الاثنين، 21 يوليو 2014

ابغض الحلال - الجزء الثانى - الحلقة 30 والأخيرة

الحلقة 30 والاخيرة

صمتت نادية... وصمت يحيي... جاء الجرسون بالطعام
وضعه فى صمت... وبدأت نادية تُطعم فريدة بصمت ايضا
ظل يحيي ينظر لهما... فلاحظت نادية وسألته
"بتبص لنا كده ليه ومش بتاكل"
"وحشتونى"
امسك يحيي بيد نادية...وجدها ترتعش بين يديه
"كفاية بقى يا نادية... ارجعيلى"
ترددت نادية... تريد ان توافقه ولكنها تذكرت اهانته لها
"انت مديت ايدك عليا يا يحيي قدام الناس... انت عارف الاهانة اللى انا حسيتها وانت بتستغنى عنى بكل سهولة"
"غلطت... وانتى غلطتى ومتعانديش"
"ايوه اتسرعت... بس ده من حبى ليك"
"خلاص سامحى زى ما انا التمست لك العذر وسامحتك من اول دقيقة وجيت وراكى...نادية انا مش هتحايل عليكى اكتر من كده... بس حرام عليكى تفرقينا بسبب دماغك الناشفة دى"
"اوعى تكون فاكر انى فرحانة واحنا بعيد عن بعض..بس احنا الاحترام اللى بيننا اتهد"
"نبنيه تانى... حبنا وبيتنا وبنتنا وعشرتنا مع بعض كل دى تساعد اننا نبنى اللى اتهد... ولو انى شايف ان مفيش حاجة اتهدت دى ساعة شيطان وارد انها تحصل بين اى اتنين"
"جاوبنى الاول بصراحة...ايه اللى بينك وبين عبير"
"شغل وزمالة... مش اكتر من كده... ولو كان فيه حاجة اكتر مكنتش هحاول اصالحك من ساعتها"
"ومد ايدك عليا؟"
"تتقطع لو اتمدت تانى"
"ايوه تتقطع"
"طيب اضحكى عليا وقولى بعد الشر"
"والله يا يحيي لو فكرت تمد ايدك عليا تانى هيبقى اخر حاجة بيننا بجد"
ابتسم يحيي وهو يرى ابتسامتها
"يعنى افهم من كده ايه؟"
ضحكت نادية وهى تطعم فريدة التى بدأت البكاء جوعا
"ايه الغباء اللى نزل عليك فجأة ده"
"غباء يا نادية... واحنا بنتصالح ولسانك ده مفيش فايدة فيه"
وضعت الطعام فى فمه وهى تقول
"بس بقى ... الاكل برد وانا جُعت... كل وانت ساكت علشان قلت لبابا مش هتأخر"
"بابا!! احنا مش هنرجع البيت"
"مش لما اجيب الهدوم اللى عند بابا وتردنى قدامه"
"بحبك... بس يا سلام لو لسانك يقصر شوية"
"معلش يا حبيبى قدرك بقى"
بدأ يحيي تناول الطعام وقلبه يخفق من السعادة...لاحظ التغيير على ملامح نادية...اصبح وجهها اكثر اشراقا وابتسامتها تملأ وجهها
ظل ينظر لها ولفريدة بحب وهو يأكل ويطعم فريدة معها
اما نادية فكانت غير مصدقة انها اخيرا ستعود بيتها وان يحيي يحبها حقا ولو كانت شكوكها حقيقة ما حاول استعادتها مرة اخرى

                            *******************

فى منزل سمير... واثناء انتظار يحيي مع سمير حتى تحزم نادية حقائبها
بدأ سمير كلامه
"انا كنت حاسس ان الزعل بينكم مش هيطول... الحمدلله ان ربنا هداكم"
"الحمدلله... انا مستغناش عن نادية ابدا ولا عن فريدة"
"ربنا يخليكم لبعض... بس انا عايز اقولك كلمة مهمة وحطها فى بالك دايما"
"اتفضل"
"كلمة الطلاق دى ابعدها عن لسانك تماما... لو استسهلتها ممكن فى لحظة حياتك وبيتك واسرتك تضيع ومش هتعرف ترجعهم تانى"
فهم يحيي مقصد سمير...فطمأنه
"انا عارف... وانا عمرى ما كنت متسرع بس هنقول ايه لحظة شيطان وراحت لحالها"
"ربنا ما يجيبلكم حاجة وحشة"
خرجت نادية من غرفتها تحمل حقيبة وخلفها نوال بحقيبة اخرى
"خلاص يا يحيي... احنا جاهزين"
نهض سمير وهو يحتضنها ويقبلها
"مبروك رجوعك لجوزك... بس تانى مرة متتسرعيش ولسانك ميطولش على جوزك... انتى عايزاه يقول عليا معرفتش اربيكى"
يحيي"العفو يا عمى... انا عارف انها كده لوحدها"
ضربته نادية على كتفه مزاحا... وبعدها سلمت على نوال وهى تدعو لها
"عقبالك لما ترجعى انتى ورامى"
لم ترد نوال... واكتفت بابتسامة باهتة...اتجهت نادية للباب
سمير"ابقى كلمى مامتك فرحيها"
نادية"حاضر... وسلموا على نسمة لما تيجى"

