الثلاثاء، 17 سبتمبر 2013

ليلة حمرا... الحلقة 6

الحلقة 6
وليد وهو عائد من عمله...وجد محل هانى مفتوحا
دخل... كان المكان خاليا تماما سوى من هانى
"وليد...ايه الاخبار"
"مفيش اى جديد ياهانى...هتجنن عايز اعرف ايه اللى حصل"
"انت مالك ياعم... الحمدلله فات 3 ايام اهو ومحدش جه جنبك"
"انا برضه مش عارف...يعنى لقوا القاتل ولا ايه اللى حصل"
"انت مالك...اكفى ع الخبر ماجور وكأنه محصلش وعيش حياتك طبيعى"
"مش عارف ارتاح...خايف...حاسس ان ف اى لحظة ممكن رجلى تيجى ف القضية دى"
"انت مش برئ؟!"
"برئ طبعا"
"خلاص ... فكك بقى"
"انا بفكر اروح هناك واطقس على الاخبار من بعيد"
صرخ فيه هانى
"انت حمار؟؟!!"
"ليه يعنى...هو انا هروح اقولهم انا كنت موجود انا قصدى اروح اسأل فى المنطقة من بعيد"
"تبقى اتجنيت رسمى... انت منتعرفش انهم بيقولوا المجرم بيرجع مكان جريمته تانى...لو روحت والست اللى شافتك دى شافتك تانى يبقى انت لبستها رسمى"
نظر له وليد ...وبتردد
"طيب ماتروح انت"
"نعم؟؟!! وانا مالى ياخويا...وليد...انسى الموضوع ده وخليك طبيعى...لو كانوا لسه ممسكوش القاتل كان زمانهم وصلوا لك"
"انت شايف كده"
"مفيش قدامك الا كده"
                         **********************

دخلت السيدة امينة المتولى زوجة جمال العشرى مكتب مراد
سيدة فى الاربعينيات انيقة جميلة تبدو من طبقة ثرية
بنظرة سريعة من مراد ادرك انها تبدو شخصية معتزة بنفسها حين قدمت نفسها باسمها الثلاثى ليدرك مراد انها بالفعل ابنة عائلة معروفة بأعمالها وشركاتها ومصانعها
"اتفضلى"
جلست وسألته بهدوء
"حضرتك طلبتنى ليه؟؟خير؟؟"
"للتحقيق فى قتل سناء سليمان الشهيرة بساندى"
"وانا ايه علاقتى"
"جوزك"
"لو هو على علاقة بيها اسألوه لوحده مش تسألونى انا"
"الكلام ده لو كنتى بره الشبهات"
"نعم!! شبهات ايه "
وضحكت بصوت هادئ ضحكة قصيرة ثم سألته
"انت متخيل انى ممكن اقتلها؟"
"مش ده كلامك؟"
"محصلش"
"عندنا شهود على تهديدك ليها من حوالى 3 شهور"
"ده كان كلام وخلاص"
"فيه سؤال بيلح عليا بعد ما شفتك"
"اتفضل اسأل"
"واحدة زيك فى مكانتك الاجتماعية وواضح انك تربية هاى كلاس ومثقفة ... تروح تعمل فضيحة لعشيقة جوزها زى لامؤاخذة يعنى الستات الجَهلة"
"مشاعر الست مفيهاش تربية هاى كلاس او لوو كلاس...مفيهاش فرق بين متعلمة وجاهلة...الزوجة هى الزوجة وخصوصا لو بتحب جوزها"
"طيب ليه محلتيش الحكاية بينكم وبين بعض"
"جربت وفشلت...وانا عارفة ان جمال بيخاف على سمعته وسمعت بناته فاضطريت انى اضغط عليه انه يسيبها"
"وسابها؟"
"لو كان سابها من ساعتها مكنش زماننا موجودين هنا"
"شكلك مش متفاجئة؟"
"متفاجئة او لأ معتقدش هتفرق معاك فى حاجة...انت جايبنى تحقق معايا فى جريمة ماليش علاقة بيها... لو عندك اى حاجة تديننى تقدر تقولى عليها واكلم المحامى بتاعى علشان يحضر معايا التحقيق"

