الثلاثاء، 14 يونيو، 2011

تحت سقف واحد...الحلقة 23

الحلقة23
تانى يوم كان ياسر وشيرين جواهم احاسيس مختلفة ومش قادرين يواجهوا بعض بيها
ياسر... كان سعيد لانه لاول مرة من سنتين يقضى ليلته مع مراته وحبيبته... بس كان حاسس انه اتسرع لانها اخر كلامها معاه انه يختارها او يختار منال... وكان خايف انها تعتبر اللى حصل بينهم اختيار غير معلن لها بانه اختارها وهيسيب منال وده اللى ميقدرش عليه... هو فعلا بيحب شيرين بس ميقدرش يبدأ حبه وحياته معاها على غدر وظلم لمنال اللى مفرحتش غير لما ظهر فى حياتها... وكان كل ماييجى يتكلم مع شيرين... ميلاقيش كلام فيسكت.

شيرين... لاول مرة تحس بالسعادة اللى كانت بتسمع عنها وهى بين ايدين ياسر... بس ياترى هو كان قاصد يحصل كده كنوع من الضغط عليها والرضا بالامر الواقع؟؟ معقول يكون كان متعمد ؟؟ اتضايقت لما حست انها ممكن تكون مجبرة على اختيار هى رافضاه... وكانت كل ماتيجى تتكلم ...متلاقيش كلام فتسكت.

كان السكوت اللى بينهم مش طبيعى وخصوصا ان السفر قرب ولازم يبقوا على نور وكل واحد يعرف هيتصرف ازاى... فقرر ياسر انه يبدأ بالكلام
"شيرين انا آسف"
"بتتأسف على ايه؟"
"انا عارف ان اللى حصل كان غلط والمفروض ميحصلش"
حست شيرين بإهانة وهو بيقول كلمة غلط
"احنا معملناش حاجة غلط "
"يعنى هنكمل حياتنا مع بعض"
"حسب اختيارك"
"ماانا قلت لك مقدرش اغدر بمنال دول جهزوا كل حاجة وحددوا يوم 20 الشهر الجاى"
"يعنى بعد مانرجع بشهر بالظبط..مبروك ياعريس"
"ياشيرين انا بحبك انتى"
"ااااه طبعا بتحبنى ... وعلشان كده اخترت تتجوز واحدة تانية"
"بصى خلينا نكمل مع بعض وخصوصا اننا فعلا بقينا متجوزين بجد"
واتغيرت شيرين وبصت له نظرة حادة جدااا
"انسى يا ياسر انك تكون فاكرنى هتحط قدام الامر الواقع وارضى بحاجة انا مش عايزاها... اتفاقنا زى ماهو...والطلاق مع السفر"
كان قرار نهائى وكانوا بيتعاملوا مع بعض الايام اللى متبقية قبل السفر بحذر علشان محدش فيهم يزعل التانى... ويوم السفر بعد تحضير الشنط وخلاص شوية وهينزلوا
"ياشيرين ارجوكى فكرى تانى"
"خلاص ياياسر وقت التفكير خلص خلاص ومش فاضل غير التنفيذ"
"بس انا مش هقدر اطلقك وانا بحبك"
"لو بتحبنى طلقنى من غير مشاكل"
ولاول مرة تشوف شيرين دموع ياسر وهى متأكدة انها من قلبه.. ونزلت دموعها وهى بتطبطب عليه واختلطت الدموع وهما بيضموا بعض بقوة...لدقايق وبعدين كان لازم ينزلوا علشان وقت الطيارة
كانوا طول الرحلة ماسكين فى بعض لانها اللحظات الاخيرة وبعدها الوداع...كانت صعبة عليهم جدا ودموعهم موقفتش وكل شوية ياسر يترجاها انهم يكملوا مع بعض... ووصلوا المطار وصمم انه يوصلها البيت... وتحت البيت والبواب بيطلع شنطها كان بيسلم عليها ومش قادر يسيب ايدها وهى دموعها نازلة قالت
"طلقنى"
ضمها بقوة وحنان وكانت حاسة بالامان والحب وهى سامعه ضربات قلبه وشايفه دموعه... لحظات وباس راسها وهو بيقول
"انتى طالق"

