الأحد، 22 يونيو 2014

ابغض الحلال - الجزء الثانى - الحلقة 18

الحلقة 18

عاد رامى من عمله... تناول الغداء ثم أخذ صبرى وذهب لوالدته
شعرت نوال بالحرية... ذهبت للكمبيوتر وجلست امامه منتظرة عودة هيثم وظهوره

تأخر... اشتاقت إليه... فمنذ اخر مرة تكلما فيها لم تتواصل معه ولو لدقيقة... الايام الماضية لم يكن لديها وقت لتتحدث معه...فلم تشعر بهذا الفراغ والشوق الذى يكويها مثل الآن

انتظرت كثيرا... حتى بدأت تقلق على عدم ظهوره
ولكن خطر على بالها ان تفتح الاكونت الاساسى وتطمئن متى اخر مرة تواجد به
فوجئت به... بوستات رومانسية طول الايام الماضية... كلمات الحب والهيام بينه وبين خطيبته
مازالت تُكتب... تتابع ما يكتب لحظة بلحظة... تسيل الدموع بغزارة على وجنتيها... تغلق الكمبيوتر حتى لا ترى ما يكتبانه
دقائق... تعود وتفتحه مرة اخرى... مازال شلال الحب متدفقا بينهما
ترسل له رسالة
"هيثم"
تنتظر... يظهر لها اسفل رسالتها seen
تنتظر رد... تنتظر وتنتظر ... تعاود ارسال رسالتها
"هيثم... انت هنا؟"
مرة اخرى... يراها ولا يرد

تحترق نوال غيرة... تتألم... تشتعل... تركض بحثا عن الورقة التى مازالت تحتفظ بها
تفتحها... تمسك هاتفها... تتصل بهيثم
تسمع صوته "الو"
تتردد قليلا...فيعيد "الوو"
ردت محاولة ان تسيطر على خفقان قلبها
"الو... هيثم"
"مين معايا؟"
"انا...نوال"
ساد الصمت بينهما لحظات...كلمات كثيرة ارادت نوال ان تقولها ولكنها لم تخرج على لسانها... قطع هيثم الصمت
"لسه فاكرة يا نوال"
"ما انا بكلمك مش بترد عليا... ولما انت بتحب خطيبتك كده وعمال تحب فيها بقالك ساعة... كنت بتقولى انك بتحبنى ليه"
"يعنى حسيتى؟"
"قصدك ايه؟"
"قصدى انك سايبانى احتياطى فى حياتك... وقت فراغك بس اللى بتتكلمى معايا فيه انما لو جوزك عندك بتنسينى خالص"
"انت عايزنى اتكلم قدامه يعنى"
"لا...بس مش حاسس انك بتحبينى زى ما بحبك"
"بحبك يا هيثم... بحبك انت ومش طايقاه بس هعمل ايه"
"يا نوال انتى وحشانى... نفسى اشوفك واقعد اتكلم معاكى...كلام التليفون ده مش هينفع"
"مقدرش ...اخاف يا هيثم"
"من ايه؟"
"من ايه ازاى... انت مش عارف انى متجوزة واى حد ممكن يشوفنى تبقى فضيحة"
"طيب والحل"
"مش عارفة... واوعى تكلمنى فى التليفون يا هيثم ربنا يخليك انا مش عايزة مشاكل"
"خايفة منه؟"
"ايوه خايفة... عارف خايفة ليه... لانى عارفة ان اللى بعمله غلط"
"الحب مش غلط... الحب مش بايدينا"
"انت مش عارف انا بتعذب ازاى...عايشة مع راجل وبحب راجل تانى"
"طيب يا نوال... انا مش عايز احس انى بخليكى تعملى حاجة غصب عنك... لو عايزة منتكلمش تانى مش هنتكلم"
"ياريت اقدر"

