الحلقة 26
"انا اتسرعت وغلطت ياماما ولازم الغلط يتصلح"
"يتصلح ازاى يعنى؟"
"اطلقها...الحمدلله انى مخلفتش منها... كفاية اوى كده انا محبيتش ولا هحب غير عالية...منكرش انى نفسى ف طفل...هموت وابقى اب بس ربنا مبيتعاندش... انا تعبت اوى ال3 شهور اللى فاتوا وعايز ارتاح"
نرجس بفزع
"طلاق؟؟ طلاق ليه بس... اعوذبالله متخليش الشيطان يخرب لك بيتك"
"بيت ايه؟؟بيتى انا خربته فعلا لما اتجوزت على عالية وطلعتها م البيت...ماما..انا مش مرتاح وتعبان مع مها جدا واللى غلط لازم يصلح غلطه"
"وهى عارفة الكلام ده؟؟؟ طلبته يعنى؟"
"لا طبعا"
"وهتطلقها ازاى"
"هو مش انا الراجل واقدر اطلقها"
"اه ...بس عارف انت هتدفع قد ايه لو طلقتها"
"ايه؟"
"لانها مطلبتش يبقى كل حقوقها هتاخدها... مؤخر ومتعة وعفش... معاك تدفع؟"
سكت طه يفكر...لانه مفكرش ف الفلوس
"هااا...معاك تدفع...ولا زى كل مرة انا اللى المفروض ادفع كل حاجة"
"انا مطلبتش منك حاجة ياماما... انتى اللى اختارتى مها وانتى اللى اتفقتى معاها على كل حاجة... غلطتى انى سكت على كل ده... منكرش انى كنت مطنش علشان نفسى اخلف بس انا كنت فاكرها هتبقى كويسة...والله لو كانت كويسة مكنتش فكرت اطلقها وقلت ده نصيب وحصل وخلاص حتى لو طلعت زى عالية ومخلفتش...انما انا لا حبيتها ولا هى كويسة معايا ولا بتحترم ظروف عالية ولا حبى ليها"
"يا طه انت بتتكلم ف ايه... انت عايز واحدة تحب ضرتها"
"مقلتش تحبها...وحتى لو بتكرهها متفضلش تتكلم عنها وحش قدامى احتراما ليا على الاقل...ما عالية اهى ياماما ...سمعتيها مرة بتشتم ف مها ولا بتتكلم عنها باسلوب وحش؟؟ واكيد مش بتحبها"
سكتت نرجس... وسكت طه
"وبعدين...انا اتهريت مصاريف عليك يا طه وعلى جوازاتك"
"عارف وكفاية اوى كده...هحاول اتصرف"
"متزعلش منى علشان الفلوس...وبعدين انا مش معاك ف حكاية الطلاق دى...اصبر شوية يمكن تخلف"
"انا مش عايز استنى علشان مش عايز منها عيال... مش عايز حاجة تربطنى بيها اكتر من كده"
"للدرجة دى؟؟"
"ايوه...انا بعاملها بالمقولة ... ان احبها اكرمها وان لم يحبها لم يظلمها...مش هظلمها ولا اظلم نفسى واظلم عالية وافضل معاها"
"والخلفة...ان مكنتش ارتحت مع مها نشوف واحدة تانية"
رد بحزم"ماماااا...لا تانية ولا تالتة كفاية اللى انا فيه...هستفيد بإيه لو خلفت عيل ومُت وملحقتش اربيه"
"كفى الله الشر انت بتقول ايه"
"ماهو حرق الدم اللى انا فيها من مها ممكن اوى تموتنى"
"خلاص ياطه...انت حر واعمل اللى انت عايزه"
"ممكن نرمين متعرفش حاجة من اللى قلناها دى علشان لسانها طويل وهتروح تقول لمها"
"طيب ولو انى الحركة دى ممكن تقطع علاقتهم ببعض"
"خايفة على صحوبيتهم ومش مهم عيشتى معاها"
"لا خلاص ...راحتك تهمنى"
********************
عالية وطه بيتغدوا... ونرمين معاهم
نرمين...خلصت وقامت
طه وهو قايم"تسلم ايدك يا عالية... مبحسش بطعم الاكل غير من ايدك"
