الأحد، 6 يوليو، 2014

ابغض الحلال - الجزء الثانى - الحلقة 24

الحلقة 24

توقفت نوال بالتاكسى عندما رأت هيثم يمشى فى اتجاه مكان لقائهما
نادت عليه... صافحها ولم يترك يدها... ومشيا فى الشارع الهادئ الذى يقع الكافيه فى آخره

كانا يمشيان واياديهما متشابكة... ونظرات الحب والهمس بينهما

فى نفس الوقت الذى يمشى فيه سمير فى نفس الشارع من الجانب الاخر باحثا على الجانبين عن محل السباك

توقف سمير فجأة... كاد قلبه ان يتوقف مع توقف قدميه
"نواااااال!!!!"
انتفضت نوال مع سماعها صوت سمير وتركت يد هيثم بسرعة وعينيها جاحظة من المفاجئة والدهشة والرعب والفزع
وصوتها يختنق فى حلقها...فخرج محشرجا
"بابا!!!"   
وقف هيثم غير قادر على النطق ولا التبرير ولا الهروب

حاول سمير ان يسأل نوال لعله يجد مبررا غير الحقيقة...لكنه لم يسأل فالموقف واضح ولا يحتاج لتفسير
اما نوال...فحاولت ان تبرر فلم تجد سوى كلمة
"بابا... انا... اصل... بابا... "
كلمات مكررة غير مفهومة....وصمت تام من هيثم
الموقف كله لم يتجاوز لحظات قليلة...حسمها سمير وهو ينظر لهيثم باحتقار ويأمر نوال
"تعالى معايا"
مشى سمير... وخلفه نوال تجر اذيال خيبتها...لم تلتفت لهيثم الذى سار عكس الاتجاه

وجد سمير محل السباك... تكلم معه وكأن شيئا لم يكن

اوقف تاكسى... ركب بجوار نوال فى الخلف والسباك بجوار السائق

وصل سمير منزله... تلكأ خطوات...همس فى اذن نوال قبل ان يرن جرس الباب
"مفيش كلمة تتقال قدام عمتك"
"بابا... انا"
"مسمعش صوتك خالص دلوقتى... هتقولى انك جاية زيارة عادى واتقابلنا صدفة"
                          ******************

بعد انصراف السباك ...وبعده مديحة
كانت نوال جالسة مكانها لم تتحرك ولم تتكلم
وقف سمير قدامها
"رامى وصبرى فين؟"
ردت بفزع
"رامى؟؟؟ ليه؟؟"
"جاوبينى"
"عند مامته"
"اتصلى بيه قوليله انى تعبان وانتى هتباتى معايا النهاردة... خليه يبات هو وصبرى عند مامته...خلصى وهاتى تليفونك"
نفذت الأمر... واعطت الهاتف لسمير
أخذ الهاتف منها...أغلقه...واغلق باب الشقة بالمفتاح ودخل غرفته اغلقها عليه دون ان يتحدث معها

ظلت جالسة تفكر ...كيف ستبرر فعلتها... كيف ستواجه رامى ان اخبره سمير بما حدث... هل سيتحمل سمير ماحدث... لماذا لم يواجهها...يشتمها...يضربها...لماذا لم يبدِ اى رد فعل؟

دخلت غرفة نومها السابقة... بدلت ملابسها وجلست تفكر
لم تنم طيلة الليل...تفكر لماذا يتعامل معها سمير بهذه الطريقة التى تحطم اعصابها...فوقوع البلاء افضل من انتظاره
وها هى تنتظر المجهول

اما سمير فظل يفكر طوال الليل ..كيف سيعالج الامر... كيف سيعالج ماحدث... غصة كبيرة شعر بها... قهر لا يتحمله.

نهضت نوال فى موعد استيقاظ سمير الذى لم يتغير لسنوات
أعدت الافطار لعلها تستدر عطفه..ولكن مازالت غرفته مغلقة
انتظرت وانتظرت... ولم يخرج
قلقت...وقفت على باب الغرفة... طرقته بهدوء
"بابا... هتتأخر على الشغل"
لم تتلق رد... فكررت بصوت أعلى
"بابا... يابابا"
لم يرد...قلقت... خافت... طرقت طرقات عنيفة وهى تصرخ وتحاول ان تفتح الباب المغلق من الداخل

"بابااااااا... بابااااا"

                           ******************

انتهت نادية من ارتداء ملابسها بعد ما انتهت من تلبيس فريدة
كان يحيي مازال نائما ولم يشعر بهما
مشت على اطراف اصابعها... اخذت الهاتف من جانبه وخرجت من الغرفة
بدأت تفتيش الهاتف...ولكنها وجدته مغلق بباسوورد
كادت ان تنفجر غيظا... ولكنها كظمت غيظها رغما عنها بسبب تأخرها عن المدرسة...فأعادت الهاتف مرة اخرى لمكانه دون ان يشعر يحيي... واخذت فريدة وخرجت.

