الحلقة 10
"زعلانة علشان مش هنعمل فرح؟...والله لو كنت اقدر كنت عملتلك احلى فرح"
"يا طه انت فرحتى...وبعدين هنعمل فرح وتعزم اصحابك ومعارفك ويلاقوا عروستك من غير اهل؟...خلينا مداريين كده احسن"
"مقصدش والله..انا بس تجهيز البيت بسرعة كده اخد كل اللى حيلتى وماما ساعدتنى ومش عايز اطلب منها تانى"
"انا عارفة كويس انك متقصدش...ياطه انا فاهماك من غير ما تتكلم... وزى ما قلتلك انت فرحتى مش الفرح والهيصة"
"ربنا ما يحرمنيش منك... ان شاءالله هنكتب الكتاب واسبوعين تلاتة بالكتير ونتجوز"
"ان شاءالله...عايزة اسألك على حاجة كده"
"اسألى"
"هتعزم ابلة فاتن ولا لأ؟؟ يعنى علشان اللى حصل بينها وبين مامتك ف الدار"
"لازم اعزمها ان شاءالله"
"طب مش تقول لمامتك الاول"
سكت طه لحظات يفكر
"شايفة كده؟"
"اه علشان مامتك متتفاجئتش وتعمل مشكلة"
**********************
طه داخل البيت...نرجس بتحط العشا ع السفرة
"يالا ياطه... اغسل ايدك وتعالى"
"البنات فين"
"جوه ف الاوضة"
"ماما... انا هعزم فاتن ف كتب الكتاب"
التفتت له واتغيرت ملامحها
"لأ...متعزمهاش"
"ماما انا بقولك هعزمها مش بقولك اعزمها ولا لأ"
وزعقت نرجس
"جرى ايه يا طه... هو انت يابنى شريك مخالف وخلاص مش كفاية الجوازة اللى غصب عنى كمان... كمان هتجيبلى فاتن اللى بتكرهنى"
"اصول ولا مش اصول...يعنى اختى الكبيرة متحضرش كتب كتابى؟؟ وبعدين الحكاية كلها ساعة هنكتب الكتاب وخلاص"
نرجس بنرفزة وهى ماشية
"اعمل اللى انت عايزه"
***********************
فى قاعة كتب الكتاب
قاعة بسيطة... واسعة فيها كراسى على شكل صفوف
وفى المقدمة ترابيزة طويلة... وعلى يمين القاعة كنبتين جنب بعض للعروسة والعريس
عالية قاعدة... لابسة تايير بيج وطرحة ملفوفة لفة بسيطة وميك اب بسيط...رغم بساطته الا ان النور اللى بيشع من وشها زادها جمال على جمالها
هدير واقفة جنبها... لابسة عباية سودة مطرزة
نرجس ونرمين ومها قاعدين ف الصف الاول من الكراسى
ال3 لابسين فساتين وطرح سواريه وميك اب يناسب ملابسهم
طه واقف بيسلم على اصحابه وزمايله ف الشغل اللى بيباركوله بعد كتب الكتاب
دخلت فاتن وميار القاعة...وراحوا على طه وعالية
سلمت فاتن على طه وباسته
فاتن"مبروك يا طه"
طه"الله يبارك فيكى اتأخرتى كده ليه"
فاتن"كنت جاية من بدرى والله بس حصلت ظروف كده عطلتنا"
طه"خير"
فاتن"لا خير مفيش حاجة... ميار بنطلونها اتقطع فرجعنا البيت غيرت وجينا"
ميار"مبروك ياخالو"
طه"الله يبارك فيكى يا حبيبتى عقبالك"
سلمت فاتن على عالية وهدير اللى فرحوا لما شافوها
نرمين لما شافت فاتن مالت على نرجس
"الحرباية اهى"
مها"هى ادى اختك؟"
نرمين"خوت يخوتها...هى"
نرجس بتبص بعيد عن فاتن
نرمين وهى بتغمزها ف دراعها
"جاية علينا"
بصت نرجس شافت فاتن جاية
وقفت فاتن قصادها...مدت ايدها تسلم
"مبروك"
نظرة خاطفة بصت فيها نرجس لطه...لما شافته بيبص لها
مدت ايدها ببرود
"الله يبارك فيكى"
سلمت ميار على نرجس من غير ماتتكلم..وسلمت عليها نرجس بنفس البرود
سلمت فاتن على نرمين وباستها...وراحت قعدت على كرسى بعيد عنهم ف صف تانى
نرمين مكشرة وبتسلم بنفس الطريقة اللى سلمت بيها نرجس
قربت ميار من نرمين...وبكل ود وابتسامة واسعة
"ازيك يا نرمين... عاملة ايه"
"كويسة"
"اتغيرتى كتير عن اخر مرة شفتك فيها...بقيتى زى القمر"
نرمين بسخافة
"والله؟؟ وانا الاول كنت وحشة مثلا"
ارتبكت ميار
"مقصدش انا..."