عالية"الف هنا وشفا...اعملك شاى دلوقتى ولا لما تقوم م النوم"
طه بصوت واطى
"متعمليش حاجة عايز اتكلم معاكى"
"حاضر هلم الغدا لحد ماتغسل ايدك واحصلك"
**********************
عالية داخلة الاوضة...وطه قاعد على السرير
عالية بتقفل باب الاوضة وهى داخلة
"خير ياطه...صوتك قلقنى"
قعدت جنبه... مسك ايدها وباسها
"سامحينى على كل اللى حصل الفترة اللى فاتت...كل حاجة هتتصلح قريب ان شاءالله"
طبطبت عليه
"اسامحك على ايه...انا مزعلتش منك علشان اسامحك...انا مقدرة ظروفك...كفاية انك مفرطتش فيا"
"افرط فيكى...ياعالية انتى مش عارفة قيمتك عندى ايه...انتى روحى وحياتى لما ببعد عنك مبحسش بالحياة"
"ياحبيبى ربنا يخليك ليا"
"انا خلاص..هصلح كل اللى حصل واطلق مها"
اتفاجئت عالية... فرحت لحظة وفكرت لحظات
"مالك ياعالية...مش ده رد الفعل المتوقع منك"
"تطلقها ليه؟"
"علشان مش مرتاح معاها"
"هى طلبت الطلاق؟"
"لا ومتعرفش حاجة"
"عايز تغدر بيها يا طه....حرام"
"انتى هتجنينى...انا عايز اطلقها علشان ابقى معاكى لوحدك...انتى مش عايزانى معاكى؟"
"ازاى ...عايزاك طبعا...بس انا لما فكرت انى ممكن كنت ابقى اللى مكانها ...حسيت انها غدر"
"ربنا حلل الطلاق"
"لما يكون فيه سبب"
"اخر حاجة كنت اتوقعها انك انتى اللى تدافعى عن مها...مها اللى انا متأكد انك مبتحبيهاش وهى كمان مبتحبكيش...واى موقف بيجمعكم ببتعمد تضايقك...يبقى ازاى كلامك ده"
"انا مبدافعش عن مها...انا مش عايزاك تظلمها...بس"
"خايفة انها تتظلم ....ومش خايفة اننا احنا ال3 نبقى مظلومين"
سكتت عالية...فرحانة بكلام طه وف نفس الوقت بتحط نفسها مكان مها...تتضايق
"خلاص ياعالية انا فكرت وقررت واتكلمت مع ماما كمان"
"مامتك عرفت؟؟"
"ايوه"
"وقالت ايه"
"عادى...قالت استنى شوية ولما قلتلها انى خلاص مش ظايقها سكتت...بس اللى قابلتنى دلوقتى مشكلة تانية"
"خير"
"طلاق مها هيكلفنى كتير وزى ما انتى عارفة مفيش فلوس وماما شالت ايدها"
"والعمل؟"
"بفكر ابيع العربية"
"ازاى...انت بتسافر بيها علشان تجيب بضاعة للمحل ...وكمان بتنفعك ف مشاويرك...هتقدر تستغنى عنها ازاى"
"مش عارف...ما انا كمان معنديش تصرف تانى"
"مش عارفة ياطه... ربنا يفرجها"
وفجأة خطرت على بال طه فكرة
"جت لى فكرة تانية"
"ايه"
"ابيع الشقة... ونجيب شقة تانية بس نطلع فرق...ادفع لمها مؤخرها ونرجع نبدأ العلاج من اول وجديد وان شاءالله ربنا يكرمنا"
عيطت عالية من الفرحة...حضنت طه
"يااااه...انا بحبك اوى ياطه...ربنا يخليك ليا"
"ويخليكى ليا ياحبيبتى"
**********************
طه فى المحل مع نرجس
يرن موبايله
"ايوه يامها...كويس... انتى كويسة؟؟ لما مش النهاردة...بكرة بالليل هاجى لك... اه عايزة ايه مش سايب لك مصروف البيت... بلاش حجج يامها الاسبوع اللى عند عالية مخلصش ومش هاجى البيت الا بكرة بالليل... ماشى روحى لمامتك لو عايزة تباتى عندها وترجعى بكرة براحتك...مع السلامة"
