الأربعاء، 11 سبتمبر 2013

ليلة حمرا... الحلقة 4

الحلقة 4
تقترب منيرة وهى تمتم بآيات قرانية وتتلفت حولها
"ايه اللى خلاكى تشكى ان فيه حاجة"
"صدق الله العظيم.... التليفزيون يا باشا... التليفزيون من امبارح بالليل شغال ع العالى ومعرفتش انام منه ابدا...اصل انا بنام فى الاوضة اللى ف وش الليفنج بتاعها... وبعدين هى فى العادى بتصحا العصر وتفتح الشبابيك وتفضل رايحة جاية فى البيت... النهاردة الصبح صحيت اصل انا بصحى بدرى ما انا لما معرفتش انام من صوت التليفزيون روحت نمت فى الاوضة اللى ع الشارع... المهم لقيت الشبابيك مفتوحة والتليفزيون زى ماهو عالى والانوار كلها مفتوحة... ومشفتهاش خالص طول اليوم فاستغربت وقلت لعم غريب"
"وليه مخبطتيش عليها امبارح تقوليلها توطى التليفزيون"
"مفيش بينى وبينها كلام"
"ليه؟"
"اصلها..."
وقطع حديثهما احد رجال البحث الجنائى وهو يحمل كيس بداخله موبايل يرن
"تليفون القتيلة بيرن يا باشا"

تناول مراد الكيس الذى يحتوى على التليفون ... وامسكه بمنديل للحفاظ على البصمات للرد سريعا قبل ان ينغلق الخط
فتح الخط ولم يتكلم...وسمع على الطرف الاخر صوت رجل منفعل
"انتى فين ياهانم ومجتيش ليه؟"
تكلم مراد
"مين معايا؟"
ثار الطرف الاخر
"انت اللى مين؟؟ فين ساندى"
"حضرتك مين"
"انت مال اهلك يا حيوان... هى مجتش علشانك ...تطلع مين بقى"
اشتاط مراد غضبا وصرخ فى محدثه على الطرف الاخر
"معاك مقدم مراد حسنين بحقق فى جريمة قتل سناء سليمان او ساندى على حسب انت تعرفها باى اسم... انطق انت مين"

أُغلق الخط فورا فى وجه مراد...مما زاده غضبا
اعاد الموبايل فى الكيس الخاص به
"وحياة امك لاهجيبك ف اسرع وقت"

كانت منيرة مازالت ترتجف امامه... بدأ يهدئ من غضبه
"كملى يا مدام... كنا بنقول ايه"
ردت بتلعثم
"ايه... اللهم صل على النبى... نسيت"
ركز مراد تفكيره لحظات وسألها
"كنتى بتقولى مفيش بينك وبينها كلام ...ليه"
"اصلها استغفر الله العظيم...ربنا يرحمها مطرح ماراحت كانت مش مظبوطة"
"مش مظبوطة ازاى يعنى"
"انا قلت وانت تفهم... انا مقولش اكتر من كده"
"انا عايز اتأكد ...تقصدى مش مظبوطة يعنى نصابة ... حرامية... مومس"
قاطعته منيرة محرجة
"استغفر الله العظيم ربنا يستر على ولايانا"
"وانتى عرفتى منين؟"
"زى ما قلتلك الشقة مكشوفة ودى رجالة داخلة ورجالة خارجة ووشها كان مكشوف مكنتش بتكسف ابدا"
تلفت مراد وهو ينظر للشقة مرة اخرى
"كنت متوقع حاجة زى كده"
والتفت لمنيرة مرة اخرى
"طيب يا مدام... احتمال كبير احتاجلك تانى...شكرا تقدرى تتفضلى"
ابتعدت منيرة خطوات بينما كان مراد يتجه ليتفقد بارقى ارجاء الشقة
وقفت منيرة مترددة لحظات...وعادت مرة اخرى لمراد
"بقولك ايه يا باشا"
"نعم"
"انا افتكرت حاجة مش عارفة هتفيدك ولا لا"
"قولى افتكرتى ايه؟"
"امبارح بالليل نزلت اشترى شوية حاجات... وانا راجعة لقيت واحد نزل يجرى وحتى خبطنى  ف جريته"
انتبه مراد لاقوالها وسألها بتدقيق
"مش يمكن نازل من اى شقة فى العمارة"
"لا ده اكيد نازل من عندها... انا وهى اخر دور وانا قابلته بين الدور بتاعنا والدور اللى تحتنا"
"تقدرى توصفيه"
"يعنى هو شاب كده بالكتير 30 سنة يمكن اقل شوية...طويل واسمر بس مش اسمر اوى ومش فاكرة اكتر من كده"
"طيب لو شفتيه تفتكريه"
"يمكن"
"متشكر اوى اوى يا مدام...انا اكيد هحتاجلك تانى ومش بعيد الحل يكون على ايدك"
كان مراد يشكرها بابتسامة ودودة...جعلتها تخفف من حدة خوفها وتبتسم له فرِحة بدورها فى مساعدة العدالة وتشكره وهى مغادرة الشقة ...مسرح الجريمة