بعد مارجعت شيرين وبعد الاستقبال الحار من مامتها ومروة
الام"فين جوزك يا شيرين"
"اتطلقنا ياماما"
دخلت شيرين اوضتها وكانت مامتها كلها اسئلة وكان صعب جدا انها ترد ولا تكلم اى حد وفضلت على الحال ده ايام لحد ما حاولت تندمج مع حياتها وترجع شغلها وكانت فاكرة انها لما ترجع الشغل هتنسى بس ابدا مفيش فايدة الحزن ساكن قلبها والضحكة مبتجيش الا بالعافية

بعد رجوع ياسر كانت منال فرحانة بيه جدا وعايزة تنزل معاه كل يوم تكمل الحاجات البسيطة اللى ناقصة فى الشقة... وكل شوية تسأله عن رأيه فى الحاجات اللى اختارتها... الشقة والوان الحيطان وشكل السيراميك وهو كان يرد عليها"حلو .. جميل.. كويس"
وكان الحزن ساكن قلبه ومش قادر يحس بأى فرحة مع منال

بعد مايقرب من 10 ايام بعد الرجوع قرر ياسر يتصل بشيرين على الاقل يطمن عليها
كانت شيرين فى الشغل لما رن تليفونها وشافت رقم ياسر فردت بلهفة
"الو...ازيك يا ياسر"
"شيرين حبيبتى ازيك... وحشتينى اوى"
كانت عايزة تقوله انه واحشها اوى وخافت تضعف وتقولها... وقالت يمكن يكون ساب خطيبته واختارها هى فسألته
"انت عامل ايه؟؟ وياترى هتتجوز امتى"
"انا مش كويس من غيرك.. والجواز فى نفس معاده"
حاولت شيرين تدارى نبرة الحزن والغضب وردت
"لو سمحت ياياسر...احنا موضوعنا خلاص انتهى ومتتصلش بيه تانى مع السلامة"
وقفلت بسرعة قبل مايرد عليها وحست ان الدنيا بتلف بيها لما عرفت ان كلها ايام ويتجوز وانه خرج من حياتها للأبد... فاقت بعد شوية عرفت من زمايلها انها بعد المكالمة اغمى عليها روحت وهى فاقدة الاقبال على الحياة... بعد ماوصلت للبيت كانت مامتها فى البيت ومروة لسه فى الشغل... وبعد ماطمنت مامتها انها كويسة
"فيه موضوع يا شيرين عايزة اكلمك فيه"
"خير يا ماما"
"من قبل ماترجعى وفيه عريس عايز ييجى يتقدم لاختك وكنا مستنيين رجوعك... وبعدين مقدرناش نقولك لما عرفنا بحكاية الطلاق بس احنا عمالين نأجل والجدع كويس واختك مش عايزة تقولك لانها شايفاكى زعلانة ومتضايقة"
"ياه ياماما ... بتؤجلوا ليه... خليه يحدد معاد وييجى وربنا يتمم لها بخير"
جه العريس وحددوا معاه معاد للخطوبة والشبكة... بعد اسبوعين ويوم الخطوبة كانت شيرين طول اليوم مع اختها وعملوا الخطوبة وكانت بتحاول تبان سعيدة علشان محدش يحس بالحزن اللى جواها ومن كتر ماهى كانت مشغولة طول اليوم نسيت تاكل اى حاجة وبالليل وقبل الخطوبة ماتخلص وهى واقفة تتصور مع اختها حست بدوار وفجأة فقدت الوعى
الحفلة اتقلبت وطلبوا الاسعاف وفى المستشفى... طمنهم الدكتور وقالهم ان الدوخة امر طبيعى لانها حامل
لما عرفت انها حامل فرحت  ومسكت بطنها وقال لنفسها
"الحمدلله ان ربنا عوضنى عن ياسر بابنه"
وقبل ماتخرج من المستشفى قالت لها مامتها
"مبروك يا شيرين انتى لازم تقولى لجوزك انك حامل يمكن ربنا يصلح الاحوال وترجعوا لبعض"
عيطت شيرين من كلام مامتها وردت عليها
"مستحيل يعرف "
وكملت بينها وبين نفسها...لانه هيتجوز واحدة تانية كمان ايام.