قفل مع مها... نرجس كانت سامعاه
"ماهى كويسة اهى يا طه... ماتشيل الفكرة دى من دماغك"
"هتتغرى بمكالمة تليفون... العيشة معاها صعبة اوى ولسانها طويل...بتتصل بتتحجج انها عايزة فلوس وانا قبل مااروح لعالية بسيب لها اللى يكفيها وزيادة"
"وهتعمل ايه ف الفلوس"
"كلمت سمسار يشوف مشترى للشقة وابقى اشوف شقة اقل شوية واخد الفرق"
"والعفش"
"على مهلى ابقى اجيب واحدة واحدة...ماهى برضه مش هتاخد العفش كله...اللى هيتبقى هبقى اكمله"
"وهتبيع الشقة ازاى وهى مش عارفة...اى مشترى هيبقى عايز يتفرج عليها"
"هقولها...لما اروح لها هقولها...كده كده ايامى عندها بتبقى عكننة فمفيش حاجة هتختلف لما تعرف"
"ربنا يستر"
**********************
طه وعالية ونرجس ونرمين قاعدين بيتعشوا
رن جرس الباب
قام طه يشوف مين...اول ما فتح الباب
"مهااا!!...ايه اللى جابك الساعة دى"
اول ما سمعوا اسم مها...نرمين قامت تجرى تسلم عليها
وعالية قلبها اتقبض...ونرجس فضلت مكانها
مها حضنت طه
"حبيبى عندى ليك مفاجئة"
نرمين وهى بتسلم عليها"ادخلى طيب"
دخلت وسألها طه
"الساعة 12 يامها...ايه اللى مخليكى ف الشارع لحد دلوقتى"
مها بعد ماسلمت على نرجس...وتجاهلت وجود عالية
"مش قلتلك رايحة مع ماما مشوار"
طه"ايوه كل ده مشوار؟"
مها"مش تعرف المفاجأة الاول"
سكتت لحظات محدش اتكلم ...وكملت بفرح
"انا حااااااامل"
لحظة صادمة للكل الا نرمين ... اجبرتهم على السكوت لتقبل واستيعاب الكلمة...لاظهار رد الفعل المناسب
نرمين بتباركلها بفرحة...نرجس قامت سلمت عليها وباركت لها وباركت لطه
طه اول ما سمع انها حامل...بدأ الامل يصحا ف خياله من اول وجديد...بقى يتخيل ابنه وهو بيشيله...وهو بيحضنه... وهو بيقوله يا بابا...وهو بيكبر وف المدرسة... وهو كبير وبيتخرج
صور متتالية جت ف خيال طه...اجبرته على الابتسام بفرحة
اول ما ابتسم بفرحة...انسحبت عالية بسرعة ودخلت اوضتها
مها بتبص عليها وهى داخلة اوضتها
"شايف...بدل ما تقولنا مبروك جريت ازاى...غلاوية اوى"
طه بيقول لمامته
"شايفة...شايفة الطريقة اللى بتتكلم بيها"
مها"وانا قلت حاجة غلط...انت مش شايف"
نرجس"خلاص بقى... هى كمان معذورة ...سيبيها"
نرمين"عايزين بقى بنت ولا ولد؟"
مها"نفسك ف ايه ياطه"
طه بأمل"اى حاجة...اللى يجيبه ربنا خير"
مها بتقرب منه وبتقف قصاده
"مش هتغير هدومك علشان نروح"
طه بيرجع لورا
"مش اتفقنا بكرة بالليل"
مها"افرض تعبت وانا لوحدى... يرضيك ابقى لوحدى وعلى فكرة الدكتور قالى مش كويس عليا حرق الدم وممكن يسقطنى...لو مش مصدقنى تعالى معايا وسأله"
نرجس"ربنا يكملك على خير... اوعى تزعلى نفسك ف اى حاجة ابدا ...وترتاحى يامها"
مها"حاضر"
ببتص لطه"هاا..يالا بقى..ده انا من امبارح نفسى ف بيتزا وشامة ريحتها"