                        *******************

دخل بلال المنزل فى المساء... وجد مديحة جالسة تشاهد التليفزيون
لم تتحرك ... جلس بجوارها... اخذ الريموت وبدأ البحث فى القنوات
تأففت مديحة ولم تتكلم... فأعطاها الريموت
"لو عايزة تتفرجى على حاجة ...براحتك"
ردت باستياء
"مش تستأذن قبل ما تقلب"
اقترب منها اكثر
"بصراحة بناغشك"
نظرت له"شكلك جاى مبسوط... يا ترى مضوك على ايه المرة دى؟"
رد مازحا"وانا حيلتى ايه تانى"
"لا وانت الصادق... مش بس اللى حيلتك... ده اللى لسه مش فى ايدك كمان"
ابتعد قليلا ونكس رأسه وتكلم بنبرة حزينة
"يعنى هى دى الاجازة اللى قربت تخلص... زعلانة وبتدينى فى كلام كل يوم... ده انا فاضل اسبوع ومسافر"
"يا ابنى... يا حبيبى... انت فين عقلك... هو كل حاجة تتقالك تعملها"
"ماما... مينفعش انى اقولهم لآ علشان ميفتكروش انى طمعان فيهم"
"وانت هتطمع فيهم ليه... ده انت جايب لها شئ وشويات"
"مامااا.. انتى مشفتيش مستوى مرتات اخواتها ولا بنات اعمامها"
"هى يعنى مفهماك كده... تقولك دى ودى وانت بتصدق"
"من غير ما هى بتقول... دول تجار مواشى وعندهم اراضى... يا ستى ده العجل الواحد يعمله ييجى 20 الف جنيه ودول عندهم مزارع بحالها...جاية تقوليلى يضحكوا عليا فى حاجات بالنسبة لهم ولا حاجة"
"الست تعيش على قد جوزها... هما مش عارفين ظروفك"
"عارفين والناس مقالوش حاجة... هقول انا بقى لأ على حاجات بسيطة"
"انا مش فاهمة انت بتدافع عنهم كده ليه... يا ابنى ده انت كسفت خالك وبنته... خالك اللى اخدت بنته مجبتلهاش طقم تلبسه انما الهانم بتجيبلها بالشنط المقفولة شايلها على قلبك من اخر الدنيا"
"الحب يا ماما... انا بحب ليلى"
"نيلة عليك وعلى الحب ... على ايه بس يا ابنى دى نسمة احسن منها 1000 مرة"
نهض بلال غاضبا
"مش معقول بقى كده يا ماما... هتفضلى كارهة مراتى علشان بتحبى بنت اخوكى اكتر منها... براحتك انا مش هتحايل عليكى تحبيها"

ظلت مديحة جالسة مكانها...تصارع قلبها الذى يريد ان يحنو على بلال فى الايام القليلة المتبقية... لم يدم الصراع طويلا فنهضت خلفه
دخلت غرفته وجدته جالسا وظهره للباب
جلست بجوراه"والله من خوفى عليك بقول كده"
"خوف من ايه يا ماما... القايمة والمؤخر دى اللى يخاف منهم اللى ناوى يغدر...انما انا بادئ حياتى معاها بنية كويسة"
"طيب يا بلال... ربنا يكتبلك يا ابنى اللى فيه الخير"
قبل يدها فاحتضنته...سألته
"اعملك تتعشا"
"لا شبعان... انا متغدى متأخر وأكلونى أكل اسبوع قدام...هنام شوية"
"طيب انا هنزل اقعد مع خالك شوية"
                         *****************

