الأربعاء، 19 يونيو 2013

هل يشفع الحب؟... الحلقة 29

الحلقة 29
عالية قاعدة ف القاعة... ف فرح ميار وايمن...مع هدير وولادها
كل الموجودين فرحانين بالعروسين وهما بيرقصوا بحب وفرحة
عالية قاعدة وعينيها ع الباب كل لحظة
والموبايل ف ايديها كل شوية تبص فيه
لحد ما بدأت تفقد الامل لما الساعة عدت 11 ونص
فاتن رغم كل الموجودين الا انها كل شوية تقعد مع عالية وتقوم وترجع تقعد معاها وهكذا

عالية قاعدة مبتسمة وقلبها حزين
خايفة يبان عليها الحزن ف الفرح
هدير"انا هقوم يا عالية يدوب ألحق اروح بالعيال"
عالية"طيب يا حبيبتى خلى بالك منهم"
هدير"هستناكى يا عالية تيجى بكرة او بعده...تعالى اقعدى معايا"
عالية"ما انا عند ابلة فاتن اهو"
هدير"ابلة فاتن مش اقرب لك منى... انتى اختى وبيتى هو بيتك.. وانتى خلاص وقفتى معاها ف جواز ميار...كفاية"
عالية بترد بكسرة نفس
"هشوف ياهدير واقولك...لازم استأذن طه"
همت هدير انها تتكلم بعصبية...رجعت مسكت نفسها
"مظنش هيقولك لأ لانه مش مهتم...ماعلينا انا قايمة هسلم عليهم وامشى"
قامت هدير سلمت على فاتن وميار وشاورت لعالية وخرجت من القاعة

قعدت عالية مستنية الفرح يخلص... حست بحد بيمسكها من كتفها
التفتت ...فرحت لما شافت طه
"طه...اتأخرت اوى كده ليه"
"معلش ياعالية كنت عند الدكتور بالعيال"
"مالهم؟"
"عندهم برد بس الحمدلله"
"سلامتهم...انا قلت مش جاى"
"انا وعدتك انى جاى... وعندى ليكى خبر كويس"
                     *********************

عالية ف اوضة ميار... بتحط هدومها ف الشنطة
وفاتن قاعدة على السرير
"يا عالية ما انتى كنتى منورانا...مستعجلة تمشى من عندنا"
"ربنا يخليكى يا ابلة... انا مش عارفة اقولكم ايه ع المقابلة وحسن الضيافة... سواء انتى ولا الحاج عبد الحميد ولا ميار... حسستونى انى وسط عيلتى"
"يا خبر ياعالية...ليه هو احنا غرب...ده والله عبد الحميد كان معتبرك زى ميار"
"ربنا يكرمكم ويسعدها يارب"
"يارب ويسعدك انتى كمان...مقلتليش انتى ماشية من هنا على اى اساس"
"هرجع البيت تانى...ماما هى اللى قالت لطه"
"ونرمين؟"
"قالى انهم مش عايزينا نتعامل مع بعض خالص لحد الامور ماتهدا وترجع المياه لمجاريها"
"وطه؟"
"ماله؟"
"مسألتيهوش عن حقك ف وجوده معاكى زيها بالظبط؟"
ردت عالية بانكسار
"ماليش عين اقارن نفسى بيها...هى دلوقتى ليها الاهتمام الاكبر ...متنسيش انها لسه والدة قريب واتنين يعنى محتاجة وجوده جنبها"
"انتى هتشيلى همها...شيلى هم نفسك"
                       *******************

طه بيفتح الباب بالمفتاح... بيدخل وهو ماسك شنطة الهدوم
بيسمع صوت نرمين بتتكلم ف التليفون ف اوضتها
"تعالى ياعالية...ادخلى"
دخلت وراه...دخل على الاوضة ...وهى ماشية وراه
حط الشنطة على الارض... وقعد على السرير ووشه ف الارض
حست عالية انه مش طبيعى ... قعدت جنبه
"مالك ياطه؟؟ شكلك متغير ... ولا مخبى حاجة؟؟"
مسك ايدها وباسها
"سامحينى ياعالية... انا بهدلتك اوى معايا"
شافت لمعة دموع ف عينيه...طبطبت عليه
"ليه بتقول كده.. انا كفاية عليا انى ابقى معاك"
"انا حاسس انى بقيت مُسير... بفكر كتير انا ايه اللى خلانى اتسرعت واتجوزت مها ... ده لا فيه حب بيننا ولا تفاهم ولا اى نوع من الاحترام... انا كل يوم بندم انى اتجوزتها"
"ايه اللى حصل بس لكل ده"
"مش مرتاح...وف نفس الوقت لما ببص ف وش ولادى بنسى تعبى معاها...انا ساعات بسرح واتخيل انك انتى امهم...واقول ياريتهم كانوا ولادنا"
ردت ودموعها نازلة
"نصيب يا طه... مش مكتوب لى اكون ام... انت تعرف انى ساعات بتخيل واقول ياترى شكلهم ايه...شبه مين فيكم...نفسى اشوفهم بس مش من حقى اطلب اشوفهم وانا بشوفك انت بالعافية"
مسح طه دموعه ...وطلع تليفونه
"اهم... انا مصورهم صور كتير اوى...قلبى واتفرجى"
اخدت عالية الموبايل وفضلت تتفرج على الصور
بتبص لهم بكل حب واشتياق لتحقيق حلم الامومة ودموع
"حلوين اوى يا طه...ربنا يخليهوملك"
"هبقى اجيبهم تشوفيهم اكيد...لما هتشوفيهم هتحسى باحساس تانى خالص غير الصور"
لاحظت عالية تغيير نبرة صوته لما بيتكلم عن ولاده..ونظرته ليهم اللى بتبين قد ايه بيحبهم ومجرد سيرتهم بتفرحه
                  ********************