                        ********************

انفتح باب غرفة سمير فجأة... فالتقطت نوال انفاسها
سألها"افتكرتينى مُت من عملتك"
"معملتش حاجة يا بابا... صدقنى معملتش حاجة"
خرج ليجلس فى الانتريه... جلست على الارض امامه وهو يشيح بوجهه عنها
"واللى شفته ده ايه؟؟ مش هتكدبى عنيا... انا اللى ضيعت عمرى فى تربيتكم تبقى دى اخرتها...بنتى تبقى خاينة"
"مخنتش... والله ما خنت رامى... رامى هو السبب"
كانت تبكى.... ولم يتأثر سمير...قال
"الخيانة مش سرير... الخيانة من مجرد تفكيرك فى راجل تانى غير جوزك... انتى ماشية ماسكة فى ايده ولا كأنك مراته "
قالها سمير بصوت مختنق... فسالت الدموع من عينه رغما عنه
قبلت نوال يديه
"انا وحشة... انا غلطانة...بس الوحدة وحشة اوى يابابا... انت مش متخيل الست لما يكون جوزها مش حاسس بيها بتتقهر ازاى"
"هاجرك يعنى؟؟؟ مبيقربلكيش... تقدرى تطلبى الطلاق ومحدش هيلومك"
"لأ...بيقرب وقت ما بيعوز... انما انا مش لاقياه جنبى...مش حاسة بيه معايا... اخد ابنى منى وسايبنى لوحدى"
"والبيه اللى كنتى معاه ده بقى عرفتيه ازاى"
"ده هيثم زميلى فى الكلية وده اللى كان جاى يتقدملى قبل رامى... بس اهله رفضونى وبعدها لما رامى اتقدملى وافقت على طول وسكتت ورضيت بكل اللى كانوا بيعملوه فيا علشان كنت مجروحة... عشت ورضيت وسكتت لحد ما اتقابلنا تانى من اقل من سنة ...غصب عنى من اهمال رامى رجعت افكر فيه تانى"
وبكل هدوء... اجاب
"يعنى مش عايزة رامى"
صمتت...لم تعرف بم تجيب
فكرر بنبرة حادة"عايزة جوزك ولا التانى؟"
لم تجب... فنهض وهو يحدثها دون ان ينظر لها
"عارفة لو كان رامى اللى شافك كان حصل ايه؟؟ كان اقل حاجة عملها انه فضحك وطلقك واخد ابنك منك... يمكن ربنا خلانى انا اللى اشوفك علشان يسترنى انا مش انتى... انا معملتش حاجة وحشة فى حياتى علشان الاقى بنتى خاينة... انا هعملك اللى انتى عايزاه واختارتيه... هطلقك من رامى واجوزك اللى انتى عايزاه... لما اتكلم مع رامى ابقى خلى التانى يتكلم معايا نتفق هنعمل ايه؟"
"هتقول ايه لرامى؟"
"اكيد مش هفضحك... واخواتك مش هيعرفوا حاجة"
نهض سمير واتجه لباب البيت
"مش هتفطر قبل ما تنزل؟"
"لأ... ومفيش نزول من البيت وتليفونك هيفضل معايا...لو عايزة تطمنى على ابنك ابقى كلميه من الارضى"