"خلاص خلاص...روحى اقعدى"
حست ميار بالاحراج...راحت بسرعة جنب فاتن
واول ما وصلت مقدرتش تمسك دموعها لحد ما ترجع البيت
مها ونرمين بيبصوا عليها ويتوشوشوا ويضحكوا
فاتن"بتعيطى ليه"
"نرمين بتكلمنى بطريقة وحشة اوى ياماما ..والله ماقلتلها حاجة"
"معلش ماهى طالعة لامها..متعيطيش معلش علشان عالية وطه"
حاولت ميار تسيطر على نفسها...مقدرتش
"احنا قاعدين ليه...قومى نمشى"
**********************
طه وعالية قاعدين على ترابيزة ف كازينو
الترابيزة ف جنب بعيد عن الزحمة
قاعدين جنب بعض على كنبة والجرسون بيشيل الاطباق
طه ماسك ايد عالية
"مبسوطة؟"
"اوى اوى"
وبصت عالية ف الساعة
"طه الساعة بقت 1 مش كفاية كده"
"زهقتى؟"
"لا طبعا...انا مش ممكن ازهق وانا معاك"
"خلاص خلينا قاعدين شوية كمان"
"خلينا... بدل هتبقى مبسوط... يبقى خلاص"
*********************
طه داخل البيت... الساعة 3
اول ما قفل الباب سمع صوت نرجس
"ما لسه بدرى"
اتخض من صوت نرجس اللى طلع فجأة
"ماماااا!!"
"ايوه ماما اومال عفريت...كنت فين ياطه كل ده"
"كنت بتعشا انا وعالية"
"عشا ده ولا سحور"
ضحك طه
"مش معقول تكونى هتزعقيلى علشان اتأخرت"
"لا ...انا متغاظة من اللى اخدتك مننا من اول يوم دى... اللى ما قلت تعالى يا ماما انتى واختى اتعشوا معانا"
"انا اسف...فاتتنى والله...حقك عليا ملحوقة..بكرة نتعشا كلنا مع بعض"
"مش لما تقول للهانم اللى مرضتش تخليك تاخدنا معاكم النهاردة"
"والله ولا جبنا سيرتكم خالص"
"طبعا من لقى احبابه نسى اصحابه"
قرب منها طه وهو بيحضنها واخدها وداخل على اوضتها
"هو فيه حد يقدر ياخدنى من احلى ام ف الدنيا... كل اللى انتى عايزاه هعملهولك...ايه اللى يرضيكى"
وصلوا على باب اوضتها
"متبعدش عنى"
باس راسها
"انا مقدرش ابعد عنك...هو انا عندى كام نرجس يعنى...يالا ادخلى نامى علشان عندك شغل الصبح...تصبحى على خير"
"وانت من اهله...بقولك يا طه"
"نعم"
"انت اديت لها مفتاح؟"
"اه"
"وانا؟؟"
"عايزة مفتاح ليه"
"ليه يعنى ايه... افرض عايزة اجيب حاجة واوديها هناك ولا مليش حق ف بيت ابنى"
"لا طبعا ليكى... ثوانى"
وطلع طه ميدالية مفاتيحه
"اتفضلى"
**********************
عالية وهدير بيفتحوا باب الشقة
دخلوا لقوا مها ونرمين قاعدين على الانترية وشايلين من عليه الورق وبياكلوا شيبسى وشيكولاته وحاطين كانزات على ايد الكنب
استغربوا الاتنين...ودخلوا
عالية"اهلا يا نرمين... اهلا بيكم منورين"
نرمين"هو طه عارف انك جاية؟"
عالية"اه... ليه؟"
نرمين"بسأل...بلاش؟"
عالية"لا عادى...بس انتم جيتوا هنا ازاى"
مها"مع طنط...اصل معاها مفتاح وجينا نساعدكم"