عالية قاعدة فى اوضتها... دخلت عليها نرجس
"صاحية؟"
"ايوه ياماما اتفضلى"
دخلت نرجس وقعدت
"حصل حاجة بينك وبين نرمين؟"
"لا... انا اسفة والله ما كذبت على طه واللى قلته كله حصل"
"خلاص الموضوع ده انتهى... بصى انا وافقت انك ترجعى البيت علشان ده برضه بيتك...وف نفس الوقت بيت نرمين... انا مش عايزة مشاكل خالص ...نرمين مجروحة من اللى حصل وعايزاكى لو اتكلمت معاكى ولا ضايقتك استحمليها"
"حاضر"
"ولما مها تشد حيلها هبقى اعزمهم هنا كل جمعة علشان اشوف العيال واقعد معاهم...وانتى براحتك لو عايزة تبقى موجودة او لو عايزة اليوم ده تقضيه بره براحتك"
"ياماما انا والله بحبكم وبحب ولاد طه من قبل ما اشوفهم...وجودهم مش هيضايقنى انما انتم لو مش عايزينى اكون موجودة قوليلى"
"انا لو مش عايزاكى مكنتش رجعتك يا عالية...انتى اصيلة وبتحبى طه بجد"
"ربنا اللى عالم انى بحبه وبحب اشوفه سعيد حتى لو مش جنبى"
                         ******************

عالية ف المطبخ... دخلت لها نرجس
"خلصتى ياعالية"
"خلصت اهو ياماما"
"طيب تعالى حضرى معايا السفرة لاحسن كلمتهم قالوا جايين ف السكة"
"هتصحى نرمين تتغدا معانا ولا ايه؟"
"اه لما يبقوا ييجوا"
                       *********************

