الاثنين، 8 أغسطس، 2011

فوق احتمالى...الحلقة 22

الحلقة 22
سالى بعد شهرين قضتهم عند فايزة فى اجازة من اجازات تامر الاسبوعية... كان تامر متضايق وكل ما تكلمه سالى يشخط فيها ويرد عليها بعصبية...ولما ضاق بيها حاله
"جرى ايه ياتامر...مالك فى ايه؟؟عمال تتلكك من امبارح على حاجات هايفة"
"متضايق منك ياسالى"
"انا؟؟؟ليه عملت ايه"
"مش حاسة بيا خالص... انا تعبت ومش حاسس انى متجوز.. يوم الاجازة بدل مااستريح فيه ببقى تعبان من السفر..انا مينفعش معايا الحياة دى"
"يعنى ايه مش حاسة بيك... انا عارفة انك بتتعب بس متهيألى ان المرتب اللى بتاخده يعوضك عن التعب ده"
"بس ميعوضنيش عنك"
"وضح كلامك وتعالالى دوغرى ...عايز ايه"
"عايز نستقر فى السويس وابقى قريب من شغلى وانتى تبقى معايا"
"انت فاجئتنى ياتامر يعنى ايه نستقر هناك"
"يعنى اكل عيشى هناك هنقضى حياتنا كل واحد فى حتة"
"بس اهالينا هنا"
"وماله نيجى نقعد هنا فى الاعياد والاجازات "
"وبيتنا ده هنقفله"
"لا ....نبيعه"
"نبيع بيتنا؟؟"
"ايوه علشان نشترى هناك شقة كويسة فى منطقة راقية لان مينفعش تعيشى فى الشقة اللى انا قاعد فيها هناك...الشقة فى منطقة بعيدة عن الناس وصغيرة اوى ومش كويسة خالص...ها قلتى ايه"
"سيبنى افكر"
"لسه هتفكرى...عموما مفيش قدامنا حل تانى... يااما بقى اسيب الشغل هناك واجى ادور على اى حاجة هنا...وانتى عارفة انه مش سهل الاقيه بسهولة... الاسبوع الجاى تردى عليا"
"حاضر ياتامر"

