الخميس، 2 يونيو 2011

تحت سقف واحد... الحلقة 11

بعد الكلمتين البايخين اللى شيرين قالتهم لياسر... شد ايدها وفتحها ورزع المفتاح فى ايدها وقالها"تصبحى على خير" وسابها ومشى
لقيت نفسها واقفة لوحدها وهو ماشى بعيد وحست انها كانت بايخة فى كلامها معاه بس هو اللى تمادى فى هزار مالوش لازمة وكان لازم توقفه عند حده ويفتكر الاتفاق اللى بينهم ... طيب هى ليه بتفكر كده مش يمكن كان بيتصرف بتلقائية وهى اللى اساءت الرد والتصرف... وايه الارتباك ده اللى كانت فيه ... كل ده كانت شيرين بتفكر فيه خلال الايام اللى بعد كتب الكتاب وفى يوم فى نص الاسبوع استدعاها مدير الفرع وقالها ان ميعاد السفر اتقدم وقدامها 10ايام فقط للسفر ... فوافقته... واتصلت بياسر والمكالمة كانت متحفظة كثيرا من الطرفين ولم تستغرق اكثر من دقيقتين يدوب عرفته ان كل الاوراق خلصت وميعاد السفر اتحدد وانه يكون جاهز

من بعد اللى حصل بعد كتب الكتاب قرر ياسر انه يتعامل مع شيرين بكل جدية وانه غلط لما اتعامل معاها بتلقائية وحاول يخفف الاحراج اللى كانت فيه واللى ادى لنتيجة عكسية واحرجته اكتر وفكرته بالفروق اللى بينهم واللى مستحيل هينساها
لما اتصلت بيه وحددت ميعاد السفر... قال لاسرته وحدد مع حسن خطيب ياسمين ان قدامهم 3 شهور بالكتير ويكونوا جاهزين
ولف عل كل اصحابه يستلف من ده ومن ده علشان لما يسافر يكون معاه فلوس ومايحتاجش لشيرين خالص... وفعلا قدر يجمع مبلغ كويس لحد مايعرف يستقر وينظم اموره ويسدد كل اللى وراه.
يوم السفر راح لشيرين زى مااتفقوا وكان مأجر تاكسى يروحوا المطار بيه علشان يروحوا هما الاتنين بس من غير ماحد يوصلهم

