس ساكتة
"ماماا... عالية مالهاش حد غيرنا... هنسيبها متلطمة كده"
"مش وديتها لفاتن...خلى فاتن تملاها من ناحيتنا"
"عالية بتحبكم وحتى لو فاتن اتكلمت هى مش هتسمع لها"
"عايز ايه يعنى"
"عايز اصالحكم على بعض وترجع البيت
"لما الامور تهدا مش دلوقتى...اختك دلوقتى شايطة"
رن موبايل طه...رد...سمع مها بتصرخ وبتقوله
"ألحقنى يا طه....انا تعبانة اوى"
                  **********************

مها على السرير.... وطه قاعد جنبها
"حمدالله ع السلامة"
"هما فين؟؟ كويسين"
"اه الحمدلله"
"ولدين؟؟"
"لا ولد وبنت الحمدلله"
"مبروك ياحبيبى"
"الله يبارك فيكى ...ومبروك عليكى انتى كمان"
"شفت ولدت ازاى بسبب حرقة الدم بتاعة امبارح... متزعلنيش تانى علشان خاطر ولادك"
"حاضر"
"هما فين عايزة اشوفهم"
قام طه اخد واحد من نرجس وخلاها مسكته
وراح جاب البنت من مامة مها
"هااا... نسميهم ايه"
                   ********************

عالية واقفة ف المطبخ ف شقة منار... بترتب دولاب المطبخ
دخلت لها فاتن
"خلصتى يا عالية"
"قربت اهو"
"هكمل معاكى... احنا كده خلصنا الحمدلله نبقى نيجى نفرش السجاد ليلة الفرح"
"ربنا يتمم لها بخير ويسعدها يارب"
"احنا تعبناكى معانا اوى ياعالية"
"بالعكس والله...ده مفيش حاجة بتهون عليا غير وجودى معاكم...انا اللى تقلت عليكم ...بقالى 10 ايام قاعدة عندكم وطه ولا قالى هيودينى فين"
"اخص عليكى...انتى منورانى"
"ربنا يخليكى يا ابلة... انا عارفة انه اتلبخ بولاده ربنا يخليهومله يارب"
"عقبالك...انتى وقفتى العلاج؟"
"ايوه"
"ماترجعى للعلاج تانى"
"مينفعش يا ابلة"
"مينفعش ليه"
"اى واحدة بتتعالج علشان الخلفة...لازم يكون جوزها معاها... انما انا طه مش معايا ومن زمان "
"وليه ساكتة... ده جوزك وليكى حقوق عنده"
"فيه حاجات مينفعش تتطلب... ان مكنتش بتيجى تلقائية مش هيبقى لها قيمة... وانا بحب طه ومقدرة ظروفه ..مش زعلانة منه"
                         *******************

نرجس مع نرمين ف البيت...داخلة لها اوضتها
"مش هتقومى تيجى معايا سبوع ولاد اخوكى"
"لا"
"ليه"
"مش عايزة اشوف مها ولا طه ولا ليا نفس افرح"
"بقولك ايه...انتى مش اول واحدة تفسخ خطوبتها...اومال لو كان عدل"
"كنت بحبه...هو ليه محدش حاسس بيا"
"لو بيحبك مكنش بص لغيرك حتى مرات اخوكى...ده واطى"
"انا غلطانة انى حكيت لك"
"ياريتك حكيتى م الاول ...جاية تقوليلى دلوقتى انه بتاع نسوان ولسه ماسكة فيه... انتى ايه يابت...انتى كنتى عارفة وساكتة"
"كلها حاجات عابرة بس كان بيحبنى انا"
"اه ما هو باين"
"انتى بتقطمينى كده ليه...مش فسختوا الخطوبة...بلاش ازعل"
"زعلتى خلاص... اعملى حسابك عالية هترجع البيت"
"مش هيحصل ياماما"


هناك 53 تعليقًا:

  1. اوووووووووووووووووووووووول كومن هع جمييييييييييييييله جدددددددددددددن بس بصراحه لسه مقرتهاش حبيت ابقى اول كومنت فجريت بسرعه :D

    ردحذف
    الردود
    1. هههههههههههههههههههههههه اخيرن شوفته

      حذف
  2. بالله عليكى تعملى حاجة تفرحى عالية المسكينة دى قلبى واجعنى عليها قوى

    ردحذف
  3. حلوة بس ما فشت غلي عايزة اشوف فيهم مصييييييييبة الرباعي المرح طه ومها وامه واخته منهم لله

    ردحذف
  4. 7raaaaaaaaaaaam kda b2a :'(

    ردحذف
  5. حلووووه اوى :) بس ايه اللى هيحصل بقى !!!
    لسه هستنى .... :(

    ردحذف
  6. يا سلام بقا لو مها تموت وعالية هي اللي تربي العيال عشان ربنا يعوضها :)

