الجمعة، 9 أغسطس، 2013

القصر الهادى (الجزء الثالث)


-
خرج منير وفاطمة من الاوضة...
الطرقة مضلمة اوى ومفيش اى ضوء غير بعيد
مشيت فاطمة ماسكة فى ايد منير لحد ما وصلوا للحمام
فتحوا باب الحمام... لقوا طرقة مربعة ومنها اتنين حمام قصاد بعض
"هو مفيش نور هنا يا منير"
"اكيد فيه"
واتحسس منير الحيطة اللى جنب الباب
"اهو...لقيت مفتاح النور"
فتح النور... نور مهزوز متقطع بيروح وييجى
"ايه ده ...هو النور ماله بيعمل كده ليه"
"اكيد اللمبة بايظة علشان كده كانوا طفينها... انا هدخل الحمام ده وادخلى انتى هنا"
ودخل كل واحد فيهم حمام

فاطمة... الحمام كبير وواسع ومدور وله 3 ابواب
وفيه حوض واحد
وجواه 3 ابواب صغيرين ...
فتحت فاطمة بحذر واحد من الابواب الصغيرة... لقيت اخيرا الحمام
بعد ماخلصت... طلعت تغسل ايديها
الضوء بيروح وبييجى... هى بتغسل ايديها بسرعة
خلصت... بصت حواليها
"ياترى اخرج من اى باب فيهم؟؟"
احتارت وهى مش عارفة تخرج من اى باب من الابواب ال3
فكرت انها تفتح كل باب وتشوف لو لقت الباب قدامه حمام تانى يبقى هو ده اللى دخلت منه
فتحت اول باب بحذر وبطء... الباب بيزيَق وصوته بيقطع الصمت
شافت باب الحمام التانى قصادها... اطمنت ان هو ده الباب اللى دخلت منه
خرجت... ووقفت فى الطرقة الصغيرة اللى بين البابين تستنى منير
استنت ... هو مش متعود يتأخر كده فى الحمام
استنت تانى... اتأخر ... قلقت
خبطت على الباب بصوت يتناسب مع الصمت
"منير... منييييير"
مفيش رد ولا صوت مياه يدل انه لسه جوه
"كده يامنير تسيبنى وترجع"
قالت لنفسها كده...وقررت انها ترجع الاوضة تانى
دى المسافة يدوب على بُعد اوضتين

لما خرجت من الباب... الخارجى لل 2حمام
بصت لقت منظر تانى خاااالص غير الطرقة اللى فيها الاوضة بتاعتهم
رجعت تانى علشان تخرج من باب تانى من الابواب ال3 للحمام
الباب مش بيتفتح... الباب مقفول
التفتت تانى للمكان اللى اصبحت فيه...مُجبرة
لقيت نفسها فى اوضة مربعة مساحتها لا تتجاوز 20 متر
ولها باب واحد... راحت بسرعة على الباب الوحيد اللى هيخرجها من المكان المغلق اللى هى فيه
فتحت الباب... وبمجرد ما فتح الباب
شافت نفس الشكل اللى بتشوفه كل مرة
بس المرة دى معاها سيف طويل
وبحركة سريعة افقية على رقبتها
كانت الاوضة وحوائطها كلها.... دم






10-
منير دخل من باب الحمام...
وهو عبارة عن حوض و2 حمام
بعد ما خلص... غسل ايده وخرج
وهو واقف يستنى فاطمة
شاف بنت صغيرة من ضهرها ... بتعيط وماشية لوحدها فى الطرقة المضلمة
قرب منها... وكل ما يقرب منها... تبعد عنه
"مالك يا شاطرة"
البنت بتعيط وبتفرك فى عينيها... وبتقول بصوت واطى
"مامااا... ماماااا"
منير ماشى وراها زى المسحور
طلعت سلم ضيق ... طلع وراها
بتطلع.. وهو بيطلع
سلالم كتير...كتير
لحد ما وصلوا للقصر من فوق
فوقه السما.... ليل مظلم رغم توقف المطر
البنت مشيت لحد سور السطح... طلعت وقفت على السور
جرى منير عليها
"استنى هنا... هتقعى"
التفتت البنت لمنير... شاف الشكل المرعب اللى وصفته فاطمة
وش بعين واحدة وبوء كبير مفتوح من عينها لدقنها
رجع منير لورا ووقع من الخضة... قام بسرعة وهوبيقول
"فاطمة"
افتكر فاطمة والبنات... خاف عليهم
نزل يجرى... نزل الدور التالت... وكمان دور لحد ماوصل الدور التانى
بيجرى ناحية الحمام والاوضة اللى فيها البنات
مع سرعته... اهتز جزء من الارض الخشبيةالمهترئة
ووقع منير.. مكان مظلم والضوء الوحيد هو الضوء الخافت الظاهر من الفتحة اللى وقع منها
قام يحاول الخروج من المكان اللى هو فيه
مش باين اى حاجة... مشى على جنب وايده على الحيطة يتلمسها
وصلت ايده لمقبض باب... وبدون تردد فتحه
لقى نفسه فى المدخل الرئيسى للمكان اللى دخل منه
كل شئ يبدو طبيعى وهادى
اتجه للسلم.. طلع للدور التانى
مشى الطرقة الطويلة وقبل ما يوصل للاوضة
سمع صوت انين واهات
مشى ناحية الصوت... الصوت خارج من اوضة مقفولة
قرب ببطء... فتح الباب فجأة
شاف راس فاطمة متعلقة فى نص الاوضة لوحدها
والاوضة كلها ملطخة بالدم
خاف... لف بسرعة علشان يخرج
كان فيه سيف اسرع منه بيفصل رقبته عن جسمه














