الخميس، 26 مايو، 2011

تحت سقف واحد...الحلقة 4

فضلت شيرين كل اللى شاغل تفكيرها الفرصة اللى جايالها والشرط اللى قصادها… مروة ومامتها لاحظوا عليها انها مش على طبيعتها بس تخيلوا انها زعلانة علشان الخطوبة اللى اتفسخت… عدى السبت والاحد الاثنين وهى مش قادرة تحسم قرارها وحست الايام بتجرى وهى مش عارفة تعمل ايه؟؟
دخلت لها مروة وسألتها عن سبب سرحانها فحكت لها الحكاية
"بس ياشيرين الحكاية دى محلولة"
لمعت عيون مروة واتعدلت وبصت لاختها
"محلولة ازاى"
"حسام موجود وكل حاجة تتم فى ميعادها"
"لالالالا مش ممكن هروح اقوله نتجوز؟؟"
"خلاص اقوله انا انك كنتى مضغوطة من الشغل ولا زعلانة علشان حكاية القاعة…اى كلام وهو ماهيصدق وتبقى انتى مقلتيلوش على رجوعك له تانى"
"الحكاية مش مين يقوله… انا مقدرش اتحمل انى اعيش معاه"
"وهتعملى ايه؟؟"
"انا هستنى لحد يوم الخميس يمكن الاقى حل قبلها… وان ملقيتش خلاص يبقى ماليش نصيب واعتذر عن الفرصة اللى مش هتتعوض دى"
"ربنا يحلها من عنده"
قامت مروة وحاولت شيرين تنام بس معرفتش من التفكير ولما بدأت تنام لقيت مروة داخلة اوضتها تجرى وتصحيها وتفتح التليفزيون
"شيرين قومى... الحل اهو هنا"
قامت شيرين بسرعة بس بتبص لقيت مروة بتشاور على التليفزيون
"الحل فين؟؟؟ فى التليفزيون"
"ايوه بصى ده فيلم قص ولزق وفيها البطلة كانت عايزة تسافر بشرط تتجوز شافت البطل اتجوزته"
"انا عارفة الفيلم... بس انتى اتجننتى هتجوز واحد معرفوش ازاى... كان حسام ارحم... احنا هنمثل دى حياتى مش فيلم"
"خلاص ياستى انا غلطانة لك... تصبحى على خير"
"وانتى من اهله"
وكان النوم غلبها وهى بتفكر فى كلام مروة بس لقيته مش واقعى خالص وكلام افلام
قامت شيرين متاخر عن ميعادها على غير العادة فلبست ونزلت بسرعة علشان متتاخرش على الشغل وعلشان اليوم باين من اوله العربية مدارتش معاها ولانها متاخرة سابتها وركبت تاكسى
فى الشغل استدعاها رئيس الفرع وعرفت انه هيسألها عن قرارها
"ايه ياشيرين اخدتى القرار ولا لسه"
"احنا النهاردة الثلاثاء يامستر على مش اتفقنا على الخميس تاخد الرد النهائى"
"هو هيفرق معاكى اليومين دول"
"اه معلش هيفرق معايا يوم الخميس هيكون عندك الرد"
وبعد الشغل افتكرت شيرين العربية اللى واقفة من الصبح فاتصلت بالميكانيكى وقالها هيبعت واحد ياخد العربية بس تستناه فى مكان العربية وفعلا بعت واحد اخد العربية واتصل بيها الميكانيكى قالها تيجى تانى يوم بعد شغلها تاخد العربية تكون جاهزة
مازالت بتفكر فى السفر اللى اخد كل تفكيرها وكل ده خايفة تقول لمامتها علشان هتضغط عليها ترجع لحسام وده اللى رفضاه تماما
راحت شيرين تاخد العربية ودفعت للميكانيكى ال400 جنيه اللى طلبهم ومشيت وهى فى الطريق كانت برضه بتفكر وحسمت قرارها ان خلاص بكرة الخميس ومعندهاش حل تانى وهترفض السفر... رن الموبايل
"الو...ايوه مين معايا"
"انا اللى جيت اخدت العربية من حضرتك امبارح ممكن ترجعى بس اقابلك على اول الشارع اللى فيه الورشة علشان حاجة ضرورى"
استغربت من اصراره ورجعت تشوف عايزها ليه
"نعم ... انت اتصلت بيه ليه؟؟"
"بصى حضرتك الميكانيكى ده حرامى انا بقالى اسبوع بشتغل معاه ومشفتش منه حاجة بس النهاردة لقيته بيحاسبك على 400جنيه وهى حاجة متستاهلش 100 جنيه... وبعد مامشيتى وسألته ليه كده قالى ياعم دى واحدة ست لاهى فاهمة حاجة فى العربية ولا عمرى شفت لها راجل جه معاها وشكلها مستريحة واللى بطلبه باخده... انا اتضايقت من كلامه على حضرتك واتخانقت معاه وطردنى... فلو عايزة ارجع معاكى تاخدى فرق فلوسك تحت امرك ولو عايزة تروحى لميكانيكى تانى واشرحله هو عمل ايه فى العربية ويقدرلك سعر التصليحات انا معاكى"
"انا مش مصدقة اللى بسمعه... طيب وانت ليه عملت كده وسيبت شغلك علشانى"
"مش علشان حضرتك ده علشان ربنا ميرضاش بالغش اللى حصل وطريقة كلامة اللى فيها افترا معجبتنيش... انا عارف ان ربنا هيعوض عليه بشغل تانى علشان انا وقفت للحق"
"انت معاك شهادة ممكن اشوفلك شغل"
"ايوه معايا دبلوم صنايع وميكانيكى شاطر لو تتوسطيلى عند حد يكون كتر خيرك"
"انت ممكن تسافر بره"
"ياريت بس ميطلعش نصب ولا هجرة غير شرعية اللى بيموتوا فى البحر"
"لا هو فيه شغل ومضمون وكل حاجة بس فيه شرط"
"شرط ايه؟؟"
"تتجوزنى؟؟"
"لا يااستاذة حضرتك فهمتينى غلط... انا وقفت ضد اللى مشغلنى علشان حقك ومهمنيش ... تفتكرى مهما كنت محتاج هبيع نفسى بالفلوس... انا آسف "

