الاثنين، 13 أغسطس، 2012

كان حلم... الحلقة 15

الحلقة 15
فاتت الايام ونغم وماجد فى سعادة
وف يوم وهما قاعدين ف النادى
جه عليهم مصطفى ويسرا
وسلموا على بعض ال4بكل ترحاب
نغم"وحشتونا اوى والله ...هترجعى امتى الشعل يا يسرا"
يسرا"خلاص بقى مش هرجع"
مصطفى"احنا جينا نعمل اخلاء طرف مع بعض...انا مسافر كمان يومين"
ماجد"تروح وتيجى بالسلامة... ويسرا هتسافر معاك ولا ايه"
نغم"اه صحيح يا يسرا مش كنتوا قلتوا انك هتحصليه بعد كام شهر"
مصطفى"مش هتسافر معايا فعلا بس شقتى هنا محتاجة توضيب وفرش وهى اللى هتشرف على كل ده وبعدين تجيلى ان شاءالله"
نغم"اه ...ربنا يعينك ده انتى وراكى حاجات كتير"
يسرا"علشان كده قلت مش هبقى فاضية لكل ده مع الشغل كمان"
مصطفى"احنا على كلامنا يا صاحبى ...هشوف لك حاجة هناك"
ماجد"ايوه طبعا... واى حاجة ختى لو مش بالشهادة"
وبص لنغم
"انا ورايا خطوات كتير عايز ابدأها"
مصطفى"ربنا معاك...والله من غير ماتقول انا عارف"
يسرا طلعت ظرف من شنطتها
"خدى يانغم"
نغم"ايه ده"
يسرا"افتحى وشوفى"
فتحت نغم الظرف... وماجد بيتابعها بعينيه بفضول
نغم ابتسمت ابتسامة كبيرة اول ما فتحت الظرف قالت بفرحة
"الصور"
قرب منها ماجد وبص للصور اللى ف ايديها وهو بيبتسم بفرحة
مسكوا الصور وقعدوا يتفرجوا مع بعض وهما الاتنين مبتسمين
مصطفى"واحد صاحبى ف الاستوديو جاب لنا الصور قبل المعاد وجاب صوركم معانا لانه شافكم يومها وعرف انكم معانا"
ماجد"اه فعلا الصور كان لسه معادها بعد اسبوع"
مصطفى"خيرى عليك طول عمرى"
يسرا"انتو الاتنين زى القمر...الصور حلوة اوى...صح يا مصطفى"
مصطفى"اه حلوين اوى... وخصوصا الصورة بتاعة العين ف العين دى... اى حد يشوفها يعرف قد ايه بيحبوا بعض"
ماجد ونغم فى دنيا تانية وهما بيتفرجوا على الصور
دنيا رجعتهم لاحلى يوم قضوه مع بعض
يوم فرح مصطفى ويسرا
يسرا ومصطفى بصوا لبعض
"يالا يامصطفى.. علشان نلحق نروح المشاوير اللى ورانا"
واستأذنوا وقاموا ونغم وماجد ماسكين الصور
"عقبال صور فرحنا ياحبيبتى"
"يارب يا حبيبى"
"تعرفى انى فرحان اوى بالصور دى"
"وانا كمان...بجد ياماجد كانت فكرة حلوة اوى"
"لو عايزة تاخديهم خديهم خليهم عندك"
"لا ياماجد مش هينفع...خليهم عندك انت"
"اللى يعجبك ياحبيبتى"
"الا قولى صحيح...هو مصطفى بيقولك اشوفلك حاجة فين"
"فى السعودية لما يسافر"
"هتسافر يعنى"
"ماهو الشغل عند نجيب مش مستمر يعنى كام شهر وخلاص...وانا عايز اشتغل علشان اعرف اتقدملك بسرعة...ماانتى عارفة الظروف"
"طيب يا ماجد"
قالتها بزعل
"انتى زعلتى"
"مزعلتش علشان كلامك صح انما غصب اتضايقت لما فكرت اننا هنبعد عن بعض"
"انا والله ماعارف ممكن يبقى حالى ازاى فى بعدنا عن بعض...بس انا بعمل كده علشان نقرب اكتر لما اتقدملك ونتجوز بسرعة غير لما اقعد هنا ويبقى قدامى سنين"
"معاك حق"
كل واحد فيهم فكر ازاى هيكون ف البعد حاله... لحظات تفكير صامتة
وقطع ماجد الصمت
"بلاش نفكر من دلوقتى ف اللى يضايقنا...ياعالم هيلاقى لى شغل ولا لا"
ابتسمت نغم ابتسامة حزينة من تفكيرها الحزين
"هتيجى فرح نشوى؟؟"
"مش هينفع"
"ليه"
"هقول لبابا وماما ايه"
"انا نفسى تيجى تتعرفى على امى واختى"
"خليها فى وقت تانى"
"اللى يريحك يا نغم... نشوى كان نفسها تشوفك"
"وانا والله عايزة اشوفها...بص هقولك فكرة كويسة...انا يومها لو عرفت اخرج لاى سبب هجيلكم نص ساعة كده ابارك لنشوى وامشى على طول...اتفقنا"
"اتفقنا"