اتلون وش عالية من الضيق
وجت نرجس من الاوضة
"انتى فين هدومك؟؟"
عالية متفاجئة"هه"
نرجس"فين هدومك... الدولاب فاضى"
عالية"لسه مجبتش"
مها ونرمين ضحكوا...بصت لهم عالية مستغربة
ردت هدير عليهم"كده عيب على فكرة"
نرجس"بتقولى لمين عيب؟؟"
هدير"حضرتك اسألينى بقول عيب ليه الاول"
نرجس"نعم ياختى... هتقوليلى اقول ايه ولا مقولش ايه...انتى مين اصلا ولا تقربى لنا ايه علشان تتكلمى"
عالية"هدير اختى"
نرجس"اختك منين... والله ما انا عارفة ارميتوا علينا من انهى داهية"
هدير عيطت...وراحت ع الباب...راحت وراها عالية ونزلوا
*****************
هدير وعالية ف ميكروباص
هدير بتعيط وعالية بتهديها
"انا اسفة ياهدير...انا السبب ... متزعليش علشان خاطرى"
"وانتى ذنبك ايه...هما اللى قللاة الادب ومعندهمش تربية"
"هو انتى قلتى لهم عيب على ايه؟"
*******************
نرجس بعد ماعالية وهدير نزلوا
مسكت التليفون واتصلت بطه
"الو... ايوه يا طه... شفت مراتك عملت فينا ايه؟؟ البت دى مش سهلة ... مش هى لوحدها دى التانية كمان صاحبتها دى ولا اختها ولا ابصر ايه... انا عارفة تلاقيها هتتصل بيك وتنزلها دمعتين علشان تتسهوك عليك... وانا اللى قافلة المحل علشان اساعدها... متستاهلش والله... والله يا طه لو ما جبتلى حقى لا تبقى ابنى ولا اعرفك ولا دخلة لك بيت...ابقى اشبع بيها بقى واخسر اهلك علشانها"
قفلت نرجس مع طه وبعصبية
"يالا...لموا زبالتكم دى وقوموا هنمشى"
*********************
عالية وهى ماشية مع هدير
الاتنين ماشيين بدموعهم... ومكسورين
وصلوا عند العمارة اللى فيها هدير
"اطلعى معايا"
"لا هرجع الدار"
"مش هتكلمى طه تحكى له"
"مش عايزة اعطله وهو ف الشغل..لما يخلص هيتصل بيا واحكى له"
سلموا على بعض...حضنوا بعض اكتر...دمعوا تانى
"متزعليش منى ياهدير...انا مليش غيرك"
"مش زعلانة منك...انا خايفة عليكى منهم يا عالية...مستقويين اوى"
"ربنا موجود"
*******************
عالية قاعدة مع فاتن ف المكتب...وبتعيط
"متزعليش ياعالية... انتى عارفة انها صعبة... اكيد طه هيجيبلك حقك"
رن موبايل عالية...ردت بسرعة وهى بتقول لفاتن انه طه
"الو... انا ف الدار... طيب مستنياك...مع السلامة"
سألتها فاتن"ايه؟؟"
عالية باستغراب
"صوته متغير وسألنى انا فين قلت له وقالى جايلك وقفل على طول"
فاتن ف سرها
"ربنا يستر ومتكونش نرجس قلبته عليها"
*********************
دخل طه المكتب عند فاتن...وباندفاع قبل ما يقعد ولا يسلم
"ايه اللى حصل ده ياعالية... انتى زعلتى ماما ونرمين ليه بالطريقة دى وهدير ازاى تتدخل فى اللى مالهاش فيه"