11-
فى الاوضة
"ماما وبابا اتأخروا اوى يا مريم"
"فعلا ... يكونوا راحوا فين كل ده"
"انا خايفة"
"طيب استنى هنا واروح كده ابص عليهم واجى"
"لالالا متسيبينيش انا خايفة"
"طيب تعالى ندور عليهم مع بعض"
وخرجوا مريم وملك من الاوضة
الطرقة ضوءها خافت...الاتنين ماسكين فى بعض
وصلوا للحمام... خبطوا على الباب
مفيش صوت نهائى لدرجة انهم نادوا على باباهم ومامتهم بصوت اشبه بالهمس
"شكلهم مش جوه"
قالتها ملك بقلق...ردت مريم
"تعالى نسأل الست اللى هنا يمكن شافتهم"
مشيوا وهما بيتلفتوا حواليهم
هدوء تام... وضلمة نسبية
نزلوا على السلم... دور واتنين
مش هو ده المكان اللى دخلوا فيه اول ما وصلوا
ده برضه طرقة طويلة فيها اوض
"مريم مش احنا نزلنا دورين"
"اه"
"بس ده دور شبه اللى كنا فيه"
"يمكن واحنا طالعين اتلخبطنا فى عد الادوار... لسه السلم مكمل لتحت"
ونزلوا لتحت... دور واتنين والسلم مبيخلصش
بصوا لبعض... شبكوا ايديهم فى ايد بعض
وطلعوا على السلم تانى بسرعة وبدون كلام
طلعوا 4 ادوار... الاتنين انفاسهم بتتلاحق من الجرى والخوف
ملك وهى بتنهج"ايه ده يا مريم... لا فيه حد ولا فيه باب و ل..."
وقاطعتها مريم... حطت صباعها على بؤها فى اشارة للسكوت
وبايدها التانية شاورت على ودنها بمعنى اسمعى
وشاورت على واحدة من الاوض الموجودين
قربوا البنتين من باب الاوضة اللى كان فيها صوت هادى
وسمعوا حوار رغم ان الاوضة مش باين اى ضوء منها
" – اسمع كلامى بس دى حاجة سهلة اوى
- وافرض ملقيناش حاجة زى ما طلع الحفر هنا ع الفاضى
- مين قالك بقى... المرة دى متأكد
- بس فين المكان ده
- قبل البلد بشوية ومتقلقش احنا هنروح بالليل ومحدش هياخد باله ولا يعرف حاجة ولما نلاقى المصلحة وتبقى من اصحاب الملايين شوف بقى حياتك وحياة ولادك هتبقى ازاى
- (صوت نسائى) الشاى
- تسلم ايدك يا ام كامل... احضرينا ياستى وشوفى جوزك ده
- (الصوت النسائى) اللى يشوفه ابو كامل"
مريم سرحت وافتكرت وهى قاعدة مع سامى وبيحكى لها

شدت مريم ملك بعد اللى سمعته... وجروا بعيد
"بتجرى ليه مش يمكن الناس دول يساعدونا"
"يساعدوا ايه بس... انتى مش فاهمة حاجة"
"فهمينى طيب"
"مش هينف...."
وقاطعتها ملك... وقالت بصوت هامس وهما بعيد عن الاوضة الاولانية
"سامعة الاوضة دى كمان باين عليها فيها حد"
وقربوا البنتين من باب الاوضة... وسمعوا
المرة دى كان الصوت اعلى شوية
"- انت جيت لوحدك ليه فين جوزى
- ا ا اصل الحكاية
- اصل ايه وفصل ايه ..جوزى فين
- شدى حيلك
- اشد حيلى يعنى ايه؟؟؟ انا عايزة اشوفه
- قضاء وقدر وقع عليه الفاس واحنا بنحفر
- وهو فين
- هناك بره البلد تعالى معايا"