                       *******************

فى الايام التالية... كانت نادية تذهب يوميا لسعاد لتترك فريدة عندها حتى تنتهى الامتحانات

وكانت نوال حائرة لا تستطيع الاختيار...هل تكمل دراسة ام تبحث عن عمل
الوقت يمر دون ان تأخذ قرار

اما نسمة... مع اظهارها القوة والتماسك...فقد كانت تفتقد ابراهيم جدا بعدما انقطع عن محاولات الاتصالات بها
ذكرياتها معه فى فرنسا كانت تزيدها ألما ...ولكنها لم تظهر ضعفها وحاولت ان تنساه كما نسيها

اما بلال فقد انتهى من توضيب الشقة وتبقى فقط شراء الاثاث وفرش الشقة قبل تحديد موعد الزواج

                    *********************

ذات مساء... وقبل ان تعود نسمة من العمل
رن هاتف سمير... فنظر للاسم وقال لنوال التى كانت تجلس امامه
"ده رامى"
رد بعدها
"الو... اهلا يا رامى... اهلا وسهلا... تنور طبعا...مع السلامة"

سألته نوال
"هو كان عايز ايه؟"
"عايز ييجى يقابلنى"
"ليه؟"
"معرفش... بيقول هييجى يوم الجمعة بالليل"
"يمكن علشان يشوف صبرى"
"كل ما بيكون عايزه بييجى ياخده من تحت... المرة دى مجابش سيرة صبرى خالص"
"طيب جاى ليه؟"
"يمكن عايز يصالحك"
صمتت نوال...لم تفرح ولم تعترض
فسألها سمير
"لو عايز يصالحك هتقولى ايه؟"
ردت نوال "مش عارفة... رأيك ايه يا بابا"
"فكرى كويس ... وافتكرى ان محدش غصبك على حاجة وكل مرة بيكون قرارك لوحدك"

فتحت نسمة باب الشقة عائدة من العمل... ألقت التحية وجلست معهم... كان يبدو عليها التفاؤل عكس الايام الماضية
فسألها سمير وهو يشعر بانفراج الازمة
"ابراهيم كلمك؟"
تبدلت ملامح نسمة على ذكر سيرة ابراهيم واجابت
"لأ"
ولكنها استعادت حماستها واكملت
"جالى ايميل من فرع القاهرة لشركة فرنسية كبيرة كنت بعتلها الcv  قبل ما اجى وعندى انترفيو يوم السبت"
سمير"ربنا يوفقك يارب والحمدلله ان العرض اللى جالك هنا ف مصر"
تمنى سمير ان تعود نوال لرامى وان يعوض الله نسمة عما لاقته فى الفترة الماضية