لم يجد مراد ما يرد به عليها... ثقتها الزائدة بنفسها اثارت شكوكه اكثر...سألها مباشرة
"كنتى فين يوم الاحد ما بين الساعة 9 و11 بالليل"
"انا كل يوم بالليل فى النادى لحد الساعة 1... وطبعا عندى شهود بيشوفونى يوميا لو تحب تسأل"
ابتسم مراد ابتسامة مصطنعة
"مفيش داعى... تقدرى تتفضلى بس ياريت متسافريش اى مكان بره مصر من غير ابلاغنا"
ردت قبل ان تغادر
"اوك... بعد اذنك"
                          ******************

دخل ماجد مكتب مراد باللاب توب الخاص بساندى
مراد"ايه الاخبار"
"كلام كتير مع ناس كتير اغلبه بيبدأ بالرسايل وينتهى بانهم يكملوا بالصوت والصورة"
"يعنى مستفادتش منه حاجة"
"الاستفادة الوحيدة انى اتأكدت ان القضية دى هتهد حيلنا مع الناس الكتير اللى لازم يدخلوا دايرة الاشتباه"
هز مراد رأسه
"ده اكيد"
"اخبار التحقيق مع جمال العشرى ومراته ايه؟"
"جمال العشرى معندوش دافع ولا كان متواجد فى مصر...انما مراته بقى"
"هااا"
"مرتبة نفسها كويس اوى وبترد ع السؤال قبل ما اجاوبه ومحضرة حجة غياب"
"ماهو طبيعى انها مش هتقتل بايدها"
"بالظبط بس لو مسكنا القاتل واعترف بتحريضها هيبقى دليل اثبات عليها... علشان كده هنستدعى الست اللى شافت القاتل... عايزها من الصبح بدرى عندى"
"امرك يا باشا"
سمعا طرقات على الباب...اعقبها دخول عسكرى
"تقرير الطب الشرعى فى جريمة قتل مدينة نصر يا باشا"

تناوله مراد بلهفة...ما ان قرأه حتى وضعه امامه على المكتب
ماجد"فيه جديد؟"
مراد"لا.. سبب الوفاة جرح قطعى فى الرقبة بآلة حادة ومفيش اى اعتداء بدنى ولا جنسى"
ماجد"للدرجة دى محاولتش حتى تقاوم"
مراد"يمكن اللى قتلها خبرة...من ضربة واحدة خلص على طول"
ماجد"ده يخلينا نرجح احتمال مرات جمال العشرى...طيب وعلى اللى فى الحجز ده"
مراد"بالنسبة لعلى سواء ابوها او مش ابوها...بصماته وحجة غيابه تبعده عن الشبهات...بس لو ابوها يستلم الجثة ونخلص انما لو مطلعش ابوها يبقى بتتفتح لنا سكة جديدة وهى ليه على اسمه وعنوانه وفين اهلها الحقيقيين"
ماجد"هى قضية باينة من اولها"
                       *********************

طول اليوم ووليد يفكر فى كلام هانى... هانى مُحق فعلا
من الاكيد انه تم القبض على القاتل الحقيقى والا كان تم القبض على وليد ان وجد اى دليل ضده
فكر كثيرا حتى استراح لتلك النتيجة
شعر ان الايام الماضية كانت كابوس ثقيل صنعه خوفه ووهمه
خرج من حجرته...حلق ذقنه... انتقى ملابسه بعناية وذهب لهاجر
                     **********************

هاجر جالسة على مكتبها...المكتب خالى
وكعادتها اثناء خلو المكتب تضع سماعات الموبايل فى اذنيها وتستمع لبعض الاغانى
فوجئت بدخول وليد حليق الذقن ومهندم والابتسامة على شفتيه
تعجبت من تبدل حاله
اقترب منها وهو يصافحها
"وحشتينى"
"سبحان مغير الاحوال"
جلس قبالتها وهو يأخذ السماعات يضعها على اذنه من بعيد
"كنتى بتفكرى فيا وبتسمعى ايه"
"الراجل ده هيجننى"
ترك السماعات بعد ان سمع ماكانت تسمع
"انتى هتنصبى...محمد منير اللى بيغنى"
"ماهو انا لما شفت حالك المشقلب ده وفكرت فيك كان لازم اسمع الراجل ده هيجننى"
"هو زياد مش هنا ولا ايه؟"
"لا مش هنا...راح القسم"
"طيب ما تقومى نخرج شوية"
"مينفعش... فهمنى بس مشكلة شغلك اتحلت الحمدلله"
"الحمدلله"
"بسرعة كده...وبسرعة كده حالك اتبدل"
"انا كنت مكبر الموضوع وطلع بسيط...متفكرنيش بقى"
قالت وهى تضحك
"حمدالله ع السلااااااااامة ... وليد اللى اعرفه وحشنى والله"
                     *********************