هناك 36 تعليقًا:

  1. يااااااااااااااااه ايه الحيره دي بس اكيد لازم يعرف بس ازاي؟؟؟؟؟؟

    جامده الحلقه كالعاده يا دندوووونه

    Eman Osama

    ردحذف
    الردود
    1. ياررررررررررررررررب النهايه تكون حلوووووووووووووووووووووووووووووووووووووووه

      حذف
  2. لأ بقي لأ بقي لأ بقي حرام عليكي يا دينا انا علي اعصابي وعندي امتحانات عايزة اعرف حيحصل ايه؟؟

    ردحذف
  3. ايمان
    هى قالت مستحيل يعرف

    ردحذف
  4. كان نفسي ابقي اول كومنت مره من نفسي بقي بس المدونه مستقصدااااااااااااني
    بجد حلوه اوي الحلقه
    اسمعي كلامي بس وخلى ياسر يحكي لابراهيم وخليه يتجوزها
    ههههههههههههههههههههههههههه

    ردحذف
  5. امنية
    كلها بكرة وهتعرفى ان شاءالله

    ردحذف
  6. اه هيا قالت كده بس مش لازم يعرف منها هيا اي حد غيرها يقوله خليها نهايه سعيده يا دينا مش ناقصين حزن اهئ اهئ اهئ

    Eman Osama

    ردحذف
  7. حرام عليكي بقى يادينـآ :(

    بُصي خلي منال دي يجيلها مرض
    ياخدها وهو يرجع لشيرو ..:DDDD

    ..
    جَميله طبعاً الحلقه ..:):)

    ردحذف
  8. ايمان
    حد مين اهله ميعرفوش عنها حاجة
    ومامتها تعرف انه من اسكندرية بس

    ردحذف
  9. حباية بندول
    حرام عليكى هههههههههه
    منال غلبانة

    ردحذف
  10. امممممم ...طبعا كالعادة الحلقة تحفة وكلها مفاجاااااات ...بس انا قلت استنى اتوقع الاحداث الجاية
    اعتقد كده منال قبل الفرح على طووول تطلع بنت مش ولابد ...وانها كانت تعرف شاب تانى لان طبعا زوجة ابيها مطلعة عينها وهى ياعينى كل همها تخرج م البيت وخلاص وطبعا ياسر ساعتها وبدون تفكير هيسيبها
    بس الفكرة بقى ازاى والدته هتقبل بشيرين الحامل كمان وهى ست على قدها والحاجات دى عندها تفرق جدااااااا

    ردحذف
  11. اصرارك المستمر ان منال غلبانه بيحسسنى ان فى وراها مصيبة وبتمثل انها ملاك ....كمان انها اخدت على ياسر بسرعه جدا ومن غير ما تقعد معاه ولا تعرفه امر يدعو للشك

    ردحذف
  12. هنودة
    امممممممممممممممممم
    توقع جايز بس موش اكيد
    معلش لازم اعيشكوا اليوم اللى فاضل فى غموض

    ردحذف
  13. ههههههههههههه...مش ضرورى يكون التوقع صح بالظبط المهم يكون نفس الاتجاه بمعنى انه اكيد هيسيب منال ...وطبعا لانه راجل عنده مبدأ فلازم هيسيبها لسبب قوى وقوى جداااااا كمان...

    طمنينى بقى صح ولا ايه ...مش هفتن عليكى...هيبقى سررررر

    ردحذف
  14. هنودة
    طبعا سر وكل الزوار بس هما اللى هيشوفوه
    ههههههههههه

    ردحذف
  15. يااااااااااااااااااه يا دينا ايه دا وجعتي قلبي

    ردحذف
  16. ايناس
    سلامة قلبك يا نوسة

    ردحذف
  17. لونــــآ ^_^15 يونيو، 2011 1:08 ص

    تحفـــــه بجد يآ دينآ .. :)
    خلتينى أقرأ آلـ أجزآء كلهآ ورآ بعض أصلآ ..