طه ومها ونرمين ونرجس وعالية قاعدين على السفرة بيتغدوا
يسمعوا صوت حد من الاطفال بيعيط
مها"افففف ...اهو لاعارفة انام ولا اكل ولا اشرب...قومى يانرمين شوفيهم"
نرمين"وانا هرضعهم...ماتشوفى انتى ولادك"
مها"شايفة ياماما.... من ساعة ما اتجوزت طه ونرمين بقت غلاوية اوى وبتغير منى"
نرمين"هغير منك على ايه يامها ماتلمى نفسك شوية...وانت ياطه ساكت لها كده"
طه"هتتخانقوا ومفيش واحدة فيكم هتشوف اللى بيعيط ده"
يسمعوا صوت الاتنين بيعيطوا
عالية"هقوم اشوف...كملوا انتوا اكل لحد ما اسكتهم"
تزعق مها وعالية قايمة
"لأ... انتى لأ"
تقف عالية مكانها محرجة
طه"لأ ليه؟"
مها"المرة اللى فاتت روحنا من هنا العيال عيوا...معرفش اتحسدوا ولا حد كان تعبان اتعمد يعديهم؟"
سكتت عالية مش عارفة ترد
ردت نرمين
"معاكى حق... اللى تخرب بين اتنين ممكن تعمل اى حاجة...الحقد وحش خلى بالك على عيالك...قومى شوفيهم انتى"
قامت مها لولادها
دخلت عالية اوضتها بتعيط... دخل طه وراها
"متزعليش يا عالية حقك عليا"
"طه... انا ال6 شهور اللى فاتت دى كنت بفكر... انا قاعدة هنا طول الوقت ونرمين مش طايقانى وبتسمعنى كلام صعب كل شوية وانا ساكتة مبتكلمش... الجمعة اللى بشوفك فيها مها بتسمعنى كلام اسوأ من نرمين... انت ناسينى خالص وغصب عنك انا عارفة... انا بقيت عبء عليك ياطه... وكفاية كده"
"انتى بتقولى ايه؟؟ انا مقدرش استغنى عنك"
"لا انت قدرت فعلا ...انا مبنامش الليل من التفكير يعنى متفتكرش ان كلامى ده من موقف النهاردة... انا بفكر بقالى كتير...انا مبقاش ليا وجود ف حياتك غير بمكالمة تليفون ...اه بنتكلم كل يوم واكتر من مرة وبس... ده كل اللى بيربطنا يا طه... مش عايزة افضل اتعذب واعذبك معايا"
"لا يا عالية متقوليش كده... انتى حبيبتى...ده وجودك اللى بيهون عليا حياتى"
"وانا مين يهون عليا حياتى... انا تعبت ياطه... خلاص مبقاش عندى اى قدرة استحمل حد"
وعيطت وهى بتكمل
"طلقنى يا طه"
اخدها ف حضنه وهى بتعيط
"مقدرش اطلقك... انتى حبيبتى ياعالية ومقدرش استغنى عنك"
دخلت عليهم مها فجأة
"يا سلااااااااااااام...عينى عينك كده...انتم ايه مفيش عندكم دم"
طه"اخرسى يامها"
قامت عالية وهى بتعيط...وبدأت تحط هدومها ف الشنطة
مها"ايوه يا بت اعمليهم عليا...طب هو عبيط ويخيل عليه حركاتك دى انما انا فاهماكى كويس...قال يعنى هتمشى بجد"
عالية لطه"طلقنى ياطه"
نرجس ونرمين واقفين ع الباب..نرمين بتبتسم بشماتة
نرجس مستغربة اللى بيحصل
طه بيزعق"اخرسى يامها ومتتكلميش تانى"
طه بيشد الشنطة من عالية
"مش هطلقك ياعالية"
مها"ماتسيبها تغور ف 60 داهية"
طه"لولا ولادى كنتى انتى اللى غورتى من زمان"
مها"بقى كده"
طه"ايوه كده... انا مبحبش الا عالية...سامعة"
مها وهى بتجرى على ولادها
"طيب يا طه... يبقى مش هتشوف ولادك تانى... ولا بيتى وبيت عيالى تدخله ...انت فاهم"
جريت نرجس وراها
"استنى يامها... متخليش الشيطان يدخل بينكم"
طه قعد وهو ماسك شنطة الهدوم علشان متاخدهاش عالية
"مش هتمشى ياعالية ومش هطلقك"
عالية"مش هقدر اقعد خلاص ياطه...انا كرهت عيشتى هنا...وروح لها لانك مش هتقدر تستغنى عن ولادك انا عارفة"
طه"ايوه بحبهم وبحبك انتى كمان"
عالية"هما اولى بيك منى...روح ألحقها انا لازم امشى...سيبنى امشى ارجوك"
غيرت هدومها بسرعة .... واخدت شنطتها وخرجت

كانت مها قاعدة تعيط ونرجس جنبها بتهديها
مشيت عالية من غير ما حد يقولها استنى

طه قاعد ف الاوضة زى ماهو
دخلت نرجس عليه بابنه ...حطته ف حجره
"ملكش الا مراتك وعيالك يا طه... عيالك اللى كنت بتترجاهم م الدنيا مش بعد ما ربنا رزقك بيهم تكفر بنعمته"
"وعالية؟"
"انت مسبتهاش...طالما هى اللى طلبت الطلاق سيبها وخليك مع مراتك وعيالك...قوم راضى مها وهى هتتراضى بكلمتين... قوم علشان خاطر ولادك"
                     *******************

طه بالليل صاحى ...ومها نايمة والاطفال ف سريرهم
قام طه يبص عليهم... ودموعه نازلة وهو بيفتكر كل ايامه مع عالية وراحته معاها وسعادته اللى مش حاسس بيها دلوقتى

عالية فى السرير وجنبها هنا... دموعها نازلة وهى بتفتكر ايامها مع طه قبل جوازه...وصبرها وسكوتها على الذل اللى شافته بعد جوازه
دخلت هدير تتسحب
"انتى صاحية"
مسحت عالية دموعها بسرعة
"اه"
"وبعدين بقى... هتفضلى مقهورة كده... مش انتى مقتنعة باللى طلبتيه"
"اه طبعا... مشكلتى انى لسه بحبه ...بس هو فين؟؟ مبقاش معايا"
"معلش يا عالية...مسيرك ربنا يعوضك خير"
"ربنا كريم...قومى نامى وانا شوية وهنام"
"طيب تصبحى على خير"
                      ************************