حازم وهو بيتغدا بعد مارجع من الشغل
"حازم متعرفش تليفون حد من بيت هديل"
ساب حازم اللى ف ايده وانتبه وهو بيقول فى خوف
"ليه ياماما... فيه ايه؟"
"انا قلقانة اوى على هديل... مخبطتش عليا النهاردة وقلت يمكن مشغولة ولما خبطت عليها من ييجى اكتر من ساعتين مش بتفتح"
قام بسرعة حازم ومسك موبايله واتصل بهديل
"ومتصلتيش بيها ليه ع الارضى ولا الموبايل"
"اتصلت مش بترد"
وكان الموبايل على ودان حازم لحد ماالاتصال انتهى ومحدش رد
"طيب متصلتيش عند طنط فايزة"
"اتصلت وخفت اقلقها بس سألتها انتى قاعدة لوحدك قالت ان سالى معاها...لو كانت هديل عندها كانت قالت"
حازم القلق بيخليه ياخد الكلام من مامته وميردش غير باقل كلمات.. فتح الباب وخبط كتير على هديل محدش فتح...دخل بسرعة غير هدومه واخد مفاتيحه ونزل يجرى... وهو على السلم
"يا حازم رايح فين"
"رايح اشوفها فى بيت اهلها وان ملقيتهاش هارجع واكسر الباب"
طول الطريق وحازم بيسوق بسرعة رهيبة ومش عارف لو ملقاش هديل هناك هيقولهم ايه؟؟ الغريب ان المعاد ده هديل مش بتخرج فيه خالص.. ياترى حصل لها ايه؟؟؟ ممكن يكون حصل لها حاجة هى وسيف... افكار ووساوس كتير بتيجى فى دماغه... لحد ما وصل بيت سالم فى وقت قياسى...خبط وهو قلبه هيقف خايف من اللى ممكن يعرفه... لحد ماالباب اتفتح... هديل اللى فتحت
"حازم؟؟؟"
"هديل انتى هنا... حرام عليكى كنت هموت من القلق"
"قلق ليه بس ياحازم... تعالى اتفضل"
ودخل حازم وكان سالم موجود ورحب بيه جدا
"معلش ياعم سالم انى جيت فجأة بس ماما قلقت على هديل لما ملقتهاش فى البيت وقالت لى اجى اشوفها هنا"
"لا ياابنى البيت بيتك انت تيجى فى اى وقت اهلا بيك"
"اومال مش بتردى ليه ياهديل على الموبايل"
"انا نسيته فى البيت وانا نازلة"
وحازم بيتكلم جه سيف وهو بيتسند وطلع فى حضن حازم... حازم حضنه وباسه... وجت نجوى سلمت على حازم واتصل حازم بماجدة وطمنها على هديل وسيف وقعدوا شوية وكانت ناهد نايمة
ومال حازم على هديل
"قاعدة شوية ولا هتقومى دلوقتى اوصلك"
"لا كفاية انا هنا من بدرى...هدخل اشوف ماما واجى"
ركبت هديل مع حازم وهما مروحين
"ايه اللى خلاكى تنزلى من غير ماتطمنى ماما عليكى"
"انت عارف انى نزلت الساعة 9 الصبح"
"ونزلتى بدرى كده ليه"
"نجوى كلمتنى وقالت ان ماما تعبانة وعايزانى طبعا لبست بسرعة وخدت سيف ونزلت جرى...علشان كده نسيت الموبايل ومقدرتش اخبط على طنط علشان قلت اكيد نايمة"
"على فكرة انا ذنبى فى رقبتك"
"انا ليه؟؟"
"شوفى احنا داخلين على بالليل ومتغديتش النهاردة بسبب انى نزلت ادور عليكى"
"انا اسفة والله لو كنت اعرف ان طنط هتقلق كده كنت كلمتها من عند ماما"
"يعنى عاملة اعتبار لطنط بس وانا لأ"
"انت كمان قلقت... مقصدش والله متزعلوش منى"
"اللى يعرفك ياهديل مش ممكن يزعل منك ابدا"
"ربنا يخليك ياحازم... والله انتوا مش محسسنى خالص انى قاعدة لوحدى بتهونوا عليا كتير"
"طيب ممكن اطلب منك طلب"
"طبعا"
"بعد كده لما تكونى نازلة...عرفينى بس انتى رايحة فين؟؟ علشان القلق وياستى كمان علشان اوفر عليكى تعب التاكسيات واوصلك"
"اخاف اتعبك واعطلك ياحازم"
"يا ستى متقوليش كده ... انتى فى عينيا انتى وسيف"
"والله انت ونعم الصديق لشريف ...محدش بيخلص اوى كده لصاحبه زى مابتعمل"
وافتكر شريف... وكأن سيرة شريف حسسته ان كلامه مع هديل بالتودد ده .. غلط... سكت خالص مع شعور بالذنب
وبعد حوالى 10 دقايق سكوت
"مالك ياحازم... شكلك اتغير ليه ومش بتتكلم"
"لا ابدا سرحت بس فى حاجة كنت ناسيها... حاجة غلط عملتها فى الشغل"
"غلط ازاى...تضرك يعنى"
"مش مهم انا...المهم مش هخليها تضر حد خالص "
ووصلوا البيت وكان سيف نايم... شاله وهما طالعين
وهديل بتفتح الباب
"على فكرة سيف عيد ميلاده يوم الاربعاء ...شفت كبر ازاى"
"حبيبى ..طبعا فاكر هو انا اقدر انسى...ومحضر له مفاجئة"
"من غير مفاجأت كفاية اننا كلنا نتجمع ونحتفل بيه احتفال بسيط"

لما راحت سالى عند مامتها كانت بتفكر فى كلام تامر وانها تاخد القرار اللى ترد عليه بيه... فات كام يوم ولسه مش عارفة تحدد
واتصلت فايزة بهديل وقالت تيجى تتغدى معاهم
بعد الغدا... وهما قاعدين مع بعض
"ماما ... بعد بكرة عيد ميلاد سيف وعايزين نتجمع كلنا فى البيت عندى"
فايزة"وماله ياحبيبتى كل سنة وهو طيب"
سالى"كل سنة وهو طيب ياهديل"
هديل"وانتوا طيبين... مالك يا سالى"
سالى"مفيش يا هديل"
فايزة"لأ فيه... انتى من اول الاسبوع وانتى مش طبيعية وكنت فاكرة انى بيتهيألى...انما معنى ان هديل لاحظت يبقى فيه حاجة"
هديل"انتى وتامر كويسين"
سالى"اه كويسين الحمدلله... بس تامر عايزنى اروح معاه السويس"
فايزة"يعنى تروحى تقعدى اسبوع ولا اتنين... وماله"
سالى"لا.. عايزنا نبيع شقتنا هنا ونستقر فى السويس علشان تعب من السفر كل اسبوع... ومدينى فرصة ارد عليه يوم الجمعة"
هديل"يا حبيبتى المفروض تفرحى انه عايزك معاه مش تزعلى"
سالى"انا معرفش حد هناك خالص.. ولا معارف ولا قرايب ولا اى حد... يعنى انتى ياهديل عايشة لوحدك بس احنا هنا قريبين منك... وطنط ماجدة معاكى على طول... وبينك وبين مامتك نص ساعة بالتاكسى... مش بينكم بلاد"
هديل"مالك ياماما... ساكتة ليه؟؟ مش بتقولى رأيك"
فايزة"اقول ايه؟ يعنى لو سافرت مع جوزها.. هيبقى ولادى الاتنين بعاد عنى البنت فى السويس والولد فى السعودية وانا ابقى لوحدى "