فتحت نسمة الباب...دخلت مسرعة وهى تصيح
"بابااااااااااااااااااااااا"
رد سمير من غرفته وهى يأتى مهرولا
"مالك يا نسمة... فى ايه؟"
ركضت تعانقه... وهى تصرخ
"الرد وصل يابابا ... خلاص اتقبلت الحمدلله ودكتور حسين قالى ابدأ فى اجراءات السفر"
وافق سمير على سفر نسمة من قبل عن طيب خاطر... ولكن الآن وقد اقترب السفر.. وبدأ الكلام يدخل حيز التنفيذ
خاف... خاف على ابنته الصغيرة من مجهول ستذهب إليه وحدها... خاف من أناس تختلف طبائعهم عنها... خاف من وحدته بدونها
خفتت فرحة نسمة تدريجيا... سألته
"مالك يا بابا؟؟"
انتبه انه لم يهنأها
"مبروك يا نسمة... انا سرحت بس انك هتسافرى وتسيبينى"
"دول 6 شهور بس ...يهونوا بسرعة ان شاءالله"
"ان شاءالله... هو السفر امتى؟"
"الدراسة تبدأ 1\ 10 وانا لازم اكون هناك قبلها طبعا"
"والسكن... هنعمل ايه ؟؟ مش هينفع تروحى من غير ماتكونى عارفة هتنزلى فين"
"دكتور حسين بيطمنى ...قال ان فيه سكن للطلبة والطالبات وممكن احجز من وانا هنا عادى"
"هو هيسافر امتى؟؟ وهيدرسلك؟"
"هيسافر قبل الدراسة برضه...لا مش هيدرسلى انا بس هيدرس فى نفس الجامعة"
"طيب قوليله انى عايز اقابله اطمن منه على التفاصيل دى واعرف السكن هتكونى مع حد ولا لوحدك...وامان ولا لأ؟"
"متقلقش يا بابا ...ما انا بقولك بيطمنى"
"لا...انا لازم اقابله علشان كمان اوصيه عليكى واقوله يخلى باله منك"
"ماشى...اللى يريحك...روحت مع عمتو النهاردة؟"
"اه...وصلناه ورجعنا ...مسكت فيها تقعد معايا لحد ما تيجى مرضيتش"
"هحضر الغدا واتصل بيها تنزل تتغدا معانا"

                   *********************

استيقظ يحيي من النوم قبل المغرب بقليل... نادى
"نااااادية"
لم يتلق رد... نهض متثاقلا يبحث عنها وهو ينادى
"فريييييدة"
وجد اضواء المنزل جميعها مطفأة...عاد لغرفته قلقا... واتصل بنادية... بمجرد سماعه صوتها
"نادية انتى فين؟"
"فى الشارع"
"شارع فين... نزلتى امتى ورايحة فين؟"
"بتزعق ليه... اتكلم بالراحة وهرد عليك"
"فريدة كويسة؟"
"ايوه يا يحيي...مالك قلقان كده ليه؟"
"صحيت ملقيتكوش ومش معاد نزول يعنى... عايزانى مقلقش"
"اطمن... فريدة عند ماما وانا رايحة درس"
"درس!! درس ايه انتى بدأتى دروس؟"
"لا.. ده درس خصوصى لبنت عندها ملحق"
"ومقلتليش ليه... ومصحتينيش ليه قبل ما تنزلى"
"اقولك!! من امتى بقولك على تفاصيل شغلى... انا صحيتك قبل ما انزل بس انت كنت غرقان فى النوم فصعبت عليا... حاجة تانى يا سى السيد"
"انتى غلطانة وبتقلبيها عليا يا نادية... بتحطينى قدام الامر الواقع"
"امر واقع ايه"
"انتى مش بطلتى الدروس...رجعتى لها تانى ليه"
"مبطلتش...انا وقفتها السنة اللى فاتت علشان فريدة كانت صغيرة..دلوقتى كبرت واتعودت على ماما وهنزل دروس"
"مفيش دروس يا نادية... انا مش عايز بنتى تتبهدل"
"مفيش ده ايه هو اى كلام وخلاص... انت ملكش دعوة بشغلى...وكفاية بقى بقولك فى الشارع...سلام"
اغلقت نادية الهاتف قبل ان يرد عليها يحيي... ثار يحيي وشعر بالدم يغلى فى عروقه...اراد ان يعيد الاتصال بها مرة اخرى ولكن رنين الهاتف قاطعه...فرد بعصبية
"ايوه"
"ازيك يا يحيي"
حاول ان يهدئ من لهجته...فجاءت مقتضبة
"الحمدلله يا عبير... عاملة ايه؟"
"انا كويسة... انت اللى مالك زي ما تكون بترد وانت بتزعق"
"مفيش متنرفز شوية بس"
"حاجة فى الشغل؟"
"لا ابدا...الشغل تمام"
"مشكلة فى البيت؟"
"يعنى؟"
"روق كده واحكيلى... ولا اقولك لو مش هتعرف تحكى وانت فى البيت انا رايحة المكتب دلوقتى...نتقابل هناك؟"
"ماشى...هلبس واجى"
"مستنياك"

