الحلقة 15
ادهم رد باستغراب"اطلقك؟؟"
ميرفت"جرى ايه ياسارة احنا كنا بنهزر ولا بنلعب علشان بعد كل ده تقوليله طلقنى...بلاش كلام فارغ ...ادخلى يالا اوضتك وانا وفتحى ومامتك هننزل مع بعض...ولا ايه ياام سارة كلامى صح ولا بنتك تتطلق ليلة دخلتها"
رجاء "لا كلامك صح...طلاق ايه ربنا يهدى سرهم"
ميرفت"تصبحوا على خير ياولاد...يالا ياجماعة"
ادهم"وبابا ياماما"
ميرفت"ملكش دعوة بينا احنا بنعرف نحل امورنا مع بعض"
فتحى "تصبح على خير ياابنى...متزعليش يا سارة"
سارة"حصل خير"
رجاء"تصبحى على خير ياسارة...ربنا يسعدك ياحبيبتى"
ومشوا فعلا وسابوا العرسان والوضع متوتر بينهم
لما نزلوا راحت رجاء على بيتها ووقف فتحى تاكسى وركب هو وميرفت
"ممكن اجى ابات عندك النهاردة ولا اروح اشوفلى حتة ابات فيها"
"انت هتستاذن انك تيجى بيتك"
"ده بيتك انتى ولو مش عايزانى مجيش"
"انت هتتدلع ماتيجى وخلاص"
واول ما وصلوا البيت
"فى ايه يا ميرفت"
"لا ابدا مفيش اى حاجة...انت بس مقاطعنا بقالك كام شهر ومجبتش لابنك فى جوازه حتى ابرة"
"انا كنت بضغط عليه علشان مايناسبش الست دى"
"وهو ماله ومالها البنت كويسة وهما الاتنين بيحبوا بعض يبقى نقف فى طريقه ليه"
"خلاص اللى حصل حصل...بس انا حاسس ان الست دى هتنغص على ابنى عيشته ومش هيرتاح بسببها"
"يبقى نصيبه واختياره وهو حر"
بعد ما رجاء وميرفت وفتحى نزلوا...دخلت سارة اوضتها وهى مكسوفة من نفسهابعد اللى قالته...ودخل وراها ادهم ...كان متجاهلها خالص غير هدومه ودخل الحمام وخرج وهى قاعدة زى ماهيه مااتحركتش
"انتى هتفضلى متحنطة كده ليه"
"اعمل ايه يعنى"
"قومى ..غيرى هدومك...انما قعدتك كده غريبة"
"لا ماانا مستنياك تشيلنى وتفك لى الطرحة وتعمل حركات الافلام دى"
"والله...ماانتى كنتى عايزة تتطلقى من شوية...وكنت هشيلك فعلا واحدفك من ع السلم"
"واهون عليك ياحبيبى"
"انتى هان عليكى تقوليلى طلقنى بعد كل اللى استحملته وعملته علشانك"
"ياادهم انا صعبت عليا ماما...وباباك كمان شتمنى وشتمها زودها اوى يعنى"
"ماانتى مامتك من يوم ما عرفتك وهى مزوداها معايا وبستحمل علشان بحبك وكنت فاكرك بتحبينى زى مابحبك"
"بحبك اكتر ما بتحبنى"
"اهو كلام...انتى بتقولى كلام وعند اول مشكلة كنتى عايزة تسيبينى انما انا حبى ليكى افعال...اى مشكلة بتقربنى ليكى مش بقول خلاص بلاها مشاكل واريح دماغى احسن"
"متزعلش يا حبيبى حقك عليا...مش هتفك الطرحة"
"واضح ان عندك مشاكل مع الطرحة "
"ايوه طبعا مش لازم نعمل زى الافلام"
وضحكوا مع بعض وكانوا فى منتهى السعادة ووعدت سارة ادهم انها مش هتزعله تانى ابدا وهتعيشه فى سعادة دايمة
بعد جواز ادهم وسارة زادت الزيارات بين سوسن وميرفت وهما كانوا اصحاب بس بقوا اصحاب قريبين اكتر بعدما ميرفت بقت قاعدة لوحدها...وكانوا اى مشوار لواحدة فيهم بتاخد التانية معاها... فكانت ميرفت لسوسن اقرب من رجاء اختها اللى من لحمها ودمها وعرفت ميرفت من سوسن ان ده طبع رجاء بصرف النظر عن ادهم وانها ملازمة لسارة دايما ومكنتش بتسيبها غير وقت المدرسة او الكلية بس غير كده هما دايما مع بعض وان سارة مكنتش تقدر تخرج زى اى بنت مع صحباتها بالعكس يااما مع رجاء او يقعدوا فى البيت
***************************************
وعدت الايام الاولى من جواز ادهم وسارة فى سعادة بس كانت رجاء بتزورهم يوميا وتقعد 3او 4 ساعات معاهم فى الاسبوع الاول واتخنق ادهم منها بس كان مضطر يستحملها علشان سارة
وبعد اسبوع اتصل بيه باباه