هناك 14 تعليقًا:

  1. hazem kan bayen 3leh awi ya Dina bs hya msh wa7'da balha 7'aaaales fe3lan w wla 3la balhaaa bs 3'alat awi hazem elmfrod aslan ybatal ywadeha w ygebha :(


    nona

    ردحذف
  2. سلم ايدك يا قمر كانت حلوة اوى واحساسها عالى بس لازم سيرة سى زفت دة عامل زى عفريت العلبة كل ما نقول يارب نفس القية كتم على مراوح قلبى فكيها بقى متبقيش بخيلة ولعى فى عفريت العلبة دة خلينا نخلص حرام يعنى حازم كدة كتير اوى يا دندن فكيها يا شيخة نفسى حازم يرتاح بقى ويتجوز كفاية حرام كدة دة كان حيموت علشانها بدل كيس الجوافة اللى عمال يلم فلوس دةوسلم ايدك يا قمر بس متكلفتيش جوازهم فى حلقة خلينا نعيش الحب معاهم شوية بعد ما يجتمعوا بالحب

    ردحذف
  3. مش بقولكم خاين وهتحصل بلاوي

    وبالنسبه للاخت سالي المفروض تسافر مع جوزها



    راضي

    ردحذف
  4. مين دة اللى خاين يا استاذ راضى

    ردحذف
  5. حازم :)

    راضي

    ومنغير استاذ ههههههههههه

    ردحذف
  6. يعنى حازم خاين لية بقى ان شاء اللة يعنى واللة احسن من جوزها النطع اللى ولا بيحس ولا عندة دم ولا ينفع يبقى راجل اصلا وبعدين خان مين اصلا عمل اية يعنى عشان حبها واللة المشاعر بش بايد حد مهوش تليفزيون عشان نطفية ونشغلة بمزاجنا يعنى بش بايد حد انة يحب او يكرة دى مشاعر وبعدين هو حبسها جواة لا مد ايدة عليها ولا عمل زى الحيوان شريف مجوز ومعاة واحدة محترمة وايدة عايزة القطع عمال يحطها على كل واحدة شوية راجل نطع واصلا مينفعش راجل وحازم حبها بجد ودة لا بمزاجة ولا بمزاج اى حد فى الكون وهو عمرة ما عدى حدود الادب والاحترام معاها واذا كان على مرواحها ورجوعها واللة دة عيب على الخروف اللى سايب مراتة بش زى تامر عمال زى الشوال يلم فلوس ويعالم بيعمل اية هناك ولا فارق معاة حاجة وبعدين هو من اول القصة هو بيتعامل بكل زوق واحترام والحب اسمى معانى الوجود وهو مترفع عن اى حاجة غلط وخوفة عليها وقلقة دة غصب عنة هو فى الاخر انسان بلاش بقى نعمل زى الطاوس ونسيب الحمار ونمسك فى حازم بجد حرام عليك يا اخى لية كل الناس ماسكة قاضى وجلاد ودايما اللى واضح هو اللى غلطان والعصفورة هى اللى قدرها الرصاص ونسيب الصياد اللى حرمنا من نعيم صوتها عشان غريزة حب التملك بجد حرقت دمى ربنا يسمحك

    ردحذف
  7. نونا
    اهدى شوية
    انتى بتتكلمى كانهم شخصيات حقيقة تعرفيهم
    وتحرقى دمك ليه
    انتى حرة فى رايك
    وهو حر فى رايه
    ومش محتاجين حد يقنع التانى بوجهه نظره
    وعموما انا رايي تستنى لما تعرفى باقى الاحداث
    علشان نشوف رأيك هيفضل زى ماهو ولا يتغير

