الحلقة 1
"خلاص اخيرا خلصنا المدرسة المقرفة دى"
"يعنى يا هالة مش هتوحشك المدرسة واصحابنا"
"يا شيخة انا ما صدقت ييجى اخر يوم فى الامتحانات... بس يارب نجيب مجموع وندخل الجامعة"
"يارب تجيبى مجموع"
"وانتى يا هديل ...مش عايزة تدخلى الجامعة"
"مش موضوع عايزة ولا مش عايزة... معتقدش بابا هيقدر على مصاريفها...يا ستى ماله الدبلوم بس انجح وخلاص"
"ولا علشان تبقى زى نجوى اختك دبلوم تجارة"
"لا ... اصلا جواز نجوى كان عبء كبير على بابا ويدوب انا هشتغل علشان وقت ماييجى ابن الحلال اكون قدرت احوش حاجة اساعد بيها بابا"
"اه صحيح...هو فرح نجوى امتى؟علشان اظبط نفسى"
"يوم الخميس الجاى...انا مش قايلالك"
"انا كنت متلخبطة الخميس ده ولا اللى بعده...جبتى فستان"
"بقولك جوازها اخد كتير تقوليلى فستان"
"بصى مرات خالى عندها اتيليه تأجير فساتين سواريه...تعالى شوفى معايا فستان ومتقلقيش من ناحية الفلوس"
قاعة افراح بسيطة مليانة ناس من اقارب ومعارف العروسين
فرحة ورقص وزغاريط من الاهل
فى مكان بعيد فى القاعة
"مبروك يا زينات...يعنى لو مكناش اتقابلنا بالصدفة مكنتيش عزمتينا على فرح ابن اختك"
"معلش يا فايزة من يوم ما عزلنا وانا مجيتش المنطقة هناك خالص والحمدلله اننا اتقابلنا صدفة ورجعنا نشوف بعض تانى"
"الا قوليلى هى مين اللى واقفة هناك دى ولابسة فستان احمر"
"دى هديل اخت العروسة"
"مش شبه اختها...هى عندها كام سنة"
"مش عارفة بالظبط بس هى لسه مخلصة مدرسة وحتى نتيجة الدبلوم لسه مظهرتش"
"يعنى تقريبا 18 سنة...هى مخطوبة"
"لا بس انتى بتسألى عليها كده ليه"
"اصل شريف ابنى نازل اجازة من السعودية الشهر الجاى وكان بيقولى ادور له على عروسة...والبنت دى عجبتنى"
"هو شريف فى السعودية...يااااااه ده انا اخر مرة شفته قبل ما اعزل كان لسه فى اعدادى وسالى كانت صغيرة اوى"
"يااااااه يا زينات...شريف دلوقتى بقى مهندس فى السعودية وسالى اهى رايحة 3 ألسن"
"ماشاءالله ربنا يخليهوملك"
"تعيشى ياختى...بت يا سالى قومى كده صورى البنت دى بالموبايل من غير ما تحس"
"ازاى ياماما ايه الاحراج ده"
"احراج ايه...ماالناس كلها واقفة تصور العروسة والعريس...اقفى كأنك بتصوريهم وصوريهالى"
وقامت سالى ونفذت كلام مامتها بالحرف الواحد
فى بيت فايزة تانى يوم
"سالى لما اخوكى يرجع من شغله ويفتح الشات اندهيلى عايزاه"
وبعد شوية
"تعالى ياماما شريف قاعد اهو"
"طيب سلمى عليه واكتبى اللى هقولهولك... انا شفت عروسة مناسبة ليك فيها كل المواصفات اللى انت عايزها... شفتها فى فرح اختها وكانت واقفة عاقلة وهادية مش بترقص ولا بتتنطط زى بقية البنات وعندها ييجى 18 سنة كده...ايه رأيك"