نرجس"ده وحم... جيبلها ياطه اللى بتتوحم عليه اوعى متجيبلهاش"
مها"يالا بقى يا حبيبى...ابنك نفسه ف بيتزا"
**********************
عالية ف اوضتها بتعيط بصوت واطى
طه داخل الاوضة... شافها بتعيط
هرب الكلام من على لسانه
"طيب قوليلى اعمل ايه؟؟ انا كنت خلاص هطلقها... مش عارف اقولك ايه...حقك تزعلى زى ما انا زعلت ان ابنى مش منك انتى"
دمعت عيون طه وهو بياخدها ف حضنه
"مش هعرف افرح وانتى زعلانة...انا مبقاش ف ايدى حاجة يا عالية...مش هقدر اطلقها بعد ما الحلم قرب يتحقق... فكرة وجود طفل يبقى ابنى ...مجرد ما تخيلتها فرحت مابالك لما يبقى حقيقة"
بيتكلم وهو زعلان علشان عالية وفرحان بأمل الطفل
"انا مش زعلانة منك...انا كمان كان نفسى يبقى لى طفل منك بس هعمل ايه...غصب عنى معرفتش احقق لك الحلم ده"
"ياحبيبتى انا عارف انه غصب عنك...وبقى غصب عنى انها هتفضل معايا"
"وانا مطلبتش منك تطلقها"
"عارف...متعيطيش ياعالية علشان خاطرى"
مسحت دموعها
"حاضر"
قام وقف وهو مرتبك
"انا... اصل الدكتور قالها... هى جت علشان تقولى ان مش هتقدر تقعد لوحدها لتتعب"
هزت راسها
"طبعا...انا مجربة وعارفة...روح معاها يا طه"
قعد جنبها تانى
"انا مبرتاحش غير معاكى"
"هنعمل ايه بقى ف نصيبنا... قوم ومتشيلش همى...مبروك ياطه"
*****************
عالية قاعدة عند هدير...وماسكة ابن هدير
هدير بتقدم لها طبق كيك
عالية"كل سنة وهو طيب....عقبال 100 سنة"
هدير"وانتى طيبة ياعالية... احكى لى المنيلة ولدت ولا لسه"
عالية"لسه...بس قربت"
هدير"الهى تفطس وهى بتخلفهم"
عالية"يا شيخة حرام عليكى...ربنا يقومها لولادها بالسلامة"
"ايه دى البت دى راجل زى الفل واول ما اتجوزت حملت ف توأم... صحيح الحظ لما يآتى يخلى الاعمى ساعاتى"
عالية بتضحك"ضجكتينى ياهدير والله ومن زمان مضحكتش كده"
"ياختى اضحكى اضحكى...قوليلى وطه عامل ايه معاكى"
"كويس الحمدلله"
"مرجعش لنظامه القديم تانى"
"هه...رجع ايه بس...ده لو جالى وناوى يبات يوم التليفونات تشتغل واشى تعبانة اشى ودينى للدكتور اشى معرفش ايه"
"ومبتروحش عند امها ليه وتريحنا"
"متحججة بجوز امها وانها مش هترتاح الا ف بيتها"
"وطه يعنى مش شايف"
"شايف بس هيعمل ايه...بيكلمنى كل يوم وكل شوية بس طبعا مش قدامها...علشان متعملش مشاكل"
"وطبعا بعد ماتخلف الوضع مش هيتغير كتير هتتحجج بالعيال"
"اكيد"
"مش عارفة اقولك ايه"
"قوليلى ربنا يصبرنى.. وخصوصا الزفت طارق ده مش عارفة اعمل معاه ايه"
"عمل ايه تانى... مش فضل ميجيش شوية بعد ما شفتيهم"
"شوية ورجع ييجى تانى ف غيابهم ونرمين مقوياه طبعا... بعد ماكان مزودها اوى فحركاته ونظراته .. دلوقتى بقى كلامه كمان ومعرفش جاب رقمى ازاى واتصل بيا بيقولى عايز اقابلك بره من غير ماحد يعرف"
"وعملتى ايه"
"قفلت ف وشه طبعا وبعدها قفلت التليفون ساعة كده وبعدين فتحته"
"هو انتى ليكى ف كل خرابة عفريت"
"شفتى!!"