    ردحذف
  8. يا دينا انتى بتكتبى وعارفة انك سعات بتتدحى مع الشخية ويمكن دة اللى انا عايشاة معاهم واللى حرق دمى انى بدافع على حد معملش حاجة غير انة حب على الاقل لغاية دلوقتى لو حضرتك مخبيلنا كارثة بس بجد هو اية اللى عملة عشان يبقى خاين وانا مبقنعش حد براى انا بدافع عن حازم صفات انسان محترم انا مشفتش حاجة وحشة عملها غير سى زفت وعموما سورى لو كنت قلت حاجة غلط بس انا بجد لما بقرى ممكن تقولى كدة بعيش مع الابطال ودفاعى عن انسان مظلوم حتى لو شخصية فى قصة المبادى هى اللى بدافع عنها وبعدين انا مبعرفش اسكت قدرى بقى كدة بيتحرق دمى بسرعة مش بايدى عموما سورى بش حكتب تانى

    ردحذف
  9. انا مع راضى دى خيانة وهو بيعملها كويس علشان هو بيحبحبها مش علشان مرات صاحبو بس


    حسن عبده

    ردحذف
  10. اولا و قبل كل شئ احب افكرك ان دي قصه "حدوته يعني "
    يعني براحه ع اعصابك
    ثانيا بصي اوك الحب ده مش بايده بس هو قادر يبعد تماما عنها ويبعد الشبهات عنه اما بقى انه معملش حاجه ف ايه رأيك ف الكلام ده

    "يعنى عاملة اعتبار لطنط بس وانا لأ" كان مين بالنسبه ليها عشان يقول كده ؟؟


    "هديل انتى هنا... حرام عليكى كنت هموت من القلق" اهو بدأت مشاعره تبان غصب عنه ومحدش عارف هيحصل ايه بعد كده وانا متأكد انه هيغلط



    واخيرا اما مش هعلق على جد حرقت دمى

    راضي

    ردحذف
  11. اولا سورىعلى كلمة حرقت دمى انا تقريبا دمى محروق ال24 ساعة سورى يا راضى
    وانا عارفة انها قصة بش اشخاص حقيقية
    واول حاجة كتبتها المفروض ان سى شريف زفت هو اللى ادالة الحق دة ان يتدخل فى حياتها من ساعة مخلاة يبقى كل حاجة وهو كمان اللى فرش بيتة وسيف اتولد على ايدة والحب غصب عنة والتعلقين زلقة لسان اى انسان ممكن يتزل بلسانة وبعدين انت لو بتحب حد حتبقى عايز تبقى جمبة حتى لو بش حتاخد منة اى حاجة وبعدين يعنى استاذ شريف هو اللى صح يعنى وبعدين اللى يعرف يحب ويسيطر على مشاعرة دة مش موجود اصلا وبعدين حيسبها ازاى اذا كان الشقة لازقة فى الشقة وهو كان اعد بياكل مامتة اللى قلتلة دى مشاعر بشر اكيد تحركاتة كانت لا ارادية بش حاجة عملها بتريب وهو فين يعنى شريف اللى بيحافظ على بيتة وشرفة ولو حصل حاجة غلط بينهم فمتنساش دق فدق ولو كنت زدت لكان السقا زاد ربنا مبيسيبش واستاذ شريف لا مراعى حرمة بيتة ولا محترم نفسة واذا كان ادام مراتة عمال يحط ايدة ويعمل بلاوى فى الفرح اومال فى الدرى بيعمل اية

    وعموما اسفة لو كنت ضيقتك انا عصبية ونرفوزة بزيادة معلش يا راضى

    ردحذف
  12. ولا يهمك انا مش مضايق ولا حاجه كلنا اخوات :)

    المهم متكونيش انتي مضايقه

    اكيد شريف برده تحمل جزء من المسؤوليه لكن يمكن عشان هو معتبر حازم اخ وكمان عشان هو مش مهتم بهديل ومش فارقه معاه

    هو اه البيت جنب البيت لكن كان ممكن يحاول يتجنب المعامله ع قد ما يقد حفاظا ع شرف صاحبه

    وزله اللسان دي ممكن تتكرر بشكل اخطر طول ما العلاقه بينهم بتقوى


    واخيرا انا عندي سؤال فضولي
    هو انتي نونا الي اعرفها ع الفيس nona ya sh ??
    ولا واحده تانيه :D


    راضي

    ردحذف
  13. no comment
    خلود محمد

    ردحذف
  14. تحفة الحلقة تسلم ايدك يا دينا

    ردحذف

قول رأيك بلاش تقرا وتقفل من سكات...ارائكم تهمنى