    وزى مآ قآلت دكتور هنودهـ كدهـ
    أعتقد منآل هتطلع فيشنكـ وبكدآ يآسو يلآقى آلمبرر ويرجع لشيرى :D ..

    بآلتوفيق يآ فنآنهـ وبإنتظآر آلحقلهـ آلجديدهـ إللى يآ ريت تنزليهآ دلوقتى :XD ..

    ردحذف
  18. لونا
    ميرسى لذوقك ويشرفنى انك قريتيها وسعيدة برأيك جدا
    ومنال بقى هنشوف هيظلمها ولا ايه نظامها
    ونورتينى وان شاءالله تتابعينى دايما

    ردحذف
  19. مهو لو مكنش الي حصل امبارح ده حصل كنت قولتلك خليه يتكل علي الله ويجوز ومنال وجوزيني شرين وعوضي علي الله هههههه
    بصي بقي عشان القصة دي مينفعغش تخلص علي نكد عشان ساعتها انا مضمنش الي متبعينك حيعملو فيكي ايه فالحل من وجهة نظري ان منال تعترف لياسر انها كانت بتحب واحد قبله وكان مسافر عشان ظروفه متسمحلوش بالجواااز ورجع وعرض عليها الجواز من جديد وسبب تعلقها بياسر انها كانت عايزة تهرب من مرات ابوها وطبعااا ياااسر يروح لشرين وهو كله فرح وشوق ليهاا وشرين تتقل عليه وتقوله سبني افكرر :))

    فرج عبد الرحمن

    ردحذف
  20. كل ده تعليق هو انا بقيت رغاي كده ليه ههههههه

    الحلقة روووووووووووعة طبعاااااا يا استاذتنااا

    ردحذف
  21. فرج
    هههههههههههههههههههههههههههه
    والله ضحكتنى بالكومنت التانى رهيب
    اولا ارغى براحتك وولا يهمك
    يعنى ياجماعة عايزنى اقفل القصة بقفلة تقليدية
    لازم اختلف عن القصة اللى فاتت
    وميرسى على كلامك الرائع ومتابعتك الاروع

    ردحذف
  22. يعني انتي عشان تختلفي عن القصة الي فاتت تنكدي علي اهلينا احنا ههههههههههههه

    اقفليها بأي طريقة بس تكون فريحي عايزين حب رومانسية كفااايناا غم ونبي :)

    تسلمي يا برنسس

    فرج

    ردحذف
  23. فرج
    انا قلت اختلاف
    مقلتش سعيدة ولا حزينة
    ههههههههههههههه
    بكرة يبان ان شاءالله

    ردحذف
  24. عن نفسي انا بعترف هذه القصة تختلف :)

    في انتظاااارك
    والف مليون مبروووك ومن نجااح لنجاح يا رب

    فرج

    ردحذف
  25. ربنا يخليك يافرج
    ومتحرمش من ذوقك

    ردحذف
  26. يعني مش قادره اتكلم من هول الصدمه الي شفتها

    الموضوع اتعقد كتييييييييييييييييير ووجعني قلبي على ياسر وهو بينطلق بالطلاق ولا دموعه .. ااااااااه ياني.. يالا هانت وهنشوف اخرتها النهارده

    ردحذف
  27. انا رايى هى عربية زى الفل تشيل منال وتريحها من ارف مرات ابوها وتريح شيرين وياسر :D :D :D

    ردحذف
  28. توتا
    سلامة قلبك
    وان شاءالله كله هيتحل

    ردحذف
  29. سلمى
    يا قااااااااااااااسية

    ردحذف
  30. مفيش مفر من انتظار الحلقة الأخيرة وأمرنا لله ..

    ردحذف
  31. لا طبعا لازم يعرف
    بس ازاى يسيب منال المسكينة دى
    القصة تحفة يادينا
    يارب من نجاح لنجاح

    ردحذف

قول رأيك بلاش تقرا وتقفل من سكات...ارائكم تهمنى