الثلاثاء، 21 يونيو 2011

ذكرى سارة...الحلقة 4

الحلقة 4
وقفت سارة بعد غادة ما جريت قدام ادهم ومش عارفة تقوله ايه
"أ...أ... أنا اسفة ... مقصدش والله"
"خلاص حصل خير"
وجريت سارة هى كمان على العمارة وادهم واقف يبص عليها
وطلع ادهم يغير هدومه

لما جريت سارة وكانت غادة مستنياها على السلم
"كده ياغادة بتجرى وتسيبينى"
"انا اتفاجئت واتخضيت واتحرجت ومقدرتش اقف... وبعدين احنا متفقناش على كده"
"مش كل ده علشان خاطرك... بتسيبينى ...بس اسكتى على منظره وهو غرقان عصير"
"ههههههههه اوعى تكونى ضحكتى عليه"
"ضحكت ايه انا كنت هموت من الاحراج اعتذرت وجيت وراكى"

طلع ادهم يغير هدومه وهو مش عارف مين البنتين دول اللى طلعوا العمارة اللى قصاده... مشافهمش قبل كده... قبل ماينزل طلع يبص من البلكونة يمكن يعرف ساكنين فى اى دور... اتفاجئ لانه لقى الاتنين فى وشه بالظبط ... ابتسم لهم وشاور على هدومه ورفع ايده وكأنه بيقولهم"شكرا"... اتحرجوا وابتسموا هما كمان... ونزل ادهم

كان ادهم وهو فى الصيدلية عمال يفتكر الموقف الغريب اللى حصله... والغريب انه مزعلش بالعكس كان سعيد... هو ليه سعيد وفرحان كده... مين البنات دول... ياترى اخوات ولا اصحاب... لو اخوات يبقى هيشوفهم كتير... لو اصحاب يبقى ده بيت واحدة فيهم ... ياترى مين؟؟؟ اللى جريت ولا اللى وقفت؟؟
كانت صورة سارة وهى واقفة قدامه فى الشارع مش بتروح من دماغه خالص... كل شوية يفتكرها... ويستعيد كلامها تانى

بعد ما ادهم شاورلهم ونزل قالت سارة
"بصراحة يا غادة الواد امور وكمان دمه خفيف"
"ااااااه يانى شفتى العسل...مش عسل والنبى"
"معاكى حق"
وندهت رجاء لسارة
"يالا يا سااااارة...ماشيين"

كانت سارة طول الوقت والايام اللى بعد كده بتفكر فى ادهم... وكل يوم بتسأل غادة عنه شافته ولا لأ وجاوبتها غادة
"تصدقى يا سارة ادهم بقى كل يوم لما بيرجع بيقف شوية فى البلكونة والحبة بتوع اخر النهار بقى يبص لى ويهز راسه كانه بيقولى ازيك... لولاكى مكنش اخد باله منى خالص"
"ومحاولش يكلمك"
"لأ"
كانت غادة سعيدة بان ادهم بدأ يهتم بيها ...هو اهتمام بالنظرات بس...بس احسن من الاول لما مكنش شايفها خالص

سارة مكنتش عارفة تفسير لاشتياقها انها تشوف ادهم تانى... وكانت بتفكر فيه كل شوية...حتى انها فى يوم...
حلمت انها فى مكان واسع كبير كله ورد بألوان جميلة ولابسة فستان زى سندريللا وجه ادهم من بعيد بعربية مكشوفة ووقف قدامها... ونزل وسلم عليها وباس ايدها وفتح لها باب العربية
وركبت... وركب جنبها... وهما فى العربية فتح لها علبة صغيرة مكتوب عليها بحبك وفيها دبلتين
صحيت من النوم على تليفون غادة كانت مكالمة سريعة وقفلت
بعد المكالمة كانت سارة نفسها تنام تانى وتكمل الحلم ولكنها اتضايقت انها مبسوطة من الحلم... اعتبرت مجرد تفكيرها فى ادهم وانها كمان تحلم بيه خيانة لغادة... معقول تخون غادة اختها وصاحبتها وكل حاجة لها... اكيد لأ
حاولت تقنع نفسها ان الحلم اللى حلمته مجرد تعبير من عقلها الباطن من كتر مابيتكلموا عن ادهم
بس الحلم فضل يطاردها وهى صاحية وتفتكره كتير

كان ادهم دايما يبص على البلكونة اللى قدامه...بس كان بيدور على البنت اللى وقفت قدامه دقيقة حفظ فيها كل تفاصيل وشها...ياترى هى فين وهيشوفها تانى ولا كانت زيارة عابرة لصاحبتها وفكر ازاى يقدر يعرف عنها اى حاجة...وفكر فى مامته
"ماما انتى متعرفتيش على حد من الجيران...يعنى يبقى لك معارف هنا بدل ما تبقى لوحدك"
"اه اتعرفت على خفيف كده... الدور اللى احنا فيه اتعرفت عليهم وكام واحدة من العمارة ساعات بقابلهم وانا طالعة او وانا نازلة"
"والعمارة اللى قدامنا؟"
"اه قابلت الست اللى فى الشقة اللى قصادنا بالظبط وكنت عايزة اعرف مكان كهربائى وودتنى"
"طيب ماتتعرفى عليها اكتر وتزوريها"
"فهمتك يا واد...انا شفت البنت اكتر من مرة ...شكلها عجبتك"
"لالا ياماما مش هى"
"اومال مين"
"واحدة صاحبتها كانت عندها شفتها مرة واحدة ومن ساعتها مش عارف انساها ومعرفش عنها اى حاجة خايف تكون مخطوبة واتعلق بيها ع الفاضى ...فكرت مين اللى هيعرفلى كل حاجة ملقيتش غير امى حبيبتى"
"يعنى انت قصدك ...حبيتها؟"
"باين كده ياحاجة...بس نعرف ظروفها ولو لقيت منها قبول نكلم بابا واخطبها...ولا ايه رأيك"
"انا بستنى اليوم اللى تيجى تقولى انك عايز تخطب..بس هروح كده للناس واقولهم ايه... واحدة صاحبة بنتكم عايزاها لابنى..طيب اسمها ايه"
"انا معرفش حاجة ولا اسمها ...بصى انا هحاول من ناحيتى افكر باى طريقة اوصلها بيها... وانتى لما بابا ييجى من البلد ابقى خديلهم زيارة من الحاجات اللى بابا بيجيبها وروحى بحجة التعرف عليهم"
"طيب.. ابوك قال جاى الاسبوع الجاى ..وربنا يقدم اللى فيه الخير"
بعد مااتفق ادهم مع مامته على طريقة التعارف دى خرج يبص من البلكونة...امله انه يشوف البنت المجهولة تانى...بس لقى صاحبتها"بنت الجيران" فهز لها راسه تحية ونزل.

