الاثنين، 13 يونيو، 2011

تحت سقف واحد... الحلقة 22

الحلقة 22
بكل هدوء رفع ياسر راس شيرين وبص لها
"حبيبتى لازم ترتاح"
واخدها ونيمها على السرير وهى مستسلمة تماما من ناحية انها فرحانة انها اتأكدت ان ياسر بيحبها ومن ناحية تانية انها فعلا تعبانة ومش قادرة تقف... بعد ما نامت وغطاها
"انا اسف انى نمت هنا غصب عنى"
"ممكن اطلب منك طلب"
"اؤمري"
"ادخل نام وارتاح وانا بقيت احسن وهكمل نوم... انت تعبت معايا ولازم ترتاح شوية "
وافقها ياسر وباس راسها قبل مايدخل ينام... اليوم ده كان شيرين بدأت تتحسن وقدرت تقوم من السرير وتتحرك فى البيت وهما قاعدين مع بعض بيتفرجوا على التليفزيون ... كانوا قاعدين جنب بعض وياسر حاطط ايده على كتفها وهى سانده راسها على كتفه ومندمجين مع الفيلم ... لما رن موبايل ياسر
"ازيك يابابا ...انا كويس الحمدلله"
كانت شيرين متوقعة انها خطيبته ولما سمعته بيقول يابابا ارتاحت
وقام ياسر يتكلم وهو واقف وكان هيدخل اوضته يتكلم ولكن خاف لشيرين تتضايق فرجع يكمل كلامه وشيرين عينها عليه
"خير يابابا ايه اللى حصل... امتى... ازاى يعنى طردتها... وانا اعمل ايه؟... هى فين دلوقتى...طيب... ازيك يامنال... معلش متزعليش ...متعيطيش بابا هيحل كل حاجة ان شاءالله...هكلمك تانى...سلام"
اول ماشيرين سمعت اسم منال قامت تدخل اوضتها... بس ياسر مسك ايدها وهو بيتكلم ووقفها جنبه لحد ماخلص وقعدوا يتكلموا
"ايه ياشيرين قمتى ليه"
"علشان تكلم خطيبتك براحتك...انا مليش مكان وسطكوا"
"بس انتى حبيبتى ومراتى"
"انا حبيبتك ومراتك ... وهى هتسيبها؟"
"مقدرش اسيبها"
قامت شيرين على اوضتها ومقدرتش تمسك دموعها ودخل وراها ياسر ومسح لها دموعها وطبطب عليها وضمها لصدره
"ولا اقدر اسيبك...يا شيرين انا بحبك"
"ومشكلتى انى بحبك وعايزاك ليا لوحدى من غير ماحد يشاركنى فيك... انما انت بتحبها ومش عايز تسيبها"
"مش حب انتى عارفة بابا بيكلمنى يقوللى ايه؟؟ منال عايشة مع مرات ابوها فى عذاب من وهى عندها 5 سنين امبارح طردتها نص الليل بعد خناقة اتفرج عليها الشارع كله...لما اتطردت طبعا ماما خدتها عندها وبابا بيقول انه هيروح لباباها ويحدد معاه معاد الجواز بعد ماارجع ... وهى منهارة ومستنية ارجع لانها شايفانى اللى هخلصها من اللى هى فيه...تفتكرى اقدر اروح اقولها بكل سهولة خلاص معلش انا مش قد كلمتى.. واظلمها؟"
"لا اظلمنى انا؟"
"بس هيا مالهاش ذنب"
"انما انا ذنبى انى بحبك"
"يعنى هو لازم حد يتظلم"
"يعنى ايه؟"
"يعنى انتى حبيبتى ومراتى ونكمل حياتنا مع بعض عادى... وهى اكمل برضه معاها علشان مش هقدر اقولها واقول لاهلى كده خلاص وانا مش هكمل"
"وده اللى مستحيل اقبله لو هموت من غيرك ولا انى ابقى زوجة وحبيبة فى الضل وكأنى مذنبة"
"يعنى ايه"
"يعنى القرار قرارك... يا أنا يا هى"
"ليه ياشيرين بتعجزينى"
"انا بخيرك وانت تختار... ولو سمحت قوم واقفل الباب انا عايزة انام علشان رايحة الشغل الصبح"
سمع ياسر كلامها وقام وقفل عليها اوضتها وهو مش عارف يتصرف ازاى... بيحب شيرين وهى بتحبه... طيب يغدر بمنال اللى شايفاه طوق نجاة بالنسبة لها... مش ممكن... بعد تفكير اتصل بباباه
"الو... بابا استنى متروحش لابو منال وتحدد معاه معاد"
"انا لسه نازل من عنده وحددنا مش انت جاى الشهر الجاى بعد ماتوصل بشهر بالضبط تكونوا فى بيتكوا... مبروك يابنى ربنا يتمملك بخير"
مقدرش ياسر يرد بكلمة وزادت حيرته... هو علشان يحافظ على حبه لازم يظلم واحدة بريئة ولو ماظلمهاش لازم يخسر حبيبته
كان ياسر مش قادر ياخد قرار وكان امله ان شيرين تحن وترجع عن قرارها وكان كتير بيحاول يتقرب لها وكانت دايما بتسأله عن اختياره وقراره الاخير... وكان مش قادر يختار
وقرب معاد الرجوع وقبل السفر باسبوعين كانت الشركة عاملة حفلة كبيرة لتكريم العاملين اللى بتنتهى عقودهم من مختلف الجنسيات... وكان طبعا ياسر وشيرين من المدعوين وخصوصا ان شيرين وضعها مختلف لمنصبها الكبير فى الشركة ...كانت الصحافة والتليفزيون مدعوين للحفلة
وللاسباب دى كانت شيرين بتستعد بما يتناسب مع الحفلة... نزلت قبل الحفلة بكام يوم واشترت فستان سواريه من اشيك المحلات وجابت بدلة لياسر متناسقة مع الفستان... وحجزت كوافيرة تيجى لها فى البيت
يوم الحفلة لبس ياسر واستعد وقعد يستنى شيرين... وبعد ماخرجت الكوافيرة من البيت... خرجت شيرين من اوضتها... وقف ياسر مندهش ... لاول مرة بيشوف شيرين بالجمال ده حتى يوم كتب الكتاب مكنتش بالجمال ده... كانت فعلا مبهرة قرب منها وانحنى واخد ايدها وباسها
"مولاتى ملكة جمال الكون جاهزة"
ابتسمت شيرين بخجل وفرحة
"جاهزة يا ملك قلبى"
ضحكوا مع بعض وخرجوا وقابلوا جلال وجيهان نازلين... اول ما جيهان شافتها
"واااااااااو... شيرين ايه الجمال ده"
"بس بتكسف"
وضحكوا كلهم مع بعض وخصوصا ان جلال من وقت مااتغير للاحسن مع جيهان وهو بقى كويس ومحترم مع كل الناس
راحوا الحفلة وكانت كل العيون على شيرين... اما ياسر كان عايز يخبيها جوه عينيه علشان محدش غيره يشوفها ومسابش ايديها طول الحفلة وكأنه لو سابها هتروح منه... يدوب سابها لحظة التكريم ... وفضل ملازمها لحد مارجعوا البيت
لما رجعوا البيت دخلت شيرين على اوضتها وهى بتقوله
"تصبح على خير"
مردش ياسر عليها... دخل وراها ووقفها قصاده وهو بيتأملها قرب من ودنها وهو بيقول
"انا بحبك اوى يا شيرين"
مقدرتش شيرين تقاوم قلبها واستسلمت لقبلاته الكثيرة وبادلته المشاعر ...واستسلمت له كليا.. وقضيا اول ليلة كزوجين.