شاور مراد للبواب ان يأتيه... أتاه مهرولا
"نعمين يا باشا"
"هى القتيلة كان بيزروها ناس كتير"
"م م معرفش"
"انت هتستعبط... ما باينة كانت بتشتغل ايه"
رد وهو منكس الرأس
"اه كان بيجيلها ناس كتير"
"وسكان العمارة عادى ...متضايقوش؟ مفكروش يطردوها مثلا"
"يعنى بقالهم مدة قريبة بس اللى اخدوا بالهم وانا كنت بخرج نفسى بره الحكاية دى واقول انه مبيحصلش"
"كانت كريمة معاك شكلها"
"يا باشا انا مليش دعوة بحاجة والختمة الشريفة"
"ماشى... انت شفت حد جالها يوم الحادثة"
"والله ما اعرف ولا اخدت بالى"
"وفين اصحاب الشقة... سايبينها كده لواحدة توسخ سمعتهم"
"اصحاب الشقة مسافرين وانا اللى بأجرها وببعتلهم الايجار كل 6 شهور"
"آآآآآآآآآه قلتلى بقى...يعنى هى مأجرة الشقة دى منك انت وانت طبعا لما لقيت الحكاية مزهزهة كده مقلتش لا"
"متظلمنيش يا بيه ده انا اجرت لها الشقة علشان ينوبنى ثواب"
"افهمها دى بقى ...ينوبك ثواب ف ايه"
"اصل ف ليلة كده برد ومطر من 3 شهور لقيت مغاورى داخل عليا وبيقولى ان فيه واحدة مش لاقية حتة تبات فيها وانها لو لقت شقة هتراضينا كويس وهو عارف ان الشقة دى كانت فاضية فانا قلت ولية وغلبانة واديها الشقة"
"مين مغاورى ده؟؟"
"ده بواب صاحبى ماسك عمارة بعدنا بشارعين"
"وهو يعرفها منين؟"

اقترب عسكرى من مراد
"مراد باشا...وكيل النيابة خلص معاينة وعايز حضرتك"
نظر مراد فى ساعته...ثم تحدث لغريب
"بكرة الصبح تجيلى المديرية انت ومغاورى"
"حاضر ياباشا...امشى؟؟"
"اه امشى"
واخرج مراد تليفونه من جيبه... واتصل باحد الارقام وبلهجة آمرة
"ماجد...انت فين؟؟... طيب فضى لك نفسك خالص علشان عايزك فى تبقى معايا فى القضية دى... ساعة وتكون عندى فى المكتب...سلام"
                      *********************

فى مكتب مراد... يدخل ماجد
"مساء الخير يا باشا"
"مساء النور... تعالى اقعد"
"خير...ايه القضية"
"بنت ليل اتدبحت فى شقتها امبارح واكتشفوا الجثة النهاردة... طبعا الجريمة واضح انها هيكون فيها مشتبه فيهم كتير لتعدد علاقاتها... جارتها شافت القاتل... وعلشان نوصل له هندور فى اكتر من اتجاه ...اول حاجة فيه مكالمة جت وانا عايز اعرف مين ابن الكلب اللى اتصل ده واجيبه هنا واعرفه مقامه"
"اشمعنى ده بالذات"
"اهو ده بالذات وغيره طبعا لما تجيبلى بيان المكالمات كله ونفحصه"
"تمام فى اقرب وقت"
"عايزين كمان نِعرف اهلها ونشوف رد فعلهم ايه ... يمكن تكون جريمة شرف"
"ممكن نبعت اى عسكرى يستدعى اهلها"
"لا مش دلوقتى وبقولك عايز اشوف رد الفعل بنفسى"
"امتى سعادتك"
"بكرة ...انا م الصبح تعبان هروح انام واعدى على بيت اهلها الصبح... عايز بيان المكالمات يكون موجود على مكتبى اول ما اجى"
"علم وينفذ يا باشا"
                     *********************