عالية باستغراب وارتباك
"انت فاهم ايه؟؟ اسمع منى الاول"
قعد طه
"سمعينى"
قامت فاتن وهى بتطبطب على كتف طه
"هبعتلك لمون يا طه وهستناكم ف الجنينة"
خرجت فاتن من المكتب...بدأت عالية تحاول تجمع كلامها
"الاول ...انت مقلتليش ليه ان مامتك رايحة"
"مقالتليش...ومهياش محتاجة تاخد اذن منك ياعالية"
"مقلتش اذن ...انا بس اتفاجئت"
"المفاجئة متسمحلكيش انك تتعاملى معاهم على انك صاحبة البيت وهما مالهمش فيه"
"والله ما عملت كده... مع انى اول مادخلت لقيت اختك وصاحبتها قاعدين ياكلوا ويشربوا حاجة ساقعة وحطينها على الانتريه... متكلمتش والله بالعكس رحبت بيهم"
"وبعدين"
"مامتك جت من جوه...ومن غير لا سلام ولا اى حاجة لقيتها بتقولى فين هدومك"
"كانت عايزة ترتب الدولاب لانها اخدت جزء من هدومى ورتبته هناك... هدير تزعق مع نرمين ومها ليه"
"مها دى ايه اللى جايبها طيب يا طه"
"بصى ...مها ونرمين مبيفارقوش بعض ودى حاجة مش هتغيريها"
"حاضر...مش مهم... بس المهم ان اختك لما مامتك سألتنى على الهدوم وانا قلت لسه مجبتش قامت قالت لصاحبتها قال يعنى هى هتجيب حاجة...فهدير ردت عليها قامت مامتك مزعقة لها"
"والمفروض انى اصدق ان كل اللى حصل علشان الهيافة دى"
اتفاجئت عالية
"يعنى انت مش مصدقنى؟"
"بقولك ايه ياعالية... انا مش من اول يوم هلاقى مشاكل بينكم... مهما حصل متنسيش ان دى امى واللى يرضيها يرضينى واللى يزعلها يزعلنى"
"والله ما زعلتها...ده هى اللى طردت هدير"
"هى ليها ف بيت ابنها انما صاحبتك ليها ايه عندنا"
عالية بتبص له كأنها شايفة واحد تانى...كمل طه كلامه
"قومى معايا تروحى تراضى ماما وتخلصى المشكلة دى وهدير اللى هتعمل مشاكل... بلاش منها"
حلوة بس الحلقة قصيرة اووووووووي :)
ردحذفيالههههههههههههههههوي على الرجاله وهو انا بقيت اكرهم من شوية ايه التغير المفاجئ ده وانا الي لسه كنت بقول عليه راجل طلع بتاع امه صحيح
ردحذفعندك حق دة بتاع مامته ورخم كمان
حذفاه رخم اوووووووووووووووووووي كدة
حذفعندك حق انا كمان حساسه انى مامته بتلعب بيه وحتخرب الجوازه والحب طول ماهى بتغسل دماغ الواد
حذف"manar"
يا ربي كلهم واحد جتهم وكسة ،يعمل فيها عنتر قبل الجواز وبعدين يقلب و يبأى عباة،.جتكو الأرف مليتو البلد
ردحذفاصدي عبلة
ردحذفايه ده ايه ده هو من اولها هيصدق امه ؟؟؟؟؟ بجد حرام عليه
ردحذفنرجس و مها و نرمين دول يارب يروحوا في داهية
الحلقة تجنن يا قمر :)
جمييييـلة أوووي الحلقــةة
ردحذفتحفة بجد ومستنية الحلقة الجاية علي نااااااااااااار
ردحذفالحلقه روعه اوي
ردحذفمنك لله يا نرجس بس يعني طه مش عارف مامته ؟