فى صباح اليوم التالى...دخل ماجد لمراد مكتبه
"صباح الخير ياباشا"
"صباح النور"
"الشاهدة بره...وعندى خبر كده"
"خير؟"
"بصمات على سليمان مش متطابقة مع اى بصمات فى مسرح الجريمة وفعلا مسابش شغله يوم الحادثة"
صمت مراد يفكر وهو يفرك جبينه وكأنه يعتصر افكاره
ماجد منتظر تعليق من مراد على ما قاله
مراد"هات الشاهدة لما نقولها عايزين منها ايه بالظبط"
                      **********************
منيرة جالسة فى مكتب مراد
"معلش يامدام هنتعبك معانا شوية"
"خير؟"
"كنتى قلتى انك شفتك القاتل واحنا شاكين انه متأجر للقتل...علشان كده ماجد بيه هياخدك ويعرض عليكى صور المسجلين...معلش احنا ممكن نطول شوية وهنعرض عليكى صور كتير بس انتى كده بتساعدينا لتحقيق العدالة"
"تحت امركم...انا كده كده فاضية وان شاءالله نلاقيه"
ماجد"اتفضلى معايا"
                  ***********************

فى نهاية اليوم... مراد فى مكتبه وامامه عدة اوراق
يتصل بماجد ويستدعيه...بعد ساعة يأتيه ماجد
"مساء الخير يا باشا"
"مساءالنور...ايه الاخبار؟"
"الست قعدت طول اليوم تدور معايا وموصلناش لحاجة"
"خلصت كل اللى عندك"
"لا طبعا...قلتلها تيجى تانى بكرة"
"بص يا ماجد... انا قريت كل التحريات اللى عملتها على المتصلين بالقتيلة فى الفترة الاخيرة بس كلها تحريات مش كافية"
"يا مراد باشا التحريات مبدئية والوقت ضيق والناس كتير جدا"
"طيب انا عملت قوايم باسماء الناس اللى هنستدعيها ... فيه ناس متصلة بيها فى يوم الحادثة ودول مش كتير ...اه...عايز جارتها تكون موجودة برضه اثناء التحقيق ده يمكن تتعرف ع القاتل... قولى زهقتك؟؟ اكيد ضايقتك علشان قعدت وقت طويل ولسه هنجيبها تانى"
"بالعكس دى متعاونة جدا ومتحمسة...واضح انها عندها وقت فراغ كبير فمساعدتها لينا مفرحاها"
"جميل اوى...يالا من بكرة تبعت الاستدعاءات ويكونوا عندى بعد بكرة...حاول موضوع عرض صور المسجلين ده تخلص منه بكرة بأى طريقة عليها عايزها هنا"
قاطعهم صوت طرقات على الباب
دخل العسكرى مهرولا
"ألحق يا باشا...الراجل اللى اسمه على سليمان ده واقع فى الحجز قاطع النَفَس"
                         **********************

وليد وهاجر فى احد المطاعم...يتناولان الغداء
تبدو السعادة عليهما...تنظر هاجر فى ساعتها
"ايه بتبصى فى الساعة ليه؟"
"خايفة نتأخر"
"يابنتى انا مستأذن من باباكى وقلت له هنتغدا وارجعك على طول"
"ايوه بس هو قالى متأخرش وانا مش عايزة ازعلُه "
"مش هنتأخر... تصدقى باباكى طلع طيب غير ما كنت فاكر"
"بابا حنين وطيب وبيحب يفرحنى بس هو عنيد اوى وميحبش اللى ميسمعش كلامه او يعمل حاجة من وراه...ودى كانت المشكلة ان هو كان فاكر علشان بحبك يبقى كنت رايحة جاية معاك من وراه"
رد وليد وهو يتذكر حالته ويأسه فى تلك الفترة
"ايام ربنا ما يعيدها"