                        *******************

اثناء تناول الغداء... تنظر نادية ليحيي نظرات مختلطة بين الغيظ والشك... تهدئ من نبرتها وتسأله
"اخبار شغلك ايه؟"
"الحمدلله"
"احكيلى شوية يعنى"
"هجكيلك ايه بس... كلها قضايا ووجع دماغ"
"هو انتو فى المكتب بتشتغلوا القضية الواحدة مع بعض ولا كل واحد ليه قضاياه"
"كل واحد له القضايا بتاعته"
"وعبير؟"
"مالها؟"
"اخبارها ايه؟"
"من ناحية ايه؟"
"اى حاجة ...بسأل عادى"
"كويسة"
وجدت نادية ان ردود يحيي مختصرة... لم تتلق رد يخص عبير يريحها من شكها...فتصنعت الهدوء وقالت
"اه صحيح... الصبح كنت عايزة اعمل مكالمة من عندك بس لقيتك قافل التليفون بباسوورد...ليه؟"
"وتليفونك ماله؟"
وتبدلت لهجتها"انا اللى بسألك يا يحيي...عملت باسوورد ليه"
"علشان متفتشيش فيه من ورايا"
"يا سلااااام... وبتعترف كده عادى"
ضحك يحيي بسخرية
"اعترف !!... ليه عامل عَملة؟"   
"ايوه... لو مش خايف مكنتش خفت وعملت باسوورد للتليفون"
"انا عايز افهم...ايه التقليعة الجديدة دى ... احنا مع بعض بقالنا اكتر من 4 سنين...ايه اللى جَد علشان تبقى كده؟"
"اسأل نفسك"
"لأ...انا بسألك انتى"
"شوف انت بتعمل ايه يخلينى مش مطمنة"
"مبعملش جديد... عبير وغيرها وغيرها بتعامل معاهم كل يوم من قبل ما اعرفك ولحد اخر يوم فى عمرى"
نهض يحيي بعد ان انتهى من طعامه... ومر بجوار نادية وهمس
"خليكى واثقة ف نفسك اكتر من كده"
تركها ... نهضت خلفه وهى تصرخ
"انت بقيت مستفز اوى يا يحيي... مستفزززززز"
لم يلتفت لصراخها... دخل الحمام يغسل يديه...ثم خرج جلس امام التليفزيون متجاهلا غليان نادية

                         ******************

فى المساء.. اتى رامى لمقابلة سمير كما طلب الاخير
جلست معه نوال وهى لا تعلم كيف تتعامل معه... ولكن ما كان يهمها هو صبرى...فقد اخذته فى حضنها فور وصوله ولم تتركه

بعد اقل من خمس دقائق من وصول رامى
سمير"نوال...قومى انتى وانا عايز اتكلم مع رامى"
رامى"طيب ألبسى بالمرة"
دخلت نوال دون ان تتكلم...واخذت معها صبرى
بعد ان اطمأن سمير ان نوال لا تسمعه...بدأ كلامه مع رامى
"بص يا رامى.. انا مش عارف ابدأ كلامى معاك منين"
"خير؟"
"دلوقتى من ساعة ما رجعت انت ونوال وانت بتسيبها اكتر ما بتقعد معاها"
"مقدرش اسيب امى .. واللى انتوا قلتوا عليه انا عملته... جبتلها شقة ومشينا...مقاطعة امى كل ده ومغصبتهاش"
"ماشى يارامى انا معاك فى كل ده ومش مغلطك"
"اومال فى ايه؟"
"نوال اعصابها تعبانة شوية... خليها عندى ...تفكروا انتوا الاتنين... يا تقرر ترجع يا تنفصلوا بالمعروف"
رد رامى بعصبية
"هى بتعمل كده علشان مروحش لامى"
"لأ يا رامى... هى تعبانة من قعدتها لوحدها...وبعدين انت بتقول مامتك متقدرش تسيبها وراضى لنوال انها تفضل لوحدها على طول"
"لوحدها فين... ما انا كل يوم ببات فى البيت...انتوا مكبرين الحكاية كده ليه"
"معلش يا رامى... تعالى على نفسك شوية واستحمل الفترة دى... وبعدين بدل ما تدخل فى حالة نفسية تأذى نفسها ولا تأذيك...خليها اعصابها تهدا"
قال سمير كلماته الاخيرة...قاصدا ان يضغط على رامى ان يترك نوال... بدا ان رامى بدأ الرضوخ...فأكمل سمير
"وطبعا صبرى معانا هنا ومعاك عند مامتك مفيش حاجة هتتغير...اى وقت عايزُه يكون جاهز...يقعد معاك يوم ولا اتنين مفيش مشكلة"
رد رامى باستسلام
"حاضر... بس انا برضه مش عارف ايه اللى حصل فجأة كده"
"مش فجأة يا رامى... دى تراكمات... وياريت بلاش تتكلم معاها فى حاجة...سيبها لحد ما تهدا"
"ماشى... اللى تشوفه... ربنا يهديها"
"يارب يا ابنى"

انتهت المقابلة... تعمد سمير الا يطلب من رامى الطلاق مباشرة على أمل ان تتراجع نوال عن قرارها الايام التالية