عالية بتلبس ...خرجت من الاوضة كان عصام وهدير قاعدين بيفطروا
عصام"رايحة فين ع الصبح كده يا عالية"
عالية"انتى مقولتيلوش ياهدير"
هدير"نسيت معلش... عالية شافت اعلان عن وظايف ف مدرسة خاصة فرايحة تقدم"
عصام"خير بس عالية هتشتغل ايه ف المدرسة"
عالية"هما طالبين مؤهلات كتير دبلومات وبكالوريوسات وكل حاجة"
عصام"ربنا يوفقك...تيجى اوصلك ف طريقى"
عالية"لا روح انت هركب واروح متقلقش"
قام عصام ونزل ...وسألتها هدير
"هتقولى لطه؟"
"لآ... وطول الاسبوع اللى فات بيكلمنى وانا مبردش...خايفة اضعف ..مش خايفة...انا متأكدة لو سمعت صوته هضعف وارجع له "
"وبعدين...ماهو انتوا لازم تتكلموا"
"مش دلوقتى... على الاقل لما احس انى قويت شوية واقدر اتمسك بالطلاق"
                      ********************

عالية واقفة ف زحمة ... ناس كتير جايين يقدموا
والتقديم معاه انترفيو ف نفس الوقت... سمعت حد بيكلمها
"عالية؟؟"
التفتت اتفاجئت بطارق...ارتبكت مش عارفة ترد ولا تعمل ايه
"ازيك ياعالية عاملة ايه؟"
ردت باقتضاب
"الحمدلله"
مشيت خطوات بعيد عنه...راح وراها
"انا عايز اعتذرلك عن كل اللى حصل منى... بس طمنينى عليكى"
"حصل خير...انا كويسة الحمدلله شكرا"
بعدت خطوات ... راح وراها
"انا عايز اتكلم معاكى ياعالية...حاولت ادور على رقمك اللى كان معايا ملقيتوش خالص...لازم اتكلم معاكى"
"اسفة معلش مفيش كلام بيننا... مش هقدر اتدخل بينك وبين نرمين لانى سبت البيت هناك...لو عايز تصالحها تقدر تروح المحل لمامتها واخوها"
سألها بفرحة
"انتى سبتى طه؟"
استغربت فرحته ومردتش...كمل كلامه
"انا مش عايز اتكلم على نرمين..انا عندى كلام يخصك انتى وفرحتينى لما قلتيلى انك سبتى طه"
"معلش بس ...يفرحك او يزعلك ف ايه؟"
"انا عايز اتجوزك على سنة الله ورسوله يا عالية...انا كنت عارف ان وضعك هناك مش هيستمر كتير ومسيرك تزهقى"
"انت ايه اللى بتقوله ده...انا متجوزة... انا لسه على ذمة طه"
"لسه على ذمته وسايبين بعض ولا عايشين مع بعض؟؟"
ردت بانكسار
"سايبين بعض"
"خلاص...يبقى تطلقى ونتجوز"
عالية متفاجئة من كلامه...كمل كلامه
"انا عارف انك شايفانى راجل معندوش اخلاق... بس انا عايزك تفهمى انى اتغيرت والله اتغيرت"
ردت باستنكار
"غريبة"
"انا بعترف انى كنت مش كويس وليا علاقات كتير... وحاولت معاكى لمجرد علاقة عابرة ووقت اقضيه معاكى وقلت هتبقى سهلة علشان جوزك متجوز وبعيد عنك وفاهم ممكن تحسى بإيه ومشاعرك هتكون محتاجة حد يهتم بيكى...بس اتفاجئت بقوتك وصدك ليا...انا حتى مزعلتش انك قلتى لجوزك... انا اتأكدت ان لسه فيه ناس محترمة ... ياعالية انتى اللى ابقى مطمن انى أأمنها على اسمى وشرفى ...انتى جوهرة نادرة مش اى حد يعرف قيمتك"
عالية متفاجئة من كل كلام طارق....اول حاجة جت على بالها
"انت عايز تتجوزنى وانت عارف انى صعب اخلف؟"
"ايوه طبعا عارف... بس هعمل ايه بعيال تكون امهم مش عارفة تربيهم... وبعدين محدش عارف النصيب يمكن لما نتجوز ربنا يدينا...ناس كتير الدكاترة غلبت معاهم وخلفوا...الحكاية دى مش شاغلانى لدرجة انى افرط ف واحدة زيك"
عالية ساكتة ومش عارفة تتكلم...كمل طارق كلامه
"انا اتغيرت...والله ما عملت اى حاجة غلط من يوم ما سبت نرمين انا كمان قربت من ربنا والتزمت بالصلاة... وحاسس ان ربنا قبل توبتى علشان كده قابلتك النهاردة "
"اه صحيح انت هنا ليه؟"
"جاى مع واحد صاحبى...شفتى الصدفة"
جه عليها الدور ف التقديم...واتنادى على اسمها
"هستناكى يا عالية... عايز اكمل كلام معاكى"
                       ********************

عالية وهدير قاعدين مع بعض
"هى اه حاجة غريبة بس بتحصل... ربنا غفور رحيم.. مترفضيش طارق طالما متقدملك وراضى بكل ظروفك"
"وطه؟"
"طه خلاص صفحة واتقفلت بقى... انسيه وعيشى حياتك مع حد يقدرك... فكرى ياعالية... فكرى بعقلك بس"
                  *******************

