الحلقة 5
كانت الزيارات بين سارة وغادة لا تنقطع بس طبعا كانت بتبقى اغلبها فى معاد بعد نزول ادهم... لان سارة كانت بتتعمد انها تروح بعد معاده علشان متشوفوش ... لانها مجرد تفكيرها فيه بتعتبره ذنب كبير فى حق اختها وتوأم روحها غادة
لحد يوم كانت سارة وغادة راجعين من الكلية متأخرين وبالصدفة كان معاد نزول ادهم... واتقابلوا تانى
اول ما ادهم شافهم اتفاجئ وحس انها فرصة المفروض يستغلها
واتقدم ناحيتهم وهومبتسم
"اهلا يابنات... معاكوا عصير النهاردة كمان"
ضحكوا وهما مكسوفين وكمل وهو بيمد ايده يسلم
"انا ادهم"
وسلمت غادة
"انا غادة"
وكانت سارة واقفة ساكتة خالص ومش عارفة ترد ولا تمشى ولا تعمل ايه...فكملت غادة
"ودى سارة"
ومد ادهم ايده يسلم على سارة... وسلمت عليه سارة... حست بيه بيضغط على ايدها شوية... فسحبت ايدها بهدوء علشان ميلاحظوش ارتباكها...بس محاولتها السيطرة على هدوئها ممنعتش ضربات قلبها اللى فضلت تدق تدق ورا بعض لحد ما خافت انهم يسمعوها
وكانت فاكرة ان المقابلة خلصت على كده... لكن ادهم كان بيفتح معاهم كلام
"وانتوا اصحاب من زمان"
غادة"احنا اخوات ... سارة بنت خالتى بس اعتبرنا اخوات"
"اه شكلكوا باين انكوا بتحبوا بعض اوى... بتدرسوا صح؟"
غادة"اه احنا فى رابعة تجارة القاهرة... هانت كام شهر ونخلص خالص"
"بالتوفيق والنجاح... مالك ياسارة ساكتة ليه"
سارة"لا.. ابدا مفيش حاجة بس حاسة ان مينفعش نفضل واقفين كده"
"اه انا اسف.. معاكى حق...يالا سلام واشوفكم على خير"
مشى ادهم ووقفت غادة متغاظة من سارة وطلعوا البيت ولما دخلوا وبقوا لوحدهم
"ليه كده ياسارة زعلتى ادهم"
"انا زعلته؟"
"اه طبعا انا ماصدقت انه يقف ويتكلم معانا تقومى انتى ساكتة ساكتة واول ماتنطقى تزعليه ويمشى"
"واحنا من امتى بنقف نكلم شباب فى الشارع"
"هو ده اى حد..ده ادهم"
"يعنى لو باباكى شافنا ولا حد اتكلم علينا هنقولهم معلش والنبى اصل ده ادهم"
"مش عارفة بقى... المهم ياعالم هتكلم معاه تانى امتى وازاى"
"سيبى كل حاجة تمشى طبيعى...خلينا فى اللى ورانا هنبدأ البحث المطلوب ده ازاى"
وكملوا كلامهم فى اللى وراهم بعيدا عن سيرة ادهم
اما ادهم بعد مامشى حس انه احرجهم وغلط لما وقف يتكلم معاهم فى الشارع...دلوقتى سارة تقول عليه انه جرئ ومش بيعمل حساب لحد ...طيب مادى كانت الطريقة الوحيدة اللى يعرف بيها اسم البنت اللى ملكت قلبه وتفكيره... لازم يحاول يصلح صورته قدامها... ازاى...هما قالوا فى جامعة القاهرة... خلاص هو يروح هناك باى حجة يمكن يقابلها تانى ويحاول يصلح سوء التفاهم ده ويمشى على طول... بس هيروح امتى وياترى هيشوفها فى الزحمة اللى هناك دى ازاى... اهو يجرب ويشوف ...يمكن؟؟؟
اتفق مع شريكه فى الصيدلية انه وراه مشوار الصبح ومش هيعرف ييجى بكره ... واستلف منه عربيته لان جاتله فكرة محتاجة العربية