                       **********************

فى الموعد المحدد لحضور رامى...لم تكن نوال قد قررت بعد
استقبله سمير بترحاب... وجلس صبرى بجوار رامى
كان سمير متفائلا بالزيارة... ولكنه لم يبدأ فى اى حوار
حتى بدأ رامى بإخراج ورقة من جيبه وظرف مغلق
"اتفضل يا عمى"
تناول سمير الورقة وهو يتساءل
"ايه ده؟"
"دى ورقة طلاق نوال... وده المؤخر بتاعها... مع ان هى اللى باعت بس انا هسيبلها المؤخر ومالهاش حاجة تانية عندى...انا بعت الشقة والعفش بتاعها وباقى حاجتها انا لميتها وموجودة فى شقة امى اى وقت تيجى تاخدها"
فوجئ سمير.. ومن هول المفاجأة عُقد لسانه فلم يستطع الرد
ظن ان الوقت سيزيد الشوق بينهما ولكنه تأكد ان ما يجمعهما زواج بدون حب... وتذكر ان ماحدث هو اقل الخسائر
اكمل رامى
"انا مغدرتش ولا بِعت... هى اللى غدرتنى وانا مظلمتهاش"
"خلاص يا رامى... كل شئ نصيب"
"هبقى ابعت لصبرى مصروفه وهقدم له فى مدرسة كويسة ... وده قصاد ان اى وقت عايز اشوفه او اخده عندى محدش يعترض"
"هو حد اعترض قبل كده لما هنعترض بعدين"
نهض رامى من مكانه... وصافح سمير
"مكنتش اتمنى ان يحصل كده واتمنى ميحصلش مشاكل بعدين... حتى لما اتجوز مفيش حاجة هتتغير"
فوجئ سمير فسأل
"انت هتتجوز!!"
"اكيد مش هكمل حياتى كده"
استأذن رامى وخرج... وكانت نوال تسمع كل كلمة تقال... فخرجت وهى تحاول ان تبدو قوية كشقيقاتها فى مواجهة ازماتهن
"انا مش زعلانة على فكرة... كده احسن ... انا كنت عايشة حياة صعبة ...وحدة واهمال و..."
وسقطت دموعها... سقطت دموعها لانها اساءت التفكير والاختيار من قبل... دموع ندم وحزن على حياة فشلت فى بناءها وهى تعلم تماما انها اخطأت مرتين...اولهما حين تسرعت وتزوجت رامى وثانيهما عندما ابتعدت ولجأت لشخص آخر فى الوقت الذى كان بمقدورها الحفاظ على زوجها وابنها وبيتها.

                     **********************

طوال الليل... ونسمة تفكر
هل ستلتقى بابراهيم فى الشركة... هل أُرسل اليه موعد المقابلة كما ارسل اليها... كيف ستقابله...هل ستتجاهله ام تتكلم معه كزميل سابق... هل يفكر فيها كما تفكر فيه
تقلبت فى فراشها ... جلست على السرير وفتحت الدرج الذى يجاورها... فتحت العلبة التى لم يأخذها ابراهيم ونظرت للدبلة

جلست نوال هى الاخرى
"انتى منمتيش؟"
ارتبكت نسمة واغلقت العلبة ووضعتها فى الدرج واغلقته
"قلقانة شوية علشان معاد بكرة... انا افتكرتك نايمة"
"مش عارفة انام"
"متزعليش يا نوال ... ربنا يعوضك خير ان شاءالله ومين عارف يمكن يكون اللى حصل النهاردة ده من تأثير مامته وشوية ويرجعلك"
"انا مش هستنى يا نسمة... انا اتفقت مع بابا انى ادور على شغل وانسى اللى فات وابدأ احس بشخصيتى واربى ابنى... انما انتى بقى لسه بتفكرى فى ابراهيم؟"
"يعنى... اللى حصل صعب انساه بسهولة بس بحاول"
"انسى يا حبيبتى... الدنيا مبتقفش على حب ضاع ولا على راجل باع"
ضحكت نسمة بمرارة وهى تؤكد
"انتى هتقوليلى... انا متأكدة من كده"
"طيب حاولى تنامى علشان تكونى فايقة فى الانترفيو بتاعك"
ردت نسمة وهى تحاول النوم مرة اخرى
"تصبحى على خير"

                     *********************

فى اليوم التالى...كان موعد نسمة فى الثانية عشرة ظهرا
قبل الموعد بوقت كاف... نزلت نسمة كى تلحق بموعدها

على السلم... قابلت ليلى ووالدتها صاعدين
سلمت عليهما... وقالت ليلى
"انتى اتأخرتى على شغلك ولا ايه؟"
نسمة"لأ مش رايحة الشغل...عندى انترفيو فى شركة كنت مقدمة فيها"
والدة ليلى"ربنا يوفقك يا بنتى"
نسمة"شكرا يا طنط... انتوا قاعدين كام يوم مش كده...يعنى هنتقابل تانى"
ليلى"ان شاءالله... ادينا مستنيين نخلص فرش ونحدد معاد الجواز...هو بلال مقالكوش"
نسمة"عمتو قالت...بلال محدش بيشوفه خالص"
والدة ليلى"الله يعينه بيشتغل ساعات طويلة يا حبيبى"
نظرت نسمة فى ساعتها
"هستأذن انا واشوفكم بالليل ان شاءالله"
ليلى"هى نوال فوق؟"
نسمة"اه موجودة...عدى عليها وانتى طالعة لو عايزاها"
ليلى"ماشى...سلام انتى"