طه ع السرير...نايم صاحى
مها بتحط ايدها عليه تصحيه فاكراه نايم...يتنفض من لمستها
"يا سلاااااااام... ايه قرصتك عقربة علشان تتنفض كده"
بص ف الساعة...سابها وقام دخل الحمام
وهى ماشية وراه
"هو ايه النكد اللى احنا فيه ده من يوم ست زفتة ما مشيت... طلقها وخلصنا انت مستنى ايه"
خرج من الحمام ودخل يلبس
"هى مشيت وسابت لى عفريتها ينكد عليا...طلقها وخلصنا من اى حاجة تربطها بيك...طلقها وريحنى"
رد بعصبية
"مش هطلقها...سامعة مش هطلقها"
"لا بقى تطلقها...يا تطلقنى انا وملكش عيال عندى"
"انتى بتلوى دراعى علشان عارفة انى متعلق بيهم"
"احسبها زى ما تحسبها"
كمل لبس...ونزل من غير ما يرد عليها
                      *****************

طه قاعد مع نرجس ف المحل
"قوليلى دلوقتى اتصرف ازاى... مش كنتى بتفضلى تقوليلى اتجوز علشان تخلف...ادينى خلفت ...فين الراحة والسعادة اللى كنت عايشها مع عالية... عالية مش بترد عليا واساسا مش عارف هقولها ايه لو ردت ...انا فعلا قصرت معاها كتير... والتانية اللى بتخيرنى بين عالية والعيال...اعمل ايه"
"طلق عالية يا طه ده الحل الوحيد"
ونزلت دموعه وهو مخنوق وبيتكلم
"مش هقدر...انا بحبها...وهتفضل على ذمتى لحد ما اموت"
"بعد الشر عليك"
"شر...هو فيه اكتر من كده شر...انا بموت بالبطئ ... انا كنت ممكن مشوفهاش بالايام بس كنت بكلمها واحكى لها وتحكى لى...هى الحضن الوحدي اللى كنت بحس فيه بطعم الراحة"
"ومها ...هتعمل ايه معاها لو صممت على كلامها"
"مش عارف...انا مش عارف اعمل حاجة خالص بس اللى متأكد منه انى مش هطلق عالية ابدا"
                          *******************

بعد شهرين
عالية خارجة من المدرسة...لقيت طارق قدامها
"ازيك ياعالية"
"الحمدلله...جيت ليه؟"
"دى مقابلة برضه؟"
"معلش اصل شكلى كده يعنى"
"شكلك ايه... وحشتينى وحبيت اشوفك.... مش هنفضل كده كتير ياعالية"
"اعمل ايه طيب"
"ادينى كلمة...بقالك شهرين كل ما اكلمك تقوليلى بفكر"
"مينفعش افكر ف جواز وانا على ذمة راجل "
"وهنفضل كده...افرضى مطلقش هنفضل متعلقين كده"
"انا كنت ناوية اطلب منه الطلاق فعلا بس بقاله فترة مبيتصلش خالص"
"خلاص اتصلى بيه انتى واطلبى الطلاق لو رفض ارفعى قضية خلع"
"ربنا يسهل..معلش ياطارق لازم امشى وبلاش تجيلى هنا تانى"
"انا كنت فاكرك هتفرحى لما تشوفينى"
"معلش كل وقت وله ادان...سلام"
                   ********************

مها بتتصل بنرجس فى المحل...المغرب
"الو... هو فين طه...مقموص؟"
"مقموص ايه؟؟ طه لسه مجاش؟"
"مجاش ازاى...اومال راح فين؟"
"معرفش انا مرضيتش اتصل بيه اشوف اتاخر عليا ليه قلت يمكن نايم شوية"
"طه نزل الصبح ف معاد الشغل عادى ومجاش انا قلت جالك"
"ومتصلتيش بيه ليه يامها"
"بتصل الموبايل مقفول"
"انتى هتقلقينى ليه؟"
"لا متقلقيش ...حركة قفل الموبايل دى لما بيكون مع الزفتة بتاعته... والله العظيم ماهسكت له تانى"
"انا هتصل بيها واشوف...انتى قلقتينى...مع السلامة"
"ابقى عرفينى لما تكلميها"
                   ********************

عالية قاعدة مع عالية الصغيرة بيكتبوا الواجب
رن موبايلها...بصت لهدير
"دى ام طه"
"ردى عليها شوفى عايزة ايه وخليكى قوية اوعى تسكتى لها على اى حاجة"
ردت عالية"الو.. الحمدلله...طه؟؟؟ لا معرفش انا مشفتوش من يوم ما سبت البيت... ولا كلمنى ولا كلمته... مع السلامة"
هدير بتسأل عالية بفضول
"فى ايه"
عالية بترد بقلق"بتسأل على طه... من ساعة ما نزل من بيته الصبح مرجعش لا البيت ولا المحل...ربنا يستر"
                     *******************