هناك 27 تعليقًا:

  1. هههههههههههههههههههههههههههههههههههههههههههههه ده ايه الجنان ده

    قال تتجوزني قال.. دي مامتها هتولع فيها اول ما تسمع الفكره دي هههههههههههههههههه

    تسلم ايدك يا دندن.. اضافه جميله

    ردحذف
  2. توتا
    تسلميلى
    هههههههههههههههههه
    كل التفاصيل فى الحلقة الجاية

    ردحذف
  3. ههههههههههههه ...لا جامدة يادوندون وغير متوقعة بالمرة...بس مش للدرجة دى ...مع انها لذيذة شوقتينى لحلقة بكرة ...انا هستناها من دلوقتى

    ردحذف
  4. د.هنودة
    ماهو ده المطلوب التشويييييييييييق
    ههههههههههههههه
    ميرسى ياجميل على رأيك

    ردحذف
  5. هههههههههههههههههههههههههههههههههههه ايه الكوميديا المريعه دي يا دينا البت دي عبيطه ولا ايه

    ردحذف
  6. ايناس
    اى تفسير فى حلقة بكرة ان شاءالله

    ردحذف
  7. هههههههههههههههههههههههههههههه ايه البت الهبله دى

    ردحذف
  8. ايه
    هبلة ولا متسرعة
    ؟؟؟؟؟؟؟؟؟؟؟؟؟؟

    ردحذف
  9. ههههههههههههههههههههه
    مش قولتلك شبه قص ولزق , اول مره اتوقع حاجة وتطلع صح
    بس مجنونة شرين دي ما تتجوز حسام احسن مين ده اللى تربط نفسها بيه ولا حتقوله جواز صوري وكده؟؟؟؟

    ردحذف
  10. شذى
    انتوا مش ملاحظين ان الواد رفض
    هههههههههههههههههههه
    ياترى شيرين هتتصرف ازااااااااااااى
    ؟؟؟؟؟؟؟؟ بعد الكبسة ههههههههههه

    ردحذف
  11. مش انا قلتلك هتشفلها واحد تتجوزه وهتحبه فى الاخر

    هيوافق ويسافروااا

    شوقتينا اكتر يابرنسس

    ...... ميرا

    ردحذف
  12. ههههههههههههه تتجوزنى
    البت ديه مجنونه
    بس حلقه حلوه وغير متوقعه

    يوياااااا

    ردحذف
  13. انااول مرة اقرى كتاباتك ..بس بجد انتى ا شاء الله عليكى بجد موهوبة اووووى وربنا يوفقك ياااارب ..اه بالنسبة للبنت دى مجنوووونة اووووى ..ياريت الحلقة الجديدة وبسرعة ...

    ردحذف
  14. ميرا
    بعد التوقع ده
    تفتكرى يبقى فين التشويق
    ههههههههههههههههههههههه

    ردحذف
  15. يويا
    هههههههههه الحمدلله انها عجبتك
    يارب دايما

    ردحذف
  16. eng-20107
    ميرسى كتير لذوقك
    وان شاءالله دايما كتاباتى تعجبك
    ومعلش النهاردة اتاخرت على الحلقة واعتذر على التاخير

    ردحذف
  17. يانهار اسود هو اي حد والسلام واله حسام كان ارحم

    ردحذف
  18. كنوز
    هى رافضة حسام اصلا ومش طايقاه
    ونورتينى ياقمر

    ردحذف
  19. القصة ولا شيرين؟؟؟؟؟؟؟؟؟؟

    ردحذف

  20. ههههههههههههههه دى طلعت هبله





    shosho saleh


    ردحذف
  21. هههههههههههههههههههههههه لا حلوة

    ردحذف
  22. ههههههههههههههههههههههههههههههههه
    جااااااااااااااامده يا استاذه :)

    ردحذف
  23. هههههههههههههههههههههههههههههههههههههههه

    ردحذف
  24. لالالالالالالالالا يادينا البنت دى شخصسة مش تزعلى غبية تتجوزنى هههههههههههه على رقى توتا قال تتجوزنة فال




    رودى

    ردحذف
  25. قوية يادينا وما بتخرش المية ..في انتظارك النهاردة ..ماما زيزي

    ردحذف
  26. انتي اسلوبك حلو جدا ومميز و في تشويق ،،،
    انا اصلا مش بحب القراءه بس حبتها جدا و استمتعت بيها من اسلوبك في الكتابه.
    من تقدم الى تقدم انشاء الله

    ردحذف

قول رأيك بلاش تقرا وتقفل من سكات...ارائكم تهمنى