رن تليفون وليد... نظر فيه وجد اسم هانى...رد
"الو...ازيك ياهانى"
"وليد انت فين؟"
"انا مع خطيبتى ...خير"
"لو هى جنبك قوم علشان تعرف ترد عليا"
توجس وليد من نبرة قلق هانى... استأذن قليلا من هاجر وذهب لخارج المطعم
"ايه ياهانى.. فى ايه"
"انا شفت عسكرى طالع العمارة عندكم...الفار لعب ف عبى قمت طلعت للحاجة وعملت انى بسأل عليك وسألتها كان فيه عسكرى فى العمارة لمين...قالت ان جايلك استدعاء من المباحث"
ارتبك وليد واختنق صوته وبصعوبة رد على هانى
"يبقى ملقوش القاتل ياهانى... رِجلى جت خلاص"
"اجمد بس...انا قلت اقولك علشان تبقى عارف"
"والعمل...اتصرف ازاى"
"مش عارف يا وليد والله... روح واعمل نفسك متعرفش حاجة"
"ورقمى والست اللى شافتنى؟؟ انا كنت عارف انى لابسها لابسها"
"ياعم انت معملتش حاجة...طيب ما تقولهم الحقيقة وخلاص"
"ياسلاااااااام... انت مسمعتش عن التعذيب اللى بيحصل والاعترافات اللى بتكون تحت الضغط"
"هتعمل ايه طيب"
"مفيش الا انى اهرب...انا مش بتاع بهدلة "
"والهرب مش بهدلة... وهتهرب تروح فين"
"معنديش حل تانى ياهانى... هروح لاختى فى البلد"
"وامك...وخطيبتك هتقولهم ايه؟؟"

نظر وليد لداخل المطعم...وجد هاجر تنظر اليه عبر الزجاج بقلق
"هقولهم اى حاجة ياهانى... هخاف ارجع البيت يكونوا مستنيينى"
"طيب يا وليد... بقولك ايه هات تليفون تانى وخط وابقى كلمنى منه اقولك الاخبار...احتياطى برضه"
"ماشى... متقولش حاجة لحد"
"طبعا من غير ماتقول...سلام"
انهى وليد المكالمة... وعاد لهاجر

هاجر كانت تتابع ردود فعل وليد اثناء المكالمة
احتارت فى ردود افعاله الغريبة وارتباكه
عندما عاد اليها
"لو خلصتى يالا بينا"
"فى ايه.. ايه المكالمة دى اللى قلبتك كده"
"اختى عايزانى فى مشكلة ياهاجر ولازم اسافر لها حالا"
"اختك!! انت مش قلت هانى "
"ايوه هانى اللى كلمنى اصل اختى كلمتنى على تليفون السايبر"
"ليه مش على تليفون البيت ولا الموبايل"
"علشان مش عايزة ماما تعرف...بطلى اسئلة بقى ياهاجر انا مش ناقص"
"مالها اختك طيب"
"لما اروح لها هعرف... واوعى تقولى لماما حاجة"
"انت مش طبيعى يا وليد ...بتلاوعنى"
رد عليها بعصبية
"مش وقته ياهاجر.... هتقومى ولا اسيبك وامشى"


هناك 32 تعليقًا:

  1. فظيييييييييييييييييييعة وحاسة ان وليد هيتورط اوووى :(

    ردحذف
  2. جمممممممميله

    ردحذف
  3. جامده موووت
    الله عليكى والنبى ماتتاخريش علينا ف الحلقه الجديده

    ردحذف
  4. التشويق ده فظييييييييييييييع ..ماترجعى كل يوم بقى يادينا

    ردحذف
  5. وليد بغبائه ده هيضيع الدنيا >.<
    يا استاذه دينا انا داخله على مدارس ينفع يعنى البهدله اللى حضرتك بتعمليها فينا ديه :'(
    متتأخريش علينا ارجوكى فى الحلقه الجديده

    ردحذف
  6. حلقه جميله ودايرة الشبهات عماله توسع .. رايحه بينا علي فين يا دينا .. تسلم ايديكي