                       ********************

وصلت نسمة لمقر الشركة... دخلت غرفة الانتظار للمتقدمين للوظيفة...تقدمت للسكرتيرة وأخبرتها اسمها وجلست تنتظر الدور
عندما لم تجد ابراهيم... تعلقت نظراتها بالباب...لعله يأتى
بعد فترة قليلة...اقتربت من السكرتيرة ... وسألتها باستحياء
"لو سمحتى...انا كنت مقدمة انا وزميلى ومعرفش جاى فى الانترفيو ولا لأ"
"اسمه ايه؟"
"ابراهيم العوضى"
قلبت السكرتيرة فى الاسماء التى امامها
"اه...اسمه موجود"
شعرت نسمة ببعض الامل...على الاقل ستراه
ولكن السكرتيرة اكملت
"اه صحيح...ده كان هنا الصبح وسأل على اسمك وبعدين نزل"
عادت نسمة مكانها....محبطة... لقد غادر المقابلة كى يتجنب رؤيتها... تسللت الدموع رغما عنها الى عينيها... مسحتها سريعا قبل ان يراها الموجودين... دخلت الحمام مسرعة... وقفت امام المرآة تعدل من زينتها...ثم عادت وهى مقررة الا تفكر سوى فى القادم على الاقل اللحظات التالية حتى تتمكن من اجتياز المقابلة ... ويمكنها التفكير فى ابراهيم عندما تكون بمفردها.

                       *********************

بعد عودة نادية من الامتحان لاخذ فريدة...جلست مع سعاد قليلا
سألتها سعاد عن احوالها فأجابت
"الحمدلله يا ماما... بحاول ابطل غيرة على قد ما اقدر"
"لا يا نادية حرام عليكى... متخربيش على نفسك تانى"
"متقلقيش...غيرة بسيطة كده بس هو بيطمنى"
"الحمدلله.. انا عايزة اسألك على حاجة...هما اخواتك زعلانين منى فى حاجة؟"
"ليه ياماما بتقولى كده...هما مش بيجولك"
"نوال بتيجى ونسمة كل فين وفين بس بيكلمونى... مفيش واحدة فيهم فكرت انها تيجى تقعد معايا شوية"
"متزعليش منهم يا ماما... صعب انهم ييجوا ويقعدوا هنا لانهم مش متعودين مش حكاية زعلانين منك... احنا منستغناش عنك"
"ربنا يخليكم ... ويصلح حال اخواتك يارب"
"يارب... انا هقوم..مش عايزة حاجة"
"لا شكرا"
"هو اسلام هيخلص امتحانات امتى"
"كمان اسبوعين"
"ربنا معاه"

                      ******************

بعد نزول نسمة من الانترفيو... واثناء وقوفها لانتظار تاكسى
وجدت ابراهيم يهرول نحوها وهو يعبر الطريق
تجمدت مكانها... شعرت بالفرحة وظلت عيناها معلقة به
تقدم نحوها يصافحها
"ازيك يا نسمة"
اخفت فرحتها وهى تجيبه
"الحمدلله...انت ازيك"
"كويس... عملتى ايه فوق"
"تمام الحمدلله..هيتصلوا بالناس اللى هتتقبل خلال اسبوع"
"ربنا معاكى"
"انت اسمك كان موجود...محضرتش ليه"
"طيب ممكن نقعد فى اى مكان ونتكلم"
"لا معلش... مش هينفع"
"مش هعطلك كتير... كلمتين هقولهم وامشى"

صمتت موافقة... اشار تجاه سيارته ...تبعته وركبت معه.

اثناء جلوسهما معا... بدأ حديثه
"انا محضرتش علشانك"
"ولما محضرتش علشانى... قاعد معايا ليه دلوقتى"
"محضرتش علشان مضايقكيش وتتوترى قبل المقابلة فاستنيتك تحت"
"وانت؟؟ تضيع منك فرصة زى دى ليه؟"
"نسمة... انا مسافر امريكا...شركة من اللى بعتنالهم بعتولى من اسبوع واتواصلت معاهم وهستلم الشغل كمان اسبوعين"
"مبروك"
قالتها نسمة بحزن بعدما ادركت انها لن تراه ثانية
"انا بحبك وعايز نتجوز"
"قلتلك قبل كده مش هدخل عيلة رافضانى"
"نتجوز ونسافر...او اسافر وتبقى تحصلينى"
"من ورا اهلك؟؟"
"هقولهم...بس مش هستنى موافقتهم... انا قلت لك قبل كده ان رأيي من دماغى ومحدش بيمشينى ولا يقرر لى... انا بحبك وعايز اكمل حياتى معاكى...انتى متعرفيش الفترة اللى فاتت عدت عليا ازاى"
"اهلك مش عايزينى"
"اهلى جم خطبوكى وكانوا فرحانين بيكى... اللى رافضينه دى حاجة متخصوهمش ولا هى مبرر رفض اصلا... نسمة سؤال وخليكى واضحة... بتحبينى وعايزانى زى ما انا عايزك ولا لأ"
ترددت نسمة ... ولم تجب...فسألها
"جاوبينى"
"ايوه بحبك... بس مش عايزة ابتدى حياتى معاك وانا مكروهه من عيلتك...خايفة من اللى ممكن يحصل"
"بقولك مسافر...يعنى هنبقى بعيد عنهم خالص...فكرى يا نسمة...بس مفيش وقت ولازم تجاوبينى بسرعة... قبل ما اسافر"