                        *****************

وقفت نوال أمام المرآة... تضع اللمسات الاخيرة من زينتها
ابتسمت راضية عن شكلها...ثم اتصلت برامى
"ايوه يارامى انت فين؟"
"انا عند ماما...فيه حاجة؟"
"لا بسأل عادى...صبرى كويس"
"اه الحمدلله"
"طيب لو عايزنى ف حاجة ابقى كلمنى على الموبايل...انا نازلة رايحة لماما شوية وهرجع قبلكم"
"طيب ماشى"

اغلقت نوال مع رامى...ثم اتصلت بهيثم
"الو... انا نازلة اهو... فين؟ مش ده قريب من شغلك؟... طيب هاخد تاكسى واجى مسافة السكة".

توقفت نوال بالتاكسى فى شارع هادئ...اتفق معها هيثم ان تنتظر فيه.. ظقفت تتلفت يمينا ويسارا...حتى شعرت بسيارة تقترب منها
خافت... ابتعدت خطوات دون ان تنظر لقائد السيارة
اسرعت فى خطواتها...سبقتها السيارة وتوقفت فجأة بجوارها
"نوااااال"
التفتت لقائد السيارة وجدته هيثم... يقود سيارة تاكسى
"اركبى"
ركبت نوال بجواره...سألته
"ايه ده؟؟ انت جبت التاكسى ده منين؟"
"اخدته من واحد صاحبى ...علشان اطمنك ان لو حد شافك كأنك راكبة تاكسى عادى"
اختلس لها نظرة سريعة وهو ينظر للطريق امامه
"وحشتينى"
ابتسمت بسعادة... اخذ يدها قربها من شفتيه... جذبتها سريها قبل ان يقبلها ... وقلبها يخفق بشدة
بعد قليل...استطاعت ان تلتقط انفاسها...سألته
"احنا رايحين فين كده"
"هنروح مكان بعيد تبقى مطمنة ان محدش هيشوفك فيه"

هناك 46 تعليقًا:

  1. لا نوااااااااال زودتها اوووى بصراحه انتى مبدعه جدااا

    ردحذف
  2. حلو اوى يادينا والاحداث بدأت تسخن

    ردحذف
  3. حلوة اوي يا دندن تسلم ايديك انا متابعة ليكي من زمان
    اوي بس كنت من الصامتين
    ويا ريت نوال ما تخونش جوزها مع اني ما بطيقهوش بس برضو جوزها

    ردحذف
  4. نوال زودتها ونادبة كمان
    بس الحلقة حلوووة جدا

    ردحذف
  5. تجنن الحلقه بس نوال هتندم وعبير شكلها ناويه على شر
    رائعه كالعادة شوقتيني للحلقه الجايه

    ردحذف
  6. ليه كده يانوال بس الحلقه حلووه اوى

    ردحذف
  7. ناديااااااااااااه لاااااااا غلط كده :D هتضيع يحيى من اديها
    وكمان نوال مجنونه اوي المهم بلال هيرجع لنسمه امتى طيب :D