فى صباح اليوم التالى... وليد فى عمله
اشترى جميع الجرائد الصباحية كاليوم السابق
ظل يقلب فيها... لم يجد اى خبر
فى الظهيرة ارسل الساعى يشترى الجرائد المسائية
بحث فيها وتوقع الا يجد شيئا
حتى رأى خبر صغير فى احدى الجرائد
"العثور على جثة فتاة ليل مذبوحة فى شقتها بمدينة نصر"
قرأ الخبر اكثر من مرة...
"تلقى قسم مدينة نصر بلاغا من حارس عقار احدى البنايات بالشك فى حدوث مكروه لساكنات احدى الشقق... على الفور انتقلت قوة من القسم لمكان البلاغ حيث تم العثور على جثة لفتاة تدعى س. ع مذبوحة ... وقد تم اخطار النيابة بالحادث وبالتحريات المبدئية تبين انها فتاة ليل ويجرى الان تحقيقات لكشف غموض الحادث"

هب وليد من مكانه فزعا... ترك عمله بدون استئذان
ظل يهيم على وجهه فى الشوارع وهو يفكر كيف يتصرف
يحاول ان يبدو طبيعيا فهو بالفعل برئ وليس له دخل بالقتل
ام يهرب قبل اتهامه بتهمة ليس له اى ذنب فيها
ام يستسلم لقضاء الله سواء تم اكتشاف القاتل الحقيقى او تم القبض عليه
                       *********************

مراد توقف بسيارته امام العنوان الموجود فى بطاقة ساندى
وجدها عمارة متهالكة فى منطقة شعبية
سأل احدى السيدات التى كانت خارجة من العمارة
"لو سمحتى"
"نعم؟"
"هو على سليمان ساكن هنا"
"قطيعة"
"ايه؟"
"عايزُه ف ايه؟"
"عايزة ف موضوع مهم لو سمحتى...هو فى العمارة هنا"
ردت وهى تنظر لمراد بتعجب
"ايوه... اول مرة حد نضيف يسأل عليه... اوضته فوق السطوح ...  فوتك بعافية"
تركته السيدة واكملت طريقها... صعد مراد السلم حتى توقف فى السطح
وجد غرفتين احدهما مغلقة والاخرى مفتوحة يلعب امامها بعض الاطفال
نادى مراد على اكبر الاطفال
"بسسس... هو على سليمان في انهى اوضة يا شاطر"
رد الطفل ذو العشر سنوات
"عم على فى الاوضة دى بس هو نزل من شوية"
"وبيرجع امتى"
"بالليل"
"اومال فين مراته وولاده"
"عم على عايش لوحده"
"طيب مفيش حد كبير هنا"
"ابويا ف الشغل وامى ف السوق"
انهى الطفل اجابته وذهب يكمل لعب مع اخوته
نزل مراد بهدوء دون ان يسأل عن على سليمان حتى لا يفصح عن شخصيته ... مقررا ان يعود مرة اخرى فى المساء
                   ************************

عاد مراد لمكتبه وجد غريب ومغاورى فى انتظاره
امرهم بالدخول معا... وبدأ فى استجوابهم
"فهمونى بقى واحدة واحدة كده ايه حكايتها"
غريب"انا حكيت لسعادتك امبارح كل اللى اعرفه من يوم ماقالى عليها مغاورى"
مراد"تعرفها منين يامغاورى؟"
مغاورى"كانت مأجرة شقة فى العمارة اللى بشتغل فيها"
مراد"من امتى"
مغاورى"قعدت يجيلها سنة ولا اكتر"
مراد"وسمعتها؟"
مغاورى"مكنش حد بيجيلها ولا حاجة ياباشا"
مراد"يعنى فجأة بقت كده؟؟"
مغاورى مترددا" لا مش فجأة ولا حاجة... بس يعنى "
مراد"بس ايه ...ماتحكى على طول"
مغاورى"كانت تبع جمال بيه"
مراد"جمال بيه مين؟"
مغاورى"جمال بيه العشرى... صاحب العمارة"
مراد وهو يردد المعلومة
"آآآه جمال العشرى رجل الاعمال....يبقى صاحب العمارة وكان مرافقها؟؟"
مغاورى منكس الرأس
"ايوه يا باشا"
مراد"وسابوا بعض ليه؟"
مغاورى"جمال بيه عنده مكتب فى العمارة وكان ساعات كده بيروح لها شقتها... اليوم اللى روحت لغريب ادور لها على شقة ده كان يوم ما مرات البيه عرفت"
مراد"عرفت ايه؟"
مغاورى"عرفت ان جوزها والست ساندى يعنى مع بعض... جت العمارة وطلعت على شقة الست ساندى على طول ومسكتها فرجت عليها الناس وبهدلتها ورمتها بره الشقة وهددتها لو قربت من جوزها تانى هتخفيها من على وش الارض ولما الست ساندى ردت عليها انها متقدرش تعمل لها حاجة قالت لها اى بلطجى بملاليم ممكن يشوهها وميخليش حد يبص لها وساعتها هى اللى هتستخبى من الناس وقالت لها لو مسمعتيش الكلام هتشوفى انى مش بقول كلام ع الفاضى"   
مراد"الكلام ده كان امتى؟"
مغاورى يفكر وهو يسأل غريب
"يوم ما جيت لك بيها كان من امتى"
غريب"3 شهور"
مراد لغريب "انت تعرف جمال العشرى"
غريب"اه اعرفه ما احنا بيننا وبين عمارته شارعين بس"
مراد"كان بيجيلها؟"
غريب"لا... محصلش"
مراد"متأكد؟؟"
غريب"انا مشفتوش خالص واكيد لو كان جه كنت هعرفه"
مراد"يمكن جه وانت مش موجود"
غريب"يعنى حتى لو مشفتوش طالع اشوفه نازل مثلا بس محصلش انى شفته خالص"
                         ********************