تانى يوم كان من الساعة 12الظهر وهو قدام الجامعة... وكان قاعد جوه العربية لحد ما يلاقيهم
والساعة 2 شافهم خارجين وماشيين كعادتهم مع بعض... نزل بسرعة من العربية وعمل انه بيصلح فيها
فجأة صرخت غادة صرخة مكتومة وهى بتقول لسارة
"شايفة يا سارة مين اللى واقف هناك"
"فين...مين"
"ادهم... عند العربية اللى هناك دى"
"بصى تعالى نمشى وكاننا مش شايفينه"
"حرام عليكى انا ماصدقت صدفة زى دى... وهنا بقى كل الناس بتكلم بعض عادى ... تعالى بس"
وراحت غادة وهى بتجر سارة ناحية ادهم
"ادهم ازيك ...انت بتعمل ايه هنا"
وكأنه متفاجئ
"مين غادة وسارة اهلا اهلا... انا كنت هنا بخلص ورق من الجامعة والعربية لقيتها مش راضية تدور"
غادة "وبعدين هتتصرف ازاى"
"ابدا انا اتصلت بصاحبى وهو هييجى يتصرف مع عربيته... بس انا عايز اقولكوا انى امبارح مكنش قصدى احرجكوا او اضايقكوا"
غادة "لالالا اوعى تكون زعلت من كلام سارة"
"لا ابدا مزعلتش بس واضح ان سارة هى اللى زعلانة لانها مش بتتكلم معايا خالص"
اضطرت سارة انها تتكلم
"لا ابدا هزعل من ايه"
كانت سارة بتتجنب الكلام مع ادهم من غير سبب...يمكن خايفة من انها تتعلق بيه... هى فعلا بتفرح اوى لما بتشوفه ومش عايزة الوقت يمر وهو واقف معاهم... وعايزة تفضل تسمعه وهو بيتكلم ... وعايزة تفضل شايفاه قدامها طول الوقت... بس غادة... افتكرت غادة... وهو شكله مهتم بغادة...يبقى لازم تفضل بعيد علشان محدش منهم يلاحظ احساسها ده ... وكمان علشان متحسش بذنب خيانتها لغادة حتى لو كانت الخيانة دى مجرد تفكير فى ادهم
وكمل ادهم كلامه وهى بتفكر
"انتوا مش بتروحوا نادى ولا حاجة يعنى لو عايز اتعرف عليكوا اكتر اشوفكوا ازاى"
حست سارة ان مالهاش مكان بينهم
"غادة انا همشى علشان متأخرش وانتوا طريقكوا واحد..سلام"
ردت غادة
"لا لا ياسارة استنى... طيب يا ادهم نبقى نكمل كلامنا بص ده رقم تليفونى نبقى نكمل كلامنا مع بعض..انا ماشية سلام"
ومشيوا البنتين وادهم مستغرب...هو عايز تليفون سارة مش غادة... خلاص اهو كده برضه قرب شوية لسارة يبقى ياخد رقمها من غادة... شافهم بيركبوا تاكسى مع بعض... ركب العربية وراح وراهم... كان طول الطريق بيحاول انهم ميتوهوش منه فى الزحمة لحد ما شاف سارة نزلت وغادة كملت بالتاكسى
قرب من سارة ونزل من العربية... واتفاجئت بيه سارة
"ايه ده... انت جيت ازاى انت مش كنت واقف بالعربية عند الجامعة"
"سارة انا عارف انتى ممكن تقولى عليا ايه... بس انا مش عارف اوصلك لوحدك خالص... انا من اول ما شفتك وانتى مش بتروحى من بالى... انا بحبك يا سارة"
"انا... انا... لالالا...مينفعش ...مش ممكن ابدا"
وجريت سارة وكانت قريبة من بيتها... وطلعت بسرعة وسمعت ادهم وهو بينادى عليها...بس مردتش عليه خالص.