"يالا يا ملك احنا لازم نخرج من هنا"
"نخرج منين ولا ازاى... وانتى ليه خايفة كده بدل ما تطمنى من ان فيه ناس معانا هنا"
شدتها مريم وجريت على السلم
مريم نازلة تجرى وبالتبعية ملك فى ايدها
"استنى يا مريم... مش لما نشوف ماما وبابا فين"
"احنا هنا فى مكان مش طبيعى ابدا يا ملك ولازم نخرج منه"
"وهو احنا لاقيين اى مخرَج"
"ان شاءالله هنلاقى"
مع كل دور ينزلوه يدوروا على اى مخرج منه مش لاقيين
سمعوا صوت صراخ جاى من اوضة
ولاول مرة اوضة مفتوحة
بصوا لبعض بخوف... مفيش قدامهم اى اختيار تانى
غير يشوفوا مصدر الصوت ده ايه
قربوا من الاوضة المفتوحة ومن على بُعد
شافوا جثة فى الارض لرجل مفصول راسه عن جسمه
وست بتصوت وتلطم... وراجل تاتى بيشدها وبيتهجم عليها

ملك ومريم خافوا اكتر راحوا ناحية السلم
نزلوا بسرعة واخيرا شافوا الباب اللى دخلوا منه بس كان بعيد شوية

قبل ما يوصلوا للباب
شافوا نفس الست اللى كانت فوق بتعيط على جوزها
شايلة جثة طفل وبتعيط... وجنبها نفس الراجل اللى كان معاها
قاعد بيولع سيجارة وبهدوء وبرود اعصاب
حطت الست جثة الطفل على الارض ... وراحت لركن فيه وابور جاز... فضت الجاز على الراجل اللى اشتعل بسرعة لان السيجارة كانت فى ايده
والباقى على هدومها... وامتدت ليها النار

النار بتزيد... وبسرعة البرق وصلوا مريم وملك للباب
واول ما فتحوه... شافوا قصادهم الشكل المرعب اللى وصفته فاطمة
ست بعين واحدة وبوء كبير من عينيها لدقنها
وف ايدها سيف.... رفعته وبحركة افقية قطع السيف رقبة ...

















12- النهاية
صوت قريب
"مريم ... مريم "
فتحت مريم عينيها ببطء
وحست بألم شديد فى رقبتها
مسكت رقبتها قبل ما تتبين مين بيكلمها
"ماما؟؟؟"
"ايوه... انتى نعسانة للدرجة دى ..قومى وصلنا"
بصت مريم حواليها... هى لسه فى عربية باباها
بصت شمالها شافت ملك واقفة بره العربية
ومامتها بعد ما صحتها سابت الباب اليمين مفتوح علشان تنزل
وبتاخد شنطتها من على الكرسى اللى قدام
باباها واقف بيكلم بواب العمارة
ملك بتشارولها "يالا انزلى"
نزلت مريم من العربية... وراحت على ملك
"ايه مالك يا بنتى مسهمة كده ليه"
"رقبتى بتوجعنى اوى"
"اصل انتى طول الطريق نايمة وهى معووجة اكيد اتلوحت"
سكتت مريم بعد ما فهمت ان كل اللى مر بيهم ده ... كابوس

اول ما دخلوا شقتهم
فاطمة ومنير دخلوا اوضتهم يغيروا هدومهم
مريم وملك دخلوا اوضتهم يغيروا هدومهم
رن موبايل مريم... ردت مريم على التليفون بابتسامة
"الو... الحمدلله...اه لسه واصلين... لا مش هنام... اوك ابعت الايميل فى مسدج... ساعة كده ان شاءالله...سلام"
قفلت مريم الموبايل ومازالت مبتسمة
"اييييييييه"
"ايه ياملك خضتينى"
"ايه النحنحة دى يابت... كنتى بتكلمى مين"
"سامى"
"سامى؟؟ سامى اللى هو سامى اللى لسه عارفينه النهاردة"
"ايوه"
"وموبايلات وايميلات وحركات... اااااه كده فهمت ابن الاروبة ده اخد باله من لون عينينا ازاى... الاخ معجب"
ضحكت مريم وراحت على دولابها اخدت فوطة وهدوم
"رايحة فين"
"محتاجة دُش علشان النهاردة كان يوم غير عادى"
"طبعا طبعا"
قالتها ملك وهى بتمسك قلبها..
ابتسمت مريم وهى بتخبطها بحنية بالفوطة
"لا ياختى مش علشان كده"
"اومال ليه"
"بصى هاخد دُش واجى اترمى فى حضن سريرى واحكيلك كل حاجة بما فيها القصر الهادى"
"ايه القصر الهادى ده... فيلم رعب"
"لا وانتى الصادقة ده حلم رعب"