هاجر فى المكتب... تنظر للساعة بين اللحظة والاخرى
تعمل بذهن شارد... تركت الاوراق التى كانت ترتبها بطريقة تحسم بها تفكيرها...واتصلت بوليد
اول ما نطقت فور سماعها رده
"الو... انت فين يا وليد؟؟ مالك فى ايه؟؟ مش طبيعى وكل مرة اتصل بيك تقفل معايا فى الكلام...قلت هتيجى المكتب مجتش... يعنى كنت مستنية اليوم اللى بابا يسيبنى ارجع الشغل علشان نشوف بعض الاقيك انت اللى مش عايز تيجى... لا متتعبش نفسك وتيجى خليك براحتك... مش زعلانة ...مع السلامة"
انهت هاجر المكالمة وقلبها حزين من المعاملة الجافة التى يعاملها بها وليد والتى لا تعرف لها سببا
                     *********************

مراد فى مكتبه...يتحدث فى التليفون
"ايه ياحضرة الظابط... كل ده بستناك علشان تجيبلى بيان المكالمات؟؟ ما انا عارف انك كنت هتطلع اذن نيابة بس انا كنت عايزه النهاردة... ماشى يا ماجد بكرة الصبح يكون عندى... والتحريات اللى طلبتها منك على ابوها جبتها؟؟"
صوت ماجد يرد على سؤاله
"ايوه ياباشا... هو فى الاوضة دى من حوالى 8 ل 10 سنين  محدش يعرف حاجة عن حياته قبلهم... مدمن حقن وبيشتغل كل شوية ف حتة شكل وفيه ناس بتقول انه بيوزع علشان يعرف يجيب حق المخدرات بس مالوش اى سوابق قبل كده وعايش فى الاوضة دى لوحده ومحدش شاف له اى قرايب خالص ولا حد يعرف ان له بنت... حاليا بيشتغل فى قهوة بقاله فيها شهر ونص"
مراد"تمام اوى يا حضرة الظابط...شكرا على تحرياتك...مستنى بكرة بيان المكالمات"
ماجد"تحت امرك يا فندم...تؤمرنى بحاجة تانية؟"
مراد"لا شكرا...مع السلامة"
                     ***********************

مراد يصعد نفس العمارة التى جاء اليها صباحا
متجها مباشرة لغرفة على سليمان دون السؤال
وجده امام غرفته يجلس مع اخر يدخنون الشيشة
اقترب منهم مراد
"سلامو عليكو... ازيك ياعم على"
رد احد الرجال عليه
"وعليكم السلام... الحمدلله...افندم"
مراد"مقدم مراد حسنين من المباحث" 
امتقع وجه الرجلان وقاما واقفان...انسحب الرجل الاخر بهدوء وترك على فى مواجهه مراد
بادره على"الشيشة مفيهاش حاجة يا بيه ولو ع الشيشة ادغدغها"
وهم على ان يحطم الشيشة فعاجله مراد قائلا
"لالالا الموضوع مالوش علاقة بالمخدرات خالص"
بدأ على يلتقط انفاسه بعدما اطمئن قليلا...وسأل مراد
"خير؟؟"
"انا جاى ابلغك خبر وفاة بنتك...البقاء لله"
"بنتى!!!!!"
رد على بكل تعجب ودهشة... واكمل موضحا
"بنتى مين يا باشا... انا لاعمرى اتجوزت ولا خلفت"          