                       ********************

بعد انتهاء اخر يوم امتحانات لنسمة... ذهبت مع ابراهيم لحجز تذاكر العودة
بعد مراجعة المواعيد
"بصى بقى...فيه حجز بعد بكرة وحجز تانى بعد 4 ايام"
"نحجز بعد بكرة"
"لا... خليها بعد 4 ايام"
"ليه؟"
"نقضى الايام اللى فاضلة فى باريس نتفسح شوية"
"نتفسح ايه بس يا ابراهيم...اللى معايا يدوب اجيب هدايا لبابا وماما واخواتى وولادهم"
"يا ستى متشيليش هم المصاريف"
"لا معلش... ال4 ايام دول فى اى اوتيل هيبقى كتير عليا"
"خلاص... متكلفيش نفسك وننزل فى نفس الاوضة"
وبحدة"انت بتقول ايه؟... اتجننت"
ضحك ابراهيم"بهزر والله...متبرقيش كده طيب"
"نحجز بعد بكرة"
"لا بعد 4 ايام.. وانا اعرف اماكن معقولة ولو احتجتى اسلفك هبقى اسلفك ومتبقيش ترديهم...وبعدين تعالى هنا... مش لسه على ما ندور على فستان الفرح"
خفق قلبها على ذكر كلمة فستان الفرح
"بلاش مقاطعة يا ابراهيم الله يخليك"
"مقاطعة ايه... نبقى فى فرنسا ومنجيبش فستان الفرح ...نبقى هبل رسمى"
شعرت نسمة بالسعادة تملأ قلبها... وقالت
"احجز كمان 4 ايام... من اولها كده هتمشى كلامك"
"طبعا... انا سى السيد اوى"
نظرت له نسمة بقلق...فاستدرك
"مش اوى يعنى... استنينى هنا لحد ما احجز"
حجز ابراهيم تذاكر الطيران... بينما انتظرته نسمة
"احنا نرجع نحضر شنطنا وننزل باريس النهاردة"
"لا يا ابراهيم...انت نسيت... دكتور حشاد عازمنا النهاردة على العشا"
"اه صحيح... طيب... نحضر الشنط والصبح بدرى نروح باريس"

                           *******************

فى الايام السابقة... تحسنت نفسية نوال كثيرا بعدما علمت انها ستطلق من رامى وتتزوج من هيثم
مازالت معاملة سمير لها جافة حينما يكونا وحدهما...أما امام عمتها ونادية وسعاد... فوجودها بسبب ضيقها من وحدتها وتفكيرها فى الطلاق كما اتفق معها سمير...حتى لا تطلب الطلاق فجأة

استطاعت اخيرا ان تحصل على هاتفها... واثناء وجود سمير فى عمله...اتصلت بهيثم...الذى رد بلهفة
"نوال...طمنينى عليكى ...ايه اللى حصل"
"الحمدلله يا هيثم..اطمن... كويس ان بابا شافنا"
"ليه... حصل ايه؟"
"بابا اقتنع بكلامى وهيطلقنى من رامى علشان نتجوز"
"نتجوز!!"
"ايوه... مش انت بتحبنى وانا بحبك... انا هتطلق وانت سيب خطيبتك ونتجوز"
"بس..."
"بس ايه؟ انت مش بتحبنى؟"
"بحبك طبعا... بس مينفعش فجأة كده اسيب خطيبتى واحنا قربنا نتجوز"
"تتجوز؟؟!! مقلتليش يعنى قبل كده"
"مكنتش عايز اضايقك... انا بحبك انتى وحبنا مش هيتغير ولا يتأثر بحاجة... بس مقدرش فجأة اسيب خطيبتى ونتجوز...كده هبقى بخسر اهلى وانا مش هقدر اخسرهم يا نوال"
تساقطت الدموع من عينى نوال وهى تغلق الهاتف تماما
       

هناك 30 تعليقًا:

  1. حلوة اووى دى يا دودو وبصراحة مش زعلانة على نوال خالص ماعرفش ليه بس هى تستاهل اللى حصلها

    ردحذف
  2. تحفه جامده جداااااااااااا

    ردحذف
  3. انا فرحان في نوال اوي والله - وناديه شكلها كده هتطلق

    ردحذف
  4. جميييلة الحلقة يا دينا ربنا يكرمك... انا مبسوطة ان نوال اخيرا عرفت حقيقية هيثم ..