هناك 18 تعليقًا:

  1. يا عينى عليكى يا منااااال يا ختى

    بس بجد دى انانيه اوى منهم هما الاتنين ذنبها ايه المسكينه يعشمها ويبهدلوها

    ردحذف
  2. يا سلاااااااااااااااااام

    بس كده لسه منال مستنيه حد ينتشلها من الضياع.. هيحصل معاها ايه؟؟ ممكن تخبطها عربيه وتموت ولا يطلع معاها مرض وبردو تموت ههههههه... انا شريره خخ

    ردحذف
  3. اسيرة الاحزان
    هو لسه مقالش قراره لانه مش عايز يظلمها

    ردحذف
  4. توتا
    شريرة طبعا ههههههههههه
    يعنى علشان نخلص منها نموتها...حرام

    ردحذف
  5. يا جااااااااااااامد
    الحلقة النهارده شقيه يا دودو هههههههههههههههههه
    بس بجد ربنا يكون في عون ياسر هو بين نارين وبصراحة انا متفهمه موقفه جدا بس انه يتجوز شيرين في السر ده لا ممكن ابداااااااااا
    يابنتي ما تجوزي منال لابراهيم صاحبه واخلصي بقققققي

    ردحذف
  6. شذى
    هههههههههههه متكسفينيش لانى مكسوفة من الحلقة اصلا
    يعنى يروح يقول لابراهيم اتجوز خطيبتى
    ؟؟؟؟؟؟؟؟؟؟؟؟

    ردحذف
  7. amaaaaaaaaaaaaaaaaaaaaaaaaaaaaazing awiii awiii awiiiiii
    بس برده هو اللي غلطان لازم يختار ويجي علي نفسه ,, بس حرام عليه :( والحل ؟؟؟؟؟؟؟

    ردحذف
  8. امنية
    ميييييييييييييييييييييرسى
    وهو غلطان ازاى بس
    واحدة بيحبها والتانية مش عايز يغدر بيها

    ردحذف
  9. أزال المؤلف هذا التعليق.

    ردحذف
  10. akeed hytl3 fi sser 3and manaaaal diiii y5lii yaser yesbha :D :D :D

    ردحذف
  11. to7fa awi al 7l2a di

    ردحذف
  12. جميله جدا كلها احساس

    ردحذف
  13. احساس ياسر بشرين حلو قوى

    ردحذف
  14. جميلة جدا كلها رومانسية
    لالاسف احنا بينلاقى الرومانسية
    فى الرويات والقصص لحد دلوقتى ميلقيتش
    حب حقيقي ورومانسية يارب اعيش الاحساس الجميل ده
    الا حاسه بيه شرين
    قولواميييييييين

    ردحذف
  15. يارب يجمع كل حبيبين سوا ويسعد كل القلوب اللي بتحب بصحيح..

    ردحذف
  16. القصة حلوة اوي تسلم ايديكي

    ردحذف
  17. ع فكره هيدي اوول مره بقرا قصه لالك بس عن جد بتعقد بالمصري لانه امي مصريه جامده اوووي

    ردحذف
  18. هيدي اجمل قصه قراتها بحياتي عن جد بتعقد

    ردحذف

قول رأيك بلاش تقرا وتقفل من سكات...ارائكم تهمنى