السبت، 11 يونيو 2011

تحت سقف واحد...الحلقة 19

الحلقة 19
استسلمت شيرين وراسها بين ايدين ياسر لكنها كانت ثوانى قليلة وفتح لها التاكسى وركبها ورا وركب هو جنب السواق
طول الطريق وشيرين كل نظراتها مركزة على ياسر وكأنها بتحضنه بعنيها... اما ياسر فكان سعيد جدا باجتماعه مع شيرين فى مكان واحد حتى لو كان التاكسى بس هو فعلا كان مشتاق لها
قطع صوت رنة موبايل ياسر افكار الاتنين... ورد
"ايوه يامنال... لا لسه موصلتش المطار.. حاضر هكلمك قبل مااقفل التليفون واول مااوصل ان شاءالله... متقلقيش... محمد رسول الله"
احتارت شيرين فى تفسير المكالمة بعد استغرابها... ياترى مين منال هى عارفة ان اخته الوحيدة اسمها ياسمين... مين منال...قريبته؟؟ حتى لو قريبته ليه عايزاه يكلمها كل ده وتقفل مكالمتها بالطريقة دى؟؟؟ قررت شيرين انها تسأله اول ماتيجى فرصة
بعد مااتحركت الطيارة بشوية سألته شيرين
"مين منال اللى كلمتك واحنا فى التاكسى وياترى كلمتها ولا لأ"
"ياخبر انا فعلا نسيت اكلمها قبل مااقفل التليفون"
"مين دى ياياسر"
"خطيبتى"
كانت الكلمة وكأنها سكينة طعنها بيها ياسر فى قلبها... عايزة تصرخ وتقول له ليه خطبت وانا مراتك .. بس بأى حق تقوله وهى دايما كانت بتفكره ان اللى بينهم مجرد اتفاق وهيخلص... واخر يوم هو قالها انه مستنى نهاية الاتفاق والوضع السخيف... قد كده بيتعامل معاها وهو مش طايقها... بس معاملته الرقيقة دى كانت ايه؟؟ تمثيل ..معقول هو ممثل قدير بالشكل ده وقادر يتلون باكتر من لون... يااااااه معقول ياسر الملاك يطلع شيطان متعدد الاشكال والوجوه ... بعد مارد عليها سكتت خالص ومقدرتش تتكلم ولا كلمة
****************************************

ياسر كان بيتمنى انها تقوله ليه عمل كده كان مستعد ولو قالت له او حتى لمحت له انها بتحبه زى مابيحبها انه يسيب منال ويسيب الدنيا كلها علشانها وعلشان يفضل جنبها طول العمر ... بس اكيد بيحلم هو نسى اللى سمعه بودانه اخر يوم!!!!!!
سألها يمكن ترد عليه بكلمة تديله امل
"مالك يا شيرين... فيه حاجة ضايقتك"
ومسكت نفسها قبل صوتها المخنوق ما يفضحها
"وانا ازعل ليه... كل واحد فينا حر فى حياته واهى فترة وهتعدى وهنخرج من حياة بعض للأبد"
كلامها رغم انه كان متوقع الا انه اتصدم... كان يتمنى يسمع منها كلام تانى خالص... بس هو ليه بيجرى ورا احساس مستحيل... لازم يحاول يحب منال زى ماواضح انها بتحبه ويكون كل تفكيره واحساسه مع منال مش شيرين اللى مش حاسه بيه خالص

شيرين حست ان كلامها كان رد لكرامتها اولا لسوء ظنه فيها لما اعتقد عنها على علاقة بجلال ثانيا لانه مش حاسس بيها خالص

لحد ما وصلوا البيت وهما محدش فيهم بيتكلم مع التانى الا فى الضرورة وكان لسه يوم واحد بس ويبدأوا شغل ... طبعا العلاقة كانت شبه مقطوعة وكان كل واحد عايش لوحده... وياسر اتجه لمنال كل شوية كلام فى التليفون ولما تسمعه شيرين وتعرف انه بيكلم منال تقيد فيها نار الغيرة

