الأربعاء، 29 يونيو 2011

ذكرى سارة...الحلقة 12


الحلقة 12
ادهم وسارة بعد ماسمعوا الكلام اللى قالته سوسن كانوا فى منتهى السعادة...ورجع ادهم البيت كانت مامته نايمة فاستنى لما تصحى الصبح ويحكيلها كل حاجة.

تانى يوم خرجت سارة من المستشفى وراحت لها غادة وقعدت معاها لحد ماتطمن عليها

تانى يوم حكى ادهم لميرفت كل اللى حصل من لحظة مانزل مع باباه لحد ماراح لسارة المستشفى وموافقة رجاء انه يتقدم لها تانى
"بس ياادهم تفتكر ابوك هيرضى يروح تانى"
"قصدك انه ممكن ميرضاش"
"ابوك دماغه ناشفة وعندى...وهو امبارح كان رافض"
"هكلمه واقوله"
"شوف يابنى وربنا يهديه"
واتصل ادهم بابوه لانه مكنش عايز يضيع وقت...واخد ادهم تليفونه بعيد عن مامته وبعد شوية رجع وهو شكله مش مبسوط
"ها ...قالك ايه؟"
"بيقولى انا مش موافق ومش رايح لهم تانى"
"اتصل لى بيه"
"ليه"
"انت عايز سارة ولا لأ"
"مش عايز حد غيرها"
"خلاص اتصل لى بيه وملكش دعوة"
واتصل ادهم تانى بباباه
"ايوه يافتحى...انت مش عايز تيجى تخطب لادهم ليه"
"ماانا روحت واتهزأت واتقابلت احقر مقابلة...عايزانى اروح تانى لواحدة ست مهزأة"
"بس ابنك عايز البنت...ومش معقول هنحرمه من اللى بيحبها"
"لازم يسمع الكلام...ده جواز يعنى نسب وعيلة هنتربط بيها"
"وهو اختار خلاص ويتحمل مسئولية اختياره"
"يعنى انا كلامى فى الهوا...طرطور انا"
"لا انت ابوه وكلامك على دماغنا بس متحرموش من اللى بيحبها"
"انا قلت اخر كلام عندى..مش موافق"
"وانت لما روحت اتجوزت تانى كنت سالت فى كلام حد"
"انا راجل وحر فى اللى اعمله"
"وابنى راجل ومسئول عن اختياره"
"يعنى هيكسر كلامى"
"مااحنا بنقول لك اهو"
"طب عليا الطلاق ماانا جاى ولا دافع له حاجة فى الجوازة دى"
"انت حر"
وقفلت ميرفت مع فتحى...بصت لادهم شافت دمعتين صامتتين فى عينيه..وجعوها اوى
"بابا مصمم على كلامه صح؟"
"مالناش دعوة بيه...اول ماسارة تشد حيلها هنروح انا وانت نخطبها"
"وبابا؟"
"سيبه يعند على نفسه....وانا هتكفل بكل مصاريف جوازك ومش عايزين منه حاجة"
"ليه هو قال مش هيساعدنى"
"سيبك منه بقى وافرح وفرح عروستك وانا افرح بيكوا انتوا الاتنين"
"ربنا يخليكى ياماما"
"ويخليك ليا ياحبيبى وافرح بيك واشيل ولادك"

