الثلاثاء، 22 نوفمبر، 2011

الحب الملعون... الحلقة 4


الحلقة 4
رجعت هالة بيتها
الام"طمنينى ياهالة...عملتى ايه"
هالة"الاولى"
الام"مبروك ياحبيبتى... ده انا كنت خايفة عليكى تعيدى السنة لانى مشفتكيش بتذاكرى خالص... اتاريكى بتقعدى تذاكرى طول الليل"
هالة" اه"
وصوت الباب بيتفتح وبيدخل هيثم
هيثم"سلام عليكم"
الام"وعليكم السلام...بارك لاختك نجحت وطلعت الاولى"
هيثم"مبروك ياهالة"
الام"مالكم ياولاد... كل ما اكلم حد منكم يرد بكلمة ويسكت هو انا هشحت منكم الكلام"
هيثم"ليه ياماما...انا عادى اهو"
الام"وانتى ياهالة متغيرة كده ليه"
هالة"انا؟؟ ... مفيش حاجة"
الام"بقالك كام يوم لا بتاكل ولا بتشرب ياهيثم وطول اليوم بره مالك يابنى"
هيثم"تصدقى ياماما النيابة حفظت حريق ادم على انها انتحار"
الام"طيب ماهو انتحار اكيد"
هيثم"لا مش ممكن ادم ينتحر...انا عارفه كويس ...انا لازم اعرف اساس الموضوع ده ومش هسكت"
واشتعلت عين هالة...وابيضت... وبعدين رجعت طبيعية تانى
فى اللحظة اللى دخل فيها الاب من باب البيت
ودخلت هالة اوضتها... وحضرت الام الغدا...وقعدوا يتغدوا كلهم مع بعض

فى بيت زياد
"مامااااااااا... نجحت ياماماااااا"
الام"مبروك ياحبيبى... ياريتنى كنت بعرف ازغرط"
زياد"انا عايز حاجة تانية اهم من الزغاريط"
الام"عايز ايه؟؟؟اللى نفسك فيه هجيبهولك"
زياد"لا مش حاجة تتجاب"
الام"اومال ايه"
زياد"انتى نسيتى اتفاقنا ولا ايه"
الام"اااااه... هالة؟؟"
زياد"طبعا هو فيه حاجة اهم من كده"
الام"وانا عند وعدى... حدد معاهم معاد وانا هتكلم مع ابوك النهاردة"
زياد"تفتكرى ممكن بابا قول اى حاجة"
الام"وهو هيقول ايه؟؟ملكش دعوة انت بابوك انا قلت خلاص"
وحضن زياد مامته وهو بيشكرها

اتصل زياد بهالة
"هالة مش بتردى من اول مرة ليه"
"كنت نايمة"
"عندى ليكى مفاجأة"
"ها"
"حددى معاد مع اهلك علشان اجى انا وماما وبابا اخطبط"
"طيب"
"انتى مش فرحانة؟؟"
"لا فرحانة"
"اومال ليه حاسس بانك عادى كده"
"مفيش حاجة...بقولك كنت نايمة"
"طيب هسيبك تنامى براحتك... بس كلمى مامتك فى اسرع وقت"
"ماشى"

فى نفس اليوم بالليل
رجع هيثم من بره متأخر...وكان كل البيت مضلم
الا اوضة هالة... خبط عليها مفتحتش.. قال يمكن نامت والنور مفتوح
دخل اوضته... غير هدومه... ودخل الحمام
وهو فى الحمام... بيغسل وشه... ووشه ناحية الحوض
حس كأن حد واقف وراه... التفت... مفيش حد
خرج من الحمام... البيت كله مضلم... راح يفتح النور
النور اتقطع... حتى اوضة هالة مضلمة
حس بخوف غريب... وكأن فيه حد ماشى وراه
دخل يدور على كبريت... لقى الكبريت
ولع عود... وجاب شمعة... ومشى بيها لحد اوضته
من المطبخ لاوضته وهو حاسس ان حد وراه
دخل اوضته...وقفل الباب ... وقعد على طرف السرير
كان بيثبت الشمعة جنبه...لما سمع صوت الباب
الباب بيتقفل بالمفتاح... التفت بسرعة
شبح امرأة محروقة الوجه
خاف... صرخ... صوته مطلعش
الست وكأنها هيكل...وش محروق...وعيون بيضاء
مدت ايديها... وخرج منها شعاع نار
وبدأت النار تمسك فى هيثم
بيصرخ وصوته مش بيطلع
حاول يقوم... كأنه متكتف

تانى يوم الصبح...الام بتخبط على هيثم
مش بيفتح الباب...حاولت تفتح...الباب مقفول بالمفتاح
نادت على جوزها ... الاتنين بيخبطوا ومفيش فايدة
كسر الاب الباب... وقعت الام مغمى عليها
لما شافوا جثة هيثم متفحمة... وكل اجزاء الاوضة سليمة
حتى ملاية السرير سليمة تماما

هناك 11 تعليقًا:

  1. استاذة دينا مع اعجابي الشديد بقصصك الجميلة..فتعليقي القادم هو والله ليس اقلالا من شأنك لكن مقصدي هو نقد بناء في جسد ونشأة القصة وهو:

    بخصوص الحوار بين شخصيات القصة فان من المساعد للكاتب و القارئ ان تختصر الحوارات في حالة تبادل شخصين فقط في الكلام على الشكل التالي :
    - طبعا هو فيه حاجة اهم من كده
    بعد تمييز المتكلمين في اول جملتين فقط.

    بدلا من
    زياد"طبعا هو فيه حاجة اهم من كده"

    و لو كان الحوار بين اكثر من شخصية تصبح على شكل :

    فلان : ..............
    علان:........
    زيدان:...........
    فلان:...........

    معلش طولت بس ياريت ماتضايقيش :)

    ردحذف
  2. حلوة اوى اوى

    ردحذف
  3. قصصك روعة بس كانو هذه القصة وقصة قدام عينيه فيهم شي من الخيال لكن مع ذلك اشكرك انا ما بقدرش اقاوم القصص واقراها كاملة الحلقات الفضول يشدني تسلم ايديك

    ردحذف
  4. ميرسى كتييييييييييير
    وطبعا دول قصص خيالية بحتة
    انما القصص الاجتماعية مستمدة من الواقع
    اما اشجان فهى قصة واقعية 100%

    ردحذف
    الردود
    1. يعنى انتى تعرفى حد زاى اشجان كده بنفس ظروفه يعنى :)

      حذف
    2. انتي ممكن تعملي قصصك افلام هتنجح اوي

      حذف
  5. 7elw awee el kss msha2 allah :)

    ردحذف
  6. لا كده حرام انا خايفة علي زياد واهل هالة

    ردحذف
  7. حرام هيثم مات
    القصة دى شكلها جثث كلها ربنا يستر

    ردحذف
  8. حلوووووووووووووووووووووووووووووووووووووى

    ردحذف
  9. قصة وأحداث جميلة ومشوقة جدا
    تفسير الاحلام

    ردحذف

قول رأيك بلاش تقرا وتقفل من سكات...ارائكم تهمنى