"بت ياعالية... طارق ده مش كان معاهم ف الكلية"
"اه"
"يعنى صاحب ريا وسكينة اوى...ليكونوا مسلطينه عليكى علشان يوقعوا بينك وبين طه ولا بعد الشر يخلوه يطلقك"
عالية باستغراب
"معقول؟؟؟"
"ليه لأ... نرمين علشان تبعدك عنها وتبقى براحتها والتانية طبعا علشان طه"
"يعنى اعمل ايه؟؟ واتصرف ازاى؟؟ خوفتينى"
الحلقه تحفه اوووووووووي بس والله زعلت على عاليه هو الطيب مالوش بحت اساسا
ردحذفحلقه جامده اووى :] تسلم ايدك
ردحذف:( :\
ردحذفبالله عليكي يادينا اعملي حاجه بقي انا اعصابي تعبت من الزفتات دول
ردحذفالحلقة حلوة جدا بس بر حمل مها قفل الحلقة شوية بس اى حاجة انت بتكتبيها بايدك جميلة من غير كلام وتسلم ايدك
ردحذفتحفه يادندونه تسلم ايدك الحلقه جامده اوى وربنا يستر على عاليه
حذفلا بجد كدة كتير ع عالية ومش هقدر استنى لبكرة بجد تسلم ايديكى
ردحذفيا ربنااااااااااااااااااااااا
ردحذفجامدة يا استاذة كالعادة
خلتنى بكيت
انا زعلالالانة علشان عالية اوووووووى
يارب ما تكتب علينا اللى هى فيه ياااااااارب
حراااااااااااااااااااااااااااااااااااااااااااااام :(
ردحذفيعنى كنت متوقعة حمل مها وانه مش هيعرف يطلقها بس مش مطمنه بصراحة للى ببحصل ربنا يستر وتسلم ايديكى
ردحذفيالهوى انا هتشل
ردحذفحامل !! ليــــــــــــه و دلوقتى
و ربنا كاان قلبى حاسس ما انا احساسى مش بيبقى صح غير فى الحاجه الوحشه !!
تسلم ايدك يادينا وبجد كده كتيييييييييير على عاليه
حذفهدير جدعه اوووي
ردحذفوحاسه ان مها هيحصلها حاجه
بس ربنا عادل
بكره تتبدل كل احزان عاليه ان شاء الله
انا مش عارفة انتي ناويه تنهيها ازاي بس عندي امل انك تنصفي عليا فاي حاجة كدا كتييييير اوي
ردحذفحلفه جميله بس حزينه :(
ردحذفعلى فكرة مها مش حامل من طه مش حامل من طه مش حامل من طه
ردحذفالبت دى هتجننى خالص يا دوندون
تصدقى ماخترش فى بالى الفكره دى قيل كده ...بس ازاى وهى دايما معاه ومش بيسيبها لوحدها ؟؟ ﻷ صعبه
حذفالحلقه جميله جدا بس زعلت ان مها حامل
ردحذفيا حرام ربنا يكون في عون المكسينة عالية وغلفكرة حاسة كده في حاجة مش طبيعية و انشاء الله ربنا عيعوض المسكينة دي و ياخد طارق قليل اﻻدب دا و طيعا مبدعة يا استاذة دينا
ردحذفحااااااااااامل !!!
ردحذفيا دي النييله هي البنت دي حالها مش ح يتصلح ابدا استغفر الله العظيم
جميله اوووووووووووووووى وربنا يصبر عاليه
ردحذفعالية مش مكتوبلها تفرح طول م مها ونرمين وطارق الا لو ربنا كرمها وبقت حامل اكيد طه مش هيبعد عنها يارب تحصل
ردحذفحلوووووووووووووووة اووووووووووووووي وتتطورورات هايلة تسلمي يا دينا
ردحذفحللللللللللللللللوة قوي بس والله اتقهرت اهئ اهئ
ردحذفحلووووة اووى يادينا
ردحذفبس قلبي وجعنى اوى ع عالية
هو مينفعش نفرح حلقتين ورا بعض ولا ايه
يارب مها تموت ونخلص منها خالص وهى بتولد وعالية تربى الولاد
وتعيش هي وطه ف سعادة بقى من غير حد يااااااااارب
بالله عليكى يادينا فرحينا شوية
حرااااااااااااااام كدة قلبي مش مستحمل
ميـــــــــرو ^_^
هى دى النهاية الكلاسيكية للقصة دى.