عالية ف المدرسة... بتبص ف الساعة 10 الصبح
قلقانة على طه غصب عنها من ساعة اتصال نرجس...اتصلت بنرجس

مها الصبح قاعدة ومعاها نرجس...الاتنين بيعيطوا
رن موبايل نرجس...ردت بلهفة
"ايوه ياعالية...عرفتى حاجة؟"
"لا ...انا كنت عايزة اطمن بس...طه بخير؟؟"
نرجس تعيط
"معرفش... لما روحت بالليل لقيت العربية مركونة تحت البيت وسألت نرمين قالت مجاش ولسه راجعة من الشغل عنده كنت بسأل عليه قالوا مجاش"
عالية بتسأل ودموعها نازلة
"يعنى ايه؟؟ حصل له ايه؟"

انتظروااااااا الحلقة الاخيرة



                   

هناك 61 تعليقًا:

  1. اوباااااااااااا بجد فظيعة اوي و يا رب يطلقها بئا و تتجوز طارق علشان شكله بئا كويس و كفاية بئا ذل في حياتها منهم كلهم علشان معندهمش دم و لازم طه لو بيحبها يطلقها بئا علشان تعيش ممكن تخلف كمان الله اعلم

    ردحذف
  2. عندها حق عاليه و كويس انها اخيرا فاقت
    بس كانت مفروض تكلمه انشف من كده و تواجهه باهماله ليها و ضغطه عليها عشان عارفها بتحبه و هتستحمل
    انما ده كتير و محدش يستمل كل ده
    يا حبيبتى يا عاليه :(

    ردحذف
  3. روعه بجدا يا ديناااااااااااااااااا مستنية بكرة على نااااااااااااااار اخيرا عالية خدت موقف :)

    ردحذف
  4. ياريييييت تنزل بببببسرعه وحلقه جميييله... بببب كان نفسي مها تكون لطارق

    ردحذف
  5. ربنا يستررررررر
    بس مش نفسي عاليه تتجوز طارق ده

    ردحذف
  6. كده كتير عالية استحملت كتير يفضل مع مراته واولاده وهي ربنا يعوضها خير ومش بالضرورة يكون طارق

    ردحذف
  7. القصة ده من اروع قصصك يا دينا بجد وجعت قلبي على عاليا اويييييي انت مبدعة سايقة عليكي النبي يا شيخة متتأخريش في الحلقة
    غادة

    ردحذف
  8. حلقة حلوة جدا بس هو انتحر ولا ايه كان نفسي كمان المواجهة بين طه وعالية تكون اقوي يعني كانت قالت كل اللي عمله فيها بقي عشان يحس هو بهدلها قد ايه

    ردحذف
  9. جامدة اوى بس يارب عليا مش تتجوز طارق ده

    ردحذف
  10. t7fa bgaad tgnn tslm edk ya dena

    ردحذف
  11. لااااااااااااا ايه ده انا مش قادرة استوعب كل اللى قريته ومخى واقف وعلى اد ماكنت عايزة القصه تخلص بس اول ماشفت الاخيرة بكرة انهرت مبقتش عارفه اركز فحاجه خااااااالص

    ردحذف
  12. تحفه تسلم ايديك



    ردحذف
  13. t7fa bgaad tgnn tslm edk ya dena

    ردحذف
  14. حرام عليكي يادينا والله صعبو عليا وقعدت اعيط عليهم مستنيييييييين بكرة متتاخريش علينا

    ردحذف
  15. واخيراااااااااااااااااااااا بقى هنعرف هتخلص على ايه نشفتى دمنا يا دودو حرام عليكى الحلقه دى حلوووووووووووووووووووووووة مووووووووووووووووووت

    ردحذف
  16. اخيراااااااااااااااااااا بقى انا فرحانة اوى انها هتخلص القصة دى قبل ما تخلص عليا ,, وفرحانة اوى اوى ان عالية هتسيب طة ,,,وعايزه اقولك يا استاذه دينا ان حضرتك مفيش اى كلام ف الدنيا ممكن يديكى حقك مهما قلت والله انتى بجد انساااااااااااااانة بكل ما تحمل الكلمة من معانى واحساسك عالى اوى ورائعة ,,يارب دايما ف تقدم ونجاح ,,, asmaa

    ردحذف
  17. بجد قصة تحفة اوييييييييييييى بس يا ريت حلقة بكرة ماتتأخرش علشان بجد مش هقدر استنى كتييير

    ردحذف
  18. جامده يارب مها تموت وطه وعاليه يربوا العيال

    ردحذف
  19. انا حاسه ان طه شاف عاليه مع طارق بس بجد الحلقه فظيعه و ربنا يستر ف الحلقه الاخيرة