هناك 24 تعليقًا:

  1. اممممممممممممم
    ياخسارة يا غادة
    ممكن سرة تضحىوتقول مش عايزة عشان غادة مش تزعل

    ردحذف
  2. ya 7aram 3'ada s3bana 3lya awii w fkrah mohtam beha hya :(
    nona

    ردحذف
  3. مارو
    امممممممممم
    طيب لو سارة ضحت
    تفتكرى ادهم هيحب غادة؟؟؟

    ردحذف
  4. نونا
    للاسف غادة فاكرة كده فعلا

    ردحذف
  5. لالالالالالالا مش حيحب غادة ينسحب من حياتهم عشان مش يخسروا بعض
    حتى لو عادة تقبلت الفكرة مافتكرس انهم حيتعملوا مع بعض زى الاول

    ردحذف
  6. قولتلك انااااااااااااااااا
    كمتي لاممكن تنزل الارض ابداااااااااااااااااا
    هههههههههههههههههههههههه

    ردحذف
  7. نوسه القاضى

    حبيب هارتى على طول كده ومن اول عصير

    بس حرام غاده هتزعل اوى

    ردحذف
  8. مارو
    ماهو لو الحكاية خلصت بسرعة بسرعة
    اكتب القصة ازاااااااى ههههه

    ردحذف
  9. شذى
    ههههههههههه مش ممكن طبعا

    ردحذف
  10. هههههههههههههههههههههههههههههههههههه حاجه متوقعه جدا

    بس ربنا يستر والعلاقه بين ساره وغاده ما تتلخبطش

    ردحذف
  11. نوسة
    هتزعل لو بتحبه بجد

    ردحذف
  12. توتا
    ماهو العلاقة بين الاتنين هى دى المشكلة

    ردحذف
  13. مش عارفه ليه شمه ريحه حاجه فى النص ربنا يسترها ههههههههههههههههههه
    عجبنى االمسلسل فيه تشويق كده بس لسه الملامح ماظهرتش اوى
    تسلم ايدك يابرنسس

    ................ ميرا

    ردحذف
  14. ميرا
    ههههههههه شمه ايه قولى؟؟؟؟؟؟؟
    تسلميلى يادندن

    ردحذف
  15. .. لونـــــــآ22 يونيو 2011 في 5:18 ص

    آلـ أربع حلقآت دول جم إمتى ..!! ههههههـ
    مبروكـ آلقصهـ آلجديدهـ يآ دينــآ ..

    وبدآيهـ مبشرهـ بـ فرآق وعذآب ودموع وكلآشآت بين قلب سآرهـ وعقلهآ :D ..
    يآ رب تخلفى ظنى ولو إنى معتقدش :(

    بآلتوفيق وبإنتظآر آلجديد ... :)

    ردحذف
  16. عاااااا .. مِشْ قـآدرَه أربط
    بِين اسم القِصَّه .. وحب ساره وأدهم
    وإنهم يعيشوا فـ تبات ونبات :DD

    حَيَّرتيني بقى يـآ دينا ..:)

    ردحذف
  17. لونا
    شفتى بقى انتى اتأخرتى قد ايه على المدونة
    وتوقعك الى حد ما متفق مع الجاى
    منوراااااااااااااانى

    ردحذف
  18. حباية بندول
    ههههههههه بكرة الحيرة تروح لما تبدأ الاحداث تتضح

    ردحذف
  19. أيون هو ده اللى توقعناه بالظبط

    انا مستنى اشوف ايه اللى هايحصل بين البنتين مين هايضحى هايتصرفوا ازاى

    ابدعتى كعادتك وحاسس انى دخلت جوه القصة
    :)

    ردحذف
  20. محمد حجاز
    اممممممم ياترى واحدة هتضحى ولا الاتنين يضحوا
    وسعيدة بدخولك فى اجواء القصة
    ميرسى يامتميز

    ردحذف
  21. يا ترى مين فيهم هتضحى عشان التانيه
    ولا ممكن الاتنين يضحوا عشان بعض؟
    مستنيه اعرف ايه اللى هيحصل

    ردحذف
  22. اميرة
    امممممممم هيبان مين هيضحى
    منورااااااااااانى بوجودك

    ردحذف
  23. وصلنا لمربط الفرس ..مين فيهم واقصد هنا مين في التلاتة اللي حاينسحب عشان الإتنين التانيين يكملوا ..والله الأمور صعبة وربنا يعينك يا دينا على اللي جاي ..

    ردحذف
  24. بجد غاده صعبانه عليا

    ردحذف

قول رأيك بلاش تقرا وتقفل من سكات...ارائكم تهمنى