يوم فرح نشوى... استأذنت نغم انها رايحة مع يسرا تجيب حاجات لجهازها... وخرجت فعلا
واتصلت بماجد وهى عند القاعة
"الو... انت فين ياماجد... انا قدام القاعة... طيب مستنياك"
دقيقتين ونزل لها ماجد
"اهلا يا حبيبتى تعالى"
"ماجد انا مكسوفة"
"ليه ياحبى"
"اول مرة هقابل مامتك واختك... ولابسة لبس خروج عادى هيبقى منظرى وحش"
"انتى زى القمر ف كل الاحوال...وانا عارف انك مش قايلة انك رايحة فرح يبقى هتنزلى بلبس عادى اكيد...وبعدين يا حبيبتى نشوى عارفة وفاهمة وهى نفسها تشوفك انتى مش تشوف لابسة ايه"
"امرى لله... برضه هموت م الكسوف"
اخدها ماجد من ايدها ودخلوا الفرح
راح على مامته
"ماما... دى نغم زميلتى فى النادى"
الام"اهلا يا بنتى... نورتى"
نغم"ميرسى ياطنط...مبروك"
الام"الله يبارك فيكى يا حبيبتى...عقبالك"
قالتها الام وهى بتبص لها هى وماجد ومبتسمة بعد مافهمت ليه اول مرة ماجد يعرفها على واحدة من زميلاته
ردت نغم بخجل"ميرسى ياطنط"
رد ماجد
"ان شاءالله يا ماما... قولى عقبالنا"
زادت الفرحة على وش مامة ماجد.... وبصت لنغم
"يارب يسعدكم يا حبيبى...تعالى يانغم اقعدى جنبى"
ماجد"مش هينفع تقعد ياماما علشان مستعجلة... هتبارك لنشوى وتمشى على طول"
نغم"معلش ياطنط مرة تانية ان شاءالله"
الام"ان شاءالله ياحبيبتى"
اخدها ماجد وراحوا يباركوا لنشوى
فرحت بيها نشوى وسلمت عليها بكل ود وكأنها تعرفها من زمان
"مبروك يانشوى ربنا يتمم بخير"
"الله يبارك فيكى يانغم... انا مبسوطة اوى انك جيتى.. عقبالكم بقى وافرح بيكم يارب"
نغم وماجد وهما بيضحكوا
"يااااااااااارب"
ماجد"استنوا لما اصوركم مع بعض"
طلع ماجد موبايله وصور نغم ونشوى مع بعض
وطلب من كريم يصور ماجد مع نشوى ونغم

فاتت الشهور وماجد ونغم الحب بيزيد بينهم كل يوم عن اللى قبله
بعد 3شهور ماجد ساب الشغل عند نجيب لان الاسرة كلها كانت مسافرة وهيستقروا لفترة ف امريكا لظروف شغل نجيب
مرت على ماجد ايام زعل كتير بعد ماراح منه الشغل ده وكانت دايما نغم بتخفف عنه
ماجد دايما قلقان من ظروفه انهم تبعدهم عن بعض
ودايما نغم بتطمنه انها مش بتحب ولا هتتجوز حد غيره
بعد 6 شهور من سفر مصطفى... وكان بداية دخول الصيف
اتصل بيه مصطفى وقاله يخلص اوراقه فى اسرع وقت علشان يسافر... وان يسرا سافرت له من شهر وهما مستقرين هناك
وفيه شقة ايجار مصطفى حجزها لماجد فى نفس العمارة اللى ساكنين فيها مصطفى وماجد

الايام اللى ماجد بيخلص فيها اوراقه كانت نغم معاه كل يوم وف اغلب مشاويره
كل واحد فيهم مش عايز يضيع ساعة بعيد عن التانى
يوم السفر... كانت طيارة ماجد الساعة 4 العصر
وده ساعد نغم انها تصمم انها تروح معاه لحد المطار