opaaaaaa bs ezay hwa 7abaha bsor3a kda w kman sare7ha bsor3a gedan
ردحذفnona
نونا
ردحذفده مش حبها بسرعة بس
ده داخل على خطوبة وجواز كمان
عقبال كا البنات ان شاءالله
اه برده انا بسأل نفس السؤال ازاى هو لسه شايفه من قريب وحبها الحب ده بسرعه كده وايه كمان عايز يخطب ويتجوز
ردحذفهو الواحد مننا كاشوباب ممكن يتدلق يحب بسرعه بس مش لدرجة الجواز يعنى
هههههه
تسلم ايدك يا دينا
طلب صغير والنبى تشيل الفريفكاشن كود اللى بيطلع كل شوية لما اجى اكتب كومنت هنا اوك
محمد حجاز
ردحذفالحب يا ناس بيعمل المعجزات... وبعدين هو اول ماحبها والظروف متيسرة قال يكمل نص دينه على طول
وبيحصل اسألنى انااااا هههههههه
والله انا ماحاطة ال... اللى بتقول عليه ده خالص فى الكومنتات..بس برضه هروح اشوف اى عوائق ازيلها بسرعة
ايوة كده بقى ....انا قلت برده ابدا 5 حلقات مرة واحدة ...عشان ندخل عالجد على طول...بس مش عارفة ليه حاسة كده ان قصة الحب دى مش هتكمل وهتبقى مجرد ذكرى...يارب يكون احساسى غلط
ردحذفبس بصراحة ولد جد ...هما دول الصيادلة يابنتى ملهمش فى اللف والدوران
نوسه القاضى
ردحذفيعينى البت اتصدمت كانت فاكره انه معجب بغاده
لو غاده بقا عرفت اللى حصل ده المسكينه هتروح فيها
بصراحه التلاته مساكين وصعبانين عليا اوى
من اولها حب وخطوبه كده
ردحذفهو لحق :D
شكل الموضوع هيبقى كبييير :D
تسلم ايدك يا دينا :)
هنودة
ردحذفيعنى التاخير عن القصة كان عمدا
وهو فيه هنا حد بيتكلم بعنصرية
فيه؟؟؟مين ؟؟ ههههههههه
نوسة
ردحذفههههههههه بدأنا الكلاكيع بدرى مش كده
بنت من الزمن ده
ردحذفواد جد وصريح
والموضوع هيبقى كبير وخطير ومرير ههههههههه
تسلمى يا قمر
هو مستعجل اوى ليه كده داخل على الخطوبه كده على طول
ردحذفالموضوع بدأ يسخن ويحلو
تسلم ايدك
اميرة
ردحذفالحب من اول نظرة مع وجود الامكانيات
المشكلة دلوقتى فى الاختين؟؟؟؟؟؟؟؟
تسلمى يا جميل
ان ان ان ااااااااااااااااااااااااان
ردحذفانا قوتلك ساره حتبقي ممزقة ماردتيش عليا
ههههههههههههههههههههه
اهي اتمزقت اهي يا دودو
شذى
ردحذفههههههههههههههههههه
ممزقة فعلا ولسسسسسسسسسه
ازيك يا دينا
ردحذفبصى هو الانطباع الأول عن أدهم إنه ف حاله شوية أو خجول أعتقد إن حد بالمواصفات دى بيبقى صعب عليه جدا إنه يمشى وراهم ويعرف بيت سارة ويكلمها ف الشارع كمان وللا إيه ؟؟
بس الكتابة طبعا متميزة وجميلة
ازيك يا طارق
ردحذفمنورنى فى المدونة
هو تحليلك لادهم صح...بس يبقى صعب لو هو ماشى وراها للمعاكسة مثلا
انما هو مش عارف ينفرد بيها علشان يصارحها بحبه
وكام من خجول غيره الحب مع محبوبته
ميرسى على رأيك واتمنى تتابعنى دايما
الله
ردحذفيابخت الى بيحب حد وبيبادله نفس الشعور ونفسه يعمله حاجه عشانه
ياااااااارب اوعدنا
ياسلام يادينا على كمية المشاعر الجميلة دي هل من مزيد ..شكلها حاتتعقد بس بحلاوة ..استمري ..
ردحذف