"بيقولك شكلها ايه"
"ابعتيله صورتها"
"بيقولك حلوة"
"قوليله...اتكلم معاهم علشان لما تيجى تشوفها على طول"
"بيقولك شوفى ظروفهم الاول ولو لقيتيهم ولقيتيها كويسة ابقى اشوفها واقابلها لما اجى...علشان هو عايز يلحق يتجوز فى الاجازة دى"
"طيب قوليله لو عجبتنى هجيبله تليفونها ويبقوا يتكلموا يشوف هيحصل قبول ولا لأ"
"قبول ازاى ياماما بالتليفون"
"انتى مالك قوليله وخلاص"
"بيقولك ماشى...بس انا مستغرباكوا"
"وانتى ايش فهمك فى الحاجات دى... البنت دى شكلها لا لفت ولا دارت...وهى اللى تنفع اخوكى بس يحصل قبول"
"وهتروحى لهم ازاى ولا تقولى ايه"
"هقول الصراحة وعلى عينك ياتاجر هو انا بعمل حاجة غلط"
واتصلت فايزة بزينات
"ازيك يازينات... الا قوليلى ينفع تحددى معاد مع اهل عروسة ابن اختك"
"خير يا فايزة"
"كلمت شريف علي هديل وعايزة اروح اقابلهم واتعرف عليهم"
"طيب انا علاقتى بيهم بعيدة كام يوم بس واكلم ابن اختى وهو اللى يكلمهم ويحددلك المعاد وارد عليكى"
وفى سبوع العروسين
"عم سالم...كنت عايزك فى موضوع"
"خير يا رشاد"
"خالتى كلمتنى وبتقول فيه جماعة عايزين ييجوا يتعرفوا عليكوا"
"مين دول...وليه"
"واحدة معرفة خالتى شافت هديل وعايزة تتعرف عليكوا"
"اه فهمت... طيب سيبنى اشاور الحاجة وارد عليك"
سالم وناهد فى البيت
"هاااا ايه رأيك فى اللى قلتهولك"
"اهلا وسهلا بيهم ياسالم هنقول للناس لأ"
"البنت لسه صغيرة وانا لسه خارج من جوازة الكبيرة على فيض الكريم...اعمل ايه؟؟انا لا حيلتى مرتب ولا معاش انا عايش برزق ربنا"
"يعنى هنقف فى وش النصيب...وياعالم هيحصل نصيب ولا لأ ... احنا نقابلهم واللى يريده ربنا خير"
"ونعم بالله...طيب ابقى شوفى ييجوا امتى وقولى لجوز بنتك"
"عايزة اقولك ان من بكرة نجوى هتيجى تبات معانا"
"تبات فين وهى مكملتش 10 ايام جواز"
"ماهى هتعمل ايه...رشاد هيرجع الشغل تانى وشغل المصنع يعنى الجدع هيخرج 12 بالليل يرجعلها تانى يوم الساعة 3..نسيبها تنام لوحدها ...حد يطلع عليها يعمل فيها حاجة"
"يا ست حد مين..حرامى ايه اللى هيدخلها وهما حيلتهم حاجة"
"مش لسه عروسة وكل حاجتها جديدة...انا بقولك وخلاص مش هسيب البت لوحدها ولا عايزنى اروح ابات معاها"
"وعلى ايه؟خليها تيجى"
وبقت تيجى نجوى كل يوم بالليل قبل ما رشاد يروح شغل المصنع وتروح الصبح قبل ما ييجى من شغل الحكومة...وتتغدى فى بيتها وترجع تيجى تانى بالليل وهكذا
وردت ناهد على رشاد وحددوا معاد لفايزة بعد يومين.