فى المطار...هما الاتنين قاعدين مع بعض
"اول ماتوصل تكلمنى"
"حاضر... هبقى اكلمك كل يوم ... وانتى طول ماانتى فى البيت خليكى فاتحة النت واول مااعرف مواعيدى هقولك"
"حاضر...خلى بالك من نفسك ياماجد...هتوحشنى اوى"
دموع نغم... اثارت دموع ماجد
مسح دموعه بسرعه... ومسح دموع نغم
"مش عايز اخر حاجة اشوفها قبل مااسافر تبقى دموعك"
"غصب عنى ياماجد"
"انا عارف"
قالها وهو بيطبطب على ايدها...ابتسم لها وقال
" بصى قوليلى ايه رأيك فى دى"
طلع علبة صغيرة من جيبه...فتحها وطلع منها سلسلة دهب فيها نص قلب مكتوب عليه"لا اله الا الله"
"الله ياماجد...احلى حاجة انها منك"
"خليها معاكى يانغم حتى لو مش هتقدرى تلبسيها علشان مامتك وباباكى خليها معاكى وانا معايا النص التانى من القلب اللى فيه(محمد رسول الله) واهى حاجة تفتكرينى بيها"
"انا مش هحتاج حاجة تفكرنى بيك ...انت ف قلبى على طول"
نزلت دمعة من ماجد غصب عنه
مسحتها نغم وهى بتضحك بدموع
"يعنى انت بتقولى متعيطيش وتعيط انت"
"مش عارف يانغم هعمل ايه من غيرك"
"ربنا يصبرنا لحد مانبقى مع بعض على طول"
"خايف تكون دى اخر مرة نتقابل فيها"
قبل ما ترد نغم... سمعوا النداء لركاب طيارة ماجد
دموعهم الاتنين نازلة بصمت... ايديهم فى ايد بعض
"نغم... خلى بالك من نفسك ... اوعى تنسينى"
"كلامك غريب اوى ياماجد النهاردة... متقلقنيش عليك"
"متقلقيش...اللقا نصيب ويارب يجمعنا تانى على خير"
"ان شاءالله هتروح وترجع بالسلامة"
قبل ما يمشى ماجد...وقف وقرب من نغم
باسها من راسها... واستسلمت نغم لاحساسها
حضنها ماجد ... نفسه يدخلها جوه قلبه
وهى ف حضن ماجد...حاطة راسها على صدره
نفسها تفضل سامعه دقات قلبه ومتبعدش عن حضنه ابدا
سمعوا النداء الاخير لركاب الطيارة
بعدوا الاتنين عن بعض ببطء وعينيهم متعلقة ببعض
"هكلمك لما اوصل... لا اله الا الله"
"هستنى اتصالك... محمد رسول الله"
مشى ماجد فى طريقه وكل شوية يلتفت لنغم
نغم واقفة مكانها بتعيط وكل ما يلتفت لها ماجد يبتسموا لبعض ويكمل طريقه تانى
قبل ما يختفى عن نظرها التفت ليها... وقف لحظة
شاور لها بايده...شاورت له
واختفى ماجد عن نظرها... وخرجت نغم من المطار
بعد ما راح قلبها مع ماجد وسابها

هناك 30 تعليقًا:

  1. جمييييييييييييييلة اوووووي يا دينا بجد انتي رائعة

    ردحذف
  2. بجد مثرة جداااااااااااا
    انا حاسه انه هيحصله حاجة ربنا يستر بجد

    ردحذف
  3. جامده اوي
    Mima

    ردحذف
  4. رووووعه مش قادره اصبر حتى اعرف شو اللي راح يصير

    ردحذف
  5. انا عيطت بجد افتكرت حاجات كتير وحاسه هيحصله حاجه او هي هتجوز احساسي مش هيرجعو مع بعض تاني

    ردحذف
  6. Ha3ait Wrabna !! :/
    bs Na 7asSa an Maged Hay7salo 7aga :O
    Rabna Youstor b2a :3
    astamere ya Dina f Abda3atek :))

    Menna x)

    ردحذف
  7. ohhhh la bgd 7ram l wa7ed he3t :\
    w maGed dh 4aKlo he7sLo 7aGa RaBna YesToR
    w yret l part l b3deh plZzZzzZ bokra

    ردحذف
  8. راااائعة يا دينا كالعادة ^__^
    آلاء

    ردحذف
  9. حلوه جدااااااااااااااااااااااااااا
    تحفه والحب والاحساس راااااااااااائع

    ردحذف
  10. الحــلقــهـ حلوه آوى روعـه والله يـ ا/ ديــنــآ :)
    مــايســه

    ردحذف
  11. ربنا يستر علي اللي جاي ان شاءالله ..مش متفائلة خير :(
    didi makky

    ردحذف
  12. 7asa N maged hymoot aw heya hatmoot :'(

    NaDa

    ردحذف
  13. انا مش خيفا الا منك انت يا دينا

    ردحذف
  14. Alot of emotions there (^__^)
    N!!!!!!!Ce ;)

    ردحذف
  15. انا عندى احساس هترجعلها الذاكره ومش هتفتكره

    ردحذف
  16. Wo0o0o0o0o0o0oo0o0oW

    Waaaaaaaaaaaaaaaaaaaaaaaaaaaaa2 7lwa awiiii kmlyyy

    ردحذف
  17. تحفة بجد

    ردحذف
  18. فين الحلقه الجديدة

    ردحذف
  19. حلوه اوى بس انا مش عارفه ابطل عياط اعمل ايه انا بقى

    ردحذف
  20. بجد تحفة اووووووووووووووووووووووووووووووووى

    ردحذف
  21. حلوة اوووووووووووى

    ردحذف
  22. جامده اوي ومؤتره ع فكره

    :) :)

    ردحذف
  23. مؤثرة اوي يا دينا احساسك عالي اوي والله عيني كانت هتدمع دمتي مبدعة

    ردحذف
  24. مؤثرة اوي يا دينا احساسك عالي اوي والله عيني كانت هتدمع دمتي مبدعة

    ردحذف

قول رأيك بلاش تقرا وتقفل من سكات...ارائكم تهمنى