بعد حوالى شهر من رجوعهم والمعاملة بينهم زى ماهى فى اضيق الحدود ويوم قبل ماينزل يروح شغله سمع الباب بيخبط وشيرين راحت تفتح
"اهلا ازيك ياجيهان اتفضلى"
"ازيك ياشيرين عاملة ايه"
"الحمدلله بخير... انتى فين؟؟ وجلال مش بشوفه"
"احنا لسه راجعين من الاجازة النهاردة وعرفت ان تانى يوم كنت عندك انك نزلتى اجازة... انا عايزة اقولك ان من اليوم اللى استقبلتينى فيه انا وولادى عندك وجلال اتغير خالص وبقى كويس معايا جدا وبقى حاسس بيه وبتعبى مع البنات وبيساعدنى فيهم على قد مايقدر... كل ده بفضلك انك خليتينى عندك لحد مااهدا وانا لو كنت اخدت قرار الانفصال كنت اكيد هندم كتير اوى"
"الحمدلله بس انا معملتش حاجة انا حسيت انك بتحبيه وهو كان هيتجنن من غيركوا وكل اللى عملته انى قعدتكوا تتكلموا مع بعض انما انتوا اللى حليتوا مشاكلكم بنفسكم"
"انتى متعرفيش غلاوتك عندى ونفسى نردلك جميلك ده"
"ولا جميل ولا حاجة ربنا يسعدكوا"

ياسر كان سامع كل الكلام اللى دار ومش فاهم حاجة؟؟ هو مين اللى كان عندها اخر يوم جلال ولا مراته ... لما سمع صوت الباب بيتقفل خرج من اوضته وسأل شيرين عن تفسير اللى سمعه
وحكت له شيرين عن كل تفاصيل الليلة اللى قبل السفر... وقتها فهم انه فسر كلام جلال غلط.. جلال كان بيشكرها على استضافتها لمراته مش له هو... حس بمرارة الندم ومعرفش يعمل ايه؟؟ يعتذر ولا يطلب انها تسامحه... كان معاد نزول ياسر فاضطر ينزل من غير مايعلق خالص على الحكاية اللى حكيتها شيرين

اثناء ماكان ياسر فى الشغل كان كل تفكيره انه ظلم شيرين وبقى يتساءل ياترى هل اتسرع فى خطوبته لمنال؟؟ بس مش معنى انه ظلم شيرين انها بتحبه... هى عمرها ما لمحت بكده ولا شاف منها اللى يحسسه انها بتحبه... يبقى هو اكيد مش غلطان بخطوبته لمنال وقطع تفكيره لما زميله قاله
 "الدور عليك النهاردة ياياسر"
زى ماهو وزمايله متعودين كان عليه الدور انه يروح بدرى عن المعاد العادى فقام متجه للبيت

شيرين وهى نايمة قامت على صوت فى البيت ولما دققت فى الساعة كانت حوالى 5 الفجر وده المعاد اللى احيانا بييجى ياسر فيه فاطمنت وحاولت تكمل نوم... لكن الصوت قرب من اوضتها وحست بباب اوضتها بيتفتح... استغربت ايه اللى يخلى ياسر يدخل اوضتها فى الوقت ده ومن غير مايخبط... لحظة فتح باب الاوضة كانت بتنور الاباجورة اللى جنبها... اتفاجئت... صرخت... مش ياسر... ده .... حرااااااااااااااااااااااامى
قامت تجرى وهى بتصرخ واتفاجئ بيها الحرامى حاول يمسكها علشان يكتم صوتها وحاولت تقاومه وهى بتصرخ وفجأة لقت ياسر بيشد الحرامى ويبعده عنها... وبعد ضرب متبادل بين ياسر والحرامى... طلع الحرامى مطواة وضرب بيها ياسر
فى لحظة كان ياسر فى الارض ومش بيتحرك والدم عامل دايرة كبيرة حواليه.

هناك 25 تعليقًا:

  1. لالالالالالالالالالالالالالالالالالالا متفقناش ع كدة هنهرج اوعى ياسر يحصله حاجة لااااااااااااااا

    ردحذف
  2. ايه داااااااااا انا عايزة الباقي ماليش دعوه ايه الحلقه النار دي يا دينا بجد تجنن الحقينا بقى بالحلقه الجديده

    ردحذف
  3. فعلا التسرع دا اوحش حاجه ف الدنيا وبنخسر حاجات حلوة كتير بسببه....بس بعد ما عرف انه كان ظالمها حسيت موضوع منال بقى معقد فعلالالا ياترى هيعمل اييييه هيسبها بعد ما اكيد اتعلقت بيه فى الفتره دى ولا ايييييييييييييه؟؟؟؟؟؟ غششينى شوية بقى دانا حبيبتك

    ردحذف
  4. سلمى
    القدر بقى هنعمل ايه؟؟؟

    ردحذف
  5. هههههههههههههههههههههههههههههه
    انتي ناااوية تعملي ايه فينا بس يا دينااااااااا

    ااااااااااااااالله عليكي بجد

    رووووووووووووووعة

    فرج عبد الرحمن

    ردحذف
  6. ايناس
    الحلقة الجديدة فى معادها ان شاءالله هههههههههه

    ردحذف
  7. ايه
    منال ايه بقى بعد ياسر؟؟؟؟؟؟؟؟؟

    ردحذف
  8. فرج
    ناوية يبقى احافظ على جمهورى ان شاءالله ويزيد كمان وكمان ههههههههههههههههههه
    ميرسى على رأيك ربنا يخليك