    ردحذف
  7. حلقة جميلة اوى .القصة بجد مشوقة وعايز اعرف مين القاتل ...وبعد اذنك حابة اعرف القصة كام حلقة وياريت لو تردى عليا عشان هموت واعرف ...وفعلا انتى مبدعة ومتألقة كعادتك ..ربنا يوفقك وان شاء الله من نجاح لنجاح احسن

    ردحذف
  8. تسلم ايدك يا دودو وكالعاده مستنين الحقه الجايه ان شاء

    ردحذف
  9. الحلقه جميله اوي وفيها تشويق جامد اوي

    ردحذف
  10. الحلقة حلوة اووووى بس ياريت بسرعة يا جينا انا داخلة ع مدارس

    ردحذف
  11. جميله اوى تسلمى انا قريت كل قصصك ودلوقتى قاعده زقهانه ممكن تنزلى حلقه كل يوم على الاقل شكرا ليكى كتيييييييييييير

    ردحذف
  12. حلووووووووووووووة اووووووووووووى تسلم ايديكى

    ردحذف
  13. حلووووووه اوى يا دينا بس بجد ليد ده غبى اوى هو ماشى فالاول خاف يبلغ لكن دلوقتى عادى يرووح ويسالوه يقول انه فعلا راح وخبط ومحدش فتحله ف نزل وكده كده مفيش اثبات لانه مدخلش جوه ف مفيش بصمات :) :) هرووبه هيثبت التهمه عليه غبى بجد

    ردحذف
  14. حلوووة اوووى انا خايفة اوووى واكتر واحدة صعبانة عليا هاجر

    مى

    ردحذف
  15. حلووة اووى مش بعيد يكون هانى هو القاتل
    اتعودنا منك يا استاذة على المفاجات

    ردحذف
  16. حلوووووووووووووووووة ربنا يسترررررررررررررررر

    ردحذف
  17. استمرى يا دودو شوقتينا رغم ان هروبه غلط جداً طبعاً

    ردحذف
  18. يا دينا الصفحة بتنشر قصصك يا قمر تحت سقف واحد
    https://www.facebook.com/photo.php?fbid=573460299356200&set=a.170305739671660.27911.169585513077016&type=3&src=https%3A%2F%2Ffbcdn-sphotos-f-a.akamaihd.net%2Fhphotos-ak-prn1%2F946730_573460299356200_1109019649_n.jpg&size=525%2C720


    واللينك ده كمان

    https://www.facebook.com/photo.php?fbid=573017576067139&set=a.170305739671660.27911.169585513077016&type=3&src=https%3A%2F%2Ffbcdn-sphotos-e-a.akamaihd.net%2Fhphotos-ak-prn2%2F1239658_573017576067139_1556917445_n.jpg&size=525%2C720



    وده ليك الصفحة
    https://www.facebook.com/mona.maloka

    ردحذف
  19. دي بت باردة اوى ولكاكة واسئلتها كتير ومستفزة ايه ده

    ردحذف
  20. >_____< ezzay waled y3ml kda da montaha el 3'aba2 asln 3shan el mfrod yro7 el 2esm 3adi gdn w y7ki kol 7aga howa bare2 leh hyehrb kda bysbt el tohma 3leh aktr :@ 3ssbtoniiiiiiiii

    ردحذف
  21. مشوقــــــــــــــــــــــــة جدا الحلقـــــــــة بس ياريت تزودى حلقات عشان المدارس يادينــا

    ردحذف
  22. مش عارف ليه شاكك فالوليه جارتها دي :/

    ردحذف
  23. انا معلقتش من بداية القصة بس لحد دلوقتي روعة ومشدودة اعرف مين القاتل ..

    ردحذف
  24. جدا روعه

    ردحذف
  25. جميييييييييله اوى

    ردحذف
  26. مشوقة وممتعة أتوقع إن القاتل يطلع رجل اﻷعمال -مش فاكر اسمه-علىطريقة سوزان تميم
    محمد المصري

    ردحذف
  27. يعنى يبقى صاحبه محامى وما يفكرش يستشيره فى اى حاجة خالص

    ردحذف

قول رأيك بلاش تقرا وتقفل من سكات...ارائكم تهمنى