                      *******************

عند عودة نسمة للمنزل...لم تجد أحد
اتصلت بنوال فعرفت منها انها مع ليلى ووالدتها ومديحة فى شقة بلال... جلست مكانها تفكر فى كلام ابراهيم ... وكلما تخيلت انه سيسافر ولن تراه ثانية ...تشعر بالضيق حتى تكاد تختنق

فتح سمير الباب...ودخل وجد نسمة جالسة شاردة
فسألها"قاعدة كده ليه؟ عملتى ايه ف المقابلة بتاعتك"
"الحمدلله بس لسه النتيجة"
صمتت قليلا ثم قال"انا قابلت ابراهيم"
جلس سمير قبالتها يسمع لها وهى تحكى كل ماحدث...حتى انتهت
"انتى عايزة ايه؟"
"مش عارفة... عايزاه وخايفة"
"يمكن لو الظروف مختلفة كنت هقولك انتى صح ليكى حق تخافى وتبعدى... بس انا شايف كنتى زعلانة قد ايه الفترة اللى فاتت مهما حاولتى تخبى... وشايف لما بتحكيلى عن مقابلتك بابراهيم عينيكى بتلمع ازاى ونفسك اقولك اتجوزيه... انتوا الاتنين بتحبوا بعض وهو كده كده هيسافر مش هيتجوز من مجايب اهله...يبقى متضيعوش حبكم"
اتسعت ابتسامة نسمة وهى تقبل سمير بفرحة
"قومى كلميه وخليه يحاول محاولة اخيرة مع اهله...يمكن يغيروا رأيهم"
"ولو فضلوا على رأيهم؟"
"شوفوا هتمشوا حياتكم ازاى وتتفقوا على ايه"

نهضت نسمة مسرعة تتصل بابراهيم من غرفتها... وخرج سمير للشرفة وهو ينظر للسماء ويحمدالله على سعادة ابنتيه نادية ونسمة رغم حزنه على ماحدث لنوال ولكنه حمدالله على ستره لها

بعد قليل عادت نسمة ووقفت بجواره...لاحظ انها ارتدت الدبلة مرة اخرى...حاوطها بذراعه وهو يسألها
"ايه اتفقتوا على ايه؟"
"هيكلم اهله تانى ونشوف"

                          ******************

عادت نوال فى المساء... مع مديحة وبلال وليلى ووالدتها
واثناء طرقها للباب...فتح سمير الباب
ومن خلال الباب المفتوح... لمحت نوال ابراهيم جالسا مع نسمة
فقالت متساءلة
"ابراهيم هنا؟"
رد سمير"اه... الحمدلله اتصالحوا"
ترددت الكلمة فى اذن ليلى...ففرحت واطمأنت اكثر
رغم انها فى الفترة الاخيرة وبسبب كثرة تواجدها وسط العائلة ادركت العلاقة العادية بين بلال ونسمة...الا ان ارتباط نسمة يزيدها اطمئنانا... دخلوا جميعا لتهنئة نسمة وابراهيم

                      *******************

فى الايام التالية...حاول ابراهيم مع اهله ولكنهم اصروا على موقفهم ...فى نفس الوقت الذى قُبلت فيه نسمة فى الوظيفة الجديدة

فاتفقت مع ابراهيم على ان تظل فى مصر وان تعمل حتى تسدد المبلغ الذى استدانه سمير من سعاد... على ان يؤسس ابراهيم فى تلك الفترة مسكن للزواج فى امريكا

تم عقد القران قبل سفر ابراهيم بأيام... واستلمت نسمة وظيفتها

طلبت نادية من يحيي ان يساعد نوال فى البحث عن عمل... واقنعته ان الافضل ان تعمل معه فى المكتب
ارادت نادية ضرب عصفورين بحجر واحد...منها مساعدة نوال فى ايجاد وظيفة... ومنها تطمئن من بعيد على العلاقة بين يحيي وعبير او اى من عميلات المكتب.