حذفوالله انا تعبت فعلا ونفسيتى تعبت كدة كتير اوى ربنا بيبتلى الانسان ولما يصبر بيكافأه وبيديه جزاء صبره اشمعنى عالية بقى المفروض يحصلها اى حاجة تفرحها بقى والله انا تعبت نفسى او تسيب طه
ردحذفانافكرت كده زيك
حذفاول مره اتأثربقصه كده ..ربنامايكتب الالم ده علينا ابداا ياارب :(
زعلانة اوي على عاليه اللي بتسحمله محدش يقدر يستحمله :(
ردحذفhadil gasser
تجنن بجد تحفة بس حرام عالية وهتجنن واعرف النهاية هتبقى ازااى
ردحذفتلاقو مها حامل من طــــــــــــارق هع هع هع
ردحذفجميله اوى تسلم ايدك
ردحذفتعبت اوى بجد بقى :(
ردحذفالحلقة حلوة اوى :) بس لية قصيرة كدة
ردحذف:( :( :(
ردحذفبجد زعلاانه اوووي وكان عندي امل ان الحلقه تبقي حلوه النهارده.. اناقلبي بيوجعني بجدد كفااايه كده
مفيش حدربنابيسيبه مظلوم كده طول الوقت
الحلقه تحفه تاحفه تحفه يا دودوووووو يا ربنا دانا كنت بعيطوانا بقرأها ربنا مع عاليه يارب وياخد البت مها ديه ههههه مش طايقاها من اول القصه والله
ردحذفينهر اسود علي حرقت الدم الي انا فيها حرام عليكى يا دينا بقي
ردحذفكنت متوقعه وهو فى مين يتنكد عليه فى ام القصه دى غير عاليه ... بس منكرش ان الحلقه حلوه
ردحذفالحلقه حلوه بس زعلانه على عاليه يا دينا اعملي فيهم حاجه بجد زهقت منهم وكمان حامل بتوأم لا كتير والله اوعي بس مها تموت وعاليه تربي الاولد لالالالالالالالا تموت هيا واولادها وعاليه هي الي تخلف اهئ اهئ اهئ
ردحذفوالله انا كل ما اقراها اعيط انا داخله ع جواز وخايفه من الخلفه حراااااااااااااااااااام ههههههه بس بجد انتى
ردحذفموهوبه ما شاء الله عليكى وفى انتظار الحلقه اللى جايه
اووووف بقا هتخلص امتى القصه دى بقا انا اتضايقت اوى من الحلقه دى والله يارب الحلقه الجايه تكون حلوه كدا ومش تضايق
ردحذفبجد انتى كاتبه رو9و9و9وعه يااستاذه دينا انا قرأت معظم قصصك واسلوبك ف الكتابه رااااااااائع ربنا يحميكى يارب ويديم التوفيق ان شاء الله
بجد انا كرهت طه ويارب عالية تسيبه ويرزقها بواحد بتحبه بجد ويستحملها
ردحذفحراااام عليكى بجد يادينا شوهتى صورت الحب الى فى خيالى :(
كنت حاااااااااااااسة ان القردة دي هتبقي حااااااااااااامل وربنا حرراااام بجد مفيش حد يقدر يستحمل اللي عاليه مستحملاه ده دي لو جبل كان زمانه اتهد :/ :/ :/
ردحذفLike awii
ردحذفالحلقه حلوه اوي و عاليه صعبانه عليا اوي
ردحذفيادييييييييييييييييي النيلللللللللللللللللة اووووووووووف بقى :( الناس دي هتشلني ربنا يكون فعون عالية بس تجنن تسلم ايدك يا دينا تحفة
ردحذفتحححفه القصه تسلم ايديكي .. بس عاليا مدايقاني المفروض تاخد موقف و تاخد حقها اللي ربنا مشرعه اللي هوا العدل يبقا ليها بيت و يبقى ليها وقت في حياة جوزها .. و طه سلبي و اناني جدا اللي عاوز يعمل حاجه بيعملها هوا بيريح دماغه و خلاص
ردحذفالرواية اسمها وهل يشفع الحب
ردحذفيعنى حاسة ان نهايتها حزينة :(
ربنا يسترها
LikE Awiiiiiiiiii :D :D
ردحذفباين انوا عاليا معمولها عمل
ردحذف