الخميس، 2 مايو 2013

ليست عذراء... الحلقة 14

الحلقة 14
مايا اول ما دخلت وقفلت الباب وراها...باباها سألها
"ايه يامايا...عملتى ايه...نادر كلمنى وسألنى هينفع تسافرى ولا لأ؟؟"
"لا قالى بلاش سفر ولا حركة كتير"
"طب وبعدين"
"سافر يابابا وهنبقى مع بعض ع التليفون"
"طيب هقوم اتصل بنادر واقوله انى هروح خلال الاسبوع الجاى"
"وانا من هنا هبقى اشوف اعلانات الشقق والمكاتب واشوف لو فيه حاجة مكانها وسعرها مناسب هبقى اقولك...هتطول؟"
"لا هشوف بس الشغل ازاى هناك واشوف عايزنى ليه واجى"
"ماشى"

قام فؤاد دخل الاوضة يتكلم... مايا بتقعد
خبط الباب...قامت تفتح
"تعالى ياعمتى"
"قفلتى الباب ليه"
مايا بتقعد
"انا عارفة... اقعدى"
"لا انا طالعة احط الحاجة ف التلاجة...هو مفيش حد هنا"
"بابا جوه بيكلم نادر ونينة مشفتهاش اكيد نايمة"
"طيب ...تصبحى على خير"

راحت ايمان ناحية الباب
سألتها مايا
"شفتى فارس"
التفتت لها ايمان وردت بتلقائية
"لأ..بتسألى ليه؟"
"فارس سافر"
رجعت لها ايمان وقعدت قدامها
"ايه..سافر فين؟"
"فرع الشركة ف السويس"
"اخص عليه مسلمش عليا...بس انتى عرفتى منين"
"وانا جاية قابلته ع السلم...يعنى كده كده مكنش هيقول لولا انى قابلته بالصدفة"
"وبعدين"
مايا بتتصنع عدم التأثر
"مفيش... اتكلمنا عادى ووريته صورة السونار وقلت له انها بنت"
"هااا"
مايا بتبص لها
"بصى ياعمتى انا هقولك اللى حسيته بس متعلقيش على اللى هقولهولك...بمعنى اصح متمسكيش عليه يعنى"
"قولى"
"قلبى وجعنى وحسيت ان فارس صعب عليا"
"وليه طيب العِند بقى"
مايا واحساس بالندم انها اتكلمت
"شفتى بقى...انا غلطانة انى قلتلك اللى حسيته... انا مش بعاند والله"
"اومال ايه"
مايا سكتت مترددة...بتحاول توصف اللى جواها
"انا ... انا خايفة من فارس...بقيت بخاف منه ياعمتى ...علشان كده بقولك زى ما قلتله ان كنا فشلنا كزوجين مش عايزة نفشل نبقى ام واب كويسين"
"فارس بيحبك"
"عارفة...بس الحب ده مشفعليش عنده ولا قدر يرحمنى "
وكملت كلامها وذكريات الليلة المشئومة قصادها
"فارس وجعنى اوى... وجعنى بقسوة... يمكن ألم جسمى خف انما ألم قلبى وكرامتى مخفش ..موجوعة اوى ياعمتى...اوووووى"
                         ********************

فارس ف العربية على طريق السفر
سرحان ف الطريق الممتد قدامه

غمض عينيه.... وتخيل

تانى يوم الفرح... الاهل عندهم بيهنوهم وفارس ومايا كل اللى بينهم نظرات حب وسعادة

فارس مع مايا بيحضروا الفطار مع بعض

فارس نايم وجنبه مايا بيبص لها بحب وهو صاحى

فارس مع مايا عند الدكتور واول خبر للحمل بيسمعوه مع بعض

فتح فارس عينيه من خياله على صوت فرقعة عالية
"ايه يا اسطى...حصل حاجة"
السواق وهو بيهدى
"الحمدلله...الكاوتش فرقع بس ربنا ستر...حالا هغيره"
                       *********************

مايا بتتكلم ف التليفون
"حمدالله ع السلامة يابابا... انا كويسة الحمدلله... لا ملقيتش حاجة مناسبة... انت فين دلوقتى... يعنى نادر وصلك الاوتيل ومشى... ماشى ابقى عرفنى عملت ايه...مع السلامة"