بعد ماخرجت سارة من المستشفى بيومين كانوا محددين معاد لادهم ومامته...وكانت سوسن موجودة تحسبا لاى خلافات
رجاء"اومال الحاج مجاش معاكوا ليه؟"
ميرفت"الحاج زعلان من اللى حصل المرة اللى فاتت...وعموما يعنى كده كده صاحب الشأن موجود وهو كفاية"
رجاء"بس احنا كده مش هيبقى فيه كلام رجالة"
ميرفت"لا ازاى ادهم راجل اهو ماشاء الله...وبعدين متأخذينيش يعنى ماانتوا معندكوش راجل نتكلم معاه...عارفين انها ظروف ومش معقول هتشحتوا رجالة يتكلموا لكوا"
اتكتمت رجاء ومعرفتش ترد...وسبقت سوسن
"يا ميرفت كفاية ادهم ماشاءالله واحنا عارفين ان كلمته ب100 راجل"
ميرفت"تعيشى يا سوسن...طلباتك ايه ياام سارة ومالناش دعوة بالكلام بتاع المرة اللى فاتت علشان المركب تمشى"
رجاء"انا عايزة اضمن مستقبل بنتى...ومعنديش امكانيات اجهز... يستنى لما اعمل جمعيات واجهزها يعنى حوالى 5سنين اكون جاهزة"
ادهم"5 سنين مين ياطنط ...انا عايز اتجوزها فى 5 ايام"
رجاء"انت بتقول ايه؟"
ادهم"بهزر ياطنط ...يعنى اقصد عايز اجوزها فى اقرب وقت"
ميرفت"بصى ياام سارة ادهم هيجيب شقة معقولة ويفرشها ومش عايزين منك حاجة احنا هناخدها بشنطة هدومها...وهنكتب مؤخر 10 الاف جنيه وهيجيب شبكة ب10 زيهم...قبل ماتردى ده اخر كلام عندى لو عايزة الجوازة تتم"
لسه رجاء هتتكلم قرصتها سوسن
"مبروك ياولاد...لولولوى ى ى ى ى ى ى ى"
سمعت غادة وسارة الزغروطة..عرفوا ان الموافقة تمت...وندهت سوسن للبنات وقروا الفاتحة
ادهم"طيب ننزل بكرة نجيب الدبل والشبكة وكتب الكتاب الاسبوع الجاى ان شاءالله"
ميرفت"مبروك ياادهم...مبروك ياسارة"
رجاء"كتب كتاب ايه...احنا متفقناش على كده"

هناك 13 تعليقًا:

  1. الحمد لله الدنيا بدات تضجك لادهم وسارة انا كنت فاكرة ان الموضوع حينتهى بفراق وتكون القصة حزينةبجد دايما بتدينا جديد يادينا والجو الرومانسى حلو وبسيط بس انا كنت حبه اوى الرومانسية اللى كانت فى القصة اللى فاتت بين شيرين وياسر بصراحة القصة دى ماثرة فيا اوى ومش قادرة انساها ولا اخرجها من مودها

    مى

    ردحذف
    الردود
    1. لو سمحت/ى ايه اسم قصه شيرين وياسر

      بليز

      حذف
    2. تحت سقف واحد

      حذف
  2. هههههههههه
    ايوه خليهم كتب كتاب على طول الست دي ممكن تفركش الدنيا
    هههههههههههههه
    بس جدعه ام ادهم بجد ست جامده موووووووووت

    ردحذف
  3. مى
    ميرسى ياحبيبتى على كلامك
    بصى انا كمان بفكر فى شيرين وياسر كتير
    هههههههه ظروفهم بقى جت احسن قصة
    يارب دى كمان تعجبكم

    ردحذف
  4. شذى
    هههههههه ماهو قلقان منها
    وام ادهم جدعة مسألتش فى جوزها الرخم هههههه

    ردحذف
  5. بصى بقى يا دينا
    1- انتى نزلتى الحلقه بدرى اوى ههههههههههه بس مفيش مشكله
    2- الحلقه قصيره
    3- الحلقه جميله اوى برضه تسلم ايدك

    ردحذف
  6. سهى
    1-بدرى بصالح الناس اللى زعلوا من التأخير
    2-الحلقة قصيرة...موافقاكى
    3-ميرسى على متابعتك وكلامك اللى بيشجعنى كتير

    ههههههههههههه عجبتنى اوى طريقة 123

    ردحذف
  7. جميلة ما شاء الله عليكي بس قلبي مش مطمن كدة مش عارفة لي اصل مش معقول في حاجة هتعكر الصفاء دة اكييد بس يلا مش مشكلة تسلم ايدك

    ردحذف
  8. اسراء
    ربنا يخليكى
    امممممممم اكيد كلامك صح
    تسلميلى ياقمر

    ردحذف
  9. القصه جميله جدا انا شكلى هقرأ الحلقات كلها انهارده ^_^

    ردحذف
  10. جميلة قوي يا دينا تسلم ايديكي

    ردحذف
  11. الرواية حلوة اوي و سوسن جدعه و ام ادهم اجدع .. بس يارب رجاء مترخمش :)

    ميس

    ردحذف

قول رأيك بلاش تقرا وتقفل من سكات...ارائكم تهمنى