                      تـــــــــــــــمــــــــــــــــــــت

هناك 75 تعليقًا:

  1. اول تعليق بجد تحفه يا عمري انت استاذة وانا كمان بقيت بحاول اكتب قصص على قدي كدا عشان افرح ناس زي حضرتك شكرااا جدا 😘

    ردحذف
  2. هييييييييييييه 💟 حلوة جدا

    ردحذف
  3. تحفةةة بجد

    ردحذف
  4. حلوة اووووى تسلم ايدك

    رقى

    ردحذف
  5. تحفه اووووووووووووووووووووى بجد تسلم ايديكى ياقمر ويارب متطوليش فترة توقف المدونه يارب
    HeBa Mohamed

    ردحذف
  6. ههههههههههههههههههه اول كومنت

    ردحذف
  7. الحلقة كويسه بس النهايه مش حساها نهايه يعنى معلش فى كلامى مش قصدى حاجه انتى تعبتى ومجهودك كله بنقدرك عليه بس يعنى كنت اتمنى لو تعملى كمان حلقات وسعاد وسمير يرجعوا لبعض بعد كل دا من الجزء الاول ومعظمنا مستنيهم :( ونوال لو كانت تقابل حد يستاهلها وبلال وليلى لما يتجوزوا واهل ابراهيم يوافقوا على نسمة ويعيشوا مع بعض فى يوم واحد يعنى كان ممكن نقول عدت سنين حتى ونكمل فى حاجات كتير كنت مستنياها ومحصلتش ياريت يكون فى جزء تالت بقا بس ع العموم القصه كلها من الجزء الاول تجنن وتسلمى ع مجهودك وتعبك مجرد رأى مش اكتر :)

    ردحذف
  8. جميله جداااااااا يادينا..رجوع ناديه ليحيى كان امر طبيعي ومفروغ منه وكمان نسمه وابراهيم اتصرفو صح هما مش اطفال علشان حد يفرض عليهم يعيشو حياتهم ازاي او يختارو مين وبناء على ايه اما بقى نوال فاللي حصلها ده افضل شئ ليها مش بس لانها غلطت لكن كمان لانها محتاجه تصحح وضعها وتختار صح وتاسس حياه جديده مبنيه على قرارات واختيارات سليمه هي اللي تختارها بنفسها مش الظروف اللي تفرضها عليها وبحييكي لانك مارجعتيش سعاد لسمير لان ده الاوقع ولو كانو رجعو كان بقى فيلم عربي... قصه روعه وف انتظار ابداعاتك وجديدك وشكرا للمجهود
    Nora Saeed


    ردحذف
  9. جامدة جدا تسلم ايدك

    ردحذف
  10. تحفه يا ديناآ تسلم ايدك :) يا ريت متتأخرييش علينا كتير ومستنيه بلاتوه ع احر من الجمر

    ردحذف
  11. بجد انا مش عارفة اقولك ايه علي جمال القصة بجد روعه

    ردحذف
  12. بجد القصة جميييييلةة اوووى ♥

    ومشاء الله حضرتك موهوبه اوووى ^^

    وربنا يقدرك وتنزليلنا جزء تالت كمان :)

    وربنا يوفقك ياارب ..... وانا بتمنالك التوفيق من كل قلبي ♥:*

    ردحذف
  13. بجد تحفة والنهاية سعيدة جدا
    انا اول مرة اعلق هنا بس انا متابعاكي على الفيس ♥♥

    ردحذف
  14. القصه كلها ان البنات تتخانق مع اجوزاهم وتمشي
    #قصه تافهه

    ردحذف
    الردود
    1. ولما هيا قصة تافهة بتقرأها/بتقرأيها ليه؟؟؟؟
      غباوة ولا رخامة؟؟؟؟

      حذف
  15. بجد القصه روعه والنهايه حلوه اووووووووووووى

    ردحذف
  16. تحفه بجد ^_^ يا رب يكون فيه جزء ثالث

    ردحذف
  17. هى جميله جداااااااااااااااااااا بس النهايه مش زى ما كنا متوقعين خالص بس اشكرك ع تعابك معانا شكرا يا دينا

