الأحد، 26 يونيو 2011

ذكرى سارة...الحلقة 9


الحلقة 9
استغربت سارة كتير من كلام مامتها...هى كانت عارفة ان مامتها بتخاف عليها وبتحبها زيادة عن اللزوم بس مش لدرجة انها تمنعها من الجواز من اللى بتحبه وحاولت معاها كتير...كل يوم بيتكلموا فى الموضوع ده والكلام مش بيتغير ومامتها اخدة القرار اللى مفيهوش تراجع... وفضل الحال كده وكل ماادهم يسألها تقوله ان مامتها مش عايزة خطوبة ولا جواز دلوقتى... وانشغلت سارة بامتحانات نص السنة ...وكانت العلاقة قربت اكتر بين ميرفت ام ادهم وسوسن خالة سارة وكانت بينهم زيارات لا تنقطع وموضوع خطوبة ادهم لسارة كان دايما بياخد اهتمام ميرفت وسوسن وياما حاولت سوسن مع اختها ان الكلام اللى بتقوله ده مستحيل وان ادهم شارى البنت وبيحبها وهى بتحبه ومفيش فايدة...وبعد الامتحانات وفى اجازة نص السنة قررت سارة انها لازم تاخد موقف مع مامتها
"ماما ادهم عايز معاد علشان ييجى يقابلوكى"
"الموضوع ده انتى مزهقتيش منه...انتهينا منه "
"لا ياماما ماانتهيناش ولا حاجة...انا هقول لادهم ييجى مع مامته وباباه يوم الخميس"
"لا مش هستقبل حد...ومش موافقة"
"ازاى مش هتستقبلى حد...هتطرديهم مثلا"
"لو جم غصب عنى ...ايوه اطردهم"
"ياماما انتى ليه عايزة تحرمينى من الانسان اللى بحبه...لو كان وحش كنت قلت معاكى حق...انما ادهم كويس جدا"
"كويس لنفسه انا مليش دعوة بادهم او غيره"
"علشان خاطرى وافقى "
"انا قلت اللى عندى"
"وانا مش موافقة على رفضك اللى من غير سبب... ولاول مرة ياماما هتخلينى اعمل حاجة غصب عنك...انا هتجوز ادهم"
"انتى قليلة الادب"
وضربتها رجاء بالقلم على وشها لانها اعتبرتها بتتحداها وبترد عليها بدون وجه حق
وصعقت سارة ووجعها كان فى الاهانة اللى حسيتها مش من الضربة وجريت سارة على الشارع وركبت اول تاكسى قابلته وراحت على بيت خالتها... وشافتها ميرفت وهى طالعة بتعيط واتصلت بادهم تسأله وطبعا مكنش يعرف حاجة وساب شغله وراح ع البيت واخد مامته وراحوا يشوفوا سارة مالها...لانها مكنتش بترد على التليفون.

بعد ماسارة جريت فضلت رجاء تنادى عليها وملحقتهاش...اتصلت بيها على الموبايل لقيته فى البيت...ومخدتوش معاها...بعدها بشوية كان التليفون بيرن كتير ورا بعض وكانت بتلاقى اسم ادهم المتصل...حاولت ترد مقدرتش ترد لان هو السبب فى اللى حصل بينها وبين بنتها ...اللى اول مرة يحصل.

اول ماغادة فتحت الباب ولقيت سارة بتعيط
"مالك ياسارة...ماما ..ياماماااااااااا الحقى سارة"
وجت سوسن تجرى
"مالك ياسارة ايه اللى حصل يابنتى"
وحكت سارة الحكاية لسوسن وغادة...ووسط الحكاية خبط الباب وجه ادهم وميرفت... وكان ادهم ملهوف على سارة واول ما شاف سارة وباين عليها انها بتعيط... جرى عليها ومسك ايدها ومسح دموعها بايده
"حبيبتى...مالك...ايه اللى مزعلك كده"
وحست غادة باحساس غريب معرفتش هو ايه وسابتهم ودخلت اوضتها...وميرفت وسوسن لما لقوا ان الموقف مش عايز وجودهم اخدوا بعض ودخلوا ورا غادة... وكانت سارة لسه بتعيط
"اهدى يا حبيبتى واحكيلى"
وحكت سارة لادهم اللى حصل...اخدها فى حضنه وطبطب عليها
"انا اسف يا حبيبتى انى السبب...بس انا مش قادر ابعد عنك اكتر من كده...لازم مامتك توافق اننا نتجوز بسرعة"
وخبط الباب وقام ادهم يفتح لانه كان قريب من الباب... ولقى رجاء قدامه...كانت هى كمان معيطة من قلقها على بنتها واول ماشافتها زعقت بصوت عالى
"بتسيبينى وبتجرى من غير مااعرف انتى فين"
وجم اللى فى البيت على صوتها...ومحاولات للتهدئة...والصلح... والاقناع...وبعد مجهود وافقت رجاء على تحديد معاد لادهم ومامته وباباه... وماصدق ادهم واتصل بباباه وحددوا يوم الجمعة هيزوروهم فى البيت لطلب ايد سارة