    ردحذف
  8. حلوة اوى يادنوون الحلقة وعلى فكرة انا قرأت قصصك كلها واول رد ليا فى الحلقة دى وان شاء الله هتلاقينى متفاعلة معاااكى
    بس ممكن سؤال هى ابغض الحلال الجزء التانى كم حلقة ياعنى اخرها كاام؟؟
    وشكرا يادندوون

    ردحذف
  9. حلوة اوى

    ردحذف
  10. المره دى احداثها دراميه شويتين زياده و نوال عايشه فى دور المراهقه دى حتى مفكرتش فى ابنها

    ردحذف
  11. جميلة اوي بس احداثها صعبة يعني نوال ونادية في يوم واحد كل واحدة ناوية تخرب بيتها بايدها

    ردحذف
  12. جميييييييلة جدا الحلقة بس ربنا يستر على نوال ويستر ع يحيى

    ردحذف
  13. بنات سمير ماحدش نافع فيهم غير نسمة والله اه غلطت بس فاقت وبقت عايشة صح لكن التانيين هيخربو حياتهم

    (gigi)

    ردحذف
  14. ع فكره نوال دي اخرتها سوووووووووووووده

    ردحذف
  15. بس القصه حلوووووووووووووووووووووووووووووووووووووووووووه

    ردحذف
  16. لالالالالالالالا يا نوال لالالالالالالالالا هيثم دة صايع صايع صايع وهيصورها وتبقي أيامها سودة

    ردحذف
  17. ليلي شكلها فقران و بتضحك علي بلال فعلا و بيتمنظروا قدامه بس و في الاخر شكله هايتورط توريطه سووووده

    ردحذف
  18. شكل هيبقى في مشاكل جااامدة بين يحيى و نادية و اتوقع يطلقوا و يتجوز عبير و نوال تخون رامي مع هيثم و يشوفهم و يطلقها و بعدها يطلع هيثم كداب و كان بيضحك عليها و بلال ليلى تسيبه بعد ما تخليه ع الحديدة و يرجع لنسمه و سمير و سعاد يرجعوا لبعض >> توقعاتي للحلقات القادمة ..
    تسلم اناملك يا دينا الحلقة رائعة و اتمنى رسالتك من المسلسل تخلينها بشكل اوضح في الحلقات القادمة

    ردحذف
    الردود
    1. سمير و سعاد مش هيرجعوا عشان اتطلقوا 3 مرات خلاص

      حذف
    2. هما اه اتطلقو 3 مرات بس هيا اتجوزت واحد تاني يعني شرعا كده خلاص ينفع يرجعو لبعض

      حذف
  19. قصصك كلها جميلة وانتى مبدعة انا متابعة جدا لقصصك. .. بس والنبى خلى نوال ترجع فاللى هى بتعمله قبل ماحد يعرف حاجة ومتنجرفش فيه ومتتفضحش. .

    ردحذف
  20. بجد جامده جدااااااا تسلم ايدك

    ردحذف
  21. جامدة جدااااااااااااااا بس مفيش بقى حلقات زيادة مفاجئة

    ردحذف
  22. الحلقة جميلة

    ردحذف
  23. حلوووووة اووووووي بس نوال لازم يحصلها حاجه عشان تتعلم انها بتعمل حاجه غلط ورامي يبقي كويس معاها عشان تحس بالذنب

    ردحذف
  24. ما هو نوال دي يا إما هبلة يا بتستهبل ايه اللي بتعمليه ده ربنا يهديكي اما سي بلال بقي شكله هياخد قلم ولا كف المخبرين هيخليه يلف حوالين نفسه

    ردحذف
  25. أزال المؤلف هذا التعليق.