قفلت مايا مع فؤاد... مسكت بطنها وهى بتمدد على السرير وبتحط اللاب جنبها وبتفتحه

دخلت على مواقع العقارات بتتفرج
اتفتح قدامها رسالة من نادر
"صباح الخير يامايا"
"صباح النور"
"ايه عاملة ايه"
"الحمدلله... لسه بابا مكلمنى وقال انك استقبلته ف المطار ووصلته"
"اه فعلا لسه سايبة من شوية... كنت اتمنى انك تيجى معاه"
"معلش ظروف"
"انا ممكن اسألك سؤال احرجت انى اسأله"
وقفت مايا لحظات مش عارفة ترد بعد ما حست بالسؤال
"لو مش عايزانى اسألك بلاش"
"عايز تسألنى على ايه"
"الاول قوليلى...متضايقة اننا بنتكلم"
"لأ..اتضايق ليه"
"يعنى علشان كل كلامنا قبل كده كان قليل اوى وفين وفين لما اعرف اكلمك"
"كل الحكاية انى مبقدرش اقعد ع النت كتير"
"صحتك عاملة ايه"
"الحمدلله"
"سؤالى... انتى ايه حكايتك"
"حكايتى؟"
"اه... كل اللى اعرفه انك مطلقة من اول شهر جواز...صحيح؟"
"صحيح"
"مش غريبة"
"النصيب بقى"
"انا اسف واضح انك اتضايقتى"
"مش موضوع اتضايقت...بس فيه حاجات ممكن تحصل تكون غريبة بس اهى بتحصل "
"معاكى حق... وياترى ابو البيبى عارف انك حامل"
"اه طبعا...ابو البيبى يبقى ابن عمتى"
"والله؟؟ مكنتش اعرف"
وقصدت مايا تغير الموضوع
"انا بدور حاليا على مكان مناسب للشركة"
"تمام ربنا يوفقك ...انتى هتولدى امتى"
"لسه 4 شهور"
"عايزين نكون بدأنا شغل"
"ربنا ييسر الامور ان شاءالله"
"هتقعدى تانى امتى...ابقى خليكى اون لاين لما تكونى موجودة"
"لما اكون قاعدة"

دخلت ايمان على مايا الاوضة
"بعد اذنك يا نادر...هقفل دلوقتى"
"اوك... سلام"
قفلت مايا مع نادر... وقفلت اللاب كله
"ايه بتعملى ايه"
"مفيش"
"مالك"
"حاسة الايام بتعيد نفسها"
"ازاى"
"فاكرة بعد ما خلصت الدراسة وكله انشغل بابا سافر ونسرين اتجوزت وانا بقيت لوحدى... حاسة بنفس الاحساس تانى"
ايمان بقلق
"قصدك ايه"
حست مايا بقلقها فاتكلمت بنبرة متفائلة الى حد ما
"مفيش... انا دلوقتى احسن كتير... على الاقل مشغولة ببنوتى..مش هننزل نجيب لها الهدوم"
"اى وقت يا حبيبتى نزل نجيب لها الهدوم"
                      ***********************

مايا وايمان مع الجدة ف البيت
بتتفرج على الهدوم اللى اشتروها
مايا بتوريها كل حاجة بفرحة

فارس قاعد ف اوضة بسيطة
ممدد على السرير وبيبص على صورة السونار بابتسامة

مايا ف اوضتها... على السرير
سرير الاطفال الجديد جنب سريرها
بتفتح اللاب...بتلاقى رسايل كتير من نادر
بتدخل اون لاين وترد عليه... ويكون مستنيها
وتبدأ محادثة بينهم

فارس بيقلب ف صور مايا اللى على موبايله
صور كتير ليها لوحدها وليهم مع بعض بعد الخطوبة
وصور قليلة ليهم ف الفرح
                      
فارس يخرج من الصور... ويقلب ف الاسماء
يقف عند اسم مايا بتردد... صباعه ما بين زر الاتصال او زر الخروج... حيرة وحنين

يحسم حيرته رنة الموبايل ف ايديه...ويرد
"الو.. ازيك يا ماما...لا صاحى..الحمدلله كويس...باكل متقلقيش... اه والله كويس... لا لسه مش دلوقتى...هبقى انزل اسبوع كل شهرين... مش بعيد ولا حاجة يفوتوا بسرعة... ماما... بتسألى على مايا؟؟ ابقى اسألى عليها وطمنينى... خليكى قريبة منهم ... مع السلامة"
                     **********************

