الحلقة 3
"ايه الاخبار"
وبدأت امانى تشوف خيال الدكتور وخيال الاء
ابتسمت لألاء علشان تطمنها
جريت عليها الاء وحضنتها
"مبروك ياحبيبتى"
الدكتور"مبروك... اكشف على عينك قبل مانلفها تانى وهقولك على التعليمات اللى لازم تنفذيها لحد ما نتأكد ان العملية نجحت"
الاء"يعنى ايه يادكتور..هى العملية كده منجحتش"
الدكتور"هى كده نجحت بس احيانا بيحصل مضاعفات "
الاء"ربنا يستر...احنا هننفذ اللى حضرتك تقول عليه"
الدكتور بعد ماكشف وهى بيحط شاش على عين امانى
"اهم حاجة العين متتخبطش ولا تتعرض لدرجة حرارة عالية ولو حسيتى باى حرقان فى عينك تتصلى بيا فورا... لو مفيش اى جديد تيجى بعد اسبوع"
خرج الدكتور من الاوضة
"مبروك ياامانى وان شاءالله ربنا يتم شفاكى على خير"
"مش قادرة افرح يا الاء... افرح ازاى بعد احمد ماراح منى"
"انتى فاكرة انك زعلانة لوحدك عليه... احمد كل الناس كانت بتحبه وكلنا زعلانين عليه... بس متخليش الحزن يتملكك كده"
"حب السنين ده كله ... ملحقش اعيش معاه فى البيت اللى اختارنا كل حتة فيه بذوقنا احنا الاتنين... الا يوم واحد بس"
"قدر الله وماشاء فعل... مش هنعترض على امر ربنا"
"ونعم بالله... صبرنى يارب"
"ربنا يصبرك... وفال كويس ان اول يوم فى السنة الجديدة هو اليوم اللى تعملى فيه العملية ويرجعلك نظرك... يمكن تكون الايام اللى جاية احلى"
"معتقدش ان اى يوم من غير احمد هيكون احلى... انتى تعرفى انى مكنتش اعرف احنا امتى ولا يوم ايه؟؟"
"احنا النهاردة 1يناير"
"الاء انا عايزة اعيش فى بيتى"
"ازاى يعنى ...المفروض ترجعى تعيشى فى بيتنا"
"بس انا عايزة اعيش هناك...علشان انتى ترجعى شغلك كفاية الفترة اللى فاتت كنتى مش سايبانى"
"وانا معقول كنت هسيبك...وهسيبك لمين يعنى... عموما احنا هنرجع بيتنا ولما ترجعى زى الاول نبقى نتكلم فى الموضوع ده"
فى بيت امانى
"خلاص ياامانى هتيجى من اول الشهر تستلمى الشغل"
"اوك... يعنى كمان 3 ايام"
"ايوه... متهيالى طول الشهرين اللى فاتوا من وقت العملية عنيكى رجعت طبيعية زى الاول"
"اه الحمدلله جدا"
"هتفضلى قاعدة هنا على طول"
"اه ياالاء انا مرتاحة هنا... بحس ان احمد عايش معايا لانى شايفة كل حاجة اختارها وكأنه بيقولى افتكرينى بيها.. ورغم ان ملحقناش نعيش مع بعض كتير بس حاسة ان ده المكان اللى بيربطنى بيه"
"خلاص ياحبيبتى اللى يريحك... واهو هنبقى مع بعض فى الشركة ونروح ونيجى كده شوية هنا وشوية هناك"
"ان شاءالله"
امانى صاحية فى معاد شغلها ودخلت الحمام
بتغسل وشها... كله بالصابون... بتشطفه ... بتبص فى المراية
شافت بدالها واحدة تانية متعرفهاش... اتخضت
غسلت وشها تانى وتالت وبتبص تانى فى المراية... شافت صورتها
خلال اليوم فى الشغل وموضوع صورتها اللى مش صورتها فى المراية ده شاغل بالها... وهى نازلة من الشغل مع الاء
"مالك ياامانى طول اليوم وانتى مش طبيعية"
"حصلت لى حاجة غريبة الصبح شاغلانى"
"حاجة ايه"
"الصبح وانا بغسل وشى شفت فى المراية واحدة تانية"
"واحدة تانية معاكى ؟؟"
"لا واحدة تانية بدالى"
"ازاى يعنى"
"معرفش ده اللى شفته"
"مش يمكن تهيؤات... انتى نمتى كويس امبارح"