    ردحذف
  18. القصه جميله جدا بس النهايه مش علي نفس مستوي جمال القصه بس ده لا يمنع انك مبدعه جدا جدا
    انا من المتابعين الجدد ليكي ونفسي اعرف اسامي القصص بتاعتك علشان اقراها كلها الاقيها فين ؟؟

    ردحذف
    الردود
    1. هتﻻقيها فى الارشيف بتاع المدونه على اليمين كده بالشهور والسنين كل القصص فى الارشيف

      حذف
  19. جميلة جدا يا دبنا بارك الله فيكي

    ردحذف
  20. جمييييله دائما ......... نهايه جميله فيها العقل والحكمه والحب والغيره فيه كل حاجه يعني مش حارمنا من حاجه شكرا ليكي

    ردحذف
  21. القصة رائعة طبعا كان نفسى فى حاجات كتير تحصل بس النهاية واقعية تماما واكتر من رائعة تسلم ايدك

    ردحذف
  22. الحمدلله يا دندن فرحتي البنات

    ردحذف
  23. هى نهاية ممكن تكون واقعية بس مش عاجبنى ابراهيم يعمل اللى فى دماغه ويعارض اهله

    ردحذف
  24. الله عليك يادينا بجد انت احسن كاتبه في الدنيا ربنا يخليك لينا بروياتك اللي تجنن دي
    hodeto

    ردحذف
  25. جميلة جداااااااااااااااا يا دودو كل سنة وانتى طيبة وياريت تبقي تحطى قصص تانية علشان هيا الحاجة الوحيدة اللى بتسلينى وانا مش بقدر انزل فبتسلى وحدتى فى البيت

    ردحذف
  26. جميلة اوى اوى اوى وفى انتظار الجديد

    ردحذف
  27. القصه الجايه ايه ومتي

    ردحذف
  28. حلوة اوى القصه يا دينا بس النهاية محستهاش اوى يمكن لو كان فيها عرض سريع للاحداث بعد كام سنه كانت هتبقى محسوسه شويه بس ده ميمنعش انك كاتبه رائعه

    ردحذف
  29. رووووووعة يا دينا ربنا يكرمك في انتظار الجديد 😘😘😘

    ردحذف
  30. بجد انتي فظييييييييييييييييييعه دي احلى قصه قريتها في حياتي
    عايزين بقى كمان قصه زي دي تكوون جزئين و حلووه اوووي :D

    tasneem

    ردحذف
  31. جميله اوووووووووووووووووووي ياريت يبقي ليها جزء 3

    ردحذف
  32. هى القصة من اولها لاخرها حلوة طبعا
    بس بصراحة انا محستش النهاية حلوة اوى يعنى لسة مازالت نادية بتشتغل وهتكون لسة نفس المشاكل موجودة
    لسة نوال مشكلتها مفتوحة تعتبر
    ونسمة مش حلوة انها تسيب اهلها وتسافر مع جوزها برة
    العلاقة بين والدة بلال وليلى انتى موضحتيش اوى انها اتصلحت وبقو طبيعين
    بس انتى تعبتى فيها وهى فعلا جميلة هى النهاية بس كانت محتاجة تظبيط اكتر شوية

    ردحذف
  33. مش عارف انا اتصطدمت من النهايه حاسس انها ناقصه حاجات جواز نسمه اللى الاهل مش موافقين عليه ونوال مافرحتش وناديه لسه بتغير ومستمره فى شغلها مشاكلها هتستمر كا ن ممكن تعدى سنين وتقولى اتعرفت ع واحد واتجوزته ونسمه اتصلحت ع اهل ابراهيم وناديه اصبحت واثقه فى جوزها كده
    انا مش بقلل من مجهودك انا بقولك عن اللى حاسه وانت طبعا كاتبه موهوبه وقصه رائعه

    ردحذف
  34. تسلمى على مجهودك بس بصراحه النهايه أحبطتنى حساها ناقصه احنا عيشنا معاهم تفاصيل و أحداث كتير و فرحنا و زعلنا معاهم زى ما عشنا واقع نسمه و ظلمها و حزنها انتى مقتنعه ان ربنا بيعوض عن الظلم و كلنا استنينا تفاصيل فرحة نسمة زى تفاصبل وجعها على الأقل كتب كتابها و فرحتها بعد الموقف الى اتحطت فيه و تفاصيل جةازها بصراحه الحلقه مختصره أحداث كتير مهمه ياريت لو ممكن تزوديها حلفتين أو جزء ثالث انشاء الله القصه فعلا من اجمل القصص مش ناقصها غير بعض تفاصيل النهايه تقبلى رأى و متزعليش والله مقدره مجهودك اوى و ان حضرتك كنتى عايزه تخلصيها و تعبتى فيها