    ردحذف
  5. هيثم ده زبالة ونوال اكيد هتعرفة على حقيقتة وغيرة نادية هتوديها فى داهية
    وبصراحة القصة تحفة وانتى كاتبة ممتازة

    ردحذف
  6. بجد تسلسل الاحداث في قصتك تحفه..بليز متتأخريش في نزول حلقاتك انا متابعه ليكي باهتمام شديد

    ردحذف
  7. حسبنا الله ونعم الوكيل فى هيثم دى آخرةالخيانة ويارب يوفقك يانسمة يا بنت عمو سمير

    ردحذف
  8. لالالالا نوال صعبت عليا رغم انها خانته

    ردحذف
  9. تحفه بجد وتستاهل نوال الي حصلها

    ردحذف
  10. رووووووووعه يا ناديه والاحداث متوافقه عقليا وعاطفيا

    ردحذف
  11. متقوليش ان ناديه ونوال هيطلقوا و نسمه بس هي الي هتجوز :-(

    ردحذف
  12. نوال كانت لازم تعرف حقيقة هيثم علشان تعقل.
    لكن نادية لازم تعقل شوية علشان تحافظ على بيتها وعلى جوزها..
    اما نسمة بقى ف دي تستاهل كل خييييييير وربنا يسعدها...
    استمررررري الحلقة تحففففففة
    Esraa.M.S

    ردحذف
  13. بجد الحلقة تحفه اوووى ونوال تستااهل احسن دى اخره الخيانه

    ردحذف
  14. جميله اوووووووووووووى
    انا فرحانه اوى لنسمنه وفرحانه في نوااال 3:)

    ردحذف
  15. الحلقه جاااامده اوى وكويس ان نوال عرفت حقيقه هيثم و لازم ناديه تخف على يحي

    ردحذف
  16. الحلقة روووعة جدا !! و ماكنتش متوقعة رد فعل سمير كده :)
    تسلم إيدك ♥

    ردحذف
  17. كانت المفروض تعرف من البداية ان هيثم مستحيل يتجوزها اهو بان على حقيقته >_<

    ردحذف
  18. قصصك حلوة
    بس النهايات دايما واحدة
    الكاتب لابد يغير و يجدد في بنية الحبكة و نمطها كمفاجأة لقراءه على الاقل كي لايكون تكراري و يتصف بكلمة واحدة
    ....مش عارفه اقول ايه
    بس مايصحش تنتهي زي قصة عالية مثلا
    خليكي اقوى شويه و واثقه اكتر

    ردحذف
  19. نوال كده هتعرف قيمه جوزها اما ناديه هتودى نفسها فى داهيه

    ردحذف
  20. GOOD JOB DINA
    القصة تحفة بجد ماشاء الله عليكى ومش دى وبس كل قصصك جامدة جدا انا عادتا مش بافتح بس بقيت افتح اقرا قصصك وتخرج تانى جيبتيلى تخلف هههههههههههههههه بس بجد ربنا يوفقك ومن نجاح لنجاح يارب وتنزلى باقى الحلقات بسرعة بلييييييييز مستنياكى على احر م الجمر

    ردحذف
  21. هي الحلقه هتنزل امتي بقي بسرعه انا متشوقه اوووووووووووووووووووووي اعرف اللي هيحصل

    ردحذف
  22. انتي مبدعه اوووووووووي يادينا وانا متابعه صامته ليكي واول مره اعلق وبحبك اووووي وانا متوقعه ان هيثم مش هيتجوز نوال وان ناديه هتتطلق بسب شكها ف يحيي واهل ابراهيم هيعرفوا ان بسمه مطلقه والجوازه هتبوظ وهتحصل مشاكل بين اهل ليلي وبلال وف الاخر هيسيبها وهيتجوز بسمه صح ولا لا يا دندوووووون :* :) <3

    ردحذف
  23. معرفش ناديه دى شايفه نفسها على ايه الشخصيه حلوه اه بس هى عايزه تمشى جوزها على مزاجها وبعدين دول متجوزين على ورق هى على طول بره وهو على طول بره وكمان بتعاملوا بطريقه وحشه اووى

    ردحذف
  24. انا بجد مستحقره نوال دي وبعد ماكنت بحبها بقيت بكرهاااااا جدا وتستاهل بجد وناديه ربنا يستر عليها

    ردحذف
  25. اد ايه مبسوطة فيها بحد تستاهل وتستاهل اكتر من كده كمان كان نفسى سمير يشفى غليلى ةيضربها كف >< :@

    ردحذف
  26. هي قصصك لو عايزه اشتريها من بره اشتريها منين انا من اليكس و مش عارفه اجيبها منين

    ردحذف

قول رأيك بلاش تقرا وتقفل من سكات...ارائكم تهمنى