على خيره الله
ردحذفمن اولها كده سلق بيض يادينا ههههههههههه
مبروك افتتاح القصه الجديده ياجميل
نوسه القاضى
مبرووووووووووووك على الافتتاح وبدايه لذيذه على فكره
ردحذفبس ايه الجوازه اللى جي في السريع دي
ههههههههههههه
مجنون شريف ده وبعدين مهندس واخته السن عندي احساس انه عايز البنت صغننه عشان يربيها
بكره الناس دي
شطوره انك ما اتأخرتيش في القصه الجديده
جميل يا دودو بداية مبشرة
ردحذفجميله اوى شكلها حتبقى قصه مشوقه
ردحذفبدايه جميله بس حاسه كده ان البدايه دي هاتترتب عليها احداث بعد كده كثييير وبدايه مبشره ومشوقه جدااا
ردحذفانا كل قصه بعيش معاها واتخيل اني معاهم
متابعه معاكي ماتتاخريش علينا
نوسة
ردحذفهههههه ربنا يتمم لها بخير
شذى
ردحذفالله يبارك فيكى
تقريبا كده كلامك مظبوط
وانا بكره الناس دى جدااا
فروتى
ردحذفميرسى يا قمرة
ew3a weshak kol deh sh7'syat w kol deh a7das fy awel 7ala2a la2 bgd 7elwa elbdaya ya dina
ردحذفحمدى
ردحذفيارب تبقى حلوة وتعجبكم
غير معرف"الاولانى"
ردحذفميرسى كتير وحلو اوى اننا كلنا نحس بالشخصيات
حتى انا عن نفسى بلتمس العذر للشخصيات لانى بحبهم
وتنورينى بمتابعتك وان شاءالله هنمشى كل يوم حلقة
غير معرف"التانى"
ردحذفيارب تبقى كلها حلوة زى البداية
هههههههههههههههههه ...مشاء الفل يا قمر عليكى وعلى احلى قراء لاحلى قصص....حلو السسبينس من اولها كده ....بس انا اتلخبطت من كتر الاسماء على فكرة ...وبعدين انا ملاحظة احلى حاجة فى كل قصصك ...انك بتلغى اى فروق اجتماعية ...مهندس ودبلوم ....شيرين كانت تعليمها اعلى من ياسر الله يمسيهم بالخير بقى ....و هكذا ...ياريت الدنيا كانت بييييييييس كده زى قصصك يا دينا
ردحذفبس فعلا بداية سريعة لذيذة ...مع انى مش متفائلة من اسم القصة بس هصبر واعديها هههههههههه
انا مش فاهمة حاااااااااااااااااااااااااااااااااااااااااااااااااااااااااااااااااااااااااااااااااااااجة اي دة كلو ؟ بالراحة علينا شوية و يا رب تكون حلوووووووووووة
ردحذفانا مع اني كنت عاوزه فتره نقاهه وراحه من وجع قلب القصص دي .. بس ماعرفش لقيت روحي فاتحه وبقرا القصه الجديده ههههههههههههههههههههه
ردحذفشدتني من اول حلقه على عكس آخر مسلسلين.. ان شاء الله بدايه حلوه وتخلص قبل رمضان .. لاننا مش هنفضى وقتها للقرايه
هنودة
ردحذفمساء العسل عليكى يا قمر
هههههه موضوع الفروق دى صدفة فى القصتين
بس طبعا لضرورة درامية
ويارب القصة تفضل عجباكم للنهاية
نورتيييييييييينى يا دكترة
اسراء
ردحذفاللخبطة فى الاول بس
بعد كده هتتعودوا على الاسماء والشخصيات
زى القصة اللى فاتت..اول الحلقات كان الكل بيتلخبط بين سارة وغادة
توتا
ردحذفهههههههههه قريتها غصب عنك ومقدرتيش تقاومى
اشطة مصلحة دى ههههه
معتقدش خااااااااااالص انها هتخلص قبل رمضان
وعموما لو كنتى مش هتدخلى فى رمضان الحلقات هتستناكى
جميلة يا دينا
ردحذفانا عايزه صفحتك الشخصيه ع الفيس
ردحذفبدايه لذيذه يادينا
ردحذفنايس ♥♥
ردحذفانا تايهة في الاسماء
ردحذفمبدعة
ردحذفرائعة
ردحذف