    ردحذف
  9. يالهوي يالهوي يااااااااااااااالهوي

    مش كان غز شيرين يعني لازم ياسر.. يا حبيبي يا ياسر

    ان شاء الله تبقى كويس وفرصه شيرين تعبر عن مشاعرها وخوفها عليه وتقوم لنا بالسلامه يا روميو

    ردحذف
  10. توتا
    هههههههههههههههههههههههههههههههههههههههههههههههههههههههههههههههههههههههههههههههههههههههههههههه
    ضحكتينى وانا زعلانة على ياسر
    بقى عايزة تضحى بشيرين

    ردحذف
  11. ماهي من البدايه وكاتمه ع نفس الراجل لا مخلياه يعبر عن حبه ولا بتعبر عن نفسها.. يمكن لو اتغزت تخاف من الموت وتعترف بحبها لياسر ههههههههههههههههههههههههه

    انا عشت القصه اوي.. اكتبي الاضافه الجديده وسيبيها ع الجهاز وهبقى اخش بعدين اقراها ههههههههههههههههههههه

    ردحذف
  12. توتا
    هههههههههههه انتى قلبك قاسى اوى اوى
    اكتب امتى ادعوووووووووووووووووووولى

    ردحذف
  13. ياسر ده المفروض يخبط دماغه في الحيــــــــــطة عشان اللي عمله ده ,,, بس حرام !! ,, يووو لاء يخبطها انا متغاظة منه ومن اللي عمله البت كانت خلاص حتحن وهو راح يخطب ,, بس هى ليه متمسكة بشخصيتها الاولانية ليه محاولتش تجر معاه ناعم ,, مش مهم بغض النظر عن الكلام ده انا عايزة اطمن علي ياااااااااااااسر اهئ اهئ اهئ اهئ

    ردحذف
  14. امنية
    بصى ياستى هى رجعت لشخصيتها الاولانية كرد اعتبار لكرامتها لما خطب واتاكدت انه مش بيحبها
    ومتنسيش انها اخدت الكلام اللى قاله لما شك فيها اخدته جد جدا المهم بقى ياسر ندعيله او ندعى لشيرين من بعده

    ردحذف
  15. يا قلبك و قفلتى على كده
    بجد روعه فوق ماتتخيلى
    أجمد من إيمان بكتييييييييييييييييييييير
    دى فيلم مش مسلسل
    ;)

    ردحذف
  16. خالد
    انت فين غايب من زماااااااان
    مفتقدة كومنتاتك
    وميرسى على كلامك الحلو ده
    تعرف ان امبارح فى نفس المعاد اتقالتلى نفس الفكرة
    فيلم مش مسلسل
    وده كان احساسى بس لما بييجى منكم بيكون مختلف
    مييييييييييييييرسى

    ردحذف
  17. لا جامده يا دودو
    اعتقد دي اللى حترجعهم لبعض تاني فكره مفتكسه

    ردحذف
  18. شذى
    ميرسى يا قمر بس تفتكرى هيعيش اصلا

    ردحذف
  19. تامر عبد الجواد
    حلوة اوى يا دينا بصراحة كل يوم بتحلو عن اليوم الى قبله بس طالب منك طلب يا ريت تبقى الأحداث تبقى اكتر من كده فى الحلقة مش عارف الحلقة قصيرة اوى

    ردحذف
  20. تامر
    ربنا يخليك يارب
    وانت تؤمر بس مش فاهمة قصدك
    الكم هو اللى قليل ولا قصدك الاحداث بطيئة؟؟؟

    ردحذف
  21. تامر عبد الجواد
    لا يا دينا قصدى الكم هو الى قليل نفسى الحلقة تكون دسمة شوية هى حلوة كده انا عارف بس تعملى ايه بقى فى الطمع بحب اعرف احداث اكتر

    ردحذف
  22. تامر
    اااااه الطمع ده موضوع تانى
    هو حق مشروع طبعا بس فوق استطاعتى
    انا بحاول على قد مااقدر اظبط الحلقة فى الكم وفى نفس الوقت تكون احداثها معقولة وقفلتها شيقة
    استحملونى بقى معلش

    ردحذف
  23. انا كدة هيعيط و انا اصلا عايزة اعيط اوعى يا دينا ياسر يجرالوا حاجة بدل ما اموت نفسى sad angel

    ردحذف
  24. احداث ساخنة ومحبوكة ..زيديني عشقاً زيديني ..ماما زيزي

    ردحذف

قول رأيك بلاش تقرا وتقفل من سكات...ارائكم تهمنى