لما وصلوا المغرب كان فيه موظف من الشركة مستنيهم ووصلهم لحد العمارة اللى فيها سكن المغتربين ووصلهم لحد شقتهم وهى شقة فى الدور التانى وجيرانهم فى نفس الدور مصريين (جلال موظف بالحسابات ومراته وولاده الطفلين التوأم الصغيرين)
سلمهم الموظف نسختين من مفتاح الشقة وقالهم ان كمان يومين هيبدأوا الشغل والعربية هتيجى تاخد الموظفين الساعة 9 الصبح
بعد مامشى الموظف وفتح ياسر باب الشقة ودخلو الشنط... دخلت شيرين تتفرج على الشقة ...هى مش كبيرة بس راقية ونضيفة والفرش اللى فيها شيك... فى البداية المطبخ وبعدين صالون وسفرة وبعدين جوه فى الحمام وسط اوضتين... بتفتح شيرين الاوضة الاولى لقيتها اوضة نوم شيك وواسعة ببلكونة... وبتفتح التانية لقيتها مكتب  وكمبيوتر وتليفزيون وكنبة كبيرة يعنى حجرة معيشة ومكتب فى ان واحد... وقفت متسمرة مكانها ومشلولة التفكير
كان ياسر دخل كل الشنط ولاحظ وقوف شيرين قدام اوضة وساكتة فاستغرب وقرب يشوف فى ايه ولما شاف الاوضتين
"مالك؟؟؟ متقلقيش مفيش مشكلة"
"يعنى ايه مفيش مشكلة .. انا مش ممكن انام الا فى اوضة لوحدى"
"طيب انا بقولك متقلقيش هنام انا على الكنبة لحد مااشترى سرير ونعيد تنظيم الشقة براحتنا وزى ماتحبى وقبل مانمشى نبقى نرجع كل حاجة زى ماكانت.. متخافيش واطمنى انا مش هنسى الاتفاق"
اخدت نفس بعد ماكانت مش قادرة تتنفس واطمنت فعلا ولو ان فكرة انها تعيش فى بيت واحد مع راجل غريب كده لسه صعبة عليها
اخدت شنطها الكتير ودخلتها الاوضة واخدت شنطة ايدها وجت تنزل
"ايه ده انتى نازلة"
"ايوه"
"رايحة فين"
"نازلة شوية"
"مش كنتى ترتاحى الاول ...طيب استنى انا جاى معاكى"
"لا مالوش لزوم خليك هنا"
"لا هبقى قلقان ومينفعش اسيبك تنزلى لوحدك وياريت تخلى بالك اننا قدام الناس ازواج عاديين نبقى لسه داخلين تنزلى لوحدك بعد دقايق مينفعش... لازم تاخدى بالك من الحاجات دى"
"خلاص تعالى... انا لمحت سوبر ماركت هنا فقلت ننزل نشترى شوية اكل يبقى موجود"
"طيب يالا بينا"
وهما نازلين كان جلال بيفتح باب شقته وعرفهم بنفسه واتعرف عليهم ونزلوا راحوا جابوا الاكل ورجعوا البيت
"انا جعان.. مش جعانة؟"
"لا جعانة... بس انا مش بعرف اطبخ انت بتعرف"
"ياستى تعالى نحاول نعمل اى حاجة المهم ناكل"
"طيب هدخل اغير هدومى واجى نشوف هنعمل ايه"
لما رجعت المطبخ كان ياسر كمان غير هدومه وواقف يبص للاكياس اللى جايبينها
"يعنى ياشيرين مش بتعرفى تعملى حاجة خالص...جعان"
"انا جايبة معلبات نفتح بقى اى حاجة وناكل وخلاص لحد مانبقى نشوف حل فى ورطة الاكل دى هنعمل فيها ايه؟؟"
وهما بياكلوا كانت شيرين مكسوفة وهى بتاكل وبعدين لقيت ياسر بيتصرف بتلقائية فبدأت هى كمان تتصرف بتلقائية
كانوا بالليل بعد الاكل دخل كل واحد علشان ينام هى فى الاوضة وهو على الكنبة
لما صحيت الصبح قامت مرتاحة وكانت نايمة مطمنة على غير ماكانت متخيلة بس وهى خارجة من اوضتها شافت ياسر وهو نايم على الكنبة... الكنبة شكلها مش مريحة ايده واقعة بره ورجله متشعلقة على ضهر الكنبة... فصعب عليها وخصوصا لما قارنت بين نومها المريح ونومه غير المريح بالمرة
غيرت هدومها ولبست ونزلت وهو نايم
..........................
قام ياسر من نومه لقى اوضة شيرين مفتوحة... دور عليها فى البيت ملقهاش... وافتكر انهم لسه مجابوش خطوط موبايلات يعنى مش عارف يتصل بيها... فاتت ساعة وهو هيموت من القلق عليها وكل الافكار دارت فى دماغه... ياترى ممكن تتوه وليه لا مش بلد متعرفش عنها حاجة... لاحسن يحصلها حاجة ولا حد يتعرض لها بأى سوء... وفضل يبص كل شوية من البلكونة وشوية يروح عند الباب... وبعد ساعة سمع مفتاح الباب وهى داخلة
وبكل عصبية ونرفزة وباعلى صوت
"انتى كنتى فين؟؟ ازاى تنزلى من غير مااعرف انك نازلة او رايحة فين"

هناك 25 تعليقًا:

  1. ياحونييييييييييييييييييين
    يعني هي نزلت تجيبله سرير عشان صعب عليها وهو زعقلها عشان قلقان عليها
    ايه الحب اللى بينقط ده

    ردحذف
  2. ههههههههههههههههههههههههههههههههههههههههههههههههههههههههههههههههههههههههههههههههههههه الوصف بتاع نومه على الكنبه موتنى من الضحك

    اكيد هتشخط فيه او لما يلاقيها جيباله سرير هيتخرس هههههههههههههههههههههه
    لا بجد جامده الحلقه دى اووووووووووووووووووووى

    ................. ميرا

    ردحذف
  3. والنبى خلى ياسر دا يقعدله على جنب بدل ما يسمعلو كللمتين زى السم منها ..... شكله مبيجيش الا بالسك على دماغه

    ردحذف
  4. شذى
    انتى بتتريقى عليهم ولا ايه
    ههههههههههههه واما نشوف نزلت ليه

    ردحذف
  5. ميرا
    هههههههههههههههههه مش لازم اعيشكوا فى القصة بالوصف التفصيلى
    هنشوف رد فعلها هيبقى ايه؟؟؟