خلال الشهرين التاليين

بعد فؤاد ما رجع...عرضت عليه مايا الاماكن اللى شافتهم مناسبين
وكانت طول الفترة اللى فاتت بتتكلم يوميا مع نادر وبتبعت له كل حاجة تختارها ويتناقشوا فيها

اختاروا شقة كبيرة ف عمارة ف وسط البلد
بدأوا توضيبها... وكان نادر معاهم على التليفون دايما
سواء فؤاد...او مايا
                    ***********************

مايا قاعدة مع ايمان وحياة والجدة
حياة"ابقى خلى بالك يامايا ومتتتعبيش نفسك"
مايا"انا تقلت تقل ياعمتى... بقيت لوعايزة اروح الشركة افضل يومين اقول هروح كمان شوية هروح كمان شوية وفين وفين لما اقدر انزل..ربنا يهون خلينى اخلص بقى"
ايمان"هانت اهو"

توفيق طالع ع السلم...بص جوه الشقة بتكشيرة
"سلامو عليكو"
وطلع من غير ما يستنى رد
قامت حياة بعد ما شافته
"اما اطلع احضر له الغدا... فارس بعد ما قال جاى بكرة قال جاى بعد 3 ايام...الولا وحشنى"
الجدة"ده معندوش دم...الولا يسافر من غير ما يقولى"
حياة"والله ياماما ما قالنا الا ليلتها...يالا ربنا يجيبه بالسلامة"

تقوم حياة تطلع ورا توفيق
مايا"هو احنا مش اتغدينا من شوية... انا جعانة كده ليه"
الجدة"ياختى كلى بالف هنا"
ايمان وهى بتضحك قامت دخلت المطبخ
رن الموبايل وهو جنب مايا...
"رقم غريب!!"
ردت"الو"
ركزت تتحقق من الصوت
"مين...نادر؟... ازيك عامل ايه...الحمدلله كويسة... لا بابا ف الشركة مش موجود... بتقول ايه؟؟ جيت امتى؟؟ مقلتليش يعنى... لا اكيد مفاجئة حلوة...حمدالله على سلامتك... روح لبابا هتلاقيه هناك...قاعد لحد بالليل... هقولك العنوان... مش لازم يعنى... طيب ساعة كده بالكتير ...مع السلامة"
ايمان بترجع من المطبخ وتحط صينية اكل قدام مايا
"ايه هو نادر جه ولا ايه"
"اه...وبيقولى عايز يروح الشركة وهييجى ياخدنى"
الجدة"وانتى قادرة تروحى"
مايا"ولا قادرة ولا حاجة وقلت له اوصفلك العنوان مرضيش... هاكل واقوم ألبس"
                         *******************

نادر قاعد ف العربية مستنى مايا
مايا بتخرج م البيت...بتركب معاه
بيسلم عليها وهو بيضحك بعد ما تركب
"ازيك يامايا"
"حمدالله ع السلامة...بتضحك على ايه"
"شكلك متغير خالص هههههه"
ابتسمت وهى بتبص لبطنها
"يتغير...خدنا ايه من الجمال يعنى"
"لا معلش حاسبى ... زى القمر برضه"
سكتت مايا ومردتش عليه
"بابا عارف انك جيت ولا لا"
"لا مكلمتوش ...كلمتك انتى بس"
مايا اتكلمت بجدية
"هى مراتك مبتجيش معاك"
"ليه"
"ابدا...هى وراها شغلها هناك مينفعش تسيبه"
"انت كنت قلتلى انها عارفة انك هتفتح فرع هنا"
"اه عارفة... ومعندهاش مشكلة.. مراتى عقلانية اوى ...اوى يعنى لدرجة الغاء المشاعر"
"متهيألى ممكن نعمل الافتتاح قريب...انت قاعد قد ايه"
"قاعد معاكم شوية"
"كويس نبقى نعمل الافتتاح ونبدأ شغل ان شاءالله...احنا قربنا الشركة هتلاقيها على الناصية الجاية"
"المكان حلو اوى"
"اه والمكان كبير من جوه...هتعجبك اكيد"
                      ********************