ردحذفعشان كده كان بيقول لفاتن انها طيبه و مش عارف هما كده ليه
يلا ان شاء الله الامور تتصلح
نرجس ومها ونرمين دول مستفزين جدا ربنا يستر عليكي ياعاليه منهم
ردحذفياريتها تقولوا انها مش عايزة ترجع معاه
ردحذفده بقى وحش اوى
ترميله الدبلة وتمشى
وهو بعدين هيرجعلها
ويارب نرجس دى تموت بقى ولا يحصلها مصيبة ونخلص من قرفها هى وبنتها
حلوه اوووووووي الحلقه تسلم ايدك
ردحذفايه ده المفروض اتشل انا الوقتي لا انا مش عايزه اخد عن طه فكره وحشه بجد حسيته كويس اووي من الاول
ردحذفمش هعلق لاني اتضايقت اووووووووووووووووووووووي
ردحذفهئ هئ هئ هئ هئ
ردحذفهو لية عمل كدة حرام عليه اوي
ومامته دي رخمة جدا
بس الحلقة قصيرة جدا
نرجس دي بتفكرني بتوفيق
ردحذفحاجة كدة استغفر الله العظيم انا لو مكانها كنت قلت لطه (طلقني )
يانهار ازرق طه عمل كده ليه ؟؟دانا جايلى عريس وكنت هوافق عليه شكلى كده هعيد تفكيرى تانى الرجاله ملهمش امااااااااااااان
ردحذفيخربيت كده يعني كمان طه هييجي ع البت الغلبانة ديه حاجة تفرس
ردحذفطيب انا عايزه اسال سؤال وياريت حد يجاوبنى
ردحذف"مقوله كله الا رضى الوادين " ينطبق ع الست اللى اسميها نرجس دى
يعنى طه لو اتحط فى موقف انه يختار بين مراته وامه واختار مراته ربنا يكون مش راضى عنه ولا ايه عايزه افهم
اووووووووووووووبس من اولها كدااااااا بجد ربنا يسترررررررر مش مرتاااااحة انا نرجس دي رخمة اووووووووووووي
ردحذفمن اولها نهارررر اسةووووووووووووووووووووووووووووووووح ليه يا طه هتخلينى اكره الرجاله اكتر منا بكرهم
ردحذفايموشن متعصب وع اخره بجد
ردحذفحلووووة اوي الحلقه مستنيه الحلقع الجديدة علي ناااااار
ردحذففعلا طه طلع بتاع امه مالو اتغير كدة ليه دانا لسه بقول عليه كويس غير فكرتي عنو
ردحذفحلوة بس طبعا انا محبطة كان لازم يحميها ويكون سندها من الاول والا كان يابها بكرامتها هى مش هتتجوز علشان تتبهدل
ردحذفايه حرقه الدم دى بفى ست مستفزه كتها الارف
ردحذفيالهوي ياني على نرجس ومها ونرمين يحرقهم الحلقة حلوة اوي
ردحذفنعععععععععععععععععععععععععععععم مين نرجس ده ده ست حيوانه اصلا ربنا ياخدهاا
ردحذفبس هو المفروض يبقى فاهم يعنى ان امه قويه وانها هتوقعها فى غلط هو مش غبى يعنى للدرجه دى مش عارفه وانا بقرا عن نرجس حاسه انى بتفرج على فيفى عبده متخيلااها بكل حركاتها :(
ردحذفانا عندي تعليق صغير بس هو ليه كل شوية عيااط عيااط حسا ان موضوع " و بتعيط " دا كتيير اووي
ردحذفاخص عليك يا طه طلعت فستك
ردحذفدور نرجس كان ينفع علوية قدري قوية ومفترية
ردحذف