    ردحذف
    الردود
    1. ايوه انا نفسى فى كده برضه :) ونفسى عاليه تخلف

      حذف
    2. قصه روووووووووووووووووووووعه ممكن عاوذه الحلقه 29

      حذف
  7. حلوة اوى حلقة النهاردة

    ردحذف
  8. حلوة اوي بقي بس انا نفسي عالية تفرح بقي وعاوزة كمان اعرف اخر القصة دي

    ردحذف
  9. جمييييييييييييييييييييييييييييييييلة جدا
    تسلم ايدك


    loly

    ردحذف
  10. جميلة جدا بس فين بقيت الحلقات :)

    ردحذف
  11. حلوه اوى اوى يا دينا تسلمى يا قمر

    ردحذف
  12. اووووووووووووووووووووووووف مش عارفة كداااا بس حاسة اني مش مطمنه للي جي وطه ده بقي مستفز اوووووووووووووي ونفسي اولع ف مهااااااا دي عشان خلاااااااااااص فرستني

    ردحذف
  13. انا هتشل

    ردحذف
  14. الحلقة جميلة جدا فوق الوصف بس في ناس كتير بتظلم طه وهو ملوش ذنب هو راجل بيجارى امورة وهو طيب وانسان كويس والدليل على كدا انه مطلقش عاليه ومقدرظروفها ولسه بيحبها

    ردحذف
  15. حلقة تشل بصراحة عايزين حاجة تنصف عالية الغلبانه دي

    ردحذف
  16. الله عليكى اهو كدا انا حاسه ان واحده واحده ربنا هيشفى عليلى من العيله دى جاتها ااراف نرمين والزفته اللى اسمها مها دى _ بصراحه يادينا انتى ابدعتى والله بجد ومستنيه حلقه بكره باذن الله على نار ^_^

    ردحذف
  17. حلللللللللللللللللللللللللللللوة اوي يسلم ايدك يا دندون

    ردحذف
  18. حرام بقى طه يتلهى ف الولاد ولا سائل فيها كده
    شكل نهايه القصه هتكون حزينه

    ردحذف
  19. بليز يا دينا خلي النهاية سعيدة مش كفاية نكد من قول القصة بسه حاوة تسلم ايدك

    ردحذف
  20. على فكرة اللى اسمه طه دا بيستهبل لانه بكل بساطه كان ممكن يروح لعاليله اسبوع زى ما كان بيروحلها قبل الزفته مها ما تبقى حامل عادى يعنى و فى الاسبوع ده كان يخلى ام الهانم مها تيجى تقعد مع بنتها الزفته او يخلى المحروسه نرمين تقعد معاها ..........و فعلا اقل كلمه تتقال على الحيوان ده انه مش راجل اصلا و لا يطلق عليه لقب انسان اصلا ده واحد حيوان معندوش دم عشان يرميها رميه الكلاب كده عشان يخلف قال ......ان شاء الله ربنا مش هيباركله فى ولاده دول و يارب عاليه تخلص من اللى هى فيه و ترتاح حب ايه اللى يذلها كل الذل ده يغور فى داهيه الحب اللى يبهدل صاحبه بالشكل ده .و الحيوان سابها مرميه فى اى حته فى الفندق او عند فاتن و هو ماله لكن لو كانت الهانم مها كانت قعدته كنبها .... حيوان و زباله ربنا يخده هو واللى الزبالة اللى معاه ....خلى فى مها اللى ممشياه و ميقدرش يقلها لا على حاجه الدلدول بس فالح يعمل راجل على عاليه بس جاته نيله تخده و تخلصنا منه

    و اسفه انى طولت بس انا اتحرق دمى
    batot

    ردحذف
    الردود
    1. عندك حق فى كل اللى قلته





      esraa

      حذف
    2. عندك حق و كمان عاليه حظها كدة و هو اللى حبها من الاول المفروض يستحملها بكل عيوابها

      حذف
    3. طه او غيره مجرد ذكر غريزته وشهوته هما الى بيحركوه والمشاعر والاصول دول آخر حاجة يفكروا فيها
      حرقتى دمنا ليه يا دينا اكتر واكتر

      حذف
    4. انتوا جايين على طه اوي هو كان عوز يبئا اب و ميسبش عالية و هو فعﻻ مسبهاش كل واحد يحط نفسه مكان كده و يشوف هيعمل ايه اي نعم هو غلطان عشان نسيها و رميها كده بس هو بردو عندو شغل و هيكون عندو وﻻد انا صحيح مش بحبه بس هو معذور غريزة اﻻمومة و اﻻبوة في كل كائن حي

      حذف
  21. كان عندي امل الزفته مها تمووووت وهي بتولد يا عيني عليكي يا عاليه :(

    ردحذف
  22. الحلقه تووووحفه بجججد

    أنا متعودتش أقراا حااجه ليكي غير لكا الحلقه الأخيره تنزل و دي اول مره اعمل في نفسي كده

    عاااااااااااااااااااااااااااااااااااااااااااا

    عايزه الحلقه الأخيره بقااا ='(

    ردحذف
  23. عاوزة اعرف ليه حظ البنت دى كدة مع انها غلبانة اوى بجد ربنا يستر دى عايشة فى وسط وحوش

    ردحذف
  24. تسلم دماغك يا دودو :) بس هو مش طارق كان رايح مع نرمين سبوع طه ومها ..هيرجعو لبعض ولا ايه ؟

    ردحذف
  25. أزال المؤلف هذا التعليق.