مايا قاعدة ف اوضتها..دخلت لها ايمان
"حبيبتى صاحية"
"اه ياعمتى...نزلتى امتى مش طلعتى تنامى"
"بصى بقى... بعد ماخلاص طلعت ع السرير وهنام...حسيت انى عايزة اتكلم معاكى ولو استنيت للصبح ماما بتبقى قاعدة معانا وساعات حياة بتنزل مش هعرف اتكلم معاكى"
"ايه ياعمتى...فيه سر ولا ايه"
"انا ملاحظة كده كلام كتير بينك وبين نادر...تليفونات ونت واول ماجه انتى اول واحدة كلمك...ده حتى مراحش لامه"
"عادى ...شغل"
"عليا يا مايا... قوليلى ايه الحكاية"
"بصى...هو النهاردة لما جه اخدنى"
"هااا...ايه؟"

هناك 47 تعليقًا:

  1. ههههههههههههههه دايما بتقفل علينا فى مواف تحفة

    ردحذف
  2. جامده طبعا ملهاش حل بس عايزين نعرف قالها ايه؟؟؟ مستنين الحلقه الجايه ان شاء الله

    ردحذف
  3. لا بجد يا دينا كدا مش ممكن احنا متنا من السهر عشان تعلقينا كدا الله يسامحك كنتى طوليها شوية

    ردحذف
  4. الحلقة رائعة ومشوقة جدا تسلم ايدك

    ردحذف
  5. حلووووووووووووووووووووووووه بس مش حاسها طويله ولا حاجه زى كل حلقه

    ردحذف
  6. لالالالالالالالالالالالالالالالالالالالالالالالالالالالالالا نااااااااااااااادر لااااااااااااااااااااااا :( :(

    ردحذف
  7. حلوووووووووة تسلمي

    ردحذف
  8. بس الحلقة حلوووة اووووي

    ردحذف
  9. جمييييييييييييله الحلقة يا دينا..وكده بقت مشوووقه اوووى

    ردحذف
  10. حرام عليكي القفله دي بجد :/ :/

    ردحذف
  11. لييييييييييييييييييييه كدة بس الحلقة صغيرررررررررررررة والله اهئ اهئ بطلت العب

    ردحذف
  12. قصييييييييره

    ردحذف

  13. ايه ده مش كبييرة خالص :( بس حلووووووووووة جدا تسلمى يا دوندون :* :*

    ردحذف
  14. جامده اوى الحلقه بس ها ايييه بقى ؟؟؟
    تسلم ايدك بجد قصصك روعه

    ردحذف
  15. لييييييييه كدا دي قصيره مووووووووووووووووووووت :(

    ردحذف
  16. جمييييييييييييله

    ردحذف
  17. الحلقه جميل اوي بس وجود نادر مش مريحني وشكلوا بيحاول يقرب منها اوي مع انوا متجوز و في نظري فارس مغلطش عشان يتحمل كل دا و اي راجل هيكون ف مكانوا كان هيعمل كدا واكتر وكان لازم تراعي دا وتسامحوا زي ماسمحها واكبر جزء ف المشكله هو سكوتها ليوم الفرح لو قالت كان الوضع تغير

    ردحذف
  18. الحلقه جميل اوي بس وجود نادر مش مريحني وشكلوا بيحاول يقرب منها اوي مع انوا متجوز و في نظري فارس مغلطش عشان يتحمل كل دا و اي راجل هيكون ف مكانوا كان هيعمل كدا واكتر وكان لازم تراعي دا وتسامحوا زي ماسمحها واكبر جزء ف المشكله هو سكوتها ليوم الفرح لو قالت كان الوضع تغير

    ردحذف
  19. الحلقه جميل اوي بس وجود نادر مش مريحني وشكلوا بيحاول يقرب منها اوي مع انوا متجوز و في نظري فارس مغلطش عشان يتحمل كل دا و اي راجل هيكون ف مكانوا كان هيعمل كدا واكتر وكان لازم تراعي دا وتسامحوا زي ماسمحها واكبر جزء ف المشكله هو سكوتها ليوم الفرح لو قالت كان الوضع تغير

    ردحذف
  20. لا يادينا الله يخليكي عايزة فارس يرجعلها صعبان عليا اوي اوي ونادر دا مش طايقة امه

