الأربعاء، 20 يوليو، 2011

فوق احتمالى...الحلقة 3

الحلقة 3
حست هديل باحراج لما سألها شريف كل الاسئلة دى وخصوصا ان كان واضح مستواهم العالى فكانت مش عايزة تحرج نفسها اكتر من كده وكملت بسرعة
"انا هقوم...فرصة سعيدة "
وهمت انها تقوم
"استنى هنا...مش عيب تقومى كده وانا بكلمك"
"ا..ا.. انا اسفة..بس متهيألى الكلام خلص"
"لا انا مخلصتش كلامى"
"افتكرتك خلصت"
"لا...كملى انتى ايه رأيك فيا"
"من ناحية ايه..انا لسه معرفكش"
"انا اقصد من ناحية الخطوبة ..موافقة عليا يعنى من الاخر"
ايه ده..هو جرئ ولا ده طبيعى انه يسألها كده...هتقول ايه؟؟
"ايه سكتى ليه"
"مش عارفة"
"ايه رأيك فيا...موافقة ولا لأ"
"ممكن اسألك سؤال...لما عرفت ان بابا كهربائى ومستوانا بسيط لسه عايز تتقدملى"
"بصى انا اتفاجئت فعلا بس هيفرق معايا فى ايه... انا هاخدك انتى ...وانتى اللى هتبقى مراتى وهتعيشى حسب مستوايا انا ...وانا هقدر اخليكى تتعايشى معانا ...انا فيه حاجات تانية اهم عندى من مستواكوا الاجتماعى ودى هنعرفها لما نقرب من بعض... ولا عندك اعتراض"
معنى كلامه انه عايزها فعلا...فرحت فعلا عريس جاهز ومستواه الاجتماعى والتعليمى عالى....يعنى كل المواصفات اللى تتمناها بنات كتير احسن منها
"خلاص انا مش هحرجك اكتر من كده...لو عندك رأى تانى ربنا يوفقك مع اللى بتحبيه"
"انت ليه مش مصدقنى انا مش بحب حد... وبعدين انا بس مش عارفة ارد اقولك ايه ؟ انت عايز منى اقول موافقة ومفيش بنت بتقدر تقول كده من اول مرة"
"خلاص انتى قلتيها...بصى هاتى رقم البيت طيب علشان ابقى اكلمك"
ابتسمت هديل بخجل وفرحة واديته رقم البيت
"اندهيلى سالى يا هديل "
وندهت هديل لسالى وقامت هديل من ع الكمبيوتر
"هااااا ايه رأيك يا شريف"
"انتى شايفة ايه"
"ههههههه شايفة ان انتوا بقالكوا ساعة ونص بتتكلموا وشايفة ابتسامات هنا وهناك وشايفة الاوضة بقى لونها بمبى"
"لا يا بت طلعتى بتفهمى... قولى لماما هكلمها بكرة علشان هقوم انام دلوقتى "
"ايه يابنى انت بقيت زى الفراخ"
"لا ياحلوة انا بصحى الساعة 5 الصبح مش زيك"
"طيب يالا تصبح على خير"
وقفلت سالى الكمبيوتر وكانت هديل مستنياها
"ايه ياهديل...قوليلى رايك بصراحة قبل مانطلع"
"رايى ازاى يعنى"
"يعنى شريف عجبك...متتكسفيش وانسى انى اخته اوعى تكونى مكسوفة منى"
"بصى انا هكلمك بصراحة...انا اول مرة اتحط فى الموقف ده وحاسة انى مش عارفة اتكلم ولا اقول اى حاجة"
"قولى اللى انتى حاساه"
"انتى دخلتى بيتنا وشفتى اننا مختلفين عنكم ده اللى قلقنى شوية"
"من الناحية دى متقلقيش خالص... انا هقولك كلام فى سرك شريف اصلا مش عايز واحدة من مستوى عالى هو اهم حاجة عنده واحدة مؤدبة وبنت ناس طيبين تريحه ومتتعبوش ...المهم عجبك ولا لا"
"هو باين عليه طيب ومحترم"
"يعنى نقول مبروك"
وخرجت سالى وهديل من الاوضة.. وشوية ونزلوا

اول ما روحوا قعدت هديل تحكى لنجوى وناهد الكلام اللى دار بالظبط...وفضلوا يحللوا الكلام وكانت النتيجة ان اكيد شريف عايزها فعلا...كانت المشكلة ان لو عايز يتجوزها بسرعة هيتصرفوا ازاى؟؟؟

