الخميس، 28 يوليو، 2011

فوق احتمالى...الحلقة 11

الحلقة 11
راحوا يوصلوا شريف فى المطار
ولحظة ما كان شريف لازم يروح يركب الطيارة سلم عليهم كلهم
الاول حازم وبعدين سالى...اما هديل فخدها فى حضنه وباسها
واتجه للطيارة...كان سلامه عليها بالنسبة لها عادى لانه قدام الناس ومفيهوش اى مشاعر غير وداع يعنى باسها زى ماباس سالى وحازم
اما حازم فاستغرب من جرأة شريف وهديل...وقال بينه وبين نفسه
"ايه ده مش المفروض يراعوا ان معاهم ناس...ودى اللى كانت قطة مغمضة...بس ايه الغلط..ماهو جوزها"

طول الطريق وهما راجعين وحازم مبطلش تدخين سيجارة ورا التانية من غير توقف
سالى"مالك ياحازم"
"مفيش"
سالى"مفيش ازاى...انت مش بتدخن بالطريقة دى غير لما تكون متضايق"
"وانا ايه اللى هيضايقنى ياسالى...هو حد عمل حاجة"
وبص فى المراية لهديل...كانت هديل مش متابعة كلامهم اصلا واضح انها كانت سرحانة...معقول يكون شريف واحشها
هى لحقت؟؟..
حازم"هديل"
هديل"نعم"
حازم"انتى سرحانة ولا ايه"
هديل"اه سرحت وانا بتفرج من الشباك"
سالى"مالك ياحازم طريقتك غريبة اوى"
حازم"تانى يا سالى خلاص بقى...بقولك يا هديل شريف قالك انى هوضب الشقة يعنى هشرف على كل حاجة"
هديل"اه قالى"
حازم"عايزة حاجة معينة فى دماغك"
هديل"لا اى حاجة"
سالى"اى حاجة يعنى ايه...لا طبعا لازم كل حاجة تبقى على ذوقك"
هديل"عادى يا سالى...اصلا انا مش عارفة فى الحاجات دى"
سالى"هنبقى مع بعض كلنا ومش هنعمل الا اللى انتى تختاريه..ولا ايه يا حازم"
حازم"اه طبعا...احنا يهمنا سعادتها"

بدأوا بداية التوضيب بعد شهر من سفر شريف لانه بدأ تحويل فلوس لحازم من اول مرتب بعد الاجازة...كانت الشقة قديمة فكانت محتاجة مجهود كبير وتأسيس من الاول علشان تكون جاهزة
كان حازم بياخد رأى سالى فى كل صغيرة وكبيرة فى الشقة
حتى الحاجات البسيطة جدا كان بيتصل بيها وياخد رأيها فيها
كان بيشوفها مش اقل من مرتين فى الاسبوع...علشان توضيب الشقة... كان بيتفانى فى الحاجات اللى تفرحها
كان بيحس بالارتياح لما يكلمها او يقابلها
وفاتت الشهووووور
وخلال 3 شهور كانت الشقة خلصت تماما
ومبقاش فيه اللى يجمعه بهديل غير الصدف اللى كانت بتحصل كل فين وفين فى بيت فايزة

لما فاتت الشهور والشقة خلصت كان فيه مشكلة كبيرة بتواجه سالم
وكانت المشكلة مثارة فى البيت كله...معملش اى حاجة ولاجاب اى حاجة من جهاز هديل
وفى يوم اجازة جاله رشاد وقاله انه عايز يتكلم معاه فى موضوع مهم
"خير يا رشاد"
"بص يا عم سالم انا من يوم ما دخلت البيت ده وانا بعتبر نفسى ابنك"
"طبعا يابنى ومن غير ماتقول ربنا عالم معزتك عندى"
"انا هقولك حاجة ومتكسفنيش"
"قول يابنى"
"انت عارف ان هديل زى اختى..فانا عندى فكرة اعمل قرض من البنك بضمان الوظيفة وتبقى تسدد اقساطه براحتك...يعنى القرض يبقى على 5 سنين ولا حاجة فيبقى القسط مش كبير"
وسكت سالم يفكر...هياخد القرض بضمان وظيفة جوز بنته...قد ايه رشاد ده انسان بجد وبيحبهم فعلا...مفيهاش حاجة ماهو اللى هيسدد القرض...مفيش قدامه حل تانى
ووافق سالم على عرض رشاد
وبدأ رشاد فى اجراءات القرض