"ازيك ياادهم... انا عارف انى قصرت معاك فى جوازك"
"لا يا بابا...انت طول عمرك مش بتبخل عليا فى حاجة"
"انا فكرت اعوضك ازاى... فحجزت لك اسبوعين شهرعسل فى تركيا تبع شركة سياحة بتاعة واحد صاحبى...تعجبك ولا تحب تروح حتة تانية"
ادهم فرحان"لا يابابا ده كده حلو اوى...متشكر اوى"
"ياواد ده انت تطلب اى حاجة عينيه ليك...خد رقم الشركة وشوف التفاصيل"
وفعلا اتصل ادهم بالشركة واتحدد معاد السفر...وقضوا احلى اسبوعين فى حياتهم
بعد ما سافروا كانت رجاء حاسة بوحدة رهيبة وخصوصا ان بنتها الوحيدة بعيدة عن البلد كلها...وحست بيها اختها وصممت انها تاخدها تقعد معاها كام يوم...وفعلا راحت قعدت عند سوسن
بس كانت لما ميرفت بتيجى تزور سوسن بتحاول تاخد جنب ومتقعدش معاهم... وسألتها سوسن
"ليه يارجاء كل ماميرفت تيجى متقعديش معانا مع انها حماة بنتك"
"مبحبهاش"
"ليه دى كويسة جدا"
"لا بقبلها ولا بقبل جوزها ولا ابنها"
"يا ساتر ليه كده"
"من ساعة ما ظهروا فى حياتنا وبنتى اتقلبت عليا"
"دى سارة بتحبك اوى يا رجاء ليه بتقولى كده"
"يا ستى ما خلاص بقت بتحب جوزها اكتر منى...لما سافرت يدوب بتكلمنى فى اليوم دقيقة ولا اتنين بالعافية وخلاص كده"
"اعذريها دول عرسان وتلاقيهم ناسيين الدنيا بحالها"
"ايوه واهى نسيتنى انا كمان فى الزحمة"
واتصلت سارة فى اللحظة دى
"ازيك ياماما...وحشتينى اوى اوى"
"ازيك يا حبيبتى انتى اللى وحشتينى الدنيا من غيرك مالهاش طعم"
"والله ياماما انا اللى متضايقة علشان مش عارفة اشوفك واقعد معاكى...وحشتينى واتفقت مع ادهم اول مااجى لازم اجى عليكى واقعد فى حضنك كتير"
"تعالى يا حبيبتى...مستنياكى...بس خلى بالك من نفسك وترجعيلى بالسلامة يارب"
rabena yehdeki ya raga2 :D
ردحذفnona
واااااااااااااااااااو ...هى الاحداث مشيت جامد كده ليه ...انا توقعت انهم مش هيتجوزوا بصراحة ...اممممممممم شكل الموضوع مليان مفاجات ...
ردحذفبس ليه تعليق صغنن ياريت تتقبليه بصدر رحب...حاساكى بتكتبى الحلقات دى وانتى مجهدة جدا ...لانى مش شايفة نفس القوة والعمق بتوع القصة اللى قبلها(تحت سقف واحد ))مش عارفة انا بس اللى حاسة كده ولا ايه ؟؟
او يمكن عشان بعدت شوية ...مش عارفة ...بس عموما انا متوقعه مفاجات كتيرة هتظبط الحكاية
نونا
ردحذفربنا يستر
هنودة
ردحذفطبعا انا اتقبل كل الملاحظات
بصى انا بكتب الحلقات بكل تركيز بس انا عارفة انتى حسيتى كده ليه
كل الناس وانا منهم شايفة ان تحت سقف واحد كانت فيها رومانسية حلوة اوى وجديدة علشان كده انتى عايزة حاجة فى نفس المستوى...وده متكررش بصراحة
مش عمدا منى بس احداث القصة دى لازم تكون فيها الرومانسية الاجتماعية لان زى ماقلتى لسه فيه مفاجات
الحمدلله ربنا يهدي سرهم و يبعد عنهم رجااااااااااااااااء و قرفها هههههههههههههه
ردحذفاسراء
ردحذفيااااااااارب
ولوانى معتقدش انها هتسيبهم فى حالهم ههههههه
لما نشوف هيحصل ايه تانى
ردحذفبس مازالت رجاء مستفزه صراحه :D
بنت من الزمن ده
ردحذفهنشوووووووووف ربنا يهديها
ايه النداله دي
ردحذفيعني ساره وادهم حرقو دمنا كل ده واحنا قعدين على اعصابنا ويوم ما يروحو تركيا يروحو لوحديهم من غيرنا
ههههههههههههههههههههه
والله رجاء ما حتسكت غير لما ساره تطلق وادهم يتجوز غادة
احساس قوي جدا
الا هي غاده فين صحيح
ههههههههههههههههههههههههههه قلبها كوميدى
ردحذفههههههههههههههههههه
ردحذفانا كنت متوقعه مشاكل كتيــــر بس ماشاء الله سوسن حلت كل حاجه! :D
ردحذفميس