بعد مانزلوا حكت سالى لفايزة عن ان رأى هديل
"يعنى عجبوا بعض"
"تقريبا...شريف قال هيكلمك بكرة"
وخبط الباب وقامت سالى تفتح "اكيد حازم جايب العيش"
"خليه ييجى"
وبعد مافتحت "تعالى ياحازم ماما عايزاك"
حازم"ازيك ياطنط...كان عندكوا ضيوف ولا ايه"
فايزة"اه كنت جايبة عروسة لشريف"
حازم"وهى كانت جاية تخطبه"
سالى"لا يافالح كانوا بيشوفوا بعض ع الكام"
حازم"ههههههه ايه ده الجواز اتقدم خالص"
فايزة"انا ما صدقت لقيت واحدة فيها المواصفات اللى شريف عايزها"
حازم"والله شريف ده دماغه بقت غريبة...من بعض موضوع رحاب وتفكيره اتغير"
فايزة"ماهو انا علشان كده اتمسكت بالبنت والله ياحازم عاملة زى القطة المغمضة وشكلها كانت من البيت للمدرسة والمدرسة للبيت"
حازم"هى مدرسة"
سالى"لا لسه طالبة"
حازم"مدرسة ازاى يعنى...لسه فى ثانوى"
فايزة"خلصت دبلوم تجارة"
حازم"يعنى بعد رحاب المهندسة ياخد واحدة دبلوم تجارة"
فايزة"ماهو من يوم فشل موضوع رحاب وهو كان بيقول مش عايز واحدة تعمل راسها براسى... وتناطحنى فى كل حاجة"
حازم"علشان كده عايز الصغيرة"
فايزة"احسن اهى تتطبع بطبعه وتعيش وخلاص"
حازم"هو حدد اليوم اللى جاى فيه علشان اعمل حسابى"
سالى"ليه انتوا مش بتتكلموا"
حازم"مواعيدنا مش متظبطة مع بعض... المهم انتى بكرة وراكى حاجة"
سالى"لا قاعدة زى كل يوم"
حازم"طيب انا عندى شغل كتير فى البنك وماما عندها معاد مع الدكتور الساعة 2 هتروحى معاها"
فايزة"طبعا هتروح ودى عايزة كلام...هو حد بيراعينا غيرك وشريف مسافر...فعلا ونعم الصحاب والله"
حازم"صحاب ايه ياطنط...انا وعيت ع الدنيا لقيت شريف صاحبى من حضانة للثانوى...يعنى خلاص بقى اخويا رسمى بحكم الزمن"
سالى"وانت تطول اصلا انه يبقى اخوك"
حازم"اسكتى انتى احنا نعرف بعض من قبل ماتتولدى...يالا اقوم انا"
وراح على الباب وراحت وراه سالى وبعد ما فتح الباب كلمته بشويش
"عملت ايه فى الموضوع اللى كلمتك فيه"
"تمام التمام...بس اصبرى"
"اصبر ايه...انت مش هتكلم شريف لما ييجى"
"لا مش مقتنع انى اكلمه دلوقتى"
"امشى ياحازم ومتكلمنيش تانى"
"مش هتروحى مع ماما للدكتور"
"هروح معاها بس برضه مش عايزة اكلمك...امشى يالا "
وزقته ع السلم اتكعبل سلمتين وقفلت بسرعة قبل ماتيجى ف وشها علبة السجاير اللى كانت فى ايده وحدفها بيها.

هناك 11 تعليقًا:

  1. حلوة يا دينا عاجبني فيها ان احداثها كتير و كل يوم في حاجات جديدة
    نونا

    ردحذف
  2. نونا
    ميرسى يا حبيبتى
    اهو لسه بنسخن هههههههه

    ردحذف
  3. هههههههههههههههههههههههههههههههه لا حلوه بس مش عاوزه اتفائل اوي بعدين اتكعبل سلالم انا الاخره خخ

    ردحذف
  4. توتا
    هههههههههههههه
    اتفائلى اتفائلى
    واوعى تقعى

    ردحذف
  5. هههههههههههه
    جدعه انها قفلت قبل ما علبه السجاير تيجي فيها
    بس مش قولتلك هو عايز واحده بس يربيها وتبقي على مزاجه
    رووووووووووووووعه

    ردحذف
  6. جامدااااااااااا يا دينا بجد تسلم ايدك وفى انتظار الباقى واحلى حاجه علبه السجاير هههههههه
    salma

    ردحذف
  7. شذى
    لحقت نفسها البنت هههههه
    يابنتى انتى ماشاءالله عليكى بتلقطى بين السطور وانا بلمح بيه قبل التصريح

    ردحذف
  8. سلمى
    تسلمي يا قمر
    هههههههه كويس ان قفلت قبل ماتيجى فى وشها
    نورتيييييييييييييييينى

    ردحذف
  9. امممممممممممممممم ....طب كنتى اشرتى هو انهى خطوبته بريرى امتى؟؟؟عشان نعرف تخلص من حبها ولا لا
    انتى عرفانى بهتم بالتفاصيل هههههههههههههه

    البداية قوية جدااااااااا على فكرة

    ردحذف
  10. هنودة
    ههههههههههه
    متقلقيش كل فى حينه
    والتفاصيل هتبان فى وقتها
    ميييييييييييييرسى

    ردحذف

قول رأيك بلاش تقرا وتقفل من سكات...ارائكم تهمنى