    ردحذف
  35. حلوة اووي تسلم ايدك

    ردحذف
  36. قصة أكتر من راااااااااااااائععععععععععععععععععععععععة بجد تسلم ايديكي بقى.....ومبسوطة علشانهم التلاتة نسمة...نادية...نوال ربنا يكرمهم كلهم وبجد تسلم ايدك انتي مبدععععععة.....
    ويااااااااريت قصة جديدة في السريع كده



    Esraa.M.S

    ردحذف
  37. بجد القصه جامده جدا بس بصراحه مش حاسه النهايه

    ردحذف
  38. روععععععععععععة يا مدام دينا بجد مبدعة
    تسلم ايديكى يا فنانة




    عبدالله

    ردحذف
  39. هي ازاي حلوه اويييي كده بجد انا بحس بفرح والله لما الاقي الامور متظبطه وبزعل جدا لما الاقيها بيظه

    ردحذف
  40. بجد القصة روعة جداااا وفعلا قصة واقعية بتحصل فى بيوت كثيرة والمعالجة ليها جميلة جداااا تسلمى يا قمر وربنا يكرمك ومن نجاح الى نجاح ان شاء الله

    ردحذف
  41. القصة تحفة أوي و منتظرة بلاتوة

    ردحذف
  42. انا مستني الجديد بقة

    ردحذف
  43. بلللللللللللليز ياريت تعمليلها جزء تالت بللللللللللللللللللليز

    ردحذف
  44. بجد تحفه اوى وجامده اوى يا دودو وياريت مش تتاخرى علينا فى الجديد وبجد انتى احسن واحده بتكتبى قصص فى العالم العربى كلها :D

    ردحذف
  45. حلوه اوى بس كان نفسى اهل ابراهيم يوافقوا على نسمه

    ردحذف
  46. القصة الجاية امتتتتتي
    noody

    ردحذف
  47. الجديد امتى؟؟؟؟؟؟؟؟؟؟

    ردحذف
  48. بجد قصه جااااامده اوي

    ردحذف
  49. يا تري القصه الجايه امتي وهتكون عن ايه

    ردحذف
  50. حلوة اوى

    ردحذف
  51. سلمت يداك

    عادل شلبي

    ردحذف
  52. انا خلصت ااقصه كلها ف 12 ساعهةبس وعندي امتحاااان حرام عليكي ..تحفه تسلم ايديكي 😍😍😍

    ردحذف
  53. جميلة جداااااااااااااااااااااااااااااااااااااااااا

    ردحذف
  54. أزال المؤلف هذا التعليق.

    ردحذف
  55. أزال المؤلف هذا التعليق.

    ردحذف
  56. شكرا علي قصصك الجميله دي دا موقع ديني _____ شكرا علي قصصك الجميله _http://matrexmohamed.blogspot.com/________ بعد اذنك طبعا

    ردحذف
  57. رووووعه ومتألقه بابداعاتك اللي بمعيش معاها احلي الاوقات
    شكرا ديما عماد ومنتظرين منك المزيد

    ردحذف
  58. روعه بس كان نفسى نسمه تفرح بجد من غير مشاكل لانها تحملت صدمات كتيره وهى صغيره بس تسلمى على الافكار الكتيره لحل مشاكل موجوده فى مجتمعنا زى مشكله نوال وزوجها وحماتها اكتر من ممتازه

    ردحذف
  59. تحفه قوى. اناكنت حاسه انى بتفرج على مسلسل مش بقرا ياريت جزء تالت

    ردحذف
  60. القصة راااائعة فعلا لكن دوما النهايات لديك تحتاج إلي حبكة أقوى و إضافات أفضل ..فى كل الأحوال تسلم ايديك علي هذه القصة الرااااائعة

    ردحذف
  61. عجبتنى النهاية جدا انا متبعاكى على الفيس اول مرة اعلق هنا بجد تسلم ايدك قصه فى منتهى الواقع

    ردحذف
  62. احلى قصصك حتى الآن تحفة ماشاءالله تسلم ايدك

    ردحذف
  63. احلى قصصك حتى الآن تحفة ماشاءالله تسلم ايدك

    ردحذف
  64. تسلم ايديك بس مش حاسه النهايه مالهاش جزء تالت

    ردحذف
  65. انتى مبدعه بجد
    والقصه التانيه امته ان شاء الله

    ردحذف

قول رأيك بلاش تقرا وتقفل من سكات...ارائكم تهمنى