    ردحذف
  20. بجد الحلقة حلوة اوى اوى بس ايه الافترا اللى فى نرجس ده دى فظيعة اوى ومعندهاش قلب حراااااااااااام اللى بيعملوه فى الغلبانة دى ومش كفاية يعنى سابوها تشمى ومحدش سأل فيها لا وكمان بعد ما قوت وخدت موقف رجعت تسألها عليه تانى هما بيوجعوا قلبها كدا بس بجد الحلقة اوى ونفسى اشوف الحلقة الاخيرة قبل ما اموت من كتر التشويق

    ردحذف
  21. يااااااااااااااااااااارب بقاااااااااااااا
    ياريت طارق ده يبعد عن عاليه وترجع لطه وتخلف كمان ^_^

    ردحذف
  22. على فكرة يا دينا انتى بجد حد ميتوصفش احلى ما في قصصك انك بتوصلى الاحساس بتخلى الخيال بيبقى سهل ومشيق وبقلمك بترسمى الصورة للقارئ يارب دايما من نجاح لنجاح يارب

    ردحذف
  23. تحفه بجد تجنن بس بليز خلي النهاية سعيدة ومتخليش عالية تسيب طه بليز

    ردحذف
  24. يالهوووووووووووى و انا لسه هستنى لبكره ... لا يا دينا انا اللى كده بموت بالبطئ .. موتى مها بقى و لا وقعيها فى بلاعه و نخلص .. نفسى اقرا الحلقه الاخيرة و مش هتكلم عن الحلقه لانها طبعا مش محتاجه كلام استااااااذه و ربنا
    Nada ashraf

    ردحذف
  25. لآ طآرق لآ يا دينا آعملي آي حاجه ف مهآ و خلي طه و عآلية يرجعوآ لبعض تآني ونبي ‎:(‎

    ردحذف
  26. الله تجننننننننننننننننننننننن بجد والله تحفففففففففففة اووووووووي يارب طه يعقل بقى يارب ويطلق الحيوانة مها دي :'(

    ردحذف
  27. أبدعت في نثر حروفك الرائعة
    عناق جميل بين مشاعرك وحروفك
    حروف تخرج من نبض قلبك لتلون لنا لوحة من الإبداع
    فتراقص الكلمات على أوتار القمر وسكون الليل
    سلمتَ وسلمت يمناك على الكلمات الرائعة
    وصف الحب حنان الإنسانة
    فقليل منك فى دنيانا
    وادم الله نبض قلمك
    تحيتي لكَ محمله بالود والاحترام

    ردحذف
  28. لا بجد حرااااااام انا صعبان علي "طه" اوي ...والحلقة جميلة اوووووووووووووووووووووي

    ردحذف
  29. الحلقة حلوووووووووه اوي بس يادينا اوعي يكون طه هيموت كده عاليه هتحس بالذنب وتفضل متعذبة طول حياتها وهي مش ناقصه كفاية اللي حصلها نفسي حاجه تغير الجؤ الكئيب اللي ع القصه ده بس قصه اكثر من رائعه تسلمي يادودو وتسلم كتابتك الجميله

    ردحذف
  30. حرااااااااااااااااام

    ردحذف
  31. تحفة اووووووووووووي
    بجد قلبي وجعني علي فرحانة
    علي اد الحب اللي بينها وبين طه علي اد ما انا مش عاوزاها ترجعله بجد
    كفاية ذل لعالية بقي
    مش معني ان الواحد يجي علي نفسه عشان حد بيحبه يبقي يستاهل يسمع كلام يسم البدن كده
    مستنية الحلقة الأخيرة بقي

    ردحذف
  32. حرااااام عليكى يا دينا أنا لآول مره أعيط وأنا بقرأ حاجه :( :(


    noaa

    ردحذف
  33. حلوه جدا وطويله وزي الفل ..... اهم حاجه النهايه متكنش حزينه وعاليه يرجعلها حقها ومها تفور في ستين داهيه

    ردحذف
  34. جاااااااااااااااااااامده بس بالله عليكي بكره نزلي الحلقه بدري :)

    ردحذف
  35. الحلقه حزينه بجد انا مبطلتش عياط :‫((
    عاليا صعبانه عليا اوووووي ربنا يصبرها
    ويصبر كل الي ظروفهم شبها
    بجد بجد الحلقه تحفه ومن كتر حلاوتها
    مش عارفه اوصفها
    وانتي كاتبه موهوبه و فنانه رائعه
    تسلم ايدك و يا رب ميحرمناش من كتاباتك الرائعه

    بس متأخريش الحلقه الاخييييره
    عشاااان انا خلااااص مش قادره استحمل

    ردحذف
  36. a5iiiiiiiiiiiiiiiraaan gaat elnhayaaa .. :D bas yarab tkon nhaya s3eeda .. :)