هناك 38 تعليقًا:

  1. Mohamed Abd Elbakey9 أغسطس، 2013 4:16 ص

    القصة تحفة انا قريت معظم قصصك وعجبانى اووى اوووى ^_^

    ردحذف
  2. يالله انا اتشلييييييت وفي الاخر يطلع حلم

    ردحذف
  3. جامده اوى اوى يا استاذه انا قريت كل قصصك ومستنيه جديدك

    شيمو

    ردحذف
  4. معجبه بقصصك جدا وبتابعك باستمرار بس قصه القصر الهادي ده انا قريتها من حوالي 3 شهور ع النت هيا القصه بالتفصيل فارجو التوضيح واتمنالك المزيد
    3yoon

    ردحذف
  5. هي القصه قريتا حملتااااا وقريتا زمان بدنا شي جديد ديناااا

    ام البراء

    ردحذف
  6. هتنزلى تانى امتى بقى ي دودووووو عاوزة اقرا قصص جدددددددددددديددددده نووووووووووووونووووووووووووس

    ردحذف
    الردود
    1. قريب ي نونوس متقلقيش

      حذف
  7. ياااااااااااالهوى يادودو خضتينى

    وأنا هنام إزاى دلوقتى ؟

    ردحذف
  8. ايه ده كده برضوا انا اتخضيت اخر حاجه وقلت ابطال القصه ماتوا كده على طول هو انتى هتنزلى الايام دى ولا لا ؟

    "manar"

    ردحذف
  9. أه يا قليـــي =)) .. القصه تحفه بس رعب اووووي ! .. يلا الحمدلله طلعت حلم :) .. تسلم ايد حضررررررررررتك :)

    ميــــــــــــــــــس

    ردحذف
  10. ده انا الى اترعبت انا شكلى مش هنام انهاردة

    ردحذف
  11. حراااااااااااااام عليكى ده انا اصلا مش بعرف انام بسهولة وخلتينى رجلى بتخبط فى بعض ومرعوبة اوى :(

    ردحذف
  12. حرام عليكى يا دودو رعبتينى بجد ايه دا كابوس لاى الابعاد؟
    بجد تسلم الأيادى

    ردحذف
  13. روعة يا دينا يعنى بعد ما موتينى فى جلدى يطلع كل ده كان حلم

    ردحذف
  14. روعة يا دينا يعنى بعد ما موتينى فى جلدى يطلع كل ده كان حلم

    ردحذف
  15. روعة ي دينا انا قرأت كل قصصك و بجد تعجز كلماتي عن التعبير

    تقي

    ردحذف
  16. اعزيني علي ال هقوله A7a

    ردحذف
  17. خوفتنيني أوي وفﻻخر طلع حلم بس ألحمد لله أنه حلم
    تسلمي يأقمرأيه♥♥♥♥♥
    حور

    ردحذف
  18. انا كنت هتقهر لو كانوا فعلا ماتو بجد حرام عليكى نشفتى دمى بس برضه انتى رائعة.

    ردحذف
  19. انا فضلت ماسكة قلبى طول الوقت بس القصة بجد تحفة

    ردحذف
  20. انا كنت هموت من الرعب زى فاطمة و مريم بس جامد جداااااااااااااااااااااااااااااااااااااااااااااان دة ممكن يبق فلم رعب بث فلم عربى

    ردحذف
  21. انا اتخضيت ليكون حقيقى انهم ماتوا حلوووه اوى

    فاطمة

    ردحذف
  22. حرام عليكى انا كده هاعمل حمام على روحى
    ثم انى بقرئها وانا فى اليت لوحدى
    حبيبه

    ردحذف
  23. ده انا كنت هموت من الرعب جداااا و فى الاخر يطلع حلم و مريم تكلم سامى و احنا هنا مرعوبين :-D
    بس القصة دى تحفة اوووووى يا دودو و مرعبة

    ردحذف
  24. to7faaa awiii

    ردحذف
  25. انا بدون واسطة بخاف وقت النوم كيف رح انام هﻻ والمشكلة اني قرأتها اخر الليل .. الله يستر

    ردحذف

قول رأيك بلاش تقرا وتقفل من سكات...ارائكم تهمنى