    ردحذف
  21. حلوه قوى الحلقه بس مافيش اطول من كده شويه
    اصل بصراحه الطمع صفه بشريه واحنا بشر
    ياريت تبقي الحلقه اطول من كده

    ردحذف
  22. اووووووووف اييييييييييييييييييه بقققى

    ردحذف
  23. لا كده مش نافع قصيرة اووي الحلقة الجاية لو جت متأخر هرتكب جناية

    ردحذف
  24. حلوة اوى يا دينا
    يا ترى نادر قالها ايه اوعى تقولى هيطلب ايدها

    ردحذف
  25. قصيرة أوى :/

    ردحذف
  26. مايا لو حست باي مشاعر ناحيه نادر ده تبقي انسانه مش محترمه ومتستهلش حب فارس ليها اي قله الادب دي انتي هتعصبينا ليه

    ردحذف
  27. لالالالالالالا مينفعش النهايات دي مش كل مره بقا بجد وااااااااااااااااااااااااااااااااو

    ردحذف
  28. ايه الزفت دة الله يخربيتك يا نادر يا دينا بقى مينفعش لازم مايا وفارس يرجعوا لبعض

    ردحذف
  29. رووووووووووووووووعة

    ردحذف
  30. ها إية ؟؟؟؟؟؟؟؟؟؟؟؟واله روعة تسلم إيدك يا أحلى أستاذه أنتى بجد فنانة

    ردحذف
  31. راااااااااااااااااااااااائعة يا دودو تسلممممم ايدككككككككك يلا شوقنا اكتر شووقنااااااا...شوقنا اكتر ما اشتقناااااااا :D

    ردحذف
  32. الحلقة حلوة مووووووووووووت ي دينا
    مش قلتلك ان نادر وراه قصة بس ربنا يستر

    ردحذف
  33. لا بقى حد يموت نادر دا :@

    ردحذف
  34. لالالالالالالالالالالالالالالالا دودو بليز كملي بقي
    والحلقه فوق الروعه

    ردحذف
  35. مش عارفة ليه يا دينا مش حابه العلاقة الى بين نادر و مايا مش حساه الانسان الى يستهلها بجد وانه لجا ليها لان مراته مشغوله والسلام مش اكتر وشايفة كمان ان فارس اخد عقابه وزياده يارب يرجعوا لبعض
    dentist aya

    ردحذف
  36. يادينا عشان خاطرنا ابعدي نادر عن الموضوع خالص دا شكله واد زباله لانو متجوز وبيلعب
    بانسانه تانيه
    الحلقه روعه مستني الاجدد

    ردحذف
  37. الحلقه جامده يا دينا واشطه مايا بدات تتعلق بنادر وحاجه زفت

    ردحذف
  38. كنتى طولى الحلقة اكتر من كده يادينا بس حلقة جامدة طحن

    ردحذف
  39. مايا دي قليلة الادب وتستاهل الحرق بجاز
    ايه البنات التعبانة دي

    ردحذف
  40. لااااا نادر ايه ده .. انا مش عايزاها تتجوز نادر عايزاها ترجع لفارس بقاااا كفايه لحد كدا

    nousa

    ردحذف
  41. الحمد الله انها ادت فرصة تانية لفارس و الحمد الله و لو كانت اتجوزت نادر دا مكنتش هتكون سعيدة خصوصا انو قلبها متعلق بفارس و غير كده لو الواحد واقف للناس على الواحدة و الغلطة الواحدة كنا متنا و علفكرة اما كانت في المستشفى دا كانه اشارة من ربنا اما فارس اتبرع بالدم و اما شافت البنت الصغير اللي اغتصبها جوز امها

    ردحذف
  42. تحفففففففففة بجد تسلم ايدك يا دينا

    ردحذف
  43. انا مغلطه فارس اوى لازم يحس بغلطه كويس اوى قبل ما ترجعله ومايا عندها حق ازاى هتقبل تقعد مع راجل بالوحشيه ديه
    مينفعش بكل بساطه بعد ما شافت ليله سوده انها ترجعله

    ردحذف
  44. ايه نادر دا كمان :-(

    بس الحلقه جامده

    ردحذف

قول رأيك بلاش تقرا وتقفل من سكات...ارائكم تهمنى