كانت الامور على مايرام بين سالى وتامر
تامر كل يوم بيثبت ان سالى اختارت صح وانه بيحبها فعلا
وبعد كام شهر من خطوبتهم راح تامر الجيش
وبقت اجازاته قليلة ورجعت سالى للكلية بعد ماالاجازة خلصت

حازم بدأ يحس انه متضايق لما انتهى من توضيب الشقة
رغم ان المجهود كان كبير اوى من الشغل للعمال لشراء الحاجات اللى لازمة للبيت الا انه كان بينسى كل ده مجرد مايشوف هديل...وابتسامتها البريئة...ووشها الملائكى...وصوتها الساحر
ولما خلصت الشقة ومبقاش يشوفها
حس وكأنه مدمن بيعانى اعراض الانسحاب
كان عصبى طول الوقت وبيدخن بشراهه ومش طايق نفسه ولا طايق اى حد...كان بيقعد ماسك الموبايل بالساعات يمكن تتصل بيه وتطلب منه اى حاجة... ومكنش بييجى الاتصال اللى بيستناه ده
ومبقاش شايف بنات فى الدنيا غير هديل وكأن البنات كلهم اختصروا فى بنت واحدة...هديل
وبدأ يفوق على واقع احساسه...ازاى يفكر فيها كده
وهى مرات صاحبه...او اخوه زى مابيعتبروا بعض من اول ما وعيوا على الدنيا
وآلمه احساسه بيها غير ألمه من بعدها عنه...وانها مش حاسة بيه نهااااائى
وتوصل فى الاخر لنتيجة واحدة...زى ماقال عبد الوهاب
"خلونى احبه على هوايا"
هو مش عايز اكتر من كده...يحبها بس..بينه وبين نفسه
واستحالة يفكر فى اكتر من كده

بدأ رشاد فى اجراءات القرض واول مااستلمه سلمه كله لسالم
اللى بالتالى سلمه لناهد...وبدأت رحلة الشراء المتتالى
اشتروا كل حاجة وقبل ما ييجى شريف بشهر..حددوا معاد الفرح بعد رجوعه باسبوع
وبدأوا يفرشوا الشقة ويجهزوها استعدادا للفرح
ورجع حازم يشوف هديل كل يوم
لان كل يوم هديل ونجوى وناهد بيروحوا يفرشوا الشقة
وحازم بقى لما يرجع من شغله ميخرجش تانى لمجرد تواجده فى الشقة الملاصقة لهديل...على الاقل هيشوفها وهى جاية او ماشية
ومرة وهو قاعد فى البيت...قبل ما يرجع شريف باسبوعين..الباب خبط...وكانت هديل
"حازم...نجوى تعبانة اوى شكلها بتولد...ممكن توصلنا اى مستشفى"

هناك 11 تعليقًا:

  1. abda2 a7enelha laken nzarato fy 7'yali nfsy a7lam m3aha ala2eh fw2ni w sa7ani....
    ya 3eny 3lek ys 7azem :S:S
    nona

    ردحذف
  2. اااااااااااااااااااااااااااااخ ياقلبى اهو الواد وقع على بوزه ههههههههههههههههه

    الحلقه دى رومانسيه اوى ومكتوبه بحرفنه جامده
    تسلم ايدك ياست الكل

    ................. ميرا

    ردحذف
  3. اممممممممممممممم....حب من طرف تالت...ياعينى خسارة والله حازم ابن ناس احسن من اسمه ايه ده ..واللى هتشوفه معاه

    ردحذف
  4. نونا
    يا سيدى ع الاغانى الجامدة

    ردحذف
  5. ميرا
    تسلميلى يا حبيبتى
    على الكلام الكبير ده

    ردحذف
  6. هنودة
    هههههههههه بالظبط
    حب من طرف تالت

    ردحذف
  7. افففففففففففففف لي كدة بس التعقيد دة حالتوصعبة خالص انا عارفة ان الجوازة مش هتتم لان اللي اسمه ايدة متكبر قوي و المواضيع مش هتعدي علي خير

    ردحذف
  8. wallhy ana knt 7asa ano he7bha
    Tu2aa

    ردحذف
  9. انتِ كاتبة رائعة تدخل القلب استاذة دينا حقيقي مليتي حياتنا بقصصك تسلم ايديكي ليا بس ملاحظة غلطة مطبعية بسيطة في جملة بدا حازم ياخد راي سالي في كا تفصيلة في الشقة اكيد حضرتك كتبتي اسم سالي غلط بدل هديل معلش اصلي مركزة وباقرا قصصك بقلبي اوي

    ردحذف
  10. تحفة الحلقة والاحداث روعة

    ردحذف

قول رأيك بلاش تقرا وتقفل من سكات...ارائكم تهمنى