    ردحذف
  37. الحلقه ملهاش حل تسلم ايد اللى كتبتها بجد بس فيه حاجه لو عايه اتجوزت طارق هيقولوا انها وقعت بينه وبين نرمين علشان تتجوزة وكدا هتتظلم بس اكيد الحلقه الجايه ملهاش وصف

    ردحذف
  38. حلوه اوى ويارب تكون نهايه سعيده لعاليه :D

    ردحذف
  39. خليتيني عيطت ولسه بعيط كتييراووي بجدعياط بحرقه لاني فكرت في عدم الامان اللي في الدنيا مش مجردعياط علي القصه نفسها خليتني اخااف اوي يادينا
    كتيراشخاص بيكونوا فاكرين انهم بيحبوك بس مع اول اختباربيضيع الحب ده او اللي هما فاكرين انه في حب اصلا :(
    طه من اسوأ الشخصيات اللي ممكن حديقابلها ياارب ابعدها عني
    قلبي واجعني اوي يادينا ربنايسامحك :( وتسلم ايدك ..
    اللهم دبرلي فاني لااحسن التدبيرواخترلي فاني لااحسن الاختيار :(

    ردحذف
  40. عندي احساس ان مها هتعمل حادثه وتموت وطه يرجع لعالية بس في الحاله دي طه لازم يعوضها عن كل الذل اللي شافته

    ردحذف
  41. حلوووووووه اوى مستنيه الحلقه الاخيره بفارغ الصبر

    ردحذف
  42. لسه فاكره تعمل كده طه ده اصلا مش راجل منه لله
    ماعندوش حاجه غير متزعليش يا عاليه :/ ;/

    ردحذف
  43. اسلوبك حلو اوي يا دينا اللملكه موجوده اكتبي سيناريوهات افلام او مسلسلات او على الاقل اكتبي القصه وحد يحولهالك صدقيني اسلوبك هو المميز والافكار تمام

    ردحذف
  44. بس ميتهيأليش هتضعف وتتجوز طارق خاصة بسبب شدة وفائها وحبها لطه

    ردحذف
  45. لا لا لا لا حرام عليكى يا دودو عاوزين الحلقة الاخيرة بسرعه

    ردحذف
  46. طه انتحر ولا ايه
    هههههههههه

    ردحذف
  47. مستنين الحلقة الاخيرة على ناااااار.

    ردحذف
  48. واو جامده تسلم ايدك يادينا

    ردحذف
  49. ♥دينا عماد♥20 يونيو 2013 في 12:53 م

    وااااااااااوالحلقه دى جميييييله جدا وطويله اوى وروعه تسلم ايدك يا دودو ♥\
    طه دا اصلا مش صعبان عليا خاالص ويا ريت عاليه تتجوز طارق والله يبقى احسن

    ردحذف
  50. هوا فين باقي الرواية

    ردحذف
  51. انا مش متفاءلة

    ردحذف
  52. 7elwa 2wi bs l 7al2a l gdeda btnzl emtaa??

    ردحذف
  53. الحلقة دي فظييييييييييييييييييييييييييييييييييييعه بجد تحفففففففففففففففففففففففففففففففففففففففففففففه جداااا يادينااااا
    .بس ياتري طه راح فييييييييين !!!!!
    مستنيه الحلقة الاخيرة باللهفففففففففففففففففففففففففففففففففففه

    ردحذف
  54. فين بقي الحلقه الاخيره

    ردحذف
  55. اكتر من رائعة في انتظار الحلقة الاخيرة

    ردحذف
  56. لحلقه لاخير ه امتى ؟؟!

    ردحذف
  57. انا مستنية الحلفة الاخيرة بقالى ساعتين هيا هتنزل امتى بقى ؟؟؟؟؟؟؟؟؟؟

    ردحذف
  58. انا قريت الحلقات كلها الليله من كتر مشدتني القصه ... ع فكره انا خلال اقل من شهر قريت كل قصصك بالمدونه بس عنجد هيك حرام انا مالي صبر انطر الحلقة الاخيره متى رح تنزليها دينا؟؟ بحييكي عنجد انتي رائعه واسلوبك حلو وبيأسر القراء ^_^

    ام البراء

    ردحذف
  59. يارب تموتوا كلكوا

    ردحذف
  60. عيطيني حرام عليكي ماشاء الله اسلوب كتابتك تحفه ربنا يحفظك

    ردحذف
  61. لا ادري اتتفاهمون شعري ام لا فان العين اولا تراء ثم تهمس للعقل ثم ياتي للقلب دوره فيختار
    الاختيار الاول والاخير يرجع الي القلب وسواء كان حبا او دون ذللك فتبقي في القلب وان كان في القلب حبا اذا يوجد عقلا
    اذا ففي شفاعه في الحب

    ردحذف

قول رأيك بلاش تقرا وتقفل من سكات...ارائكم تهمنى