وجه يوم الجمعة ووصل ادهم ومامته وباباه وقعدوا ومرضيتش رجاء تعمل اى اهتمام غير عادى بالزيارة... وبعد ماقدمت شاى...حتى من غير ماتسالهم يشربوا ايه...وقعدت
ابو ادهم"احنا اتشرفنا يا مدام بمعرفة حضرتك...وطبعا يسعدنا اننا نطلب ايد سارة"
رجاء"اه ما انا عارفة انهم متفقين من غير مايعملوا اعتبار لحد فينا"
ادهم"ازاى بس ياطنط احنا من غير رضاكوا منقدرش نعمل اى حاجة"
ابو ادهم"اهو الجيل ده كده ياخدوا القرارات وبعدين يدونا خبر"
رجاء"يمكن ابنكم كده انما انا بنتى قبل ماتعرفه مكنتش كده خالص"
ميرفت"ولا ادهم كمان كان كده...محدش عارف بقى مين غير مين"
ادهم بيغمز لباباه انه يعجل بقراية الفاتحة
ابو ادهم وهو متضايق من كلام رجاء
"طيب يا مدام نقرا الفاتحة ...واهم حاجة ان الولاد عايزين بعض"
رجاء"فاتحة على ايه...مش لما نتفق الاول"
ابو ادهم"طلباتك"
رجاء"انا مش هقول زى كل الناس عايزة شقة وشبكة ومهر..الشبكة دى اساسى لازم هيجيبها...وانا ست ارملة وموظفة على قدى ومش جاهزة لجواز بنتى..فممكن يعيشوا معايا فى الشقة "
ادهم"مابلاش يا طنط علشان كل واحد يبقى بحريته"
رجاء"لا انا مصممة وده شرط وتفرش الشقة بعفش جديد وكمان تكتب قايمة ب200الف جنيه ومؤخر صداق 100الف تانيين"
ابو ادهم"وانتى هتديهاله بقطع الغيار والضمان"
رجاء"انت بتتريق"
ابو ادهم"انتى كلامك مش طبيعى"
رجاء"مجنونة انا مثلا"
ابو ادهم"لا ياستى احنا اللى مجانين علشان جينا...قومى ياميرفت...يالا ياادهم"
ادهم"يابابا استنى"
وجت سارة تجرى من جوه
"فيه ايه ياماما...فيه ايه ياادهم"
ادهم بص لها وهو قايم مع باباه
ردت رجاء"ابوه شكله جاى يفركش الجوازة"
ابو ادهم"ماتحترمى نفسك يا ست انتى"
ادهم"خلاص يابابا"
وشد ادهم باباه ومامته كانت قامت وخرجوا...وجريت سارة ورا ادهم ونادت عليه...سلم عليها بسرعة وهماعلى الباب وقالها وهو نازل ورا باباه ومامته
"بحبك ياسارة ومش هحب حد غيرك"
ونزل ورا باباه ومامته.

هناك 17 تعليقًا:

  1. اممممممممممممم الموضوع بداء يتكعبل

    ردحذف
  2. 7asbeya allah w ne3ma elwakeel :D
    nona

    ردحذف
  3. مارو
    بيتكعبل جدااااااا
    واصلا الحكاية مش ناقصة ورجاء معقداها

    ردحذف
  4. نونا
    هههههههههههههه
    المشكلة بقى هيعملوا ايييييييييه

    ردحذف
  5. حاسس بنهاية حزينة ........ احتمال حد يموت :((

    ردحذف
  6. غير معرف
    اهلا بيك نورتنى
    امممممممم يمكن كلامك صح ويمكن لأ
    مش هقوووووول"تشويق"

    ردحذف
  7. القصة حلوة بس المشكله ان مامتها معقداها بس ازاي و باي حق يمسح دموعها و كمان يحضنها و انا متأكدة ان سارة هتموت و دي كلها هتبقي ذكريات لغادة او ادهم و بجد تسلم ايدك القصة ممتعة جداااااااااااا
    israa

    ردحذف
  8. اسراء
    مامتها انانية فى حبها لبنتها
    وهو مسح دموعها وحضنها بحق الحب ومحدش قاعد"حتة رومانسية فى الزحمة"
    امممممم ممكن اه وممكن لأ
    تسلميلى وتسلم متابعتك

    ردحذف
  9. هاتلنا بقي صور الشخصيات عشان نحس بالقصه الواحد حاسس انه بيسمع راديو
    بس امتاع بردوا رهيب بأمانه امكانيات رائعه

    ردحذف
  10. غير معرف
    انا سايباها من غير صور علشان كل واحد يتخيل الشكل اللى يعجبه"اطلق لخيالك العنااااااااان"
    وميرسى ليك واتمنى انك تتابعنى دايما
    نورتنى واهلا بيك

    ردحذف
  11. عليا النعمة الست دي مجنونه رسسسسسسسمي
    هههههههههههههههههه
    شكلها حترسي على غادة في الاخر والله
    ربنا يسسسسسسسسسستر

    ردحذف
  12. شذى
    ههههههههههههه
    ياترى النهاردة بقى مين الممزقة

    ردحذف
  13. هههههههههههههههههه
    رجاء بقي هي اللى اتمزقت انهارده
    يارب تفضل متمزقه على طول

    ردحذف
  14. مامتها غريبه اوى فى تصرفاتها
    هى بتحبها بس مش بالطريقه دى بردو !

    ردحذف
  15. الأم متعقدة وحاتطلع عقدها على البنت ربنا يستر وتكمل على خير ..

    ردحذف
  16. مامتها دى هبله وعايزه بنتها تفضل من غير جواز زيها

    ردحذف
  17. امها دى اكيد مجنونه بجد

    ردحذف

قول رأيك بلاش تقرا وتقفل من سكات...ارائكم تهمنى