    ردحذف
  26. والله حرام عليكي يادينا اللي بتعمليه في عاليه الدنيا صحيح ظالمه بس كده كتير معلش بس كده المسكينه عاليه من يوم ما اتولدت وهي متلطمه في الدنيا :(

    ردحذف
  27. :) aNa L qeSa D Law Ma NtahetSh Nhaya mOnseFa L 3aLyaa
    aNa hygeLii ShaLL w Zampy F R2pTq y maDam DiNa :D

    ردحذف
  28. بجد انتي رائعة لازم تعملي كتب

    ردحذف
  29. الأمل عندما يتحقق ..هذا هو طه .. نسى فى غمره فرحته بعض من واجباته نحو عاليه .. ولن أحكم عليه بعنف ... فلا يحكم عليه إلا من وضع نفسه فى مكانه ... وعاليه تحب طه .. فهل يشفع الحب .. زلات طه .نحو عاليه ..أنا أرى ذلك ..وطه لا يريد أن يخسر فهو يوازى بين الامور بقدر المستطاع ..فمن يدرى به انه مقسم إلى أجزاء .. ونبقى لننتظر النهايه ...!!!

    ردحذف
  30. القصة دة من اروع قصصك يا دينا رغم انها وجعالي قلبي جدا تسلم دماغك

    ردحذف
  31. طه ده معندوش دم
    مش عارف يطلق مها دي ولا يضربها بالجزمه و يسكتها
    دي انانيه اوي و متغاظه منها
    بس الحلقه جميله و خلصنا من طارق ده :)

    ردحذف
  32. على فكره بقا نرجس دي عقلانيه جداااااااااااااا لدرجه انها مش ممكن ابدا تمشي بعاطفتها حتى في اصعب الظروف وده بيخليها تزعلهم انما هيا مش وحشه او بتظلم

    ردحذف
  33. حلقه جامده موت ومستنيه الجديد ونفسى اعرف اخرتها ايه مع عاليه المسكينه دى

    ردحذف
  34. بجد يا دينا أكتر من رائعة ، انا متابعة المدونة من فترة ومن كتر ما هى حلوة جدااااااااا انا ممكن اقعد اقرا 3-4 ساعات متواصل من غير ملل

    ردحذف
  35. يعنى ينفع كده نفضل طول القصة متنكدين مفيش اى احداث تفرح واللا المصيبة كمان تبقى النهاية حزينة هتبقى االقصة دى اول قصة اندم على قراءتها

    ردحذف
  36. ايوة بقى يا دندن انا على طول بقرى القصه بحالها فى يوم بس اما اول مرة هتابعك بالايام بس بجد القصه تحفه يارب مها تموت وعاليا تربيهم عشان.ام مها هتبقى مشغوله بجوزها م عليش طولت اصلى مفروسه enas

    ردحذف
  37. جميلة جدا جدا ونا خلصت كل قصصك بجد رائعة كلها
    ومستنية الباقى بسرعة

    ردحذف
  38. بجد حلوه اوي اوي بس ليه الحلقه الجديده مش نزلتيها وايه مواعيدها بعد اذنك وياريت مش تتاخري علينا في تنزيل الحلقات

    ردحذف
  39. لأ بقي فين الحلقه الجديده انا مستنياها من باليل
    نزليها بليز

    ردحذف
  40. كان نفسى تنزلى الحلقة الجديدة بدرى يا دودو بس النصيب بئى ان شاء الله هاقراها الصبح واقول رايى وطبعاً هتكون رائعه كالعادة

    ردحذف
  41. فين الحلقة بقى

    ردحذف
  42. بليييييز الحلق امتتتتتتي حرام

    ردحذف
  43. اوعى تقفليها على ان مها تاخدوا وتظلمى عاليه حرااااااااااااااااااام

    ردحذف
  44. اول مره اعمل كومنت
    بس عشان حسه بظلم رهيب الحلقة ديه حرام بصراحه عاليه مظلومة طول عمرها وشكلها حتفضل كده بس ربنا ؤحيم ولازم حيفتحها عليها

    Nourhan

    ردحذف
  45. بجد حرام الذل ده
    انا مستنياها من امبارح
    حرام
    ممكن تنزليها بقي

    ردحذف
  46. هيا اسمها منار ولا مار متهبليناش

    ردحذف

قول رأيك بلاش تقرا وتقفل من سكات...ارائكم تهمنى