هناك 41 تعليقًا:

  1. جميلة اوي و مشوقة

    ردحذف
  2. تحفففففه يا دودو

    ردحذف
  3. :O :O لا اتجوز ولا خلف شكلنا هنتعب فى المسلسل ده انا عارفه

    ردحذف
  4. تحفه او9وى يا دينـــا :)

    ردحذف
  5. هى بتنزل كل كام يوم فى الاسبوع

    ردحذف
  6. الحلقة طويييييييييلة وجامدددددددددددددددة اوووووووووووووووي بدأنا نسخن اهوووووووو

    ردحذف
  7. جميله بس ممكن يكون هانى هو اللى قتل ساندى انا اتوقع كده

    ردحذف
  8. حــلــوه جــــدا الحـلــقــة انــهــارده :D

    ردحذف
  9. حلوه اوي تسلم ايديكي

    ردحذف
  10. جميللللللة جدا يا دينا ما شاء اللة عليكى
    شكلها هتبقى مليانة الغاز

    ردحذف
  11. حلوووووووووووووة اووووووووووووووووووووى بصراحة ننتظر اللى بعدها بكل شووووووووووق

    ردحذف
  12. مشوقة جدا

    ردحذف
  13. عم على ابو ساندى هو اللى قتلها يا دندنون

    ردحذف
  14. جميلة جدا

    ردحذف
  15. بس اية كمية الشخصيات الكتيرة اللى ظهرت فجأة دى كدة مش هنعرف نخمن القاتل

    ردحذف
  16. وبعديييييييييييييييييييييييييييييييييين بقى انا نفسى الروايه دى تنزل كلها مره واحده :] :] تسلم ايدك يا دودو

    ردحذف
  17. جاامده اووى :D

    esraa

    ردحذف
  18. حااااااااااااااااااااااامده ننتى ***يحيى***

    ردحذف
  19. رووووووعه في انتظار الحلقه 5

    ردحذف
  20. اية الجمااااااااااااال دة يا دينا

    ردحذف
  21. روعه بجد :)

    ردحذف
  22. تحفه جدااااااااااااااااااااااااااااااااااا

    ردحذف
  23. حلووووووووووووووووووووه

    ردحذف
  24. الحلقة حلوووووووة اووووووووووي وانا كنت حاسة انو امور هاجر وحبيبها ح تتلخبط بس يلا وادينا مستنيين

    ردحذف
  25. قصـــة جميـــــــلة ومشوقـــة وتوقعاتى فيها انهمــ هيقبضوا على وليــــد بتهم قتلها ومرات الراجل اللى اسمه مراد دة هتبقى هي اللى بعتت حد يقتلها لان ساندى على اعتقادى هى اللى كانت بتروحله مش هو اللى بيجيلها

    ردحذف
  26. حلوووة اوووى وموشوقه اوووى

    Esraa

    ردحذف
  27. الحلقة طويلة وجميلة ومشوقة..ربنا يخليك يارب

    ردحذف
  28. جميله ومع كثرة الشخصيات دى هتتحول للغز محير...من القاتل...

    ردحذف
  29. جمييييييييييييييييييييييييله جدااااااااااااااااا بس قصيره طوليها شويه يا دينااااا

    ردحذف
  30. الله عليكي :)

    ردحذف
  31. احييييه تحفى .. دينا بجد متتخيليش انا كان بقالى مده مش بفتح و لما فتحت جبت صفحتك و اول ماشفت انك نزلتى قصه جديده صووت :D و بقيت فرحانه جدا لدرجه كل اللى ف البيت ضحكوا ع هبلى .. اصل انا متابعه قديمه جدا انتى موهبه بجد

    ردحذف
  32. تحفه يا دودو جميله اووووووووووووووي بججد ... وهاتبقى مثيره واحداثها شيقه اوووووووووووووووووي .... :*

    ردحذف
  33. احساسى ان ف اخر القصة هيطلع والدها هو اللى قتلها زى قصة اهل كايرو

    ردحذف
  34. حاسه ان البطاقة اصلا مش بتاعتها

    ردحذف
  35. حلوه اووووووووووى

    ردحذف
  36. جامدة جداجدا جدا

    ردحذف

قول رأيك بلاش تقرا وتقفل من سكات...ارائكم تهمنى