    ردحذف
  26. ما هو نوال دي يا إما هبلة يا بتستهبل ايه اللي بتعمليه ده ربنا يهديكي اما سي بلال بقي شكله هياخد قلم ولا كف المخبرين هيخليه يلف حوالين نفسه

    ردحذف
  27. أخطأت نوال ونادية فى افعالهم

    ردحذف
  28. الحلقة حلوة اووووى
    الحلقة ال 19 هتنزل امتى ؟؟

    ردحذف
  29. نواااااااااااااااااال بتستعبط ولازم حد يفوق ليها بقـــى
    وعلى فكره اخرتها هتقع على جدور رقبتها تتقطم ان شاء الله

    ردحذف
  30. الله حلوه أوي بس كده هيبقي في مشاكل بين نادية ويحيي دي مش طريقه تكلم بيها جوزها أبداَ ونوال هتوقع نفسها في مشاكل كبيره اوي اوي .... تسلم ايدك يادينا

    ردحذف
  31. حلقه تجنن و مبدعه كعادتك :D

    ردحذف
  32. حلقه روعه وعلى فكره اعتقد ان نسمه هتحب بلال تانى وبلال هيحب نسمه بس هيكابر انما نوال مينفعشى الى هى بتعملوه دا وكمان مينفعشى الى رامى بيعملوه دا هو ماشى ورا مامته بطريقه غريبه وزياده اوى وكمان عبير دى انا مش مرتاحلها ابدا وهتفضل ورا يحى لحد ما تخرب عليه وناديه بتخرب على نفسها باديها

    ردحذف
  33. لاااااااا انا كنت بقرائها مجمعه عشان مش عارفه المواعيد وعشان انا فضوليه جدا واتصدمت اوي لما لقيت ان دي اخر حلقه نزلت اهئ اهئ اهاااااا بجد حراااام انا مش قادره استنی بس الواد هيثم ده قذر شكله ونوال غبيه ومش بتفكر صح وهتفضل غبيه لحد ماتودي نفسها ف 60داهيه بغبائها ده ويارب بلال الكلب ده تحصله اي مصيبه تخده وهو ليلی حيوانه بس وباقية الاشخاص عجبني وبدعي ليهم تتظبط حياتهم ويحي ده عسل انه مستحكل عصبية ناديه بس البنت العصبيه مافيش اطيب مانها اصل انا عصبيه :))))))))))

    ردحذف
  34. الحلقة حلوة اىىىى هو بسراحة مش الحلقة بس ديه القصه كلها حلوة من الجزء الاول للجزء التانى

    ردحذف
  35. حلوه جدا

    ردحذف
  36. جميله اووووووووووى بس نفسى تنزلى روايه الدائره علشان انانفسى اقرائها بس انا فى اسكندريه ومش عارفه اجيبها ياريت تنزليها

    ردحذف
  37. ليه بقى رجعت ناديه ويحيى يتخانقوا تانى

    ردحذف
  38. هي الحلقه الجديده هتنزل السنه الجايه ولا ايه...........................اتاخرت اووووووووووووووووووي

    ردحذف
  39. الحلقة الجديدة فيييييييين؟؟؟ كده اتأخرت اووووووي ع فكرة بقى😣

    ردحذف
  40. ياربي كل دا عشان الحلقه19نزليها بقي كفايه كده ع فكره وانتي مبدعه ع فكره بس ماتوتريناش

    ردحذف
  41. فين ال19 اتأخرتي اووي علينا

    ردحذف
  42. انا اول مرة اقول كومنت بس انا مبهور جدا يا دينا مش مصدق موهبة بالشكل ده انا ببقي فخور جدا ان عندنا مواهب
    وهنفضل طول عمرنا بيكم احسن

    ردحذف
  43. انا لو ولد كمت شتمت شتيمة وحشة :D حسبى الله ونعم الوكيل فيها وفيه تلاقيه التاكسى دوت بتاعه اصلا اساسا والحال ادهور بيه دول عالم زباله يا سعيد :D

    ردحذف

قول رأيك بلاش تقرا وتقفل من سكات...ارائكم تهمنى