    ردحذف
  6. ايه
    متقوليش كده على ياسر
    انتى قلبك قاسى اوى اوووووووووووى
    هههههههههههه

    ردحذف
  7. ايوشه
    وياريتها تقدر حنيته دى
    نورتينى ياايوشه زاد

    ردحذف
  8. الله الله الله ...ده شكله حبها ولا ايه...انا شايفة كده ...شغال يا دينا ...بس ياريت تخللى الحلقة بدرى شوية ....انا بقيت اقوم اقراها الصبح قبل ما انزل الشغل وده تسبب فى تاكسى يوميا ....لازم تتصرفى فالحكاية دى ...انا كده هفلس

    ردحذف
  9. معلش نسيت اكتب حاجة
    انا عاجبنى اسلوب الشد والجذب ده يا دينا لانه بيولد انفعال من الطرفين يخليهم يقربوا من بعض ....كمان عاجبنى اوى انه راجل حمش ...بجد نشنتى

    خللى بالك على اخر الحلقات كلنا هنحب ياسر ههههههههههه

    ردحذف
  10. هنودة
    انا بحطها بدرى فعلا 11 تقريبا
    انتى بتنامى بدرى عن كده؟؟؟؟؟؟؟؟
    ومعلش بقى هبقى اوصلك "زى البن اللى موصلش"

    ردحذف
  11. ربنا يخليكى ياهنودة
    طيب انا بقى اعمل ايه بحب الاتنين ياسر وشيرين ومش عايزة حد فيهم يزعل التانى
    ورطة هههههههههه
    يارب تفضل عاجباكى للاخر ان شاءالله

    ردحذف
  12. ههههههههههه....البن ... الله يمسيه بالخير بقى ...لا يا ستى انا ميخلصنيش تتعبى نفسك ...خلاص هسهر حبتين ...بصراحة اصل القصة تستاهل..بس لو وعدتينى ان ياسر وشيرين يفضلوا محافظين على كبرياؤهم ...طبعا مع مزيج من الشطة والذى منه ...طبعا مش هفهمك انتى ادرى بقى...واتوقع ...مجرد توقع يعنى ...ان حد من الطرفين حد تانى هيحبه فى المغرب والغيرة تظهر بقى والمواضيع تحلى وكده

    ردحذف
  13. عجبتني اوووووووووووووي الحلقه دي

    Eman Osama

    ردحذف
  14. دينااااا :)
    أنا عاوزة أقرأ من الأول ..
    هاعملك فولو عشان اعرف اقارها في آخر اليوم كلها ..
    :)
    صباح الورد

    ردحذف
  15. هههههههههههههههههه
    يا حنين كل ده وقلقان عليها بس دخلت فى الرومانسيه
    حلوه اوووووووى الحلقه

    يويااااااااااااا

    ردحذف
  16. هنودة
    وعد انهم هيفضلوا محافظين على كبريائهم لاخر حلقة
    بس طبعا ده ميمنعش من حنية على لحظات ضعف على كل المفلفلات والمقبلات والمشهيات اللى تفتح النفس للقراءة
    بس ممكن يحصل حرق دم للقارئ شوية استحملوا بقى هى الرومانسية كده ههههههههه

    ردحذف
  17. ايمان
    ميرسى ياجميل ويارب كل حلقة تعجبك

    ردحذف
  18. شيماء
    صباحك سكر
    وتنورى المدونة باشتراكك
    مستنية رأيك لما تقرى الحلقات اللى فاتت
    ويارب تعجبك وتتابعينى فى الحلقات الجاية

    ردحذف
  19. يويا
    شفتى الحنية يااوختى هههههه
    ميرسى على كلامك العسل ده

    ردحذف
  20. بجد الحلقات حلوة اوى ودمها خفيف رغم ان ياسر بيصعب عليا من عمايل شيرين فيه بجد هايل يا دينابرافو عليكى انا بقيت بستنى الحلقة كل يوم

    ردحذف
  21. غير معرف
    ميرسى كتير ويارب تتابعنى كل يوم ان شاءالله

    ردحذف
  22. بجد الحلقات دي جامدة ..... هو دي اول مرة ليا في المدونة بس حبيتها كتير

    ردحذف
  23. هههههههههههههههههههههههههههههههههه اكيد هتعلقه وتقوله انت مالك :D

    ردحذف
  24. ههههههههههههههههههههههههههه و الله انت عسل يا ياسر

    ردحذف

قول رأيك بلاش تقرا وتقفل من سكات...ارائكم تهمنى