"لا منمتش كويس ...نومى كان مقطع وطول الليل بفكر فى احمد"
"يبقى عينك زغللت ولا خيال فى المراية خلاكى اتهيألك انك حد تانى"
"مش عارفة...مفيش تفسير الا كده... ما تيجى تباتى معايا"
"مش هينفع النهاردة...خليها بكرة"
وركبت كل واحدة عربيتها... ومشيت
خلال اليوم وامانى بتتجنب تبص فى المراية
حتى تانى يوم وهى بتغسل وشها خافت تبص فى المراية
فات كام يوم والاء قاعدة مع امانى فى بيتها... واتأكدوا الاتنين ان اللى حصل لامانى ده كان وهم... ورجعت الاء بيتها
فى نفس اليوم اللى رجعت الاء بيتها... امانى قبل ماتنام
كانت بتسرح شعرها قبل ما تلمه علشان تنام
اخدت دبوس شعر... وبتحطه فى شعرها قدام المراية
شافت نفس الشكل اللى شافته فى مراية الحمام
الغريبة ان الصورة مكنتش لحظة عابرة زى المرة اللى فاتت
بالعكس حوالى دقيقة وامانى بتفرك عينيها وتبص تانى
علشان تتأكد انها مش متوهمة... نفس الشكل وصورة الست مش بتتحرك
خافت امانى... اترعبت... اخدت روب عليها
والمفاتيح والموبايل... ونزلت تجرى من البيت
امانى بتخبط على باب الاء بسرعة وبقوة
"امانى... مالك؟؟؟ ايه اللى جايبك كده"
امانى بتعيط"خايفة اوى... انا مرعوبة"
"ليه حصل ايه"
"شفت نفس الست تانى وبتبصلى... المرة دى بصت لى من مراية اوضة النوم... كانت بتبص لى فى عينى"
"اهدى يا امانى... بس مين الست دى؟؟"
"معرفش... معتقدش انى شفتها قبل كده"
"هى شكلها مخيف مخوفك اوى كده"
"بالعكس... اللى خوفنى انها كانها واحدة حقيقية... ست شكلها عادى زينا كده"
"بقولك ايه... هى الشقة دى قبل مايشتريها احمد كانت بتاعة مين ؟؟او حصل فيها ايه؟؟"
"معرفش"
"احنا بكرة نروح تلمى هدومك وتيجى تعيشى معايا هنا لحد مانشوف حل للشقة دى"
"ايوه... انا مش هعيش هناك لوحدى تانى"
نيهاهاههاهاهاهاهاها الشقة مسكونة :):)
ردحذفوااااااااااااااااو ...بجد شكلها تحفة ...انا متشوقة لكل حلقة من دلوقتى
ردحذفاسراء
ردحذفههههههههههه انتى بتعملى موسيقى تصويرية مناسبة للحلقة نيهاهاهااهاهاهاا
ههههههههههه
هنودة
ردحذفياااااااااااارب القصة تكون على المستوى المرجو منها
رعب...ربنا يطمنك بالليل كده
ردحذفyalahooeee ana ma
ردحذفsh hanammmm
shosho ssaleh
قصة تحفة تقريبا كدة انا هموت من الرعب
ردحذفيا حلاووووه D: شافت واحده طالعالها في الميرايا الله يطمنك يا دينا
ردحذفايه ده هي القصه رعب
ردحذفطب انا عايزه اقوم اصلي الفجر وخايفه اعمل ايه انا دلوقتي
ذنبي فرقبتك يا دينا :D
بهزر بهزر انا بعشق القصص الرعب وبلاقيها بصعوبه جداً
بس خلاص حبكت الاقيها متأخر وانا قاعده لوحدي
لا وقدامي مرايه كمان بصيت فيها لقيتني زي مانا الحمد لله :D
ايه ده القصة اللي بطلتها علي اسمي تبقي رعب كده
ردحذفيلا انا بحب الرعب اصلا
شكلها حلوة بتأثر فيا أوي قصص الحب اللي مش مكتلمة دي .. ربنا يخليلي جوزي وميحرمنيش منه ابدا .. ويسعد كل الناس ياااااااااارب
ردحذفقصة وأحداث جميلة ومشوقة جدا
ردحذفتفسير الاحلام
حاسه انها شبه فيلم the eye
ردحذفشبه فيلم the eye
ردحذفيامامى
ردحذفرعب من اولها كده احنا باليل
ردحذف